Ntsiab lus tseem ceeb:
- Post natal depression ces yog cov kev nyuaj siab ntxhvo plawv tom qab yug me nyuam tag uas muaj tej yam ntxwv nyuaj siab ntxhov palwv ntev tshaj cov xwm txheej Baby blues, thiab muaj tej yam ntxwv hnyav dua.
- Yeej muaj tej leej niam txog li 1 tug ntawm 5 tug twg thiab muaj tej leej txi 1 tug ntawm 10 tus twg yeej ntsib teeb meem nyuaj siab ntxhov plawv tom qab yug tau me nyuam tshiab.
- Thiaj yeej muaj tej xub ke kho li sab laj daws kev nyuaj siab ntxhov plawv los nyog noj tshuaj pab thiab nrog xyuas kom tej niam txiv tshiab tau txais kev pab cuam kom lawv rov qab zoo.
Yeej tau kwv yees tias muaj 4 tug ntawm 5 tug leej niam tshiab yeej ntsib cov xwm txheej 'baby blues' rau thawj ntau hnub tom qab uas yug tau me nyuam tshiab lawm.
Tos ho muaj tej xwm txheej uas ua rau tej neeg nyuaj siab no los twb vim yog muaj cov kev hloov tej hormones ces thiaj ua rau muaj cov kev txhawj, ua rau pheej xav quaj, pw tsis tsaug zog, tab sis tej xwm txheej no kuj tau dua mus yam sai sai yam tsis tas yuav noj tshuaj dab tsi pab li thiab.
Tab sis yog thaum uas pheej muaj tej yam ntxwv no tshwm sim tas mus li thiab cuam tshuam rau ib tug niam txwv twg cov kev tsis muaj peev xwm ua tau lub neej li qub los yog muaj teeb meem rau lawv tej me nyuam yug tau tshiab, ces tej zaum yog lawv ntsib cov kev nyuaj siab ntxhov plawv tom qab yug tau me nyuam lawm.
“Muaj peev xwm ntsib kev nyuaj siab thaum tseem xeeb me nyuam uas yog ua ntej yuav yug me nyuam los sis yog tom qab yug tau me nyuam lawm,'' raws li Julie Borninkhof uas yog ib tug clinical psychologist uas yog tus coj ntawm lub koom haum hais.
Thiab tej zaum kuj muaj tej yam ntxwv li pheej ua rau tswj tsis tau yus txoj kev xav zuj zus ntxiv, tsis muaj peev xwm yuav teev tau tej xov xwm, thiab cais yus tus kheej tsis xav koom lwm tus.
Tsis tas li ntawd los yeej pom tias pheej ua rau tsis tau dab ntub li thiab raws li Ms Borninkhof hais.
“Tej zaum kuj yuav pw ntev tshaj qhov tsim nyog los sis yog tsis tau pw txaus, tsis muaj peev xwm yuav noj yuav haus li ib txwm ua tau, thiab pheej ua rau yus nyuaj siab rau ib lub caij twg ntawm yus lub neej.''
Raws li Ms Borninkhof tshab txhais ces tej neeg uas muaj kev nyuaj siab ua ntej dhau los ces yeej yuav yog cov uas ntsib kev nyuaj siab tom qab yug me nyuam. Uas yeej ib txwm pom muaj tej yam ntxwv nyuaj siab thiab ntxhov plawv tas mus li. Credit: SDI Productions/Getty Images
“Peb yeej paub tias tej neeg uas muaj keeb kwm nyuaj siab yog cov yuav ntsib kev nyuaj siab ntxhov plawv. Thiab tej neeg uas tau ntsib ib co xwm txheej tau ua rau lawv ntshai ib zaug ntawm lawv lub neej los yog cov uas tej zaum yuav ntsib kev nyuaj siab ntxhov plawv rau lub caij ntawd thiab.''
Txawm li cas los txhua cov kev xeeb me nyuam nyias yeej sib txawv nyias thiab, yeej ntsib cov kev nyuaj siab ntxhov plawv sib txawv thiab.
Yog tham txog Sarah Bari uas yog tus leej niam uas muaj tus me nyuam hu ua Azai uas muaj hnoob nyoog 3 xyoos ntawd, ces nws cov kev xeeb me nyuam yeej yog ib co uas nws zoo siab heev thiab yeej mloog tias yeej npaj txhij tos nws tus me nyuam lawm.
Nws yeej tseem nco tau tias ''Nws tau quaj txog li 60-70 feem pua ntawm ib ntug twg yam tsis paub tias yog tim dab tsi li'' thiab pheej muaj cov kev ntshai nrog rau lwm cov yam ntxwv uas muaj ntev txog ntau limtiam, uas muaj ntev tshaj tej xwm txheej baby blues.
“Pheej ua rau kuv txhawj tas mus li txog tej yam yooj yooj yim txog kuv tus tub, kuv pheej txhawj txog cov kev pub mis rau nws noj, yuav tau nrog nws nyob, nrog nws ua si....thiab pheej ua rau kuv ntshai txhua sij hawm. Thiab kuv yeej totaub tias tej no yeej txawv tej xwm txheej uas ib txwm muaj vim rau qhov pheej ua li no los ntev lawm.''
Sarah ces tau yug ntawm teb chaws Bangladesh thiab tau tuaj nyob teb chaws Australia tau 20 xyoo lawm. Nws qhia txog cov kev tau txais kev pab cuam daws kev nyuaj siab ntxhov plawv tias.
“Yeej tsis muaj neeg ntawm teb chaws Bangladesh hais tias 'koj muaj kev nyuaj siab lawm, thiab yuav tau nrhiav kev pab cuam'. Vim tej xwm txheej tau tshwm sim rau kuv yeej txawv, kuv niam kuv txiv los yeej muaj txoj kev xav nthuav dav, thiab kuv txiv los yeej yog tus tau qhia rau kuv tias 'kom kuv nrhiav kev pab cuam los ntawm tej neeg paub daws kev nyuaj siab ntxhov plawv'.”
Regardless of ethnicity or culture, reaching out for help during perinatal depression can be hard for some people. Credit: FatCamera/Getty Images
“Tseem yog tej yam uas tej neeg tsis tshua tham txog ... thiab tej neeg tsis paub tias xyov yuav ua li cas.''
“Kuv yeej tau nrog tej neeg Australia uas nyob ntawm lub teb chaws no tham thiab yeej tau nrog kuv tej neeg ua hauj lwm ua ke tham txog tej no. Ces yeej muaj 1 tug ntawm 4 tug twg qhia tias lawv tsis paub tias xyov yuav ua li cas. Ces thiaj tseem pom tias yeej tseem muaj neeg ntaus nqe tsis zoo rau tej xwm txheej no, uas yeej nthuav dav tshaj cov kev cuam tshuam txog tej kab lis kev cai lawm thiab, raws li kuv xav.''
Jakqui Barnfield hais tias ib cov kev ntaus nqe yuam kev tsis zoo ntawm ntau cov uas tsis muaj tseeb txog cov kev nyuaj siab ntxhov plawv tom qab yug tau me nyuam tshiab ntawd ces pheej tseem xav tias tsuas muaj tej teeb meem no rau tej poj niam nkaus xwb.
Nws yog tus Executive Director of Service Delivery ntawm lub koom haum , uas tsim cov kev pab cuam los pab rau tej neeg ntsib xwm txheej ti tes ti taw thiab kuj muaj cov kev sab laj tawm tswv yim coj los pab tej txiv neej raws cov kev pab cuam .
“Piv txwv li ntawm kuv kiag, uas kuv tus txiv yeej ntsib teeb meem nyuaj siab ntxhov plawv tom qab kuv yug me nyuam tag lawm. Thiab vim kuv yog ib tug nurse uas paub txog cov hauj lwm pab tej neeg nyuaj siab ntxhov plawv, ces kuv yeej paub tias nws tab tom ntsib teeb meem yuaj siab ntxhov plawv uas ntej nws yuav paub tias nws ntsib tej teeb meem no.''
“Tej xwm txheej no yeej sib txawv rau ib tug twg. Tsis hais rau tus leej niam los yog tus txiv li yeej muaj peev xwm ntsib tej kev nyuaj siab ntxhov plawv no,'' raws li Dr Barnfield hais. Source: Moment RF / Vera Vita/Getty Images
Dr Barnfielf tshab txhais tias yeej muaj ntau yam sib xws uas ua rau ib tug twg ntsib tej kev nyuaj siab no.
“Yog cov kev hloov uas ua rau rau tej xwm txheej no. Thiab feem ntau mas yog cuam tshuam txog ntiag tug cov kev vam kev cia siab ntau yam, thiab lwm tus cov kev cia siab, los yog ntau yam uas coj mus tso ntawm tej social media.
“Yog tias yus pheej muab yus piv rau lub tswv yim tias ib yim neeg zoo tsim nyog zoo li cas, los sis ib tug leej txi zoo tsim nyog zoo li cas, ces haj yam yuav ua rau yus raug tsub nias ntau tuaj ntxiv kom ua li ntawd.''
Dr Barnfield hais tias kom txheeb yus tus txiv yus tus poj niam tias seb nws ho zoo li cas lawm kom thiaj yooj yim zog rau yus qhia rau nws tias yus xav li cas rau cov kev ua niam txiv tshiab.
“Thiab yog tias yus tsis paub tias yuav ua dab tsi, ces kom qhia rau nws (yus tus poj niam) paub tias yus los yeej yoob kawg nkaus tsis pom qab ua li cas los sis yus yeej ntshai tias tsam ho ua ib yam dab tsi yuam kev, thiab xav kom ob leeg sib pab koom tswv yim los daws tej xwm txheej no ua ke. Ua qhov ntawd yog ib qho tseem ceeb heev.''
