Xov xwm luv tshaj tawm hnub zwj Teeb (Thursday news bulletin 13.02.2025):
Australia kuj muaj cov kev nqe peev nyiaj rau cov kev teeb txheeb thiab txhim kho tsawg tshaj tej cov teb chaws OECD ua, ces thiaj tau muaj cov kev ceeb toom kom siv tej txuj ci uas teeb txheeb tau tshiab ntawm Australia. Raws li tau muaj ib cov ntaub ntawv sab laj txog tsoom fwv cov kev nqe peev rau tej no c3s txheeb tau tias tsim nyog yuav tau txhawb nqa tej laj lim tswv yim tshiab, thiab yeej muaj lwm cov teb chaws tab tom txhim kho Australia cov kev teeb txheeb kom siv tau tej technologies zoo tuaj ntxiv.
Tau muaj kev nqua hu kom kub siab los pov puag Australia tej lagluam li siv tej hlau tsim tau ntawm teb chaws Australia rau lub caij Mekas tseem yuav tsub se sai sai no. Mr Arthur Rorris uas yog tus coj lub koom haum South Coast Labour Council xav kom Australia siv txhua txoj xub ke pab kom lub tsis txhob tau tej se thiab tsoom fwv yuav tau hloov nws tej tswv yim ua luam tshiab.
Tub ceev xwm Askiv kuj txheeb tau tias muaj ib co foob pob txog li 176 yam tsis tau tawg nyob sab hauv qab ntawm tej me nyuam yaus tej chaw ua si, ntawm Northumberland lub nroog Wooler rau lub caij uas tej nom tswv zos kho tej chaw ua si no kom zoo tshaj qub ntxiv.
Peter Hegseth uas yog Meskas tus nom tswj dej num tug rog tau hais rau lub koom haum NATO tej coj tias ntshe xyov Ukraine puas yuav ua tau ib tug tub koom siab nrog lub koom haum no, thiab lub teb chaws no yuav tau sib khom ciam teb tshiab nrog Russia. Thiab nws hais tias kom Ukraine tso tseg nws cov kev cia siab tias yuav tau nws tej ciam teb li xyoo 2014.
Melissa Wu uas yog Australia tus neeg sib tw Olympic diver tau qia tias nws so tsis sib tw ntiv lawm tom qab nws tsuas yog tib tug neeg uas tau mus sib tw Olympic 5 saug sawv cev rau teb chaws Australia.
Muaj ntau thaj chaw ntawm xeev South Australia ces yuav kub sov heev hnub zwj Teeb (Thursday) no, thiab ntawm xeev Western Australia los tej zaum kuj yuav muaj lub khaub zeeg cua chaw sov muaj ceem txog zum 3, thiab qaum teb xeev Queensland los kuj pib txheb tej kev puas tsuaj uas ntuj los nag hlob thiab dej nyab tsim.
Tau muaj ib lub koom haum sawv cev rau tej me nyuam yaus tau piv tias cov kev ua kev nco txog hnub National Apology rau tej neeg uas raug nom tswv muab nyiag mus (Stolen Generation) ces yog ib cov kev rov qab pheej ua rau lawv nco txog tej xwm txheej ua rau lawv tus siab thiab nyuaj siab. William Tilmouth ntawm neeg txum tim lub koom haum Children Ground hais tias tej cai ntau yam uas siv tsis tau hauj lwm thiab tsis kub siab ua hauj lwm thiaj ua rau muaj tej me nyuam ntau tuaj ntxiv raug coj mus rau lwm tus tsom kwm.
Tshuav sij hawm 24 teev ua ntej yuav txog hnub sib hlub (Valentine's Day) ces tau muaj lub koom haum Who Gives a Crap cov kev teeb txheeb txheeb tau tias muaj 1 tug ntawm 3 tug neeg Australia yeej tsis xav tias lawv muaj txoj kev hlub ntawm lawv cov kev nkauj nraug/sib raug zoo nrog lwm tus, thiab ib nrab yeej tsis muaj peev xwm nrhiav tau ib lo lus tsim nyog siv los xaus ntau yam rau hnub tim 13 lub 2 hlis ntuj uas hu tias yog hnub World Dump Day.
Tau muaj xov xwm cej luam tias Suav tuam tshoj tej tub rog nruab deg thiab nruab ntug raug xa mus ncig thoob Taiwan tab sis nom tswv hais tias tsuas yog xyaum tub rog kom npaj txhij thiab soj ntsuam xwb. Li Zhaudong thiaj hais tias tsuas yog Suav tuam tshoj cov kev npaj kom txhij tsam ho muaj kev sib tawm tsam xwb.
Elon Musk kuj tsis lees paub tias yog tus ua rau muaj cov kev tsis haum xeeb rau tsoom fwv Meskas cov kev tswj hwm rau lub caij muaj neeg cav tias nws tej kev txheeb kom txuag tau nyiaj rau tsoom fwv Trump yog ib cov kev tsis dawb huv. Meskas tus President Trump tau xaiv tus txiv neej tuam los pav no los ua hauj lwm ces thiaj ua rau tsoom fwv tej tuam chav ntxhov quav niab thiab ua rau muaj ntau rooj plaub ntug nyuaj.
Muaj pej xeem Nplog yuav laug txog li 90 feem pua los sis tshaj 5 million tus tau siv internet, social media thiab xov tooj tes raws li Nplog phau ntawv xov xwm The Laotian Times qhia.
Listen to on Thursday at 6 pm and on Sunday at 11 am, or follow us on , , and . Downloadand or follow us on or other third party podcast platforms (, , and ).
