ပၤပၤ ဖရၣ်စ့ၣ် လၢအတီခိၣ်ရိၤမဲ Roman Catholic Church, တၢ်ဘူၣ်တၢ်ဘါ ၁၂နံၣ်ဝံၤအလီၢ်ခံ ပာ်လီၤတဲာ်ကွံာ်ဟီၣ်ခိၣ်ဒီး အသးနံၣ်အိၣ် ၈၈နံၣ်န့ၣ်လီၤ.
အဝဲအတၢ်သံအံၤကဲထီၣ်ဝဲတၢ်သးအုးအကတီၢ်တခါ လၢအပၣ်ဃုာ်နံၣ်ယၤဖှိၣ်အါမး လုၢ်လၢ်လၢဘၣ်တၢ်မၤအီၤသ့ၣ်တဖၣ် ဒီးလုၢ်လၢ်တနီၤန့ၣ် ဘၣ်တၢ်ဟံးန့ၢ်စိာ်ခီအီၤစးထီၣ်လၢ ရိမ့ၤအစိၤလၢပျၢၤအခါန့ၣ်လီၤ.
မုၢ်နံၤမုၢ်သီခံခါလၢၤ လၢတၢ်ကပာ်လီၤအဒဲဟီၣ်ခိၣ်အမူးဒီး တၢ်ခူၣ်လီၤအီၤအဂီၢ်န့ၣ် ရိမ့ၤခဲးသိးလ့းခ်သရိာ်စီဆှံပၤပၤဝဲၤဒၢးခိၣ်သ့ၣ် ကဘၣ်မၤဝဲတၢ်ဆၢတဲာ်, ဒီး
သရိာ်စီဆှံအံၤ ပၢဆှၢအံးထွဲကွၢ်ထွဲဝဲ Holy See တၢ်စုလီၢ်ခီၣ်ခိၣ်ဒီးကျိၣ်စ့ဂ့ၢ်ဝီန့ၣ်လီၤ.
တၢ်ပာ်လီၤအဒဲဟီၣ်ခိၣ်အမူးန့ၣ် အိၣ်ဖျါအါလၢတၢ်ကမၤဝဲဒၣ်အီၤဖဲ St Peter Square ဖဲအဝဲသံဝံၤအလီၢ်ခံ လွံၢ်သီ တုၤ ဃုသီအနံၤန့ၣ်လီၤ.
တၢ်အံၤကကဲထီၣ်ဝဲ တၢ်သးအုးအဆၢကတီၢ် ခွံသီ လၢအဘၣ်တၢ်ကိးအီၤလၢ 'Novendiale' န့ၣ်လီၤ.
တၢ်ဃုသ့ၣ်ညါမၤလိယွၤဒီးတၢ်ဘူၣ်တၢ်ဘါအဂ့ၢ် တၢ်ပာ်စီဆှံခရံာ်ဖိတၢ်ဘူၣ်တၢ်ဘါအလုၢ်လၢ် ဒီး ခရံာ်ဖိတၢ်ဘူၣ်ထီၣ်ဘါထီၣ်အတၢ်မၤလိဂ့ၢ်ဝီ — Liturgical Studies and Sacramental Theology), သရၣ်မုၣ်ဒိၣ်စိ Clare Johnson, ရှဲပၠးဝဲဒ်အံၤန့ၣ်လီၤ.
