Xov xwm tshaj tawm hnub zwj Quag (Tuesday news 28.11.2023):
Tau muaj tej neeg tawm tsam pov puag tej ib puag ncig ntawm Newcaslte ntawm NSw hais tias lawv yeej tsis tu siab rau lawv cov kev rwg npoj txawm tias tau muaj lawv tej neeg tshaj 100 tus raug tub ceev xwm txhom. Tej neeg raug txhom no kuj muaj 5 tug me nyuam yaus thiab ib tug txiv neej hnoob nyoog 97 xyoo. Tus coj NSW mining thiaj hais tias tej neeg tawm tsam no ua dhau zog lawm, txawm muaj teeb meem rau Newcastle lub ncaws nres nkoj los yeej tsis muaj teeb meem dab tsi rau ntiaj teb cov kev xa roj zeb ntsuam. Alan Stewart uas yog tus neeg hnoob nyoog 97 xyoo no thiaj hais tias nws tsis tu siab dab tsi rau tej kev tawm tsam tias 'tsis muaj dab tsi rau kuv thiab sis yuav muaj teeb meem rau tej ib puag ncig thiab muaj rau ntau pheum neeg yav pem suab xwb.'
NSW tau coj nws tsab cai Voluntary Assisted Dying Act 2022 coj los siv txij hnub tim 28.11.2023 no mus lawm, kom thiaj muaj txoj kev xaiv rau tej neeg muaj mob kho tsis zoo lawm muaj cai xaiv. Ms Shayne Higson uas yog tus coj lub koom haum Dying With Dignity NSW hais tias pab kom tej neeg thiab tej cuab yig muaj kev tso siab. Tab sis lub koom haum Christian Voice Australia tsis pom zoo thiab hais tias 'yog ib cov kev tawm tsam leej tib neeg txoj sia.'
Nom tswv India qhia tias txawm muaj huab cua phem los lawv yeej tseem yuav mus pab cawm tej neeg ua hauj lwm 41 tug uas tau khuam daig rau hauv ib lub qhov av khawv ntawm Himalayas kom tau txais kev nyab xeeb txuas ntxiv. Lub qhov no khawb tau 4.5 km ntawm lub xeev Uttarakhand tab sis muaj av pob los txhub txij tim 12.11.2023 lawm. Ces lawv thiaj khawb tau ib lub qhov me me xa zaub mov, dej, teeb taws thiab oxygen nrog tshuaj rau tej neeg no siv xwb.
Nom tswv Aaskiv tau txheeb tau thawj cov mob khaub thuas uas mob rau npua uas tau kis rau tib neeg lawm. UK lub koom haum Health Security Agency qhia tias tau txheeb tau tus mob no rau lub caij uas lawv txheeb kab mob khaub thuas thoob teb chaws tab sis kuj tseem tsis tau paub tias kis li cas. Txawm li cas los lub chaw no kuj qhia tias nom tswv ntawm North Yorkshire ntawm Northern England kuj yuav tau soj tej chaw phai mob thiab tej tsev kho mob.
Tub ceev xwm hais tias tsim nyog lawv kub siab tshaj no nrog nrhiav ib tug poj niam transgender uas tau poj rau yav lig xyoo 2020 uas tom qab tuaj paub tias tas sim neej lawm. Angela Pucci -Love tus muam hu ua Bridget Flack tau qhia tias rau ib pawg neeg txheeb tej xwm txheej no tias nws tau nrog tub ceev xwm 7 tus tub ceev xwm ntawm 4 lub chaw tham tias seb lawv tau ua dab tsi rau lub sij hawm 36 teev uas nws tus muam tau ploj lawm ces nws txhawj tias tub ceev xwm yeej tsis kub siab tiag. Ces tom qab tej zejzog transgender ntawm Melbourne mus nrhiav ces thiaj pom Ms Flack lub cev.
Tsoom fwv Alabnese tau qhia cov kev mus txheeb txog Optus cov kev tsis muaj peev xwm siv tau xov tooj thiab internet. Michille Rowland uas yog tus nom tswj dej num Communication hais ib cov lus tias Richard Bean uas yog tus lwm coj lub koom haum Australian Communications and Media Authority yog tus coj txheeb txog tej xwm txheej no. Ua xav los txheeb tias seb tsim nyog tsoom fwv, tej lagluam thiab tej zejzog ho kawm dab tsi los ntawm cov kev tsis muaj peev xwm siv tau tej xov tooj thiab internet no. Nws hais tias yuav tau txheeb tias vim li cas thiaj tsis muaj peev xwm siv rau cov emergency services (tripple zero).
