Raws li UNESCO tsab ntawv cej luam tsis ntev los no tau qhia, muaj ntiaj teb tej moj kuab yuav luag txog li ib nrab yuav ploj tag rau thaum yuav kawg rau kee tiam no (2100) lawm. Yog li lub koom haum no thiaj tau muab xyoo 2019 los ua xyoo nco txog pej kum haiv cov keeb cag neeg tej moj kuab (International Year of Indigenous Language 2019-), coj los qhia kom tib neeg paub txog tej no.
Tsis tas li no, lwm yam tseem ceeb ntawm tej lus thiab tej hauv kev uas peb khaws tej xov xwm cuam tshuam txog ntiaj teb tej moj kuab no los tseem yuav raug teeb meem pheej hmoo thiab.
Ntxiv ntawd tej txheej txheem khaws tej ntaub ntawv thiab muab coj los sau thiab zwm kom siv tau rau hauv computer, los yeej tsis tshua muaj neeg kub sib txog npaum li tej lus lawm thiab. Yog li ntawd Timothy Brookes uas yog ib tug kws teeb txheeb txog tej ntaub ntawv no thiaj qhia tias, yog tej moj kuab no ploj lawm ces yuav yog ib cov kev piam sij puas ntsoog loj tshaj plaws rau leej tib neeg txoj kev vam meej.
uas yav dhau los yog tus coj cov program sau ntawv (Professional Writing Program) ntawm lub tsev kawm qib siab Champlain College thiab tam sim no yog tus coj lub koom haum ceev cov moj kuab yuav ploj (Endangered Alphabets Inc.,) tau tig los kub siab txog ntiaj teb cov ntaub ntawv no thaum nws tau pib txaug cov sob lus rau tej phiaj ntoo.
“Thaum xub mas yeej yog muaj hmoo thiab muaj zoo cib fim kawg nkaus xwb, vim kuv yeej tsis yog ib tug neeg txawj txeeg txog fab txuj moj kuab thiab tsis yog ib tug paub zoo txog tib neeg txoj kev ua lub neej (Linguist or Anthropologist) li. 10 xyoo dhau los kuv tau pib txaug cov lo lus rau phiaj ntoo, los ua phiaj rau kev tsev neeg los yog rau tej neeg lagluam dai rau lawv tej khw los yog txaug rau tej neeg coj mus siv ua lwm yam.''
Ntiaj teb cov neeg pawg tsawg qee cov lus thiab moj kuab uas tej zaum yuav ploj tag rau thaum xaus rau kee tiam 21 no, Timothy Brookes, Endangered Alphabets. Source: Endangered Alphabets
“Ces txawm ua rau kuv pib txaug cov sob lus, cov lo lus, paj huam, sob lus teev hawm luv luv ua ntau hom ntaub ntawv sib txawv lawm."
Tom qab ntawd tsis ntev thiaj tau ua rau Timothy Brookes khwv tau tswv yim tias, yuav tau coj tej phiaj txaug ua ntau hom lus no, coj mus ua koom txoos tso rau tej neeg tau saib, kom ho tau sib tham thiab hloov tswv yim. Lub tswv yim no thiaj tau ua rau nws tau npaj koom txoos qhia txog tej phiaj ntoo thiab tej ntaub ntawv no los tau ntau xyoo. Ces thaum kawg, nws thiaj txiav txim siab tias, tsim nyog yuav tau kub siab tshaj no los nqes tes nrhiav hauv kev los pab tej neeg ceev thiab cawm lawv tej lus thiab tej ntaub ntawv uas tej zaum yuav ploj mus no.
“Yog tias ib lub teb chaws muaj ib pawg neeg feem coob uas coj ib yam kev cai thiab hais thiab siv ib hom ntaub ntawv thiab lus twg ntau dua, thiab ho muaj cov neeg pawg tsawg thiab cov keeb cag neeg uas lawv yeej muaj lawv kab lis kev cai thiab lawv tej ntau ntawv, ces tej neeg no tej teej tug hais no yeej yuav muaj peev xwm ploj tau thiab."
Brookes hais tias txawm UNESCO tau teeb txheeb txog tej lus uas yuav ploj plam ntawd ntxaws kawg, tab sis nws yeej tsis tau los txheeb txog tej ntaub ntawv uas yuav ploj no li thiab.
