Cov kev teeb txheeb tsis ntev los no tau qhia tias muaj Australia cov pej xeem yuav laug txog li ib nrab yog cov muaj lub cev muaj ceeb thawj los yog lub cev rog heev lawm.
Tsis ntev no los kuj tau muaj ib cov kev teeb txheeb txog ntiaj teb cov pej xeem kuj tau qhia ntxiv thiab tias, lub sij hawm li 30 xyoo dhau los no, ntiaj teb tej pej xeem nce kis lus (Lub cev hnyav) txog li 5-6 kilograms (kgs) uas poj niam nce txog li 6 kgs hos txiv neeg nce txog 8 kgs lawm.
Tej xwm txheej no thiaj yuav ua rau muaj teeb meem cuam tshuam rau peb txoj kev noj qab haus huv, vim yuav ua rau peb muaj cov mob uas mob ntev ntau yam thiab yuav ua rau peb los yog nom tswv yuav tau siv nyiaj ntau heev coj los kho mob.
Mloog tau zaj xov xwm hais txog ntiaj teb cov pej xeem lub cev muaj ceeb thawj tuaj ntxiv rau lub sij hawm 30 xyoo dhau los no ntawm nod: https://www.sbs.com.au/yourlanguage/services/embeds/audioplayer/55f464d0-c53d-46e5-bea1-dfc99845bbcb
Tsis ntev los no Professor Bill Starvreski ntawm Sydney University tau qhia tias vim Australia yog lub teb chaws tej neeg tsis noj tej zaub mov zoo muaj txiaj ntsim pab rau lub cev thiab tsis tas li no los Australia tej pej xeem tseem tsis tshua nyiam ua exercise thiab.
Tab sis peb ho yuav paub tau li cas tias noj npaum li cas rau ib pluas hno thiaj haum los yog txaus pab rau peb lub cev?
Megan Alsford uas yog ib tug kws qhia tej neeg noj zaub mov muaj txiaj ntsim pab rau lub cev thiab tsim cov program noj zaub mov ntawm lub tuam txhab Jenny Craig thiaj xav kom peb mus txheeb xyuas tau ntxiv rau ntawm lub tuam txhab no lub vas sab los yog mus txheeb xyuas tau ntawm tsoom hwv Australia lub vas sab uas qhia tej neeg seb yuav noj ntau npaum li cas rau pluag ntawd.
Tsis ntev los no lub tuam txhab Jenny Craig cov kev teeb txheeb kuj tau qhia tias, muaj pej xeem Australia ze txog li 40% tsis paub tias yuav noj ib pluas mov no noj ntau npaum li cas thiab tsim nyog noj dab tsi, muaj tshaj li 2 feem 3 tau noj mov ntau tuaj ntxiv vim lawv yuav zaub mov noj thiab noj tsis tas ces nkim zaub mov pov tseg ntau, thiab tseem muaj txog li 2 feem 3 yog cov neeg pheej nyiam noj khoom txom ncauj ntxiv rau pluas hmo uas twb noj tag ntawd ntxiv lawm thiab, tej hais no thiaj ua rau pej xeem Australia muaj ceeb thawj ntau tuaj ntxiv txog 20% txij li xyoo 1995 los txog tam sim no lawm.
Mloog tau cov lus SBS Radio Hmong Program nrog Megan Alsford tham ua lus Askiv tau ntawm no: https://www.sbs.com.au/yourlanguage/services/embeds/audioplayer/fd083aff-58a4-40c3-9430-9ebe747ab3f7
Alsford hais tias 'cov phaum neeg hluas yog cov tswj tsis tau lawv tus kheej li yog hais txog kev noj zaub mov lawm, ces tej zaum muaj lawv ib txhia yog cov noj ntau dua vim lawv yuav zaub mov ntau tab sis ho noj tsis tag ces nkim pov tseg ntau thiab, yeej xav yuav zaub mov ntau vim tshuas tau them me ntsis ntxiv xwb, ces thiaj ua rau lawv muaj ceeb thawj tuaj ntxiv lawm'.
'Tab sis qhov txaus txhawj xeeb tshaj mas yog qhov tias tej neeg tseem tsis tau paub tias xyov yuav noj npaum li cas es kom thiaj haum los yog txaus hauj sim pab rau yus lub cev xwb' raws li Alsford tau qhia.
Yog li nws thiaj xav kom nom tswv thiab tej nom pwm tsav zejzog yuav tsum kub siab los nrog xyuas kom tej neeg noj tej zaub mov zoo thiab noj haum pab rau tej neeg lub cev raws li lbu koom haum qhia tej neeg noj zaub mov tau thov ntawd.
Txawm li cas los Megan Alsford tau hais tias "Qhov tseem ceeb tshaj plaws ces peb yuav tau xub xub kub siab txog peb txoj kev noj qab haus huv thiab noj qab nyob zoo ua ntej tshaj plaws, noj zaub mov kom zoo, kom txaus thiab hauj sim, noj zaub thiab txiv xyoob txiv ntoo kom ntau thiab nquag mus exercise pab peb tus kheej ntxiv."
