Xov xwm tshaj tawm rau hnub zwj Feej (Wednesday news 29.11.2023):
Aaskiv tus thawj pwm tsav Rishi Sunak tsis kam ntsib Greece tus coj vim Greece xav tau tus pej mlom Elgin Marble rov qab.
Tej zaum tsoom fwv teb chaws kuj yuav tau suab pom zoo txaus ntwm tsev kis xeev siab los tsim tsab cai Murray Darling Legislation tom qab senator David Pocock tau qhia tias nws yuav pab tsoom fwv kom tau nyiaj $20 million los pab tus dej Murrumbidgee thiab cia neeg txum tim Australia nrog tswj tus dej no.
Israel tau tso 30 tus neeg Palestinian uas muaj ib nrab yog poj niam ib nrab yog tej tub hluas nto nraug tom qab uas Hamas tau tso 12 tug neeg uas muaj 10 tus yog neeg Israli thiab ob tug yog neeg txawv teb chaws.
Raws li lub tuam chav Department of Prime Minister and Cabinet tau qhia ces Stephanie Foster uas yog ib tug neeg ua hauj lwm tseem ceeb rau nom tswv kuj raug xaiv los ua tus coj lbu tuam chav Home Affairs tshiab lawm.
Thawj pwm tsav Albanese tau los thov txim hauv tsev tsoom fwv rau tej neeg, tej cuab yig thiab tej neeg lwm tus hlub tshua nrog rau tej neeg lawv tu saib xyuas vim tseem cia ib txhia neeg Australia yuav tau cov tshuaj Thalidomide txawm tau muaj cov kev txheeb tau rau lub 11 hlis ntuj xyoo 1961 tias yog siv tej tshuaj no rau poj niam xeeb me nyuam ces yug tau me nyuam los yuav muaj teeb meem, thiab nom tswv tsis txwv cov tshuaj no thiab pheej tseem sau tej tshuaj no rau tej poj niam xeeb me nyuam uas qaug qav noj, uas nws hais tias tej nom tswv dhau los tsis kub siab nrog xyuas.
Tsev tsoom fwv Australia yuav tsim ib tsab cai los kaw tej neeg tsiv teb tsaws chaws ua txhaum kom nruj tshaj qub ntxiv tom qab uas ua tau muaj ib tug neeg thoj nam raug tso tau ploj thiab tsis kam coj lub tooj npab xauv caj dab taw. Ces Clare O'Neil uas yog tus nom tswj lub tuam chav Home Affairs thiaj hais tias tus tsoom fwv thiaj tab tom xyuas kom seb tsim puas tau tsab cai no rov qab coj tej neeg raug txim uas ua txhaum cai no rov qab mus kaw tom qab High Court tau txiav txim tias cov kev muab tej neeg thoj nam kaw yam tsis paub tias yuav tso hnub twg yog ib cov kev ua txhaum cai.
Tau muaj ib cov kev teeb txheeeb thoob teb chaws txog cov teeb meem huab cua pauv hloov nrog Australia tej hluas coob tshaj 19,000 tus ces pom tau tias tej hluas txhawj txog huab cua pauv hloov ntau dua cov kev txhawj tsam ntiav tsis tau tsev nyob raws li tsab lub koom haum Mission Australia tsab ntawv cej luam Youth Survey Report 2023 tau qhia. Txuav ntxiv ntawd ces mam muaj cov kev txhawj xeeb txog tej teeb meem nyuaj siab ntxhov plawv txog li 30 feem pua.
Lub koom haum Directorate of Public Prosecution tau taw qhia kom tsub ib lub txim tua neeg ntxiv rau ib tug tub ceev xwm ntawm lub zos Cooma uas tau siv rab phom hluav taws xob laum tus poj niam Claire Nowland ntawm ib lub tsev laus ntawm NSW.
Tsev tsoom fwv teb chaws pawg rooj saib xyuas hais kom teeb tsa ib cov txheej txheem tuaj nruab nrab los tswj cov kev qhia qhov tseeb thiab sib khom kom muaj kev pom zoo nrog Australia tej neeg txum tim.
India cawm tau 41 tug neeg raug qhov av txhub ntawm Himalayas tom qab tau daig tau 17 hnub thiab coj mus kho ntawm lub tsev kho mob ntawm lub zos Chinyalisaur lawm.
Australia tus nom txawv teb chaws tseem nrog tus coj Suav lub tuam chav tsim kev sib raug zoo nrog pej kum haiv tham ntawm Canberra tim 29.11.2023 tom qab tau ntau limtiam uas tau muaj cov xwm txheej Suav ib lub nkoj tub rog tau siv cov sona pulse ua rau muaj teeb meem rau Australia ib tug neeg tseem ploj mus daws ib lub moo daig Australia lub nkoj HMAS Towoomba ntawm pej kum haiv tej dej ze ntawm ntug hiav txwv teb chaws Japan.
Tej neeg phem tsim teeb meem ntau tuaj ntxiv tshaj 60 feem pua rau tsoom fwv Australia tej tuam chav raws li tsab ntawv cej luam Blackberry Global Threat Intelligence Report qhia.
Tau muaj tej xov xwm ntawm lub koom haum Australian Institute of Health and Welfare (AIHW) qhia tias Australia siv nyiaj AUD 48 million tswj kab mob COVID-19 rau lub caij muaj kab mob kis coob heev xyoo 2019 txog 2022, uas yog raug nyiaj tshaj 7 feem pua ntawm tej nyiaj uas tsoom fwv teb chaws siv los tswj tej dej num kho mob.
Tau muaj ib cov kev txheeb txog Victoria cov kev ntiav tsev nyob ces tsis kam cheem kom tsis txhob nce tej nqe ntiav tsev nyob 2 xyoos thiab tsis txhob pub nce ntxiv txawm tias tej tub koom siab ntawm pab nom Greens ntawm pawg rooj saib xyuas hasi tias ua rau tej neeg ntiav tsev nyob haj yam ntsib teeb meem loj tshaj lub caij ua ntej yuav muaj tus kab mob coronavirus sib kis coob heev.
Bangkok Post tau tshaj tawm tias pab nom Move Forward Party yuav coj tsab cai amnesty bill los sab laj hauv Thaib lub tsev kis xeev qes, thiab txhawb nqa kom tsoom fwv thaib tsim nws ib tsab cai thiab, kom yog tsim tau coj los siv ces thiaj li yuav zam tau txim rau Thanathorn Juangroongruangkit los yog lwm tus coj ntawm pab nom Future Forward dhau los uas raug txim cuam tshuam nrog tsab cai Les Majestie uas tawm tsam thiab saib tsis tau huab tais Thaib. Vim Move Forward Party hais tias yog tsis cia tej neeg tsis pom zoo nrog tsab cai no muaj feem koom ces yeej yuav daws tsis tau tej teeb meem no.
Vientiane Times tau tshaj tawm tias xyoo 2024 no ces yuav tsim tau tus choj zum 5 uas hla ntawm Thaib lub xeev Beung Kan mus rau Nplog lub xeev Khammuane kom thiaj ua tau lagluam ntawm Thaib, Nplog thiab Cob tsib.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
