ณัฐพล สืบศักดิ์วงศ์ los yog Nuj Phlaib yog ib tug Hmoob nyob Thaib teb thiab koom nrog pab nom Future Forward tau raug xaiv los ua ib tug nom sawv cev rau pej xeem mus ua nom hauv Thaib lub tsev tsoom hwv lawm.
Tsis yog nws tib leeg xwb tab sis yeej muaj ntau tus Hmoob feem ntau yog txiv neej, kuj muaj ib tug poj niam Hmoob nrog thiab tau mus sib tw sawv cev rau ntau pab nom xws li Prachachart Party, Phalang Thongthin Party. Tab sis lawv kuj tsis raug xaiv li thiab tsuas yog Nuj Nplhaib thiaj raug xaiv rau pab Future Forward xwb.
Kuj yog ib cov xwm txheej tseem ceeb rau keeb kwm Hmoob Thaib rau tej laj fai kum xeeb no, kom los pab tau lawv txoj kev ua lub neej raws li qhov tsim nyog, tom qab uas tsaib no tau muaj 6 tus Hmoob ntawm teb chaws America raug xaiv los ua nom thiab ua kws lij choj lawm thiab.
Pab nom Future Forward los kuj muaj ib tug txiv neej Hmoob hu ua ณัฐพล สืบศักดิ์วงศ์ yog thawj tug Hmoob nyob Thaib teb uas raug xaiv los ua nom sawv cev rau pej xeem mus ua hauj lwm nrog pab nom Future Forward hauv Thaib lub tsev tsoom hwv lawm thiab. Lub caij thaum tseem nrhiav suab ntawd, nws tau los hais lus rau tej pej xeem Thaib cov neeg pawg tsawg tias:
'' Kuv yug thiab loj hlob rau lub caij tseem muaj cov kev sib tawg tswj ntawm 2 cov tswv yim khoom tsham thiab democracy uas muaj tej xwm txheej sib ntaus sib tua nyob nrog suab phom nqaij ntuag ntshav nrog thiab ua lub neej txom nyem tsis pom qab cob cuab. Peb cov neeg nyob toj siab los yeej ib txwm raug lwm tus liam thiab ntau nqe yuam kev, raug qhia hauv tej teej kawm tias yog cov neeg txov zoov, tab sis cov neeg Pabkaskawbyos yog cov txawj txuag thiab ceev tau tej hav zoov zoo tshaj plaws, cov neeg lagluam nroog thiaj yog cov txov zoov, hos tej neeg toj roob hauv pes mas txiav ib tug xyoob xwb yeej txhaum cai. Teeb meem yaj yeeb los liam tias yog cov neeg toj roob ua, tab sis lub chiv keeb tiag yog cov neeg nroog yog cov pib. Yog li nom tswv thiaj li raug ntaus nqe tias cov neeg pawg tsawg nyog toj roob hauv pes yog cov tsim teeb meem ntau yam-ua muab peb piv zoo li lub thoob rau khoom qias uas pov txhua yam tsis huv rau xwb. Peb yuav tsis faj peb tej teeb meem rau lwm tus nom pab coj mus sab laj thiab daws ntxiv lawm, kuv thiaj tuaj ntawm no thiab lees los ua tus sawv cev yuav mus hais tej teeb meem no sawv cev rau peb cov neeg pawg tsawg qab teb thoob qaum teb. Lub neej pem suab yav tag peb tsis xav tau lawm tab sis xav tau lub neej pem suab tshiab thiab pab nom Future Forward yog tus yuav los xyuas tej hauj lwm no lawm."
Tom qab tsoom hwv peeb zeej Prayut Chan-Ocha tau txeeb tsoom hwv pej xeem lub fwj chim los tswj kav txij xyoo 20194 los, ces nws tau muab cov kev xaiv tsa ncua ntau zaus. Txog rau hnub tim 24. 03.2019 dhau los thiaj yog thawj zaug ntawm 5 xyoos uas pej xeem Thaib rov qab muaj cai los xaiv tsoom hwv Thaib tshiab dua, seb lawv yuav xaiv tus tsoom hwv peeb zeej los tswj hwm txuas ntxiv, los yuav xaiv tsoom hwv pej xeem uas tswj democracy ntawd.
Pab nom Prachathipart yog pab uas swb cov kev sib tw loj tshaj plaws zaum no.
Mloog tau cov lus tham txog moj kuab Phaj Hauj uas yog ib co ntawm ntiaj teb cov ntawv ntau hom uas yuav ploj mus rau tiam no yog tsis kub siab khaws, ceev tseg thiab los kawm los qhia los siv tau ntawm no:
Hmoob kuj muaj ntau tus neeg mus sib tw nrog ntau pab nom li Phalang Thongthin Party thiab Prachachart Party los yog Future Forward Party thiab, tab sis yeej tsis raug xaiv thiab tsis tau li, tsuas tau tib tug uas yog Nuj Nplhaib uas nrog pab nom Future Forward nkaus xwb. Thiaj ua rau cov nom Hmoob no tu siab heev tias lawv twb siv dag siv zog kawg nkaus tab sis Hmoob tseem tsis xaiv lawv thiab ho mus xaiv lwm pab nom lawm.
Raws li tau muaj xov xwm qhia, 2 pab nom tseem ceeb uas yog Phalang Pracharat, tus tsoom hwv peeb zeej uas thawj pwm tsav Prayut Chan-Ocha tswj hwm tam sim no tau suab txog li 249 lub suab los ua lwm pawg fai kum xeeb (Opposition party), hos pab Pheu Thai uas Ms Sudarat Keyuraphan yog tus coj ntawm yeej cov rooj nom txog 251 lub rooj nom.
