Mloog tau zaj xov xwm no ua lus Hmoob tau ntawm no:
LISTEN TO
AMA hais tias kom kho Medicare vim siv tsis tau hauj lwm
SBS Hmong
06/02/202514:30
Tau hu thawj cov Medicare uas raug tsim coj los siv ua Medibank - uas tau raug tsim coj los siv xyoo 1975 tom qab tsis muaj peev xwm coj cov universal healthcare system coj los siv ob peb zaug ntawm teb chaws Australia.
Tab sis txog rau thaum ntxov lub caij xyoo 1980s ntawd ces dua ntawm tag nrho txhua tus neeg Australia yuav tau siv, tsoom fwv tsuas pub cov Medicare no rau tej neeg so tsis ua hauj lwm, tej cuab yig khwv tau nyiaj tsawg siv xwb ces thiaj ua rau ntau pua txheeb yim neeg Australia yuav tau tos siv cov private health insurance.
Xyoo 1983 ces thiaj rov qab los tsim cov universal health insurance scheme dua, thiab xyoo txuas ntxiv ntawd thiaj pib coj cov Medicare rov qab los siv.
Thiab txawm tias tsis yog tej yam ua tau yooj yim los kuj zoo li tseem yuav rov qab los npaj dua thiab.
Danielle McMullen uas yog tus coj ntawm lub koom haum Australian Medical Association (AMA) hais ces tseem yog ib co Medicare qub uas siv li yav tag los xwb.
"Tau tsim xyoo 1984 thiab lub caij ntawd los tsuas yog ib co kev kho mob yooj yooj yim ib yam los yog ob yam uas tej neeg mus ntsib tau ib tug kws kho mob thiab tsuas siv sij hawm txog li ntawm ntau ntiag tiv (minutes) xwb. Tab sis tam sim no peb poob rau lub caij uas tej neeg muaj mob ntau yam thiab yog tej mob uas mob los ntev, ua rau tej neeg muaj teeb meem nyuaj siv ntxov plawv ntau tuaj ntxiv, thiab txawm cov kev kho tej mob ntau yam yooj yooj yim xwb los yeej yog cov uas sib chab sib chaws tshaj tej muaj rau lub caij xyoo 1980s, tab sis peb tseem siv tib co Medicare li qub xwb.''
Dr McMullen hais tias tej laj thawj vim li cas AMA thiaj xav thov kho cov Meicare kom vam meej yog xav kom kub siab ceev nrooj los kho cov system no. Tsis hais yog pab nyiaj kom txaus rau tej hauj lwm kho mob, thiab tsim tej cai 7 theem rau cov kev kho mob kom tej neeg mob tau siv sij hawm ntev zog ntsib kws kho mob.
"Lub caij ntsib kws kho mob tam sim no ces ntev tshaj 18 ntiag tiv lawm. Tab sis Medicare yeej raug tsim coj los siv rau lub caij uas tej neeg tsuas siv sij hawm li 10 ntiag tiv mus ntsib kws kho mob xwb. Tsis tas li ntawd los kuj tsis muaj peev xwm thov cov Medicare rebates raws lub sij hawm kho mob ntev zog kom thiaj haum raws li tej nqe kho mob thiab. Txhais tias tej neeg mob siv sij hawm ntev dua ntxiv thiab yuav tau them nqe kho mob kim zog ntxiv lawm, tsis tas li ntawd los zoo li tej nqe kho mob mus ntsib ib tug kws kho mob twg yeej kim zujzus tuaj lawm, thiab peb paub tias yog tej yam nyuaj heev rau lub caij uas tseem muaj tej nuj nqes siv ua lub neej ntau yam no.''
Tab sis vim li cas tej neeg thiaj xav tau lub sij hawm siv ntev tuaj ntxiv?
Dr Michael Wright uas yog tus coj ntawm lub koom haum sawv cev rau tej kws kho mob (Royal Australian College of General Practitioners -RACGP) tshab txhais tias:
"Qhov peb tab tom txheeb tau ces yog muaj peb tej pej xeem coob tuaj ntxiv lawm, thiab kuj yog tej pej xeem uas muaj hnoob nyoog zog ntxiv, thiab yeej muaj peeb coob tuaj ntxiv los yog cov neeg ua lub neej nyob nrog tej mob nkeeg ntau yam uas mob ntev thiab. Tsis hais yog mob ntshav qab zib, hawb pob, muaj neeg ntau tuaj ntxiv ntsib teeb meem nyuaj siab ntxhov plawv. Ces thiaj ua rau muaj cov kev pauv hloov rau peb tej kev kho mob lawm, tab sis yeej tseem siv tej Medicare qub xwb. Yog li qhov peb xav tau thiaj xav kom nqes peev nyiaj kom ntau tuaj ntxiv pab tsim kom tau cov kev kho mob ntev zog tuaj ntxiv siv.''
