Lub koom haum tsab ntawv cej luam txheeb tau tias muaj Australia tej niam txiv tshaj 60% xav tias cov digital money uas rau lawv tej me nyuam tsis paub txog tej txiaj ntsim ntawm nyiaj txiaj lawm. Yog li ne, ho yuav yog leej twg txoj hauj lwm los qhia tej me nyuam yaus kom paub tswj thiab siv nyiaj?
Ricardo Goncalves yog SBS tus neeg sau xov xwm txog fab nyiaj txiaj tau cej luam tias Helen Lewis yog ib tug leej niam ntawm coob leej ntau tus ua niam ua txiv, uas yeej kub siab tiag tiag los qhia kom nws tej me nyuam paub txog tej txiaj ntsim ntawm nyiaj txiaj. Nws yeej tau muab nyiaj rau nws cov me nyuam raws lawv cov hnoob nyoog yog tias lawv pab ua hauj lwm hauv tsev, thiab yog lawv tseem pab ua lwm yam hauj lwm hauv tsev thiab ces lawv haj yam tau nyiaj ntau ntxiv thiab. Nws ntseeg tias tej zaum nws cov me nyuam yuav tau ua ntau txoj hauj lwm los yog ua cov hauj lwm contract lawm xwb, yog li ntawd thiaj tseem ceeb heev uas lawv yuav tsum tau paub los tswj thiab siv nyiaj txiaj thaum lawv yuav tsev los yog cuam tshuam txog lawv cov nyiaj npaj tseg kom tau siv rau lub caij lawv so tsis ua hauj lwm ntawd lawm.
''Yeej yog ib cov kev nyuaj siab kawg nkaus rau tej lees kais, vim tej neeg yeej ntseeg tias tsim nyog tej lees kais yuav qhia tej tub kawm kom paub tswj thiab siv nyiaj txiaj, uas kuv pom tau tias yeej yog tej yam tsis ncaj rau lawv lawm thiab, vim tej niam txiv los yeej muaj lub luag hauj lwm yuav tau los nrog xyuas thiab," raws li Lewis tau qhia.
Laura Higgin ntawm lub koom haum Australian Securities and Investments Commission (ASIC) los kuj tau hais kom yuav tsum coj cov sob kawm qhia txog kev tswj thiab kev sib nyiaj txiaj (Financial literacy) no coj mus zwm rau Australia tej txhooj cai qhia ntawv thiab qhia rau tej tub kawm hauv tej teej kawm thiab. Thiaj yuav qhia tau kom paub txog tej txiaj ntsim ntawm nyiaj txiaj tiag, los yog pab kom lawv paub daws, tswj thiab txiav txim siab cuamt shuam txog tej nyiaj txiaj no. los yeej muaj ntau yam xov xwm thiab cov kev taw qhia txog ntau yam cuam tshuam txog nyiaj txiaj pub rau zej tsoom sawv daws thiab. Ntxiv ntawd los Higgins kuj tau hais tias tej lees kais muaj peev xwm mus siv tau lub vas sab los kawm txog ib cov qauv qhia txog cov kev paub txog cov financial literacy no kom lawv thiaj paub qhia tej tub kawm hauv chav kawm los yog qhia rau lwm tus.
Lub teej kawm Northern Beaches Christian School ntawm nroog Sydney los kuj tau tsim cov stationary budget uas yog cov kev them thiab tswj tej tub kawm tej ntaub ntawv thiab mem lo ntev lawm thiab. Lub hom phiaj yog coj los pab tej tub kawm kom paub "txog lawv txoj hauj lwm yuav tau kub siab los ua tib zoo saib xyuas lawv tej khoom siv thiab cov kev ua tswv rau tej khoom no, kom paub daws teeb meem thiab paub txiav txim siab los yog paub npaj thiab tswj tej hauj lwm cuam tshuam txog nyiaj txiaj no thiaj pab kom lawv paub zoo txog tej txiaj ntsim ntawm nyiaj txiaj zoo tuaj ntxiv lawm,'' raws li Julian Bolt uas yog ib tug lees kais tau qhia.
Thiab vim rau qhov tias muaj neeg xav kawm tej sob kawm financial literacy no ntau heev ces thiaj ua rau muaj cov koom haum NGOs uas tsis nce rau tsoom hwv, tej tuam txhab lagluam pib tshiab mus txog rau tej txhab nyiaj thiaj tau los tsim cov sob kawm qhia txog kev tswj thiab siv nyiaj txiaj no ntau tuaj ntxiv lawm.
Muaj ib txhia neeg hais tias vim tej lagluam tam sim no yog cov lagluam digital economy uas yuav tau siv cov digital money lawm xwb uas yeej txawv tej dhau los uas siv nyiaj ntsuab los yog siv npib nyiaj lawm. Yog li ntawd thiaj tsim nyog peb yuav tau los qhia peb tej me nyuam kom paub txog cov kev tswj thiab npaj los yog siv tej nyiaj txiaj no tsis hais rau tam sim no kiag los yog txuas ntxiv mus rau yav pem suab kom thiaj yooj yim rau lawv.
