CRISP -ຈະກາຍເປັນແບບຖາວອນ.
ຣັຖບານກາງ ໄດ້ປະກາດວ່າ ໂຄງການທົດລອງ Community Refugee Integration and Settlement - ທີ່ຮູ້ຈັກກັນໃນນາມ CRISP -ຈະກາຍເປັນແບບຖາວອນ.
ໂຄງການນີ້ ເລີ່ມຕົ້ນໃນກາງປີ 2022 ໄດ້ຊ່ວຍອົບພະຍົບ ຫຼາຍກວ່າ 500 ຄົນໃນການຕັ້ງຖິ່ນຖານ ໂດຍກຸ່ມຊຸມຊົນ ທົ່ວອອສເຕຣເລັຍ... ດັ່ງທີ່ Tom Stayner ແລະWing Kuang ລາຍງານ.
Juan Santamaria ອະດີດທະນາຍຄວາມຄະດີອາຍາ ໃນ Venezuela, ໄດ້ຫນີຈາກ ບ້ານເກີດຂອງລາວ ດ້ວຍຄວາມຢ້ານກົວ ສໍາລັບຊີວິດຂອງລາວ ແລະໄດ້ມາເຖິງອອສເຕຣເລັຍ ໃນປີ 2023.
ລາວໄດ້ເປັນສ່ວນຫນຶ່ງ ຂອງໂຄງການທົດລອງ Community Refugee Integration and Settlement, ທີ່ຮູ້ຈັກກັນໃນນາມ CRISP, ບ່ອນທີ່ລາວ ໄດ້ຮັບການສນັບສນຸນຈາກກຸ່ມຊຸມຊົນ ໃນທ້ອງຖິ່ນ ຕັ້ງແຕ່ການຈົດທະບຽນ Medicare, ຈົນເຖິງການຊອກຫາບ່ອນພັກອາສັຍ.
Mr Santamaria ກ່າວວ່າ ການສນັບສນຸນຈາກກຸ່ມຊຸມຊົນ ເປັນການຊ່ອຍເຫລືອຢ່າງຫລາຍ.
"ພວກເຮົາ ໄດ້ລໍຖ້າເປັນເວລາດົນນານ ແລະກ່ອນຂ້າພະເຈົ້າ ຈະມາຮອດທີ່ນີ້, ແລະເມື່ອພວກເຮົາໄປຮອດທີ່ນີ້, ສໍາລັບພວກເຮົາ ເປັນປະສົບການທີ່ຍິ່ງໃຫຍ່, ເພາະນັ້ນຫມາຍຄວາມວ່າ ການເລີ່ມຕົ້ນໃຫມ່ ສໍາລັບພວກເຮົາທຸກຄົນ, ຫລັງຈາກເວລາທີ່ຍາກລໍາບາກ ສໍາລັບພວກເຮົາ. ມັນເປັນໂອກາດທີ່ດີ ແລະມັນບໍ່ງ່າຍເກີນໄປ ທີ່ຈະຍ້າຍໄປຢູ່ອີກປະເທດຫນຶ່ງ ໃນອີກຟາກຫນຶ່ງຂອງໂລກ, ແຕ່ພວກເຮົາຮູ້ບຸນຄຸນຫລາຍ ແລະຕັດສິນໃຈທີ່ຈະກ້າວໄປຂ້າງຫນ້າ."
ເລີ່ມຕົ້ນໃນກາງປີ 2022, ໃນຕອນທໍາອິດ CRISP ເປັນໂຄງການສາມປີ ທີ່ເຊື່ອມໂຍງ ກຸ່ມຊຸມຊົນ ກັບຄອບຄົວອົບພະຍົບ ທີ່ໄດ້ຮັບການສນັບສນຸນ ຈາກອົງການອົບພະຍົບ ຂອງອົງການສະຫະປະຊາຊາດ ເພື່ອສນັບສນຸນການຕັ້ງຖິ່ນຖານໃຫມ່ ໃນປະເທດອອສເຕຣເລັຍ ເປັນເວລາ 12 ເດືອນ.
ຜ່ານໂຄງການ CRISP, Mr Santamaria ໄດ້ເຊື່ອມຕໍ່ກັບ ກຸ່ມຊຸມຊົນຂອງຊາວຢິວ, ແລະລາວໄດ້ກາຍເປັນເພື່ອນໃກ້ຊິດກັບ Guy Abrahams, ສະມາຊິກຄົນຫນຶ່ງ ຂອງກຸ່ມນັ້ນ.
ແລະດ້ວຍເຫດນີ້ Mr Santamaria ຈຶ່ງຍິນດີກັບຂ່າວທີ່ວ່າ ຣັຖບານກາງ ໄດ້ຕັດສິນໃຈ ທີ່ຈະເຮັດໃຫ້ໂຄງການ CRISP ເປັນແບບຖາວອນ, ຊຶ່ງເປັນສ່ວນຫນຶ່ງ ຂອງຂັ້ນຕອນ ການຕັ້ງຖິ່ນຖານໃຫມ່ ສໍາລັບອົບພະຍົບ.
"ການສນັບສນຸນຂອງ CRISP ສໍາລັບຜູ້ອົບພະຍົບ ທີ່ກໍາລັງຈະມາເຖິງ ແມ່ນສິ່ງສໍາຄັນ, ເພາະເມື່ອທ່ານມາເຖິງທີ່ນີ້ຄົນດຽວ, ທ່ານມາບ່ອນໃຫມ່, ໄດ້ຮັບການສນັບສນຸນຈາກຜູ້ທີ່ເຕັມໃຈຊ່ອຍເຫລືອ, ຕິດຕໍ່ກັບຊຸມຊົນຂອງເຂົາເຈົ້າ, ຊ່ອຍເຫລືອເຂົາເຈົ້າ ຕິດຕໍ່ກັບການບໍຣິການຂອງ, ແລະເຂົ້າຮຽນພາສາອັງກິດ, ແນະນຳເຂົາເຈົ້າ ເຖິງວິທີໃຊ້ລະບົບຂົນສົ່ງສາທາຣະນະ."
