Xov xwm luv tshaj tawm hnub zwj Feej (Wednesday newsflash 07.02.2024):
Productivity Commission tsab ntawv cej luam hasi tias ntshe tsoom fwv teb chaws Australia tsis muaj peev xwm yuav daws tau cov kev sib tu ncua rau txoj kev ua lub neej ntawm Australia tej neeg txum tim tsuas yog tias ntshe nws yuav tau hloov siv dua tswv yim tshiab xwb. Lub hom phiaj ntawm cov hauj lwm Closing the Gap yog los nrog xyuas kom tsim tau kev vaj huam sib luag rau Australia tej neeg txum tim Aboriginal and Torres Strait Islander.
Tsoom fwv cia siab tias nws cov kev sib khom yuav tau txais kev txhawb nqa los kho kom tau tsab cai Industrial Relation hnub tim 7 lub 2 hlis ntuj hnub no. Muaj ob toom ntawm tsab cai no uas yuav tau kho li teev dua lub ntsiab lus tshiab ntwm cov neeg ua hauj lwm casual thiab xyuas kom tau txais kev pov puag ntau tuaj ntxiv rau tej neeg ua hauj lwm gig economy thiab xyuas kom tej lagluam tsis txhob pheej hu, xa text message los yog emails rau tej neeg ua hauj lwm tom qab 10 pm.
Alice Jill Edwards uas yog UN tus neeg raug txib kom cej luam txog Julian Assange rooj plaub tau nqua hu kom Askiv tso tseg tsis txhob xa Mr Assange uas yog tus teeb tsa lub tuam txhab Wikileaks mus rau teb chaws Meskas vim nws ntshais tsam yuav raug tsim txom, raug ua phem rau. Ms Ewards tau hais tej lus no ntawm Geneva rau tsoom fwv Askiv tias kom yuav tau txheeb Assange tej lus cav kom ntxaws kom thiaj li yuav tsis raug kev phom sij vim yog muab nws xav rau Meskas lawm ces tej zaum yuav raug rau txim hnyav.
Lub txhab nyiaj National Bank of Australia (NAB) qhia tias Andrew Irvine yuav los ua tus CEO tshiab hloov Ross McEwan uas yuav so rau tim 2 lub 4 hlis ntuj xyoo 2024 no. Mr Irvine ces yeej tau ua hauj lwm nrog NAB txij xyoo 2020 los tam li tus Group Executive Business thiab Private Banking, thiab yeej tau ua tej hauj lwm no zoo thiab ua tus coj rau ntau lub txhab nyiaj li Bank of Montreal, Lycos Europe thiab Credit Agricole dhau los.
Israel cov tub rog Israel Defence Forces (IDF) hais tias lawv yuav pib los tshuaj ntsuam seb puas muaj cov kev ua txhaum cai rau lub caij uas tej Hamas tau tawm tsam Israel tim 7 lub 10 hli ntuj tsaib no, tom qab tau muaj kev cej luam tias tau muaj pej xeem raug tua tuag thaum muaj cov kev tua phom ceeb toom rau lub caij tseem siv cov kev txwv.
Chris Minns uas yog NSW tus hau xeev tau teb tej lus cav tias nws tus tsoom fwv cov tswv yim tshiab yuav los tsim vaj tse tshiab rau ntawm plawv nroog Sydney ua rau muaj kev tsis haum xeeb. Tus tsoom fwv no yeej npaj yuav los tsim ib co vaj tse tshiab ze rau ntawm tej chaw caij tsheb ciav hlau coj los daws tej teeb meem tsis muaj vaj tse txaus nyob ntawm lub xeev no.
The Laotian Times tau tshaj tawm tias Nplog tej kab theem nyiaj poob nqe tau nce siab tuaj yuav laug txog tshaj li 24 feem pua, ces thiaj ua rau tej nqe noj mov hauv tej khw noj mov thiab tej nqe ntiav tsev tos txais qhua kim tuaj ntxiv yuav laug txog li 40 feem pua. Tos ho zoo li ntawd los vim muaj neeg xav tau zaub mov thiab dej caw los ua ntau yam koom txoos. Thiab nyiaj poob nqe yog piv rau nyiaj dollar thiab nyiaj Thaib.
Bangkok Post kuj tau tshaj tawm tias Thaksin Shinawatra uas yog Thaib tus qub thawj pwm tsav dhau los yuav muaj cai mus hais plaub seb puas raug tso ntxov, tom qab raug kaw tsev laj cuj los txwm ib xyoos rau hnub tim 18 lub 2 hlis ntuj xyoo 2024 tom ntej no.
Ua kev no los Thaib tus thawj pwm tsav Sretha Thavisin kuj tsub nias Thaib lub txhab nyiaj Bank of Thailand (BoT) kom txo kab theem paj 0.25% coj los txhawb nqa lagluam, thiab nws kuj xav xyuas kom tau nyiaj 500 billion Baht coj los khiav nws cov hauj lwm digital wallet.
Michelle Heyman raug Antonio Guvtasson xaiv los ua tus coj pob mus tua rau Australia pab Matilda thiab Chloe Lazargo uas ncaws nruab nrab los kuj tau rov qab mus sib tw rau cov kev sib tw Paris Olympics tom ntej no tom qab tsis tau koom cov kev sib tw 2023 Women World Cup.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
