Lub chaw nthuav xov xwm tshooj 9 yog tus tswv cuab tswj cov kev sib teev theev zum peb ntawm ob tug coj ntawm ob pab nom tseem ceeb li the Australian Labor Party (ALP) thiab pab nom koom tswj (Coalition) uas yog ob pab nom Liberals thiab Nationals sib koom ua lwm pab nom teb chaws (Federal Opposition) rau lub caij Mr Albanese tseem ua nom. Thiab cov kev sib teev theev zaum no ces yuav tham txog ib yam dab tsi ntawm ib tug nom twg tias seb lawv tau hais dab tsi tsis muaj tseeb txog lwm pab nom li cas.
Dutton tau hais tias ''3 xyoos dhau los ces ua rau Australia tsis muaj peev xwm ua tau lub neej zoo piv rau lwm cov teb chaws hauv ntiaj teb, yog li peb thiaj yuav tau xyuas kom Australia rov qab ua tau lub neej li qub.''
Tab sis thawj pwm tsav hais tias nws tsuas tham txog yav pem suab xwb uas yog pab nom Labor ''yuav yog pab txhim kho teb chaws Australia, thiab Australia tej cuab yig lub neej pem suab, uas pab them tej nuj nqes siv ua lub neej thiab nqes peev rau yav pem suab.''
Raws li Roy Morgan cov kev ntsuam zej tsoom cov kev tawm tswv yim ces yog xaiv tsa kiag tam sim no ces Labor yog pab yuav rov qab yeej los ua tsoom fwv dua tiam 2 ntxiv, vim muaj tej neeg nyiam nws tshaj 55 feem pua piv rau tsuas muaj neeg nyiam pab nom koom tswj tshaj 44 feem pua xwb.
Dutton tau liam Labor tias ''tau siv $20 billion los tsim cov kev haub tau yaum tsis zoo ces thiaj tsis muaj neeg nyiam nws pab nom tab sis ntau hnub ntxiv no tej neeg xaiv nom mam txiav txim siab seb yuav xaiv pab twg.''
Thiab yog tham txog tias ib tog twg ho muaj cov kev dag loj tshaj plaws, ces Peter Dutton hais tias ''Labor yeej dag tias pab nom Coalition yuav siv nyiaj txog $600 billion los tsim 7 lub nuclear power plants tsim hluav taws xob siv, tab sis raws li CSIRO kwv yees ces tsis yog.'' Ua Labor yuav siv nyiaj tshaj li $400 tawm billion los siv nws cov renewable energy tsim hluav taws xob siv.
Dutton kuj hais ntxiv tias ''Albanese dag rau tej neeg tias kom txhawj txog cov Medicare rau cov kev xaiv tsa zaum no xwb tab sis qhov tseeb tiag yeej muaj tej bulk billing siv tsawg rau lub caij thawj pwm tsav Albanese tseem ua nom thiab yuav tau rho nyiaj ntiag tug them nqe kho mob thaum mus ntsib kws kho mob.''
Tab sis Mr Albanese hais tias ''Mr Dutton tsuas siv tej xov xwm teev txog cov kev siv bulk billing thaum tseem muaj kab mob COVID xwb, thiab nws yog tus txiav nyiaj $50 billion tsis pab rau tej tsev kho mob thaum nws tseem ua tus nom tswj dej num kho mob. Nws xav siv cov GP tax thiab tsis xav siv cov bulk billing ntxiv tab sis tsis muaj peev xwm ua tau, txawm li cas los nws tseem tau freeze tej Medicare rebate ces thiaj ua rau tau siv tej bulk billing tsawg lawm.''
Mr Albanese tseem hais rau Peter Dutton tias ''Ua ntej koj yuav ua nom ces kom tseem txiav nyiaj pab rau ob co hauj lwm no txog li $80 billion thiab, ces thiaj ua rau Dutton chim thiab hais tias ua cas yuav dag ua luaj li, tab sis Albanese hais tias kom sawv daws mus saib tau ntawm cov nyiaj puag xyoo 2014 hauv online.''
Yog tham txog tej hauj lwm vaj tse ces Coalition hais tias tsis hloov tej negative gearing los yog capital gain tax dab tsi. ''Thiab yuav tsim ib co se los txhawb nqa kom nqes peev tsim vaj tsev kom tej hluas Australia thiaj tau tsev nyob los yog yuav tau tsev nyob, yog tsis muaj tej neeg nqes peev tsim tsev ces haj yam ua rau tsis muaj tsev txaus ntaiv nyob.''
Tab sis Albanese hais tias nws tus tsoom fwv xyuas kom tsim tau tsev ntau ntxiv. ''Peb yuav tsis hloov dab tsi vim txhawj tsam tej nqe ntiav tsev kim tuaj ntxiv. Tab sis sawv daws yeej paub zoo tias vim li cas thiaj muaj tej teeb meem vaj tse tau tshwm sim 2 xyoos dhau los, vim tus tsoom fwv dhau los twg tsis muaj tus nom tswj hauj lwm vaj tse li.''
Hais txog tej nuj nqes siv ua lub neej ces Albanese hais tias Labor yeej paub tias tej neeg txom nyem, ''Yog li ntawd peb thiaj pab them qee yam nqe tab sis peb yeej tswj kom kab theem nyiaj poob nqe nqes los ua 2.4 feem pua thiab tsim tau 1 million txoj hauj lwm rau tej neeg ua.''
Peter Dutton hais tias nws pab nom ''yuav txo se roj 20 cents pheej yig dua, hos lub caij tsoom fwv Albanese tseem ua nom ces tej nqe gas kim txog 34% thiab nqe hluav taws xob kim txog 32%.''
Albanese hais tias ''cov kev plhom moj thiab tej xwm txheej ntiaj teb tsis paub tias yuav zoo li cas yog ib co kev phom sij loj tshaj plaws rau Australia. Thiab tsis tsim nyog Dutton yuav tso luag rau tej hauj lwm huab cua pauv hloov rau tej teb chaws pov txwv Pacific.''
Tej neeg nthuav xov xwm tshooj 9 thiaj txiav txim tias Dutton yeej cov kev sib teev theev zum 3 no rau lub caij twg tau muaj neeg Australia txog li ntawm 1 million tus mus xaiv nom thaum ntxov lawm. Ua tau kwv yees tias ntshe yuav muaj neeg Australia txog ib nrab yuav xub mus xaiv nom thaum ntxov ua ntej hnub xaiv tsa tim 3 lub 5 hlis ntuj xyoo 2025 no.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm , , , los yog . Download thiab mloog , caum Pod follw los yog lwm cov podcasts platforms (, ).