Nws hais tias cov kev xyuas kom siv tau lub sij hawm kho mob ntev ntxiv tuaj tej zaum kuj yuav pab tsoom fwv txuab tau nyiaj ntev rau yav tom ntej thiab.
"Yog tau lub caij sab laj mob nkeeg ntev zog ces yuav pab kom yus tsim tau cov kev kho mob zoo siv kho tus neeg mob. Vim rau qhov lub sij hawm 5 ntiag tiv (minutes) xwb yeej tsis muaj peev xwm kho tau, vim yeej pom tias tej neeg yeej ib txwm muaj ib yam mob, los sis tej zaum muaj ob peb yam mob. Tsis tas li ntawd los kuj tseem tshuav cov kev pab tiv thaiv kom tsis txhob mob nkeeg thiab, li ua tib zoo xyuas kom lawv tau mus txheeb txhua yam tshiab, thiab kuj cuam tshuam txog tej neeg mob tej teeb meem nyuaj siab ntxhov plawv, los yog lwm yam teeb meem, ces tej no thiaj yuav tau siv sij hawm kom ntau zog ntxiv. Yog tias peb tshwm nyiaj los ua tib zoo pab tej khw kho mob raws li qhov tsim nyog, ces peb yuav pab kom tej neeg ntawm tej zejzog tau txais kev noj qab nyob zoo, thiab yog ib cov kev nqes peev zoo tshaj plaws pab rau Medicare vim yog ib cov kev pab kom tej zejzog tau txais kev noj qab haus huv, ces yuav tsis ua rau lawv mus siv lub tej tuam chav emergency departments los yog siv tej tsev kho mob, uas peb paub tias yeej kim tshaj tej nqe teem caij mus ntsib yus tus kws kho mob.''
Lub koom haum AMA thiaj tab tom nqua hu kom siv ntau yam tswv yim los tswj tej kws kho mob cov kev kho mob, thiab npaj qhia ntau tshaj 500 tus kws kho mob ntxiv. Dr McMullen thiaj hais tias Australia tab tom tsis muaj tej kws kho mob txaus siv.
"Yog tias peb tsis kub siab ua ib yam dab tsi, ces lub sij hawm 6 xyoo ntxiv no yuav ua rau tsis muaj tej kws kho mob coob tshaj 10,000 tus siv lawm. Vim rau qhov lawv pheej thov tsis tau cov Medicare rebates txaus, thiab zoo li tej kws kho mob cov kev ua hauj lwm kho mob no yeej khwv tsis tau nyiaj zoo kom ua tau lub neej tsim nyog thiab. Tsis tas li ntawd los kuj yog tej yam nyuaj heev yuav nrhiav tau tej neeg los ua hauj lwm ua kws kho mob vim lawv muaj peev xwm ua tau lwm yam hauj lwm dab tsi tsi ntsees lawm.''
Peter Breadon uas yog tus coj uas tswj cov hauj lwm noj qab haus huv ntawm lub chaw teeb txheeb Gratton Institute hais tias tej zejzog khwv tau nyiaj tsawg yog cov uas ntsib teeb meem ntau tshaj plaws ntawm peb cov healthcare system tam sim no.
"Yog tej neeg txom nyem zog uas tsi muaj peev xwm yuav them tau tej nqe kho mob mus ntsib ib tug kws kho mob twg, ces thiaj ua rau lawv muaj tej xub ke xaiv tsawg dua tias yuav mus kho mob qhov twg lawm. Thiab tej neeg nyob rau ntawm tej chaw uas tsis tshua muaj kws kho mob siv, tej neeg zejzog zos toj sib ntawm ntau thaj chaw ntawm teb chaws Australia uas muaj cov kev kho mob siv tsawg los yog tej neeg uas pheej muaj mob nkeeg dua, yog cov neeg uas yuav mus siv tsev kho mob kho ib yam mob twg uas muaj peev xwm tiv thaiv tau yog tias peb muaj cov primary healthcare zoo siv. Vim tej chaw li hais no yog cov uas muaj cov bulk billing siv tsawg dua thiab ua rau tej neeg mob tau them nqe kho mob ntau dua. Thiaj yog tej yam txawv uas peb muaj tej kev kho mob tsawg tshaj plaws rau tej neeg ntawm tej chaw uas xav tau cov kev kho mob siv tshaj plaws.''