“အဝဲသ့ၣ်န့ၣ်မ့ၢ်ဝဲတၢ်သးအုးမုၢ်နံၤမုၢ်သီလၢအဖိးသဲစးတၢ်ဘျၢ, တနံၤဘၣ်တနံၤန့ၣ် ပှၤကညီဂီၢ်မုၢ်သ့ၣ်တဖၣ် လဲၤပာ်ဖျါထီၣ်တၢ်အုၣ်သး မ့တမ့ၢ် တၢ်အၢၣ်လီၤအီလီၤ ဒီးဘူၣ်ထီၣ်ဘါထီၣ်တၢ်န့ၣ်လီၤ. တၢ်အံၤမ့ၢ် တၢ်သးအုးအမုၢ်နံၤခွံသီ ဒီး မုၢ်နံၤသ့ၣ်တဖၣ်အံၤ တသီစုာ်စုာ်န့ၣ် မ့ၢ်မုၢ်နံၤလီၤလီၤဆီဆီလၢ တၢ်မၤတၢ်သ့ၣ်နီၣ်ထီၣ်က့ၤ ပၤပၤ အံၤန့ၣ်လီၤ. တၢ်ဆိးသီတၢ်သံအမူးအံၤ ကဘၣ်တၢ်လုၢ်ဘၢအီၤလၢအလွဲၢ်ဂီၤ, လၢအမ့ၢ် တၢ်ပာ်ဖျါထီၣ်တၢ်သးအုးအလွဲၢ်န့ၣ်လီၤ. တၢ်မၤတၢ်သ့ၣ်နီၣ်ထီၣ်က့ၤအမူးအံၤ အတၢ်ကီတၢ်ခဲတခါန့ၣ်မ့ၢ်ဝဲ ဆၢကတီၢ်ခဲအံၤန့ၣ်မ့ၢ်ဝဲ တၢ်မၤလၤကပီၤ Easter, ခရံာ်ဂဲၤဆၢထၢၣ်က့ၤအမုၢ်နံၤ ဒီးမ့ၢ်ဝဲတၢ်သးဖှံအဆၢကတီၢ်န့ၣ်လီၤ. အဃိ, ပဒိးန့ၢ်ဘၣ်ဝဲ တၢ်သးဖှံဒီး တၢ်သးအုး အဘၢၣ်စၢၤ အတၢ်ထိၣ်သတြီၤတၢ်လီၤဆီန့ၣ်လီၤ.”
ဘၣ်ဃးဒီး တၢ်သိၣ်တၢ်သီတၢ်ဘျၢလၢ တၢ်ဘၣ်မၤထွဲအီၤ ဒီးတၢ်သံအမူးန့ၣ် ပၤပၤအနီၣ်ကစၢ်ဒၣ်ဝဲ ဟ့ၣ်လီၤဝဲအခွဲး ဖဲအပူၤကွံာ်တနံၣ်အခါန့ၣ်လီၤ.
Franciscan အလုၢ်အလၢ် တၢ်ရဲၣ်တၢ်ကျဲၤ လၢတၢ်ညီနုၢ်မၤအီၤန့ၣ်မ့ၢ်ဝဲ, တၢ်ထုးကွံာ် တၢ်သံအမူး လုၢ်လၢ်ထူသနူတၢ်ရဲၣ်တၢ်ကျဲၤတနီၤဒီး တၢ်ဃုထၢမၤဝဲ လုၢ်လၢ်ထူသနူ တၢ်ရဲၣ်လီၤကျဲၤလီၤလၢ အယိယိဖိသ့ၣ်တဖၣ်န့ၣ်လီၤ.
ဒ်သိးလၢအမ့ၢ် တၢ်မၤညီနုၢ်တၢ်ရဲၣ်တၢ်ကျဲၤတခါအသိး, ပၤပၤအံၤအစိၣ်န့ၣ်ဘၣ်တၢ်ပာ်မံနီၤလီၤအီၤဖဲတၢ်သံတလါတဖျၢၣ်အပူၤ လၢအဘၣ်တၢ်တ့အီၤလၢသ့ၣ်ဒီးပှာ်ဝါကပုာ်, ဒီးပာ်အီၤဖဲ Santa Marta သရိာ်အပူၤန့ၣ်လီၤ.
“အပူၤကွံာ်လၢညါအခါ တၢ်လၢ ပၤပၤန့ၣ် ဘၣ်တၢ်ခူၣ်လီၤအီၤဒီးတၢ်သံတလါသၢကဖျၢၣ်န့ၣ်လီၤ. တၢ်သံတလါတဖျၢၣ်ဒီးတဖျၢၣ်န့ၣ် တၢ်ပာ်နုာ်ကထြၢထီၣ်အီၤ တကထြၢဝံၤတထြၢ န့ၣ်လီၤ. နာ်သက့ ပၤပၤ ဖရၣ်စ့ၣ်အံၤ မၢပှၤမၤက့ၤအီၤယိယိဖိလၢအမ့ၢ် တၢ်ကမၤဝဲ တၢ်သံတလါထဲတဖျၢၣ်ဧိၤ လၢအဘၣ်တၢ်တ့အီၤလၢသ့ၣ်ဒီးပှာ်ဝါကပုာ်န့ၣ်လီၤ. အဝဲဆီတလဲကွံာ်စ့ၢ်ကီးတၢ်သိၣ်တၢ်သီတၢ်ဘျၢတနီၤ, လၢအမ့ၢ် ကမျၢၢ်တၢ်ဟဲအိၣ်သကိးသၢသီ ဖဲအဝဲအိၣ်ဆိးတၢ်လီၢ် သရိာ် St. Peter Basilica အပူၤန့ၣ် အဝဲတပျဲ တၢ်ဟဲအိၣ်သကိးဘၣ်န့ၣ်လီၤ.”