Thiaj ua rau Timothy Brookes xav tau lub tswv yim los ntawm UNESCO no los tsim los lus "Endangered Alphabets", uas thaum xub tsuas yog ib cov project me me xwb,
Tab sis thaum kawg kuj tau ras los ua kub koom haum uas tau teev zwm ntiaj teb tej ntaub ntawv tshaj ib puas tawm hom rau daim luaj chib lig (Atlas) uas tej zaum yog tsis ceev ces yuav ploj mus, thiab tau qhia txog keeb kwm me ntsis txog hom ntaub ntawv ntawd, nrog rau qhia txog tias hom ntaub ntawv ntawd nyob rau qhov twg hauv lawj kob xwb no thaum koj nyem rau cov pob liab liab ntawd.
Thiab raws li daim phiaj luaj chib lig (Atlas) no tau qhia ces muaj ntau cov mob kuab ntawm nrim av Asia yog cov tej zaum yuav ploj mus lawm yog piv rau lwm cheeb tsam hauv ntiaj teb no.
Brookes cov kev teeb txheeb tau qhia tias muaj ntiaj tej ntaub ntawv no ze txog li 170 hom tab sis tej zaum kuj muaj tej ntaub ntawv no txog li ntawm 80% yuav ploj tag rau thaum xaus kee tiam 21 no lawm thiab.
Nws qhia ntxiv tias, cov lus ntawm ntau cov keeb cag neeg li teb chaws niam dav (America), teb chaws dawm ntsuag nos (Australia) uas hais lus Askiv ntau ntawd ces twb tau ua rau tej keeb cag neeg tej lus thiab ntaub ntawv twb ploj tag lawm.
Daim phiaj qhia txog ntiaj teb cov pawg neeg tsawg thiab cov keeb cag neeg cawm lawv tej ntaub ntawv thiab lus kom txhob ploj, Timothy Brookes, Endangered Alphabets. Source: Endangered Alphabets
“Yog tias koj yog lub teb chaws ua kev zoo siab thiab lees paub tias yeej muaj ntau haiv neeg ntawm koj lub teb chaws, ces yuav muaj kev txhawb nqa ntau pawg neeg ntawm lub teb chaws ntawd tej kab lis kev cai, paj nruag thiab lawv txhua yam teej tug kom pab cawm tau tej hais no. Hos yog tias koj lub teb chaws ho pom tias, koj tsis uaj peev xwm yuav ua tau li hais no, vim ntshai tsam koj lub teb chaws yuav sib tawg tswj ua pab ua pawg thiab muaj teeb meem kub ntxhov sib cov nyom ntxhov quav niab, ces koj yeej yuav txwv thiab tsub nias lwm pawg neeg tej ntaub ntawv thiab tej lus. Yog li ntawd pawg neeg coob ntawm lub teb chaws ntawd txoj kev xav thiaj cuam tshuam txog cov pawg neeg tsawg tej kab lis kev cai no thiaj tseem ceeb heev.''
Ntawm ntau cov piv txwv ntawd, ces yog muab tham txog Hmoob tej lus thiab tej ntaub ntawv ntawd lawm, ces tus neeg uas tau tsim tus moj kuab coj los pov puag thiab ceev txuag Hmoob tej kab lis kev cai no, twb raug neeg muab tua tuag lawm. Tus neeg ntawd ces txawm yog niam ntawd Yaj Soob Lwj ntag.
Soob Lwj Yaj yog Hmoob ib tug coj sab ntsuj plig thiab Hmoob paub tias nws yog "" ntawm tsav neeg Hmoob rau keem tiam 20 dhau los, uas nws kuj yog ib tug neeg ntawm tsev neeg Hmoob uas yeej ib txwm siv ncauj qhia tej kab lis kev cai thiab khaws Hmoob teej tug txhua yam txheej dhauv txheej, kuj tau los rhawv tsim thiab khaws tus moj kuab Phajhauj rau Hmoob siv ntawd, twb raug tua rau xyoo 1971 tsis ntev tom qab nws tau coj cov ntawv no los qhia rau zej tsoom Hmoob. Ntxiv ntawd, nom tswv ntawm ob 2 lub teb chaws Nplog thiab Cob tsib tseem txwv tsis pub qhia thiab kawm los yog siv tus ntawv Phajhauj no thiab.
“Nws cov kev muaj peev xwm tsim tau cov ntawv sau tiav uas tej neeg coj mus siv thiab coj mus qhia thiab kawm thiab coj los siv tam li yog ib yam tsim nuj, coj los txhawb Hmoob tej kab lis kev cai thiab Hmoob lub meej mom ua rau raug muab saib rau lub sam xeeb, raug ntaus nqe los ntawm tus tsoom hwv Nplog dhau los, los sis tus tsoom hwv nam nrim teb nrim chaw dhau los tias, yog ib cov kev hawv tawm tsam nrog lawv, ces tej nom tswv no thiaj tau muab nws txov nruam sim lawm."