Raws li Australian National University cov kev teeb txheeb tshiab nrog tej neeg tshaj 4,000 tus ces pom tau tias tsim nyog cia neeg txum tim Australia muaj cai tawm tswv yim txog tej cai thiab cov kev txiav txim siab txog tej laj fai kum xeeb tom qab tsis pom zoo muaj suab sawv cev rau neeg txum tim hauv tsev tsoom fwv.
Lwm pab nom tsoom fwv teb chaws tau tib tsoom fwv ua ntuv zus tom qab High Court tau txiav txim tias cov kev muab tej neeg thoj nam kaw yog ib co kev ua txhaum cai. James Paterson uas yog lwm pab nom teb chaws tus coj lub tuam chav Home Affairs hais tias Labor yeej paub txog High Court tej laj thawj uas rau nws txiav txim siab no rau thaum tav su dua hnub zwj Quag (Tuesday tim 28.11.2023 no).
David McBride yog ib tug kws lij choj rau tub rog dhau los tau muaj feem qhia txog Australia tej tub rog cov kev ua txhaum cai lub caij ua tsov rog ntawm Afghanistan vim nws mloog tau tias tej tub rog raug tej coj tub rog liam tias ua txhaum. Nyob hauv ib daim ntawv sau teev ua pov thawj uas tsis tau xa rau tsev hais plaub, ces Mr McBride tau hais tias muaj cov kev sib txawv deb rau cov kev tshuaj ntsuam tub rog thiab tej coj tub rog, uas xaiv rau txim rau ib co neeg hos zam txim rau lwm cov. Nws thiaj raug 3 lub txim thaum lub 3 hlis ntuj vim raug liam tias nyiag tej xov xwm tsis tsim nyog qhia mus qhia rau tej neeg tshaj xov xwm yam tsis tau txais kev tso cai.
Tau muaj ib cov kev teeb txheeb tshiab qhia tias muaj tej cuab yig khwv tau nyiaj ntau tab tom pib ntsib teeb meem muaj nyiaj tsis txaus siv lawm. Lub txhab nyiaj National Australia Bank cov kev teeb txheeb qhia tias muaj tej neeg no txog li 41 feem puas ntsib tej teeb meem no los txog rau lub 9 hlis ntuj dhau los lawm.
UN qhia tias cov kev tso tseg tsis sib tua ntawm Israel thiab Hamas ntawm Gaza 2 hnub ntxiv yeej tsis muaj caij txaus coj mus pab tej neeg txom nyem ntawm Gaza, tom qab uas Qatar thiab Egypt nrog Israel sib khom.
European Commission tau qhias Ukraine cov kev tawm tsam tej kev lwg noj lwg haus rau lub caij lub koom haum no tseem txheeb txog lub teb chaws no cov kev ua tub koom siab. Ces thiaj yuav tau siv ntau xyoo thiab tseem yuav tau ua raws tej cai thiab tej lagluam ua ntej yuav koom tau.
Jim Chalmers uas yog Australia tus nom tswj nyiaj txiaj rau tsoom fwv Albanese hais tias tsoom fwv teb chaws tau mus nrhiav tus lwm coj txhab nyiaj faj seeb haiv txawv teb chaws. Tus neeg no yog tus coj UK central bank thiab ua tej hauj lwm no tau 30 xyoo thiab tam sim no tseem yog tus coj lub txhab nyiaj Markets Directorate.
Tau muaj ib rooj plaub ntawm Beijing uas tej txheeb ze ntawm tej neeg caij Malaysia fij dav hlau MH370 mus hais. Tau muaj tej neeg Suav coob tshaj 150 tus tau caij fij dav hla ya ntawm Kuala Lumpur mus rau Beijing uas cia li ploj rau hnub tim 8.3.2014 lawm kom ntau cov tuam txhab li Malaysia Airlines, Boeing, Rolls-Royce thiab Allianz Insurance nrog rau lwm cov tuam txhab them nyiaj paj tshab txij li 2 mus txog 17 million dollars rau lawv, uas muaj tej txheeb ze tshaj 40 leej xav kom them.
Bangkok Post tau tshaj tawm tias Thaib tus coj tsho liab tau liam pab nom Pheu Thai tias tsis kub siab kho tsab cai kom tsis txhob pub Thaib 250 tus nom senator los koom xaiv Thaib tus thawj pwm tsav, pab nom no tsuas xav ua nom txuas ntxiv xwb.
Vientiane Times tau tshaj tawm tias Nplog tus thawj pwm tsav Siphandone tau los hais lus tawm tswv yim txog zejzog pej kum haiv hnub tawm tsam thiab tiv thaiv kom tsis txhob pub tsim teeb meem kub ntxhov rau tej poj niam thiab me nyuam ntxhais. Thoob ntiaj teb tau siv nyiaj txog li $1.5 billion los daws tej xwm txheej no thiab 3 xyoos ntxiv no ces Nplog yuav siv nyiaj li ntawm USD 14 million los lis tej dej num no.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
