Key Points
- باکسنگ ڈے سیلز 26 دسمبر سے تقریباً ایک ہفتے تک جاری رہنے والاسب سے زیادہ مقبول ریٹیل ایونٹ ہے۔
- زیادہ تر مصنوعات جو آپ آسٹریلیا میں خریدتے ہیں صارف کی ضمانت کے ساتھ آتی ہیں۔
- چھٹیوں کے موسم میں یہ کاروباری سرگرمی $23-25 بلین تک کمانے کا باعث بنتی ہے، جس میں باکسنگ ڈے $3-4 بلین کا حصہ ڈالتا ہے۔
26 دسمبر کو منایا جانے والا باکسنگ ڈے آسٹریلیا میں مغربی عیسائیوں کے لیے کرسمس کی تقریبات کے بعد عام تعطیل ہے۔
اس دن کی جڑیں برطانوی تاریخ سے ملتی ہیں، جہاں یہ روایتی طور پر سروس ورکرز کو 'کرسمس باکس' دینے کا دن تھا۔
موناش یونیورسٹی کے سینٹر فار ریلیجیئس اسٹڈیز کے پروفیسر کانسٹنٹ میوز کا کہنا ہے کہ کرسمس باکس دینے کی روایت 16ویں صدی سے چلی آ رہی ہے۔
"یہ ایک طرح سے کام کرنے والے ملازمین اور مشقت والے کام کرنے والے افراد کو، ان کی خدمت کے لئے صلے میں تحفہ دینے کا وقت تھا ، اسی طرح اس کی ابتدا 16ویں اور 17ویں صدیوں میں ہوئی، جبکہ اس کا مقصد صرف اہل خانہ کو تحائف دینا نہیں تھا بلکہ ان افراد کو تعظیم دینا تھا جنہوں نے پورا سال بنا کسی چھٹی کے آپ کی اور آپ کے اہل خانہ کی مدد تھی مختلف کاموں میں یا شاید ان ملازمین نے محض اتوار کے روز تھوڑی چٹھی لی ہو۔ پروفیسر میوز کہتے ہیں
وہ بتاتے ہیں کہ باکسنگ ڈے ابتدائی طور پر سماجی تقسیم کو ختم کرنے کے لیے بنایا گیا تھا۔ 19ویں صدی کے آخر اور 20ویں صدی کے اوائل میں، یہ آرام، کھیلوں اور آسٹریلیا کے مشہور باکسنگ ڈے کی فروخت کا دن بن گیا۔
Brian Walker, CEO and Founder of Retail Doctors Group
باکسنگ ڈے سیلز
تحائف کی خریداری، چاہے دوسروں کے لیے ہو یا اپنے لیے، ایک ایسی سرگرمی ہے جس میں آسٹریلیا میں لاکھوں لوگ مشغول ہوتے ہیں۔
باکسنگ ڈے کی فروخت خریداروں کے لیے الیکٹرانکس سے لے کر کپڑوں تک مختلف اشیاء پر منافع بخش سودے حاصل کرنے کا ایک بہترین موقع ہے۔ ریٹیل ڈاکٹرز گروپ کے سی ای او اور بانی برائن واکر کا کہنا ہے کہ یہ سیلز آسٹریلیا میں ایک بڑی ڈیل ہے، جس میں ان گنت اسٹورز میں نمایاں رعایتیں دی جاتی ہیں۔
"باکسنگ ڈے کی فروخت روایتی طور پر کیلنڈر پر 26 دسمبر سے لیکر آئندہ تقریباً سات دنوں کے لیے پریمیئر ریٹیل شاپنگ ایونٹ رہی ہے۔ اس عرصے کے دوران تقریباً 23 سے 25 بلین ڈالرز کی خرید و فروخت آسٹریلیا میں قومی سطح پر کی جاتی ہے۔ اور خود باکسنگ ڈے یعنی 26 دسمبر کی تاریخ، اس پورے ایونٹ کا سب سے بڑا ایک دن ہوتا ہے، جس میں ایک واحد دن میں تقریباً تین سے چار بلین ڈالر کی خرید و فروخت کی جاتی ہے،" مسٹر واکر کہتے ہیں۔