လၢန့ၣ်အမဲာ်ညါ လၢတၢ်ကခူၣ်လီၤအီၤဖဲ Vatican တၢ်ဘါသရိာ် St. Peter Basilica ဒၢးဟီၣ်ခိၣ်ဖီလာ် အလီၢ်န့ၣ်, အဝဲဃုထၢစ့ၢ်ကီးလၢတၢ်ကခူၣ်လီၤအီၤဖဲ Santa Maria Maggiore လၢအအိၣ်ဖဲ Rome န့ၣ်လီၤ. သရၣ်မုၣ်ဒိၣ်စိ Johnson စံးဝဲ အဝဲအတၢ်ဃုထၢအံၤ မ့ၢ်ဝဲတၢ်ဒုးနဲၣ်ဖျါ အဝဲမ့ၢ်ပှၤလၢအအိၣ်ဒီးတၢ်ဆီၣ်လီၤသးတဂၤန့ၣ်လီၤ.
“တၢ်လီၢ်အံၤ အဝဲထံၣ်အီၤဒ်သိး အမ့ၢ်တၢ်လီၢ်လၢ အဝဲလဲၤဃ့ဘျါထုကဖၣ်တၢ်အလီၢ်တခါ တချုးဖဲအဝဲလဲၤတၢ်ဒီးမူဒါတၢ်ဖံးတၢ်မၤဘၣ်အခါမ့ၢ်ဂ့ၤဒီး ဖဲလၢအဝဲဟဲက့ၤကဒါက့ၤအခါမ့ၢ်ဂ့ၤန့ၣ်လီၤ. အဃိတၢ်လီၢ်အံၤ မ့ၢ်ဝဲအတၢ်သးစဲဘူးအလီၢ်တခါဒီး ဖဲအဝဲသွၣ်ခိၣ်လၢၢ်အလိၤန့ၣ် အဝဲအဲၣ်ဒိးလၢတၢ်ကွဲးအမံၤထဲဖျၢၣ်ဧိၤ လၢအမ့ၢ် 'Francisco' န့ၣ်လီၤ. ယဆိကမိၣ်တၢ်အံၤန့ၣ် မ့ၢ်တၢ်လၢအဘၣ်လိာ်အသးဒီးအဝဲအတၢ်သကဲးပဝးန့ၣ်လီၤ. ဖဲအဝဲစးထီၣ်ကဲထီၣ်ပၤပၤအခါ အနီၣ်ကစၢ်ဒၣ်ဝဲန့ၣ် အတအဲၣ်ဒိးအိၣ်ဖဲ တၢ်ပာ် ပၤပၤစိကမီၤလီၢ်လၤဟံၣ်အပူၤဘၣ်. အဝဲန့ၣ် အဲၣ်ဒိးအိၣ်သကိးဒီးပှၤကညီသ့ၣ်တဖၣ် အဃိ ယဆိကမိၣ် တၢ်အံၤမ့ၢ်စ့ၢ်ကီးတၢ်တခါလၢအဝဲအဲၣ်ဒိး တၢ်ခူၣ်လီၤအီၤဖဲ Santa Maria န့ၣ်လီၤ.”
ဖဲတၢ်ဘူၣ်တၢ်ဘါအခိၣ် တအိၣ်လၢၤဘၣ် အဆၢကတီၢ်အံၤ တနံၤဘၣ်တနံၤအဂီၢ် တၢ်ဖံးတၢ်မၤသ့ၣ်တဖၣ်န့ၣ် College of Cardinals ဘၣ်အံးထွဲကွၢ်ထွဲအီၤ — ဒီးမ့ၢ်ဝဲတၢ်ဆၢကတီၢ်တခါလၢ လီၢ်ခၢၣ်သးသရိာ်တၢ်တီခိၣ်ရိၤမဲရဲၣ်ကျဲၤသ့ၣ်တဖၣ်ပတုာ်အသးန့ၣ်လီၤ.
လီၢ်ခၢၣ်သးသရိာ်တၢ်တီခိၣ်ရိၤမဲရဲၣ်ကျဲၤသ့ၣ်တဖၣ်အံၤ ကပတုာ်အသး တုၤလၢတၢ်ဃုထၢထီၣ်ပှၤလၢကဘၣ်ထီၣ်ပၤပၤအလီၢ်, လၢအပၣ်ဃုာ်တၢ်ဟ့ၣ်တၢ်ဖးခူသူၣ်န့ၣ်လီၤ.