Dr Wright thiaj hais tias muaj ob co tswv yim uas yuav tau kub siab txog thiaj daws tau tej teeb meem no.
"Tej kws kho mob xav tau nyiaj ntau pab rau cov kev kho mob Medicare no tom qab tau ntau xyoo uas ntau tus tsoom fwv tau txiav tej nyiaj pab cuam, thiab yeej tsis tshwm nyiaj pab rau cov kev kho mob Medicare thiab xyuas kom muaj peev xwm thov tau cov Medicare rebates raws li tej kab theem nyiaj poob nqe. Kuv xav tias peb yuav tau ua ob yam. Li xyuas kom yooj yim zog ntxiv rau tej chaw kho mob GPS uas siv cov bulk bill muaj peev xwm thov tau cov rebate kom thiaj tau sij hawm kho mob ntev zog siv thiab xyuas kom tej neeg mob tau rho nyiaj ntug kom tsawg them tej nqe kho mob yog tias lawv yog cov neeg uas tsis tau siv cov bulk billing. Thiab peb yuav tau qhia kom tau tej kws kho mob coob ntxiv, thiab pab kom tej neeg mob los muaj peev xwm mus thov tau cov rebates ntau zog ntxiv, thiab ua tib zoo xyuas kom muaj peev xwm tau lub sij hawm ntev zog mus ntsib tau kws kho mob tau yooj yim zog thaum lawv xav siv.''
Thiab lub caij uas ze ze rau qhov twb yuav txog lub caij xaiv tsa tsoom fwv teb chaws tshiab no, tej zem tej tsoom fwv yav peb suab yuav raug tsub nias kom xub kub siab los txheeb tej hauj lwm Medicare ntawm lawv tej nyiaj puag xyoo. Dr McMullen hais tias:
"Ob tog nom tswv yeej xav pab kom neeg Australia tau txais kev noj qab nyob zoo, tab sis lawv tsuas muaj nyiaj txaus li lawv yuav ua lawv tej dej num xwb, thiab peb yeej paub tias yeej yog tej yam ntawm ntau yam uas yuav coj mus nrhiav suab sib tw xaiv nom. Tab sis peb xav tias cov hauj lwm kho mob yuav tsum yog ib co tseem ceeb tshaj plaws ntawm ntau yam hauj lwm. Vim yeej paub tseeb tias tsis muaj dab tsi yuav tseem ceeb tshaj cov kev nqe peev pab kom tej neeg tau txais kev noj qab nyob zoo. Ces peb thiaj yuav txhawb nqa ob tog ua ntej cov kev xaiv tsa no kom xub kub siab txog neeg Australia cov kev noj qab haus huv ua ntej thiab ua tib zoo xyuas kom lawv npaj tej txheej txheem los ua tej no.''
Nws thiaj hais ntxiv tias tsis hais leej twg li yog yeej los ua tsoom fwv tshiab yuav tsum tau kub siab maj ceev nrooj los xyuas tej hauj lwm no:
"Kuv xav tias peb nyob rau ntawm txoj kev tshuam lawm uas yuav tau txiav txim siab seb yuav taug txoj twg tom qab tau ntau xyoo uas tau txiav nyiaj pab rau tej Medicare thiab tsis tau nyiaj txaus raws tej nyiaj poob nqe, thiab tej nyiaj Medicare rebates uas thov tau los yeej tsis duav tej nqe siv los tsim tej kev pab cuam kho mob. Tsuas yog tias tsoom fwv yuav tau nqes tes daws kiag tej teeb meem nod tam sim no xwb, tsis li ntawd ces ntshe yuav tsis muaj ib tug tsoom fwv twg uas yuav muaj peev xwm los tswj tau tej teeb meem no.''
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab mloog tau caum los yog lwm cov podcast platforms (, , thiab ).
