Xov xwm luv tshaj tawm hnub zwj Quag (Tuesday newsflash 27.02.2024):
Chris Minns uas yog NSW tus hau xeev tau los pov puag nws tus hau tub ceev xwm tom qab tau muaj neeg tib nws tej tswv yim los daws tej xwm txheej tua neeg tsis ntev los no. Karen Webb uas yog tus hau tub ceev xwm NSW thiaj tau piav txog cov kev tib nws tias yog ''ib co neeg ntxub nws'' tom qab tau muaj ib tug nom kis xeev qes ntawm lub xeev no tau hais tias Ms Webb yog ib tug coj ''zoo'' thiab tau liam tias tsis tau txais kev txhawb nqa los ntawm nws tej neeg ua hauj lwm ua ke. Ms Webb kuj ceeb tias tub ceev xwm tsis raug caw mus koom lub koom txoos Mardi Gras hnub zwj Cag (Saturday tim 2 lub 3 hlis ntuj), thiab tseem cuam tshuam txog cov kev sib teev theev txog tub ceev xwm cov kev muaj feem tua ob tug neeg Jesse Baird thiab Luke Davies ntawm Sydney.
Scott Morrison uas yog Australia tus qub thawj pwm tsav dhau los tau los hais lus ua zaum kawg hauv tsev tsoom fwv teb chaws thaum tav su, tom qab nws tau ua nom los tau 16 xyoo.
Lub koom haum Workplace Gender Equality Agency tau coj nws tsab ntawv cej luam txog cov kev khwv tsis tau nyiaj sib npaug ntawm poj niam thiab txiv neej uas yog thawj cov kev cej luam uas tau teeb txheeb txog Australia tej tuam txhab ze txog li 5,000 lub. Ces pom tau tias tej lagluam transport, construction, khawb peev txheej yog cov lagluam tseem muaj kev sib tu ncua loj heev rau poj niam thiab txiv neej cov kev khwv tau nyiaj siab npaug. Hos Australia tej tuam txhab ya dav hlau li Qantas, Jetstar thiab Virgin los kuj tseem yog cov tuam txhab uas tseem muaj cov kev khwv tau nyiaj sib tu ncua theem nrab li 37 feem pua, 43.7 feem pua thiab 41.7 feem pua sib law liag thiab.
Nplog phau ntawv xov xwm The Laotian Times tau tshaj tawm tias nom tswv Nplog tau kho dua cov kev sau nqe rau Nplog cov passport (e-passport/ – passport book) 60 USD thiab 40 USD ntawd yuav tsis sau ua nyiaj txawv teb chaws thiab yuav sau ua nyiaj Kis (Lao Kib/LAK) lawm xwb. Thiab kho cov kev thov visa sai raws li 3 hom xws li tau 1 hnub ces sau nqe 1 million Kis, 3 hnub ces them 500,000 Kis, 5 hnub ces them 300,000 Kis lawm xwb.
Bangkok Post kuj tau tshaj tawm tias Thaib tej neeg ua lagluam ntoj ncig tau nqua hu kom tsoom fwv Thaib nrog xyuas kom pub visa-free rau neeg India mus ncig teb chaws Thaib, vim rau qhov tias tej zaum India yuav ras los ua lub teb chaws laj luam loj tshaj plaws hauv ntiaj teb no lawm.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
