Xov xwm luv tshaj tawm hnub zwj Feej (Wednesday newflash 12.02.2025):
Tau muaj ob tug nurses ntawm ib lub tsev kho mob sab qab teb hnub poob ntawm Sydny raug cheem tsis pub ua hauj lwm thiab tej zaum yuav raug muab rho tawm hauj lwm cuam tshuam nrog nkawv cov lus tawm tsam neeg Jews hauv ib daim video uas ib tug neeg Israeli muaj neeg caum coob tshaj 100,000 tus coj mus tso hauv TikTok, uas tus poj niam thiab tus txiv neej no hais tias kom muab tua tsis txhob kho.
Tony Burke uas yog tus nom tswj cov hauj lwm Arts tau qhia tias yuav siv nyiaj $38 million dollars los pab neeg txum tim cov arts thiab tej koom haum qhia ntawv thoob teb chaws raws li tsoom fwv cov kev pab Indigenous Visual Arts Industry Support program rau 4 xyoos.
Teb chaws Australia tau raug teev zwm nrog thawj 10 lub teb chaws muaj peev xwm los daws tau cov teeb meem lwg noj lwg haus (corruption) vim muaj tej cai zoo los tawm tsam thiab tsis pub xiab nyiaj ntiav lwm tus nrog rau kho lub koom haum Administrative Appeals Tribunal. Thaib ces tau zum 107 thiab Nplog ces tau zum 114 ntawm tag nrho 180 lub teb chaws raws li lub koom haum Transrancy International hais.
Volodymyr Zelenskyy uas yog Ukraine tus coj hais tias nws xav siv Russia tej av uas txeeb tau ntawm cheeb tsam Kursk pauv nws tej av uas Russia txeeb tau, tab sis kuj tsis qhia tias yog cov chaw twg.
Tej kws teeb txheeb hais tias tej zaum tsis yog tej hluas nto nkauj nto nraug cov kev tub nkeeg thiaj ua rau lawv tsis tau pw txaus raws li tej niam txiv yuav laug txog li 1 feem 3 ntseeg, tom qab tau muaj ib co kev teeb txheeb ntawm tsev kho mob Royal Children Hospital ntawm Melbourne txheeb tau tias tim cov kev pauv hloov ntawm tej hluas lub cev.
Trinity Ford uas yog tus coj lub koom haum People with Disability Australia hais tias tseem ncua cov kev pab cuam rau tej neeg puas cev ntau millions tus thiab tseem txwv tsis pub tej neeg siv tau NDIS tsuas pub tej neeg siv tau cov program no siv xwb tom qab tau muaj tej koom haum no tau liam tej nom tswv xeev tias txhob txwm ncua tsis coj cov kev pab cuam National Disabilit Insurance Scheme los siv.
Tau muaj Shohely Akhter uas yog ib tug poj niam neeg Bangladesh uas sib tw cricket kuj raug muab txwv tsis pub sib tw 5 xyoos tom qab lub koom haum International Cricket Council tau txheeb tau tias nws ua txhaum vim nws tau ntiav nyiaj rau ib tug poj niam sib tw kom tsis txhob sib tw thaum sib tw Women's T20 World Cup nrog Australia xyoo 2023.
UN kuj tau nqua hu kom Israel thiab Hamas ua raws li cov kev pom zoo tso tseg tsis sib tua tom qab Hamas liam tias Israel tsis ua raws cov kev pom zoo ces thiaj tsis tso tej neeg nws txhom rov qab rau lub caij Netanyahu hawv tias yog tsis tso ces nws yuav rov qab hais kom tub rog mus rau Gaza.
Thawj pwm tsav Anthony Albanese tseem muaj kev cia siab tias tej zaum Meskas yuav zam tsis tsub cov se 25% rau Australia tej hlau thiab aluminium xav muag rau Meskas, tom qab Donald Trump tau kos xyeem mem tes siv executive order tsub se rau txhua lub teb chaws thiab tsis zam rau ib lub teb chaws twg.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab mloog tau caum los yog lwm cov podcast platforms (, , thiab ).