2 pab nom nom tseem ceeb no tseem yuav tau los nrhiav lwm pab nom los koom ua tus tsoom hwv koom tswj thiaj teeb tsa tau tsoom hwv tshiab uas nkawv yeej nrhiav tau lawm thiab, tab sis tseem muaj teeb meem cuam tshuam tias, thaum tus tsoom hwv peeb zeej no tau los kho tej txhooj cai tswj haiv (Constitutions) ntawd ces nws tau teev tias nws muaj cai tau 250 lub rooj nom los ntxiv cov uas nws xaiv tsa yeej ntawd ces nws muaj cai los tsa tsoom hwv thiab ua tau thawj pwm tsav tshiab lawm.
Thiaj ua rau muaj neeg pom tias yog ib cov kev ua tsis ncaj lawm thiab tab sis pej xeem Thaib yeej tau pom zoo los tsim tsab cai no lawm thiab.
Ib txhia kuj hais tias yuav tsum tau yuav raws li tej rooj nom uas pej xeem xaiv xwb leej twg tau ntau lub rooj nom ces pab nom ntawd yog pab yeej thiab muaj cai los tsa thawj pwm tsav thiab teeb tsa tsoom hwv los tswj hwm. Tab sis tus coj pab nom Phalang Pracharat hais tias nws tau cov suab neeg nyiam nws ntau dua (Popular vote) uas cov nom kis xeev siab tseem yuav los tawm suab pom zoo ntxiv thiab ces nws muaj cai los teeb tsa tsoom hwv tau.
Thiaj ua rau Ms Sudarat Keyuraphan uas yog tus coj ntawm pab nom Pheu Thai pom tias tsis ncaj lawm thiab tau hais tias yus muaj 350 lub rooj nom tab sis sib tw yeej tsawg hos cov muaj 250 lub rooj nom xwb tab sis swb tw yeej cov rooj nom coob ces tsim nyog pab yeej cov rooj nom coob yeej.
Raws li Bangkok Post tau tshaj tawm, Dr Thaksin Chinawatra uas yog Thaib tus thawj pwm tsav dhau los kuj tau qhia tias, Mr. Thaksin tau qhia rau New York Times tias,
"Txawm tus tsoom hwv peeb zeej no tso cai rau ntau pab nom nyiam cov kev tswj hwm democracy los tswj kav los nws yeej tseem muaj fwj chim, thiab nws yeej yuav siv txhua txoj xub ke los ua kom nws muaj fwj chim tswj kav, thiab nws yeej tsis paub txaj muag li. Ntxiv ntawd nws tseem tau hais tias tej zaum yeej yog pab nom Phalang Pracharat uas tus tseem hwv Prayut Chan-Ocha txhawb nqa no thiab lub chaw tswj cov kev xaiv tsa no ua tsis ncaj rau cov kev xaiv tsa no lawm thiab."
Rau qhov lub caij xaiv tsa tim 24.03.2019 dhau los no uas tseem muaj Thaib ib cov pej xeem ntawm teb chaws New Zealand cov ntawv xaiv nom raug xa mus txog qeeb thiab tsis raug suav nrog lwm tus pej xeem cov ntawv xaiv tsa ntawd.
Txawm li cas los nom tswv thaib lub chaw tswj cov kev xaiv tsa no tseem yuav mus txheeb xyuas seb tej nom ntawm ntau pab nom ntawv puas ua txhaum plaub ntug dab tsi thiab, yog txhaum ces yuav raug txwv tsis pub muaj cai ua nom, ces tej zaum yuav ua rau cov rooj nom uas yeej ntawd tau tsawg lawm los yog ua rau ib pab nom twg swb rau lwm pab los tau. Thiab mam los qhia cov kev xaiv tsa rau hnub tim 09.05.2019 tom ntej no.
Hnub tim 27.03.2019 dhau los, kuj tau muaj Thaib 7 pab nom ua ke tau los sib koom ua ke los tsim tus tsoom hwv koom tswj tshiab kom tau cov rooj nom tshaj 500 lub kom txhob pub tus tsoom hwv peeb zeej Prayuth Chan-Ocha los tswj hwm ntxiv. Vim lawv pom tias yog tseem cia rau tus tsoom hwv peeb zeej no tswj hwm ntxiv ces yuav plam ntau yam txiaj ntsim rau lub teb chaws no thiab tej pej xeem.
Kuj tau muaj cov teeb meem cuam tshuam txog Thaib cov kev xaiv tsa zaum no thiab xws li cov neeg Thaib nyob ntawm teb chaws New Zealand cov ntawv xaiv tsa raug xa mus txog qeeb lawm ces thiaj tsis raug lees paub raws li tej cai tau teev tseg. Thiaj muaj neeg nug tias pua yog txhob txwm los yog tus neeg xa cov ntaub ntawv ntawd tsis kub siab txog pej xeem cov ntawv xaiv tsa thiab lawv txoj cai xaiv nom es thiaj xa cov ntawv xaiv tsa no mus rau Thaib lub koom haum tswj kev xaiv tsa ntawd lig lawm.
Mloog tau lwm yam xov xwm ua lus Hmoob tau raws li hauv qab no:
READ MORE
Significance of Hmong flower clothes