باکسنگ ڈے 1980 کی دہائی سے ایک روایت رہی ہے جب بڑے ڈپارٹمنٹ اسٹورز اس پر غلبہ رکھتے تھے۔ تاہم اب ایسا نہیں رہا۔
مسٹر واکر کا کہنا ہے کہ اس کے بعد سے آسٹریلینزاور عالمی ریٹیل کے منظر نامے میں نمایاں تبدیلی آئی ہے۔
"اب، ان دنوں کے مقابلے میں مارکیٹ میں کافی زیادہ حریف موجود ہیں، کافی زیادہ طلب ، اور کافی زیادہ اسٹاک۔ لہذا، یہ ایک سطح پر خوردہ فروشوں کے لیے زیادہ مسابقتی ماحول فراہم کرتا ہے۔ یہ ان خریداروں کے لیے زیادہ مسابقتی ماحول ہے جو اچھی طرح سے تحقیق کے بعد بہترین اشیاء مناسب قیمت پر حاصل کرنا چاہتے ہیں،" وہ مزید کہتے ہیں۔
MELBOURNE, AUSTRALIA - DECEMBER 26: People shop at Cotton On during the Boxing Day sales at Chadstone the Fashion Capital (Photo by Naomi Rahim/Getty Images) Credit: Naomi Rahim/Getty Images
بہتر انداز میں خریداری کے تجربے کو قابل عمل بنانا
آسٹریلین اسٹائل انسٹی ٹیوٹ کے بانی لارین دی بارٹولو کے مطابق، باکسنگ ڈے فیشن اور طرز زندگی کی صنعتوں میں آسٹریلینباشندوں کے لیے خرید و فروخت کا ایک اہم اور بنیادی وقت ہے۔ لیکن خرید و فروخت کے لئے یہ واحد عرصہ نہیں ہے۔
باکسنگ ڈے کی کی رعائتی خرید و فروخت کا آغاز اکتوبر اور نومبر میں کلک فرینزی، بلیک فرائیڈے، اور نومبر کے آخر میں سائبر پیر سے ہو جاتا ہے۔
محترمہ دی بارٹولو کہتی ہیں، "باکسنگ ڈے ان چیزوں کو دیکھنے اور خریدنے کے لئے بہت زیادہ اہم ہے جنہیں خریدنا کچھ عرصہ سے آپ کی خواہش رہی ہو ، اور اب یہ وقت انہیں خریدنے کا اچھا موقع فراہم کرتا ہے یہ جانتے ہوئے کہ ان اشیاء کی قیمتوں میں نمایاں کمی واقع ہو جائے گی،" محترمہ دی بارٹولو کہتی ہیں۔
محترم واکر کے مطابق، رعایتی خرید و فروخت کا یہ بڑا سیزن نومبر کے وسط سے لے کر جنوری کے آخر تک ہر سال، تقریباً 70 بلین ڈالر کی متوقع کاروباری سرگرمی کا باعث بنتا ہے۔
آپ باکسنگ ڈے پر آن لائن اور ان اسٹور سیلز اور سودے تلاش کر سکتے ہیں۔ محفوظ طریقے سے خریداری کرنا بہت ضروری ہے، خاص طور پر آن لائن شاپنگ کے اس دور میں ہوشیار رہنے کی ضرورت ہے۔
خوردہ فروش کو جانیں، اس بات کو یقینی بنائیں کہ ان کا آن لائن خرید و فروخت کاعمل محفوظ ہے، بینکنگ کی تفصیلات چیک کریں، چیک کریں کہ تمام حفاظتی ایپس موجود ہیں، لیکن میرے خیال میں کسی بھی چیز سے بڑھ کر، خوردہ فروش کو جانیں۔ جان لیں کہ سائٹ محفوظ ہے، تمام معروف خوردہ فروشوں کے پاس محفوظ لین دین کے راستے اور محفوظ سائٹس ہیں۔برائن واکر
کیا آپ باکسنگ ڈے پر ذاتی طور پر خریداری کرنے کا انتخاب کر رہے ہیں؟
پیشگی تحقیق اور منصوبہ بندی آپ کے تجربے کو نمایاں طور پر بہتر بنا سکتی ہے اور اس بات کو یقینی بنا سکتی ہے کہ آپ اپنے مطلوبہ نتائج حاصل کریں۔
محترمہ دی بارٹولو کہتی ہیں کہ خریداری اور سیلز دریافت کرنا جذباتی تجربات ہیں، لیکن یہ اکثر بہت سے لوگوں کوخریداری کی لت میں مبتلا کر سکتی ہیں۔
"تحقیق اچھی چیزہے، خاص طور پر اگر آپ اس سال کا بجٹ دیکھ رہے ہیں، کیونکہ یقینی طور پر خریداری کے دوران بجٹ سے زیادہ خرچ کرنا ایک عام بات ہے ، خاص کر اس وقت جب مارکیٹنگ اور الفاظ کے چناو کے ذریعے وہ ہمیں پیسہ خرچ کرنے کی ترغیب دیتے ہیں،" محترمہ دی بارٹولو نے خبردار کیا۔
اگر آپ اسٹور یا شاپنگ سینٹر میں تحقیق اور خریداری سے گریز کرنا پسند کرتے ہیں، تو محترمہ دی بارٹولو خریداری کرتے وقت اپنے بجٹ اور ضروریات کو مد نظر رکھنے کا مشورہ دیتی ہیں۔
"دماغ کا ایک حصہ ہے جسے ریٹیکولر ایکٹیویٹنگ سسٹم کہا جاتا ہے۔ یہ انسانی نفسیات کا ایک طرح کا حصہ ہے۔ یہ جو کچھ کرتا ہے وہ یہ ہے کہ اس کے ذریعے ہم ایسی چیزیں ڈھونڈتے ہیں جن سے ہم پہلے ہی واقف ہوں ۔ تو اس کا کیا مطلب ہو سکتا ہے؟ اکثر ہم ان چیزوں کو تلاش کرتے ہیں جو ہمارے پاس پہلے سے ہی الماری میں موجود ہیں،" محترمہ دی بارٹولو بتاتی ہیں۔
غیر ضروری خریداری سے بچنے کے لیے، نئی اشیاء خریدنے سے پہلے اپنی الماری اور گھر کی اشیاء کا اچھی طرح جائزہ لیں۔
Australian Style Institute Founder Lauren Di Bartolo
بجٹ بنانا اور زیادہ خرچ کرنے سے گریز
میلبورن بزنس اسکول میں فنانس کی پروفیسر نادیہ مسعود کے مطابق، خرریداری کے لیے بجٹ بنانا بہت ضروری ہے۔ خریداری کے لیے ایک متعین رقم مختص کریں اور اس پر کاربند رہیں۔
"آپ کو آمدنی یا آمدنی کے ذرائع کی فہرست بنانے کی ضرورت ہے۔ پھر آئٹمائزڈ اخراجات کی فہرست بنائیں۔ کچھ اخراجات مستحکم ہوتے ہیں، اور ان پر ہمارا کوئی کنٹرول نہیں ہوتا ہے۔ اسے ہم مقررہ اخراجات کہتے ہیں اور اس میں تبدیلی ہو سکتی ہے جسے ہم صوابدیدی سمجھتے ہیں۔ اور یہ وہ جگہ ہے جہاں آپ کو مکمل کنٹرول حاصل ہے ،جہاں آپ انتخاب کر سکتے ہیں، کہ آپ کیا خریدنا چاہتے ہیں" محترمہ مسعود بتاتی ہیں۔
وہ تجویز کرتی ہے کہ صارفین باکسنگ ڈے کی فروخت کو اپنے مجموعی مقررہ اخراجات کو کم کرنے کے موقع کے طور پر دیکھیں۔
"اگر آپ کے بچے ہیں اور وہ عمر میں بڑھ رہے ہیں، اور آپ کو ان کے لیے کچھ جوتے اور کپڑے ضرور خریدنا ہوں گے، تو آپ وقت سے پہلے منصوبہ بنائیں۔ اور باکسنگ ڈے کی فروخت کے دوران وہ اہم چیزیں خریدیں،" وہ کہتی ہیں۔
آسٹریلوی صارفین کے حقوق کو سمجھنا
آسٹریلیا میں صارفین کے طور پر، یہ جاننا ضروری ہے کہ آپ کے حقوق اچھی طرح سے محفوظ ہیں، کیونکہ یہ آپ کو کافی پریشانی سے بچا سکتے ہیں۔
آپ ایسی ناقص یا غیر محفوظ مصنوعات کے لیے رقم کی واپسی، مرمت یا متبادل کے حقدار ہیں جو اپنی تفصیل کے مماثل نہیں ہیں۔ اپنی رسیدوں کو سنبھال کر رکھنے کا مشورہ دیا جاتا ہے، خوردہ فروش کے ساتھ کسی بھی مسئلے کو حل کرنے میں ہچکچاہٹ محسوس نہ کریں۔
نتاشا مان نیو ساوتھ ویلز فیئر ٹریڈنگ کمشنر کے مطابق، آسٹریلیا میں خریدی جانے والی زیادہ تر مصنوعات صارفین کی گارنٹی کے ساتھ آتی ہیں، اس بات کو یقینی بناتے ہوئے کہ پروڈکٹ اپنے مطلوبہ مقصد کے لیے توقع کے مطابق کام کرے گی۔
محترمہ مان کہتی ہیں، "مصنوعات کو قابل قبول معیار کا ہونا ضروری ہے۔ انہیں بغیر کسی خامی کے محفوظ اور دیرپا ہونے کی ضرورت ہے۔ انہیں قابل قبول نظر آنے کی ضرورت ہے، اس لیے ضروری ہے کہ مصنوعات پر کوئی خراشیں یا ڈینٹ یا ایسی کوئی چیز نہیں،" محترمہ مان کہتی ہیں۔
Boxing Day sales are an excellent opportunity for shoppers to grab deals on everything from electronics to clothing - Getty Credit: Diego Fedele/Getty Images
"باکسنگ ڈے کی فروخت کے دوران، صرف اس بات کو یقینی بنائیں کہ آپ وہی خرید رہے ہیں جو آپ خریدنا چاہتے ہیں کیونکہ اگر (چیز صحیح ہے اور) آپ اپنا خیال بدل لیتے ہیں، تو آپ خود بخود رقم کی واپسی کے حقدار نہیں ہوں گے،" محترمہ مان کہتی ہیں۔
شاپنگ آسٹریلیا میں باکسنگ ڈے کا ایک بڑا حصہ ہے، جبکہ اس کے ساتھ ہی اس دن کا سرگرم سماجی پہلو بھی موجود ہے۔
محترمہ دی بارٹولو کہتی ہیں کہ یہ لوگوں کو اکٹھا کرنے، آرام کرنے اور کرسمس کے بچا ہوا کھانے کے بارے میں ہے۔
"باکسنگ ڈے کو صرف خریداری کرنے یا خرچ کرنے کا دن ہونے کی ضرورت نہیں ہے۔ باکسنگ ڈے کے مرکز میں، بہت سے آسٹریلین شہریوں کے لیے، یہ ایک ایسا دن سمجھا جاتا ہے جہاں لوگ کرسمس تک کے تیز رفتار وقت اور افراتفری سے تھوڑی فرصت اکٹھی کرتے ہوئے آرام کرتے ہیں " محترمہ دی بارٹولو تجویز کرتی ہیں۔