တၢ်ကူၣ်လိာ်တၢၣ်ပီၣ်ခူသူၣ် အံၤအပူၤန့ၣ် ပၣ်ဃုာ် ခါဒံးနၢၤလ် အဂၤ ၁၂ဝ ဃၣ်ဃၣ် — လၢတၢ်ကစးထီၣ်မၤအီၤဖဲ Sistine Chapel သရိာ် Vatican နီအပူၤ ဖဲတၢ်သံအံၤဝံၤအလီၢ်ခံ ၁၅ သီတုၤ အသီ ၂ဝ အဘၢၣ်စၢၤန့ၣ်လီၤ.
ခါဒံးနၢၤလ် လၢအပၣ်ဃုာ်သ့ၣ်တဖၣ်အကျါန့ၣ်မ့ၢ်ဝဲ Cardinal Mykola Bychock လၢအအိၣ်ဖဲမဲလ်ဘၢဝ့ၢ်, ဒီးမ့ၢ်ဝဲအီစထြ့လယါကီၢ် ခဲးသိးလ့းခ် တၢ်ဘူၣ်တၢ်ဘါအခိၣ်လၢအလီၢ်အလးထီကတၢၢ်န့ၣ်လီၤ.
The Europaeum တၢ်ကရၢကရိ, တၢ်ရဲၣ်တၢ်ကျဲၤ ပှၤပၢဆှၢရဲၣ်တၢ်ကျဲၤတၢ်အခိၣ်, Dr Miles Pattenden, လၢအမ့ၢ်ပှၤပာ်ဖျါညီနုၢ်တၢ်ထံၣ်ဘၣ်ဃး ပၤပၤ ဖရၣ်စ့ၣ် အတၢ်စိကမီၤလီၢ်လၤ အဂ့ၢ်တဂၤရှဲပၠးဝဲဒ်အံၤန့ၣ်လီၤ.
“တၢ်ကူၣ်လိာ်အိၣ်သကိးခူၣ်သူၣ် အတၢ်အိၣ်ဖှိၣ်ဒီး တၢ်ဖံးတၢ်မၤကျိၤကွာ်န့ၣ် တၢ်ဒုးအိၣ်ထီၣ်အီၤအိၣ်လံအနံၣ် ၁,ဝဝဝ ဃၣ်ဃၣ်, လၢအစးထီၣ်အသးလၢ ၁ဝ၅၉နံၣ် In Nomine Domini ပၤပၤဝဲၤဒၢးခိၣ်သ့ၣ်လံာ်ဘိးဘၣ်သ့ၣ်ညါ လၢအစံးဝဲဒၣ်, ပှၤလၢအဃုထၢထီၣ် ပၤပၤန့ၢ် န့ၣ် မ့ၢ်ဒၣ်ထဲ ခါဒံးနၢၤလ် ပိာ်ခွါသ့ၣ်တဖၣ်, နာ်သက့ တၢ်မၤအကျိၤကွာ်သ့ၣ်တဖၣ် န့ၣ်ဘၣ်တၢ်ဒုးအိၣ်ထီၣ်အီၤပိာ်ထွဲထီၣ်အသးလၢနံၣ်ယၤဖှိၣ်အါမး: စးထီၣ်လၢ ၁၃ နံၣ်ယၤဖှိၣ် တၢ်ထံၣ်တၢ်ဆိကမိၣ် လၢအမ့ၢ် တၢ်ကမၤတၢ်ဃုထၢအံၤအဂီၢ် ခါဒံးနၢၤလ်သ့ၣ်တဖၣ်န့ၣ် ဘၣ်တၢ်ကးပံးတံာ်အဝဲသ့ၣ်ဒီးပာ်လီၤဖးအီၤန့ၣ်လီၤ.”
တၢ်ဟ့ၣ်လီၤတၢ်ဖးခူၣ်သူၣ်အပူၤန့ၣ် ခါဒံးနၢၤလ် လၢအသးနံၣ် ၈ဝ ဆူအဖီလာ်ခဲလၢာ်နုာ်လီၤပၣ်ဃုာ်သ့န့ၣ်လီၤ.
