དེ་རིང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་དང་༧གོང་ས་སྐྱབས་མགོན་ཆེན་པོ་མཆོག་ལ་ནོ་བྷེལ་ཞི་བདེའི་གཟེངས་རྟགས་འབུལ་བཞེས་མཛད་ནས་མི་ལོ་ ༣༢ འཁོར་བའི་དུས་དྲན་སྲུང་བརྩི་ཉིན། བཀའ་ཤག་གི་གསུངས་འཕྲིན་ནང་” བོད་རྒྱ་གཉིས་ཀར་གྱོང་ལས་ཁེ་མེད་པའི་རྒྱ་གཞུང་གི་ནོར་འཁྲུལ་སྲིད་ཇུས་དེ་རིགས་ཁུངས་འཁྱོལ་ཐབས་མེད་ངེས་ཡིན་པས། བོད་མིའི་སྒྲིག་འཛུགས་ཀྱི་ངོས་ནས་གཉིས་སྨན་དབུ་མའི་ལམ་གྱི་འཇུག་ངོགས་ནས་རྒྱ་ནག་གཞུང་ལ་འབྲེལ་གཏུག་བརྒྱུད་བོད་རྒྱའི་དཀའ་རྙོག་སེལ་བའི་འབད་བརྩོན་བྱ་རྒྱུའི་ཆོད་སེམས་གཞིར་བཞག་ཐོག དེ་སྔ་རིམ་པར་ཞུས་ཟིན་པ་ལྟར། བོད་རྒྱའི་དཀའ་རྙོག་འདི་གཙང་སེལ་མ་བྱུང་བར་དུ། རྒྱལ་སྤྱིའི་ནང་བོད་དོན་ལས་འགུལ་རྒྱ་གང་ཆེ་སྤེལ་རྒྱུ་དང་། དེ་མཚུངས་སུ་རྒྱ་གཞུང་གི་ནོར་འཁྲུལ་སྲིད་ཇུས་དེ་རིགས་མཚམས་འཇོག་དང་ཡོ་བསྲང་དགོས་པའི་ཡིག་ཆ་ཞིག་ཀྱང་རྒྱ་ནག་གཞུང་ལ་རིང་མིན་སྤྲོད་འཆར་ཡོད།” ཅེས་གསུངས་འདུག
ཡང་དེ་རིང་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་དང་༧གོང་ས་མཆོག་གི་ནོ་བྷེལ་ཞི་བདེའི་གཟེངས་རྟགས་འབུལ་བཞེས་མཛད་ནས་མི་ལོ་ ༣༢ འཁོར་བའི་དུས་དྲན་སྲུང་བརྩི་མཛད་སྒོ་ཐོག་བོད་མི་མང་སྤྱི་འཐུས་ལྷན་ཚོགས་ཀྱི་གསུངས་བཤད་དེའི་ནང་“མང་གཙོའི་སྤྱི་ཚོགས་ནང་བསམ་ཚུལ་མི་མཐུན་པ་དང་། དེ་ལ་བརྟེན་ནས་རྩོད་རྙོག་སྣ་ཚོགས་ཡོང་གི་ཡོད་པ་ནི་འཛམ་གླིང་ཤར་ནུབ་ཀྱི་ཡུལ་གྲུ་ཀུན་ཏུ་གཅིག་མཚུངས་ཡིན་ཡང་། ༸གོང་ས་མཆོག་གི་རླབས་ཆེན་གྱི་དབུ་ཁྲིད་ལམ་སྟོན་འོག བོད་མིའི་སྒྲིག་འཛུགས་ཀྱི་འགན་ཁུར་མཁན་རྣམས་དང་། རྒྱ་ཆེའི་མི་མང་བཅས་ཀྱིས་བསམ་ཚུལ་མི་མཐུན་པ་རྣམས་ལ་གྲོས་བསྡུར་སྦྱངས་བཤད་ཀྱི་ཐོག་ནས། ཐོབ་ཐང་ལས་ལས་འགན་གལ་ཆེ་བརྩི་རྒྱུ་དང་། གང་ཟག་ལས་ཁྲིམས་སྒྲིག་གལ་ཆེར་བཟུང་སྟེ་ཡང་དག་པའི་མང་གཙོའི་ལམ་དུ་བསྐྱོད་དགོས་པ་ནི། ༸གོང་ས་མཆོག་གི་དགོངས་གཞི་དང་། མང་གཙོའི་ལེགས་བྱང་བླ་ན་མེད་པ་ཞིག་ཏུ་གྱུར་ཡོད་པ་མ་ཟད། བོད་ཀྱི་རྩ་དོན་འཐབ་རྩོད་ཀྱི་ཐོག་ནས་ཀྱང་གལ་གནད་ཆེན་པོར་གྱུར་ཡོད་པས། ཚང་མས་དེ་ལུགས་དམ་དོན་དགོས་པ་ནན་བསྐུལ་ཞུ་རྒྱུ་ཡིན།”ཞེས་གསུངས་འདུག
སྤྱིར་ནོ་བྷེལ་གཟེངས་རྟགས་ལ་ནོ་བྷེལ་ཞི་བདེའི་གཟེངས་རྟགས་དང་། ནོ་བྷེལ་རྩོམ་རིག་གཟེངས་རྟགས། ནོ་བྷེལ་དངོས་ཁམས་རིག་པའི་གཟེངས་རྟགས། ནོ་བྷེལ་སྨན་དང་སེམས་ཁམས་རིག་པའི་གཟེངས་རྟགས། ནོ་བྷེལ་རྫས་འགྱུར་རིག་པའི་གཟེངས་རྟགས། ནོ་བྷེལ་ཚོང་ལས་རིག་པའི་གཟེངས་རྟགས་བཅས་ནོ་བྷེལ་གཟེངས་རྟགས་ལ་རིགས་མ་འདྲ་བ་ཁག་དྲུག་ཡོད་པ་རེད།
འདི་ལོའི་ནོ་བྷེལ་ཞི་བདེའི་གཟེངས་རྟགས་དེ་བཞིན་པི་ལིན་ཕིང་གི་མི་རིགས་ཡིན་པ་གསར་འགོད་པ་དང་བུད་མེད་རྩོམ་པ་པོ་ Maria Ressa ལགས་དང་། ར་ཤི་ཡའི་གསར་འགོད་པ་དང་བརྙན་འཕྲིན་མདོ་འཛིན་པ་ Dmitry Muratov གཉིས་ལ་མཉམ་དུ་ཕུལ་ཡོད་པ་རེད། ནོ་བྷེལ་གཟེངས་རྟགས་ཚོགས་ཆུང་གིས་ཁོང་གཉིས་ཀྱིས་མང་གཙོ་དང་འགྲོ་བ་མིའི་ཞི་བདེའི་རྩ་བར་གྱུར་པའི་སྨྲ་བརྗོད་རང་དབང་སྲུང་སྐྱོབ་བྱེད་པའི་སྙིང་སྟོབས་དང་བྱས་རྗེས་རླབས་ཆེན་བཞག་ཡོད་སྐོར་འགྲེལ་བརྗོད་གནང་འདུག
