Nod yog xov xwm luv tshaj tawm hnub zwj Feej (Wednesday news 22.11.2023):
Russia tus coj Vladimir Putin thiab Suav tus coj Xi Jinping koj tau nrog UN tus coj Antonio Guteress tham txog tsov rog Israel-Hamas, thiab zoo li Russia kuj xyuam xim thiab xav los ua tus neeg muaj fwj chim los nrog tswj tej xwm txheej no.
John Kirby uas yog tus kis sawv cev rau Meskas lub tuam chav tswj kev ruaj ntseg haiv hais tias ze rau qhov yuav tso tej neeg uas raug Hamas txhom lawm tab sis yuav tsum yog Israel thiab Hamas pom zoo. Thiaj tau muaj tej xwm txheej no tom qab uas Meskas, Israel thiab Qatar tau sib khom nrog Hamas kom tau 4 limtiam kom tso tej neeg Hamas muab txhom rov qab kom thiaj xaus tau tsov rog ib ntus thiab thiaj pab tau tej neeg xav tau txais kev pab cuam ntawm Gaza.
Tub ceev xwm New South Wales hais tias tau muaj tej neeg coob tshaj 20 leej raug txhom rau lub caij muaj neeg mus rwg npoj tawm tsam txhawb nqa neeg Palestinian vim muaj Israel ib lub nkoj tau mus nres ntawm Port Botany. Ces tub ceev xwm yeej paub txog cov kev rwg npoj hmo zwj Quag (Tuesday tim 21.11.2023) thiab nrog xyuas kom tej neeg tawg thiab khiav mus tsev.
Thawj pwm tsav Albanese hais tias tsoom fwv yeej muaj peev xwm ua tau tej hauj lwm uas pab kom tej neeg khwv tau nyiaj ntau ntxiv rau lub caij nws ua nom txog nrab. Thiab Mr Albanese hais tias nws yuav xub kub siab nrog daws tej teeb meem nuj nqe siv ua lub neej kim tuaj ntxiv no ua ntej tshaj plaws. Thiab lub koom haum HR Institute kuj tau qhia tias txawm tias muaj tej neeg raug rho tawm hauj lwm ntau tuaj ntxiv los kuj muaj neeg nrhiav hauj lwm ua ntau tuaj ntxiv lawm thiab.
Penny Wong uas yog Australia tus nom txawv teb chaws tau rov qab qhia ntxiv tias Suav tuam tshoj lub nkoj tub rog coj tej cwj pwm tsis tau txais kev nyab xeeb thiab tsis tsim nyog vim txawm muaj Australia lub nkoj H.M.A.S Towoomba tau ceeb toom kom tsis txhob mus rau ntawm Japan ib thaj ntug hiav txwv uas muaj Austraia lub nkoj no daig vim raug moo khuam thiab tseem muaj tej neeg ploj qab thu dej mus daws lub moo no. Tab sis Suav lub nkoj tub rog tseem mus thiab tso cov sona pulse ua rau muaj Australia ib tug navy diver raug mob me ntsis.
Tsoom fwv tseem xav thov kho tej online safety laws kom tej tuam txhab internet platforms yuav tau nrog xyuas kom tau txais kev nyab xeeb thiab kom tshem tej content uas AI tsim tsis raug cai tawm, thiab npaj tej txheej txheem tiv thaiv kom tsis txhob cia tej neeg hais lus ntxub ntxaug lwm tus kom tej me nyuam yaus tau txais txiaj ntsim zoo tshaj plaws.
Japan tau tsis pom zoo nrog North Korea cov kev xav tsim rov qab xa lub hnub qub cuav mus soj xwm tub rog nruab ntug ua zaum peb. South Korea tej tub rog hais tias cov kev rov qab xa lub hnub qub cuav no qhia tias North Korea yeej kub siab tsim kom tau nws ib cov system soj xwm qab rooj nruab ntug rau lub caij uas tsis muaj kev sib raug zoo nrog Meskas. Fumio Kishida uas yog Japan tus thawj pwm tsav thiaj hais tias cov kev xa lub hnub qub cuav no yog ib cov kev yuam UN cai.
Kuj tau muaj ob tug tub kawm uas raug lwm tus thab zes thiab hais lus saib tsis taus vim yog neeg Jews ntawm Victoria ib lub teej kawm tau tsis lees paub lub tuam chav tswj kev kawm cov lus thov txim hnub tim 21.11.2023, thiab hais tias yog ib co kev ua txhoj thov txim xwb. Tau muaj tsib tug tub kawm ntawm lub teej kawm Brighton Secondary College tau coj tsoom fwv xeev, lub teej kawm no thiab ob tug lees kais nrog rau tus coj lub teej kawm uas yog Richard Minack coj mus hais plaub ntawm lub tsev hais plaub Federal Court tsaib no thiab kuj yeej rooj plaub no thiab tau nyiaj paj tshab tshaj $500,000.
Kuj tau muaj ntau pua tus neeg tshaj xov xwm hauv xov tooj cua, tej neeg nyeem xov xwm thiab tej neeg qhia dab neeg tau sib sau ntawm Ngambri thiab Ngunnawal ntawm Canberra ntawm thawj lub rooj sab laj 2023 First Nations Media Conference tis npe raws sob lus ''Our Media Our Voice''. Ces thiaj muaj Linda Burney uas yog tus nom tswj dej num neeg txum tim nrog rau Stan Grant uas yog ib tug neeg tshaj xov xwm dhau los thiaj yog ob tug neeg tseem ceeb tau mus hais lus.
Paul Brereton uas yog tus coj lub koom haum National Anti-Corruption Commission hais tias ''tej kab lis kev cai uas pheej liam lwm tus'' tau ua rau Kelly Bayer Rosmarin uas yog Optus tus coj tau tawm tsis ua nws txoj hauj lwm lawm. Tab sis nws cov kev tawm no yeej pab tsis tau lub tuam txhab no los yog tej customers dab tsi.
Bangkok Post tau tshaj tawm tias tau muaj tej kws lij choj ze txog 70 tus sawv cev rau tej neeg Thaib ze txog 700 tus coj 2 lub tuam txhab muag paj hluav taws thiab ib lub tuam txhab ua vaj tse mus hais plaub thiab xav tau nyiaj paj tshab 300 million Baht. Vim cov kev tsim vaj tse tau ua rau muaj teeb meem rau tej paj hluav taws kub hnyiab thiab ua rau muaj 11 tug neeg tas sim neej thiab muaj tej neeg tshaj 100 tawm tus raug mob.
The Laotian Times kuj tau tshaj tawm tias tub ceev xwm Thaib tau tshawb thiab txhom tau tej neeg thov khawv hauv tuam ceeb Bangkok ces txhom tau ob tug neeg Nplog nrog lwm cov neeg thov khawv. Kuj muaj ib tug poj niam neeg Suav yog tus nom tswv Thaib kub siab txheeb tias muaj nyiaj siv txog li 2 million Baht siv ib lub hlis twg, tab sis nws tseem thov khawv thiab dag tias tsis muaj chaw nyob ruaj uas cov nyom nrog nws daim npav siv nyiaj teev tseg, thiab nom tswv ntseeg tias tej zaum nws cuam tshuam nrog cov kev nyiag neeg txhaum cai hla teb chaws.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