လၢကဃုထၢထီၣ်ပၤပၤအသီအံၤအဂီၢ် အဝဲသ့ၣ်လိၣ်ဘၣ်ဝဲတၢ်ဖးအစှၤကတၢၢ် သၢပူ ခံပူ ဒီး တၢ်ဖးအပိၣ်တခါ, အဃိ တၢ်ဟ့ၣ်တၢ်ဖးအံၤ တၢ်ဘၣ်မၤအီၤတဘျုးဝီ လၢအသီအါမးန့ၣ်လီၤ.
Dr Pattenden, စံးဝဲဒၣ် လီၢ်လၤအံၤအဂီၢ်တၢ်တၢၣ်ပီၣ်တဲသကိးသ့ၣ်တဖၣ်န့ၣ် ဟံးတၢ်ဆၢကတီၢ်ဖးယံၤသ့ဝဲန့ၣ်လီၤ.
ဖဲလၢ တၢ်တၢၣ်ပီၣ်ကူၣ်လိာ်ခူၣ်သူၣ်အံၤဝံၤဝဲတဲာ်ဝဲတဘျီ, ပၤပၤအသီန့ၣ် တၢ်ကသံကွၢ်အီၤ မ့ၢ်အဝဲတူၢ်လိာ်အလီၢ်လၤအံၤဧါဒီး အဝဲအဲၣ်ဒိးဟံးန့ၢ် အမံၤဒ်လဲၣ်န့ၣ်လီၤ.
တၢ်ဟ့ၣ်တၢ်ဖးလံာ်က့သ့ၣ်တဖၣ် တၢ်ကဒွဲၣ်အူကွံာ်အီၤဒီးဂာ်ကသံၣ်ဒ်သိးကထုးထီၣ်မ့ၣ်အူလုၢ်အလွဲၢ်ဝါ ဒီး ဟီၣ်ခိၣ်ဒီဘ့ၣ်ကသ့ၣ်ညါဘၣ်ဝဲလၢ တၢ်ဃုထၢ ပၤပၤအသီန့ၢ်လံန့ၣ်လီၤ.
အဝဲသ့ၣ်ဂာ်ကသံၣ်အဂၤတခါလၢမ့ၣ်အူလုၢ်ဟဲထီၣ်အသူအဂီၣ်န့ၣ်, တၢ်အံၤ ဒုးသ့ၣ်ညါဝဲလၢ တၢ်ဖးအံၤတဝံၤဒ်ဘၣ် တၢ်ဃုထၢထီၣ်ပၤပၤအသီတန့ၢ်ဒ်ဘၣ်န့ၣ်လီၤ.
Dr Pattenden, စံးဝဲဒၣ် လုၢ်လၢ်တခါအံၤ အတမ့ၢ်တၢ်လၢတၢ်မၤတ့ၢ်အီၤလၢပျၢၤ ဒ်သိးတၢ်ဆိကမိၣ်ပာ်အီၤအသိးဘၣ်.
“အခီၣ်ထံးခီၣ်ဘိန့ၣ် တၢ်အံၤစးထီၣ်အသးဖဲ ၁၉နံၣ်ယၤဖှိၣ်အခါဒီး မတၤတဂၤ ဟ့ၣ်လီၤတၢ်ဖးလၢမတဂၤအဂီၢ်လဲၣ်န့ၣ် ဒ်သိးတၢ်သုတသ့ၣ်ညါအီၤဘၣ်တဂ့ၤအဂီၢ် ခါဒံးနၢၤလ်သ့ၣ်တဖၣ် ဖဲလၢတၢ်ဟ့ၣ်တၢ်ဖးတဖျၢၣ်စုာ်စုာ်ဝံၤန့ၣ် ဘၣ်ဒွဲၣ်အူကွံာ်ဝဲဒၣ် တၢ်ဟ့ၣ်တၢ်ဖးလံာ်က့သ့ၣ်တဖၣ်အံၤန့ၣ်လီၤ. တၢ်အံၤမ့ၢ်ဒ်သိး ခါဒံးနၢၤလ် အကျါ တၢ်သးလီၤပလိာ် တအိၣ်ဘၣ်န့ၣ် ပှၤလၢအသးတီဒီး ခဲးသိးလ့းခ် လၢတၢ်ချၢသ့ၣ်တဖၣ် အသုတထံၣ်အီၤတဂ့ၤန့ၣ်လီၤ. အဝဲသ့ၣ်န့ၣ် ဆိကမိၣ်န့ၢ်ဝဲတၢ်လၢ တၢ်ဒီသဒၢ ပၤပၤအသီအံၤ အသူးသ့ၣ်လၤကပီၤအဂီၢ်သပှၢ်ပှၢ်န့ၣ်လီၤ.”