“Txiv neej yeej ib txwm raug cob qhia tias kom xyaum ua taus txiv neej yawg thiab tsis txhob qhia txog nws tej kev xav rau lwm tus paub thiab yeej yog tus muaj peev xwm yuav ua tau ntau yam.''
“Yog tham txog cov kev nyuaj siab ntxhov plawv tom qab yug me nyuam tag, ces tej zaum tej txiv neej los kuj mloog tau tias ntsib tag nrho tej li hais no thiab. Tej zaum lawv kuj mloog tau tias lawv raug cais, nyob tib leej twm zeej kho siab khuav, tab sis lawv yeej tsis tshua tham txog li.''
Txawm li cas los yeej muaj peev xwm kho tau tej yam ntxwv no. Yus tus kws kho mob yeej yuav txheeb seb yus xav tau kev pab dab tsi thiab yuav qhia kom yus nrhiav cov kev kho raws li qhov tsim nyog los pab rau yus.
Yog tham txog tej xwm txheej uas Sarah tau pom ntawm nws ntiag tug lawm ces, nws hais tias yog tej yam tseem ceeb uas tej niam tshiab paub tias yeej muaj qhov zoo los ntawm cov kev yug tau me nyuam tshiab thiab.
Ib daim duab pom muaj ntsis plooj uas ib nkawm niam txiv neeg Asian tab tom sib cav tsis sib haum xeeb ze ntawm ib co qhov rais ntawm tsev thaum tus poj niam ntawd tseem puag ib tug mos liab. Credit: PonyWang/Getty Images
“Zoo tib yam li tau taws ib lub teeb rau yus pom kev lawm ntag, vim rau qhov muaj ib hnub thaum kuv tau sawv los ces txawm ua rau kuv mloog tau tias kuv xav ua noj ua haus, kuv xav ua ub ua no pab rau kuv tus me nyuam. Ces kuv thiaj xav tias, vuag, zoo li kuv zoo zog lawm tiag. Txij hnub ntawd los ces kuv thiaj tau zoo zuj zus tuaj lawm.''
Cov kev txheeb thiab ntsuam txog yus cov kev nyuaj siab ntxhov plawv txhua hnub yog ib co kev taw qhia tseem ceeb uas Sarah xav qhia rau tej niam txiv tshiab.
Ms Borninkhof uas yog tus coj lub koom haum PANDA los kuj pom zoo nrog nws thiab.
Nws thiaj xav kom yuav tsum tau npaj kom txhij tias tej zaum tsam yus ho ntsib tej teeb meem nyuaj siab ntxhov plawv no tom qab yug me nyuam tag lawm tam li yog tej yam tseem ceeb uas yuav tau nrhiav kev pab cuam rau yus thiab yog tias yus ho ntsib tej xwm txheej no tiag.
“Yuav tsum tau npaj ib cov tswv yim los pab daws cov kev nyuaj siab thaum uas yus tseem tab tom yuav mus yug me nyuam tib yam li tej tswv yim uas yus npaj tib yam li thaum yus yuav mus yug me nyuam thiab. Tsis hais yus yuav yog tej niam txiv tshiab los yog tej niam txiv uas twg tau yug me nyuam dhau los lawm, vim yeej raug tej xwm txheej no sib txawv rau txhua tus me nyuam mos liab.''
Rhiav kev pab cuam thaum xav tau kev pab:
- Yog xav tau kev pab daws kev nyuaj siab ntxhov plawv tom qab yug me nyuam tag, ces hu rau lub koom haum PANDA (Perinatal Anxiety & Depression Australia) tus xov tooj1300 726 306 los yog txheeb tau ntawm uas yeej muaj tej xov xwm ntau yam raug txhais ua 40 hom lus.
- Yog xav t au tej xov xwm thiab cov kev sab laj daws kev nyuaj siab uas siv dawb xwb (tau siv txog li 10 zaug) rau tej niam txiv tshiab los yog tej niam txiv uas yuav tau me ab tshiab, ces yeej muaj peev xwm siv tau cov kev pab cuam tim ntej tim muag ntawm ntau cov chaw sib txawv ntawm tej xeev NSW, QLD thiab VIC, los yog siv cov telehealth sessions, txheeb tau ntxiv ntawm lub koom haum .
- Yog xav tau kev pab cuam rau tej neeg LGBTIQ+ daws kev nyuaj siab ces hu rau lub koom haum QLife tus xov tooj1800 184 527 los yog txheeb tau ntxiv ntawm .
- Thiab yog poob rau tej xwm txheej phom sij cuam tshuam txog tej xwm txheej ti tes ti taw tsis tau txais kev nyab xeeb rau koj los yog ib tug twg txoj sia ces yeej muaj cov kev pab cuam 24 teev 7 hnub pab ntawm lub koom haum tus xov tooj 13 11 14.
- Thiab yeej muaj peev xwm hu xov tooj los yog siv cov kev pab cuam sab laj daws kev nyuaj siab pab rau tej txiv neej ntawm cov kev pab cuam Mensline tus xov tooj 1300 78 99 78 los sis yog txheeb tau ntxiv ntawm
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