Txawm li cas los, Brookes qhia tias ntiaj teb kuj tau muaj kev thim xav lawm, thiab ib txhia tseem hwv yeej tau tig los kub siab nrog ceev tej neeg txum tim tej lus thiab ntaub ntawv cia lawm thiab.
Hauv teb chaws Australia, los yeej muaj neeg paub txog Australia tej keeb cag neeg tej lus thiab ntaub ntawv ntau ntuaj ntxiv, hos nyob teb chaws New Zealand los nom tswv yeej tau tso cai los tsim cov program rau nws cov neeg txum tim Maori los tshaj tawm lawv cov lus hauv ntau hom media platforms lawm thiab.
Tshaj ntawd ntxiv, tseem hwv Filipino "kuj tau tsim ib tsab cai tsis ntev los no, los txheeb xyuas nws cov keeb cag neeg tej lus thiab ntaub ntawv, tsim cai coj los pov puag, ceev tseg thiab txhawb nqa kom coj los qhia hauv tej teej kawm, mus txog rau siv ntau txoj xub ke los txhawb nqa kom tej ntaub ntawv no txhob ploj mus," raws li Brookes tau qhia.
Tsis ntev los no los, tseem hwv Japanese yeej tau tsim ib tsab cai los pov puag nws cov keeb cag neeg Ainu tej kab lis kev cai thiab lus ntaub ntawv teej tug lawm thiab.
Lwm cov piv txwv ntxiv ces yog tau coj "tej phiaj qhia kev (Road signs) uas sau ua cov lus Askiv thiab cov lus Inuktitut los siv rau teb chaws Canada cov keeb cag neeg Innu tej zos cov kev tsheb lawm thiab.''
Yog li ntawd Brookes thiaj tau qhia tias “Tej xwm txheej tau teev los no, yeej yog ib lub cim uas txhawb siab thiab txhawb dag zog kawg nkaus li thiab."
Timothy Brookes uas yog tus coj lub koom haum Endangered Alphabets hais tias, txawm cov kev plam tej lus tsuas yog ib feem ntawm cov kev plam qee yam ntawm ib cov kab lis kev cai zuj zus rau ib lub sij hawm ntev twg xwb los, yeej yog ib cov xwm txheej yuav ua rau muaj teeb meem loj heev rau ib pawg neeg twg, ces tej teeb meem ntawd yuav ras los ua ib co teeb meem loj cuam tshuam rau zej tsoom txoj kev noj qab haus huv thoob ntiaj teb tau thiab.
Timothy Brookes tau hais tias “Yog peb los xyuas tias muaj dab tsi tshwm sim rau cov pawg neeg tsawg thiab cov keeb cag neeg uas tej kab lis kev cai ua rau lawv plam lawv lub cim thawj (Identity) thiab tsis paub tias tsav neeg ntawd muaj lub hom phiaj li cas lawm, ces yuav ua rau tsav neeg ntawd txov txos lawv tus kheej txoj sia ntau tuaj ntxiv, ua rau lawv quav dej quav cawv, quav yeeb quav tshuaj ntau tuaj ntxiv, ua rau tej me nyuam mos tas sim neej coob tuaj ntxiv, ua rau lawv muaj tej neeg kawm txuj ci siab tsawg tuaj ntxiv, thiab ua rau lawv yug me nyuam tsawg tuaj ntxiv. Tej xwm txheej no thiaj tsis yog cov kev piaj sij rau ntiag tug xwb, tab sis tseem yog ib cov kev puas tsuaj rau tag nrho sawv daws thiab, vim yuav ua rau muaj teeb meem cuam tshuam txog zej tsoom cov kev tswj kev noj qab haus huv li tau muaj rau teb chaws Canada, tau tshwm sim ntawm teb chaws America, thiab kuv ntseeg tias yeej tau tswm sim ntawm teb chaws Australia tib yam thiab."
Brookes qhia tias tsab xo kuv xav xa rau cov neeg pawg coob ntawm ib lub teb chaws uas coj ib yam kev cai dab qhua twg, ces xav qhia rau lawv tias, "lawv yeej tsis paub li tias, yog tej neeg tsis muaj tsoom hwv tsis muaj peev xwm yuav hais tau cov neeg feem coob ntawm lub teb chaws ntawd tej lus zoo, ces yuav ua rau lawv muaj teeb meem cuam tshuam txog tej cai lij choj, cuam tshuam txog cov kev pab cuam, cuam tshuam txog kev tswj kev noj qab haus huv, thiab cuam tshuam txog txhua tsav yam ntawm lawv lub neej."
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
