Kanokporn Taowatanakul yog ib tug ntxhais Hmoob yob Thaib teb thiab tau ua hauj lwm nrog Australian Embassy ntawm Bangkok. Nws ua hauj lwm pab rau kis tswj qoob loos thiab tej tsiaj txhu.
Kanokporn Taowatanakul hais tias "Qhov ua rau kuv zoo siab tshaj plaws yog tau tuaj pom Hmoob Australia, nrog Hmoob tham ua lus Hmoob, thiab pom tias lub teb chaws Australia yog ib lub teb chaws huv huv heev."
Nws tau tuaj txhais lus sawv cev rau Australian Embassy thiab sawv cev rau tsoom hwv Australia rau nom tswv Thaib cov neeg uas muaj ib cov veterinarians nrog nom tswv Thaib tau tuaj ncig xyuas teb chaws Australia rau 2 lub plua lub 5 hlis ntuj 2018 dhau los uas tsis paub lus Askiv zoo.
Lub hom phiaj tuaj zaum no yog xav coj nom tswv Thaib tuaj ncig xyuas seb Australia tej txheej txheem tus tshiaj thiab yug tej tsiaj li nyuj thiab twm mus txog rau kev tso mis coj los tsim tej khoom ntau yam seb puas huv puas ua tau zoo raws li pej kum haiv cov txheej txheem, los yog nom tswv Thaib puas txaus siab thiab tso siab rau Australia cov lagluam siv tej tsiaj no tej mus coj los tsim ua khoom siv khoom noj ua ntej yuav pom zoo tso cai xa muag tau rau Thaib teb thiab Australia ho yuav lis ntaub ntawv li cas thiaj ua tau tej lagluam no.
Saib daim yeeb yaj duab (video) uas SBS Radio Hmong Program nrog tus ntxhais Hmoob hu ua Kanokporn Taowatanakul tham seb nws qhia dab tsi txog nws txoj hauj lwm, kev kawm, Hmoob tej kab lis kev cai, Hmoob lus thiab Hmoob ntaub ntawv nrog rau Hmoob tej hluas los yog tsev neeg Hmoob tsim nyog ua li cas tau ntawm no:
Tsis tas li no nws tseem xav hais rau Hmoob tias "Yus yog Hmoob ces mus txog qhov twg yuav tsum zoo siab hlo qhia rau mab sua paub tias yus yog Hmoob. Yus yuav tsum hais lus Hmoob thiab paub sau nyeem tau ntawv Hmoob los yog hnav khaub ncaws Hmoob," uas yog ib yam zoo qhia txog Hmoob lub cim thawj (Identity) rau mab sua paub."
Dua ntawm tej hais no lawm, Ms Kanokporn Watanakul kuj qhia tias, kev tuaj ua hauj lwm hauv Australia zaum no kuj ua rau nws khwv kawg li thiab. Vim nws yuav tau tsav tsheb, caij tsheb, caij dav hlau mus rau tej zos yaj sab mus txhais lus thiab coj nom tswv Thaib mus ncig xyuas Australia tej tswv teb uas ua cov lagluam tsim tau los ntawm tej nyuj twm no ntau thaj chaw uas yuav tau mus mus los los. Ntxiv ntawd tseem yuav tau txhais lus thiab hais lus ib hnub ib hnub thiab mus ntxov los txog chaw so lig. Mas kuj ua rau yus sab kawg li thiab.
Tab sis dua ntawm tej hais no lawm, Ms Kanokporn Watanakul kuj qhia tias nws zoo siab uas tau tuaj pom teb chaws Australia yog ib lub teb chaws tej ib puag ncig huv si. Tab sis qhov zoo siab tshaj plaws yog tau tuaj pom Hmoob nyob teb chaws Australia thiab tau tham lus Hmoob.
Ms. Watanakul tau hais tias "Kuv yeej yog ib tug neeg uas yog thaum nrog mab suab tham ces kuv yeej tsis txaj muag thiab yeej zoo siab hlo qhia rau lawv paub tias kuv yog Hmoob, thiab yeej qhia rau lawv tias yog lawv khoom ces kom lawv qhia es kuv yuav coj lawv mus saib kev tsev thiab seb Hmoob tej kab lis kev cai kev coj noj coj ua ho zoo li cas, qhia txog Hmoob tej tsoos ris tsoos tsho rau mab suab paub."
Qhov tseem ceeb tshaj plaws nws hais tias yog thaum luag mab sua paub tias yus muaj peev xwm thiab sawv tib lub sam thiaj li luag lawm ces luag thiaj yuav cam hwm yus thiab tsis ntaus nqe yuam kev rau yus ntxiv.
"Kuv yeej ntseeg tias Hmoob tej hluas los yeej muaj tsab peev xwm tib yam li mab sua thiab tseem muaj cov muaj peev xwm thiab tshaj lij tshaj kuv lawm. Tsuas yog tias peb yuav tau ntseeg peb tus kheej tias peb muaj peev xwm ua tau thiab rau siab ntso ces peb yeej ua tau xwb.#
Mloog tau xov xwm ua lus Hmoob ntxiv tau rau ntawm ob hnub xws li hnub zwj Teeb (Thursday) 6pm AEDT-Australian Eastern Standard Time thiab hnub zwj Hnub (Sunday) 11 am AEDT; download tau SBS Radio App kom koj mloog tau xov tooj cua SBS Radio Hmong Program tau ntawm App Store thiab ntawm Google Play los yog download xov xwm kaw ua suab (Podcasts) ua lus Hmoob thiab lus Askiv tau ntawm los sis tuaj koom ua tub koom siab thiab koom mloog tau tau ntawm #SBSHmong lub Facebook page tau. Ntxiv ntawd koj mloog tau SBS Radio cov xov tooj cua ntawm ntau thaj chaw thoob plaws teb chaws Australia no tau ntawm no