တၢ်ဃုထၢထီၣ်ပၤပၤအသီအတၢ်ဖံးတၢ်မၤတဆီဘၣ်တဆီန့ၣ် မ့ၢ်ဒ်သိးထံရူၢ်ကီၢ်သဲးတခါအသိး, လၢအမ့ၢ် ပှၤလၢလူၤပိာ်ထွဲလုၢ်လၢ်ထူသနူလၢပျၢၤဒီး ပှၤလၢလူၤပိာ်ထွဲစိၤခ့ခါဆၢကတီၢ်ခဲအံၤ အဘၢၣ်စၢၤ ဂုာ်လိာ်သးတၢ်စိတၢ်ကမီၤန့ၣ်လီၤ.
ဖဲအဝဲတၢ်တီခိၣ်ရိၤမဲအစိၤဆၢကတီၢ်န့ၣ်, ပၤပၤ ဖရၣ်စ့ၣ်အံၤ ဘၣ်တၢ်သ့ၣ်ညါပာ်ပနီၣ်အီၤဒ်သိးအမ့ၢ်ပှၤလၢ အဆီတလဲဒုးအိၣ်ထီၣ်တၢ်အသီတဂၤ, လၢအမ့ၢ် ပှၤလၢအတမ့ၢ် ပှၤယူရၤဖိဘၣ်သ့ၣ်တဖၣ်န့ၣ် ပာ်ထီၣ်ဝဲ ခါဒံးနၢၤလ် အါကတၢၢ် ဒီး ခဲကနံၣ်အံၤ ခါဒံးနၢၤလ်သ့ၣ်တဖၣ်အံၤ ကဘၣ်နုာ်လီၤပၣ်ဃုာ်ဖဲ တၢ်ဟ့ၣ်လီၤတၢ်ဖးအပူၤန့ၣ်လီၤ. ခဲကနံၣ်အံၤ ပှၤဃုထၢထီၣ်တၢ် ဘူးထီၣ် ၈ဝ မျးကယၤဃၣ်ဃၣ်န့ၣ် မ့ၢ်ပှၤလၢအဝဲပာ်ထီၣ်အီၤသ့ၣ်တဖၣ်န့ၣ်လီၤ.
ဘၣ်သ့ၣ်သ့ၣ် တၢ်အံၤကမ့ၢ် တၢ်န့ၢ်ပာ်ထီၣ်ဘၣ် ပၤပၤအသီတဂၤ လၢအမ့ၢ်ပှၤအဲၣ်ဒိးမၤတၢ်လဲၤထီၣ်လဲၤထီ မ့တမ့ၢ် ယၤဖှိၣ်နံၣ်အါမးအတီၢ်ပူၤ ကမ့ၢ်တၢ်အဆိကတၢၢ်တဘျီလၢ ပှၤအးဖြံးကး မ့တမ့ အ့ရှၢၢ် ကဲထီၣ်ဘၣ် ပၤပၤအသီတဂၤန့ၣ်လီၤ.
ဘၣ်ဆၣ်သနာ်က့ Cardinal Timothy Radcliffe ဟ့ၣ်ပလီၢ်ဒီး ထီဒါဝဲ တၢ်ဆိကမိၣ်ဆိပာ်စၢၤ လၢအတဘၣ်ခ့ဘၣ်ခါအံၤန့ၣ်လီၤ.
“ယဆိကမိၣ်န့ၣ် ပဖုဆိပာ်စၢၤဆူမဲာ်ညါတစဲးဖိ, ဒ်နသ့ၣ်ညါအသိး လၢတၢ်သးအုးအဂီၢ် Holy See ဃ့ပာ်ဝဲတၢ်ဆၢကတီၢ် ခွံသီ ဒီး တၢ်အံၤမ့ၢ်တၢ်လၢအရ့ဒိၣ်န့ၣ်ဒံးလၢ တၢ်ကဆိကမိၣ်တယာ်ဆိပာ်တၢ်လၢညါန့ၣ်လီၤ. ယဆိကမိၣ် အဝဲမ့ၢ်ပိာ်ခွါတဂၤလၢအိၣ်ဒီးနီၣ်ခိပူၤသးသဟီၣ်ဆူၣ်မးတဂၤဒီး အနီၣ်ခိအပူၤန့ၣ်အိၣ်ပှဲၤဒီးတၢ်မုာ်တၢ်ခုၣ်န့ၣ်လီၤ.”
