သကုၤဟီၣ်ခိၣ်ဒီဘ့ၣ်အပူၤ, ပိာ်ခွါသးစၢ်သ့ၣ်တဖၣ် အထံရူၢ်ကီၢ်သဲးတၢ်ထံၣ်န့ၣ် သုးအသးဆူ စုထွဲသနူကွ့ၢ်ကွ့ၢ်န့ၣ်လီၤ.
ဖဲကီၢ်အမဲရကၤအပူၤန့ၣ်, မ့ၢ်ထိၣ်သတြီၤ ပိာ်မုၣ်ဒီး ပိာ်ခွါလၢအသးနံၣ် ၁၈ တုၤ ၂၉နံၣ်အဘၢၣ်စၢၤတၢ်ဟ့ၣ်တၢ်ဖးန့ၣ် ပိာ်ခွါဟ့ၣ်တၢ်ဖးလၢ Donald Trump အဂီၢ်အိၣ်ဝဲ ၅၆ မျးကယၤဒီး ပိာ်မုၣ်ဟ့ၣ်တၢ်ဖးန့ၣ်အိၣ်ဝဲ အမျးကယၤ ၄ဝ န့ၣ်လီၤ.
ဘၣ်ဆၣ်သနာ်က့, ပှၤသ့ပှၤဘၣ်သ့ၣ်တဖၣ်စံးဝဲဒၣ်လၢ မ့ၢ်ထိၣ်သတြီၤဒီးထံချၢကီၢ်ချၢန့ၣ် ဖဲအီစထြ့လယါကီၢ်အံၤ တၢ်ဂ့ၢ်အိၣ်ဝဲစှၤကိးထံၣ် လၢအဆီၣ်ထွဲခူၣ်သူတၢ်လၢ စုထွဲသနူအဂီၢ်န့ၣ်လီၤ.
ဖဲလၢအဝဲမၤတၢ်ဃိထံၣ်သ့ၣ်ညါဘၣ်ဃး အီစထြ့လယါကီၢ်ပူၤ စုထွဲသနူပၣ်တံၣ်သ့ၣ်တဖၣ် အဂ့ၢ်ဝံၤအလီၢ်ခံ, ပှၤဃိထံသ့ၣ်ညါတၢ်ဒိၣ်လၢ Centre for Deliberative Democracy and Global Governance လၢအအိၣ်ဖဲ University of Canberra ဖၠၣ်စိမိၤ, Jordan McSwinney စံးဝဲဒၣ်လၢ အဝဲသ့ၣ်န့ၣ် အကရၢကရိတၢ်တဂ့ၤဘၣ်န့ၣ်လီၤ.
“[ပှၤဒိးဃုထၢသးသ့ၣ်တဖၣ်] အတသးမံဒီး ပၣ်တံၣ်အတၢ်အိၣ်ဆၢထၢၣ်ဘၣ် တကးဒ်ဘၣ်န့ၣ် အတသးမံစ့ၢ်ကီးဒီး ပၣ်တံၣ်အတၢ်ဖံးမၤဝးတရံးသ့ၣ်တဖၣ်.”
တမၤတသ့ တၢ်ကမၤဝဲဒၣ် တၢ်ဟ့ၣ်တၢ်ဖးန့ၣ် မ့ၢ်စ့ၢ်ကီးတၢ်ဂ့ၢ်တခါန့ၣ်လီၤ.
သးစၢ်ပှၤဃိထံသ့ၣ်ညါတၢ်ဒီးပှၤသိၣ်လိဘၣ်ဃးပၢပြးဂ့ၢ်ဝီဖဲ Flinders University ဖၠၣ်စိမိၤ, Intifar Chowdhury စံးဝဲဒၣ် စုထွဲသနူတၢ်ထံၣ်တၢ်ဆိကမိၣ်သ့ၣ်တဖၣ်န့ၣ် ပှၤဟ့ၣ်တၢ်ဖး လၢအအိၣ်ဒီးတၢ်ပာ်သးဖဲတၢ်ခၢၣ်သးဒီး အိၣ်ဒီးတၢ်ပာ်လၢမၤလဲလိာ်တၢ်သ့ၣ်တဖၣ် တသးစၢၢ်ဆၢအီၤဘၣ်.
“ပဝဲပှၤအီစထြ့လယါဖိသ့ၣ်တဖၣ်န့ၣ် အိၣ်ဒီးတၢ်ပာ်သးဖဲအခၢၣ်သးအပတီၢ်, အဃိန့ၣ် ပတၢ်အိၣ်သးန့ၣ် အတကဲထီၣ်ဒ်သိး တၢ်ကဲထီၣ်ဖဲဟီၣ်ခိၣ်ဒီဘ့ၣ်အသိးဘၣ်.”
မတၤတဂၤမ့ၢ်စုထွဲသနူ? မတၤတဂၤမ့ၢ်စုစ့ၣ်သနူ? တၢ်ပာ်ဖျါအကူာ်အံၤအပူၤ ပကွၢ်ဝဲဒၣ် အီစထြ့လယါကီၢ်ပူၤ မုၣ်ခွါတၢ်လီၤဖျဲၣ်လီၤဟိအတၢ်ထံၣ်တၢ်ဆိကမိၣ်သ့ၣ်တဖၣ်, ဒီး ဆီတလဲအသးဒ်လဲၣ်အဂ့ၢ်န့ၣ်လီၤ.
