Xov xwm luv tshaj tawm hnub zwj Feej (Wednesday newsflash 21.02.2024):
Julian Assange uas yog tus teeb tsa lub koom haum Wikileaks tsis muaj peev xwm mus koom Askiv rooj plaub sib hais thawj hnub seb puas yuav muab nws xa mus rau txim ntawm teb chaws America vim nws mob. Thiaj ua rau Assange tej kws lij choj hais kom tsis txhob muab nws xa mus rau txim ntawm Meskas txawm tias nws tsis mus koom hais plaub, vim yog tias tseem muab nws xa mus ces tej zaum nws yuav raug kaw tsev laj cuj 175 xyoo.
Tau muaj ib tug txiv neej ntawm NSW raug tub ceev xwm muab txhom thiab raug teem 3 lub txim tim qab raug liam tias tau tua nws tus poj niam, nws tus me nyuam thiab nws tus txiv nram ntej ub.
Meskas tau tawm suab tsis pom zoo nrog cov teb chaws Arab uas txhawb nqa UN lub tswv yim los xaus tsov rog Israel-Hamas kom thiaj xa khoom mus pab tau tej neeg txom nyem. Ces thiaj muaj 13 lub suab pom zoo nrog Meskas tsis pom zoo thiab Askiv tsis kam tawm suab.
Brad Bunducci uas yog Woolworths tus coj tam sim no yuav tawm tsis ua hauj lwm lub 9 hlis ntuj tom ntej no thiab yuav muab Amanda Bardwell los ua tus coj tshiab. Ces nws thiaj tau tawm vim raug lub koom haum Australian Comsumer Competition Commission txheeb tias seb puas yog lub supermarket txhob txwm nce nqe khoom kim.
Tub ceev xwm Queensland tau qhia rau tsev kis xeev siab pawg rooj saib xyuas tias nws yuav tau kho nws tej hauj lwm kom thiaj pab tau Australia tej neeg txum tim tej poj niam thiab tej me nyuam uas tau ploj los yog tau tas sim neej kom thiaj pab tau tej neeg txum tim no vim lawv tsis tau txais vaj huam sib luag.
Meskas hais tias nws tab tom npaj yuav muaj ib co kev rau txim tshiab rau Russia cuam tshuam txog Alexei Navalny cov kev nruam sim. John Kirby uas yog Meskas tus kis ntawm lub tuam chav tswj kev ruaj ntseg haiv thiaj hais tias yuav qhia cov kev raug txim rau hnub zwj kuab no.
Dr. Yang Hengjun tsev neeg tau qhia tias lawv yuav tsis mus hais nrog Suav ib lub tsev hais plaub uas tau teem txim kaw tsev laj cuj tag ib sim neej rau nws vim txhawj tsam ua rau nws tsis tau txais kev noj qab nyob zoo.
Nplog phau ntawv xov xwm The Laotian Times tau tshaj tawm tias Nplog lub tuam chav Ministry of Finance tau qhia tias kom tej lagluam e-commerce uas ua lagluam hauv website yuav tsum teev zwm kom raug cai, yuav tsum qhia tias them cov se Value Added Tax (VAT), tsis hais yog tej neeg ntiag tug, neeg haub tau yaum, tej lagluam.
Thaib phau ntawv xov xwm Bangkok Post tau tshaj tawm tias Mr Hun Sen uas yog Cambodia tus qub thawj pwm tsav dhau los yuav mus xyuas Thaib tus qub thawj pwm tsav dhau los uas yog Thaksin Shinawatra ntawm nws lub tsev ntawm Bangkok rau lub caij nws tseem muaj mob no. Ua ke no los Thaib tus thawj pwm tsav Srettha Thavisin kuj tau sau ntawv ntawm nws phau X account (Twitter) tias xav kom thaib lub txhab nyiaj Bank of Thailand pawg rooj saib xyuas tswj tej cai Monetary Policy kub siab los txo cov kab theem paj kom thiaj pab tau tej nuj nqe siv ua lub neej ua kim tuaj ntxiv rau pej xeem Thaib thiab pab tau tej lagluam.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