Julian Hill ຜູ້ຊ່ອຍຣັຖມົນຕີກະຊວງ Citizenship and Multicultural Affairs ກ່າວວ່າ CRISP ພົບວ່າ "ກຸ້ມຄ່າ" ແລະມີປະສິດທິຜົນ.
"ພວກເຮົາ ໄດ້ຮັບການຕອບຮັບ ຈາກຊຸມຊົນທົ່ວປະເທດ, ຈາກອົບພະຍົບ ຜູ້ທີ່ຊີວິດຂອງເຂົາເຈົ້າໄດ້ປ່ຽນໄປ ໂດຍການຖືກຕ້ອນຮັບ ເຂົ້າມາໃນປະເທດຂອງເຮົາ. ແລະຂ້າພະເຈົ້າ ໄດ້ນັ່ງລົມກັບອາສາສມັກ ຈາກຣັດແລະເຂດປົກຄອງຕ່າງໆ ເພື່ອຮັບຟັງປະສົບການຂອງເຂົາເຈົ້າ ແລະວ່າມັນເປັນລາງວັນທີ່ກຸ້ມຄ່າ ຫລາຍປານໃດ ສໍາລັບເຂົາເຈົ້າ ແລະຊຸມຊົນ ແລະຄອບຄົວຂອງເຂົາເຈົ້າ ທີ່ສາມາດເຮັດວຽກນີ້ ເພື່ອຕ້ອນຮັບຜູ້ຄົນ ໃຫ້ມາສູ່ປະເທດຂອງເຮົາ."
ໃນຕອນທຳອິດ, ໂຄງການທົດລອງ ການສນັບສນຸນອົບພະຍົບ ໃນຊຸມຊົນ ຈະສິ້ນສຸດລົງ ໃນເດືອນມິຖຸນາປີ 2025, ແຕ່ຣັຖບານ ໄດ້ສເນີໃຫ້ເງິນທຶນອີກ 1 ລ້ານໂດລາ ເພື່ອໃຫ້ດໍາເນີນຕໍ່ໄປ ຈົນເຖິງເດືອນມິຖຸນາປີ 2026.
Mr Hill ກ່າວວ່າ ບັດນີ້ມັນໄດ້ຖືກຂຍາຍອອກໄປຕື່ມອີກ.
"ການຕັດສິນໃຈໃນຕອນນີ້ ທີ່ຈະຮັກສາໂຄງການໄວ້, ເຮັດໃຫ້ມັນຖາວອນ ໃນໂຄງການມະນຸດສະທັມ ຂອງອອສເຕຣເລັຍ ອະນຸຍາດໃຫ້ອົງການ ແລະອາສາ ສມັກ ວາງແຜນ ເພື່ອຮັບເອົາຜູ້ຄົນແລະອື່ນໆຕໍ່ໄປ."
Lisa Button ເປັນຫົວຫນ້າ ຜູ້ອໍານວຍການໃຫຍ່ ຂອງ Community Refugee Sponsorship Australia, ຊຶ່ງປະສານງານໂຄງການ.
ບັດນີ້, ໂດຍທີ່ CRISP ກາຍເປັນໂຄງການຖາວອນ, Ms Button ຫວັງວ່າ ຈະ ຂຍາຍຂນາດຂອງມັນ ເພື່ອໃຫ້ຜູ້ຄົນ ໄດ້ຮັບຜົນປໂຍດຫລາຍກວ່າເກົ່າ.
"ມັນເປັນໂຄງການນ້ອຍໆ ໃນເວລານີ້, ແຕ່ພວກເຮົາ ມີຄວາມທະເຍີທະຍານອັນໃຫຍ່ຫລວງ ສໍາລັບ model ນີ້ ໃນອະນາຄົດ. ບັດນີ້ ເມື່ອພວກເຮົາໄດ້ພິສູດວ່າ ມັນມີປະສິດທິຜົນ, ພວກເຮົາ ສາມາດເຫັນຊາວອອສເຕຣເລັຍ ກ້າວໄປຫນ້າ ໃນຈໍານວນຫລາຍກວ່າເກົ່າ ໃນອະນາຄົດ, ເມື່ອມີໂອກາດໃນການມີສ່ວນຮ່ວມ. ພວກເຮົາ ມັກຈະປະຕິເສດ ຜູ້ຄົນທີ່ຢາກມີສ່ວນຮ່ວມ ໃນການສນັບສນຸນຜູ້ຄົນ ໃນວິກິດ ທີ່ກໍາລັງເກີດຂຶ້ນ, ໃນການອົບພະຍົບ ທີ່ປະເທດ Afghanistan ໃນປີ 2021, ຫລືໃນການມາເຖິງປະເທດ ຂອງຊາວ Ukraine ຫລື Gaza. ສະນັ້ນ ພວກເຮົາຈະຄົ້ນຫາວິທີ ທີ່ແບບຢ່າງນີ້ ຈະສາມາດຊ່ອຍເຮົາ ໃນທຸກສະຖານະການ ທັງເຖິງຄວາມພະຍາຍາມ ໃນດ້ານອື່ນໆແນວໃດ."
ເນື້ອເລື່ອງໂດຍ Tom Stayner and Wing Kuang ຂ່າວ SBS News,
ຈັດທຳໂດຍ ສັກ ພູມີຣັຕນ໌ ວິທຍຸ SBS ພາກ ພາສາລາວ.
ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌
