Linzee uas yog tus program coordinator ntawm lub koom haum Australian Multicultural Community Services (AMCS) qhia tias, lub koom haum no tau nyiaj txog li 1.8 million dollars los ntawm lub koom haum Sport Australia coj los pab cuam rau Australia tej laus neeg thoob nplaws nroog Melbourne ntawm xeev Victoria hauv teb chaws Australia no. Tsis hais tus laus neeg twg li yog muaj hnoob nyoog tshaj 60 xyoo rov sauv lawm ces muaj cai mus thov tau cov nyiaj no los pab lawv txog rau thaum xaus xyoo 2020 tom ntej no. Tab sis Linzee hais tias 'kav tsij maj nrawm nroos tsam lwm tus thov cov nyiaj no mus siv tag lawm ces koj thov tsis tau coj los siv pab koj los yog koj pawg neeg ntxiv lawm.'
Linzee hais tias 'lub koom haum AMCS yeej muaj ntau cov kev pab cuam rau Australia tej laus kom tau mus exercise qoj ib ce hu ua 'Moving for life the way I like it,' lub hom phiaj yog pab kom tej laus lub cev muaj zog tau txais kev noj qab nyob zoo thiab pab kom txhob nyuaj siab ntxhov plawv.
Nws tseem pab Australia tej laus neeg kom tau siv ntau cov kev pab cuam rau lawv tom lawv tej tsev kiag thiab, pab thauj lawv mus rau ib qho twg, los yog nrhiav neeg tuaj tu saib xyuas lawv los yog tu ib tug neeg twg kom lawv dim tes thiab khoom me ntsis, los yog nrhiav ib cov neeg ua hauj lwm yeem thaj (volunteers) tuaj nrog lawv nyob tham ua phooj ywg kom lawv txhob kho siab khuav, thiab ho nrhiav lwm cov kev pab cuam rau tej neeg zejzog, tsis tas li no los tseem txib ib pawg neeg mus rau hauv tej zejzog thiab qhia rau tej zejzog paub tias lub koom haum no muaj kev pab cuam uas lawv thov tau siv pab rau lawv thiab.
Ntxiv ntawd los yeej muaj cov kev pab cuam rau tej neeg puas cev uas xav tau kev pab thiab tseem pab tej neeg uas txom nyem nyiaj txiaj uas tsis muaj peev xwm them tej nqe dej, cua sov, hluav taws xob los sis muaj cov voucher rau lawv siv thiab.
Tsis tas li no los lub koom haum Australian Multicultural Community Services (AMCS) no yeej tseem coj tej laus mus tawm rooj ncig ua si, mus de txiv los yog mus xyuas ib thaj chaw twg thiab.
Linzee tau qhia ntxiv tias lub koom haum ACMS yeej tseem pab nyiaj los xyaum thiab qhia ib cov neeg ua ntau hom lus kom mus rau hauv tej zejzog uas paub hom lus ntawd mus tham thiab qhia rau lawv tias cov kev mus qob ib ce thiab exercise los yog physical activities no tau txais txiaj ntsim li cas rau tej laus neeg Australian thiab.
Linzee uas yog tus coordinator rau lub koom haum AMCS hai tias "Peb yeej muaj ib cov nyiaj pab qhia cov xov xwm txog tej txiaj ntsim tau txais los ntawm cov kev qoj ib ce (physical activities) no qhia rau cov neeg coj tej xov xwm no mus qhia rau lwm tus uas yeej paub hais ntau hom lus kom lawv mus qhia rau tej neeg zejzog paub tias muaj yuav tau txais txiaj ntsim dab tsi rau cov active aging no, vim yeej tseem muaj Australia ib txhia laus neeg tsis paub tias tos lawv tsis tau txais kev noj qab nyob zoo thiab cev tsis muaj zog los twb vim yog lawv pheej tsis ua ib yam exercise dab tsi li."
AMCS los yeej tau koom tes nrog tej nom tswv zos thiab nom zejzog los tsim ib co program ntau yam li line dancing, rock and roll dancing, community garderning, yoga, pilates, barre thiab Taichi los yog ntau yam program coj los pab rau tej neeg zejzog thiab.
Yog li no lub koom haum the Australian Multicultural Community Services thiaj muaj ntau cov program los pab cuam rau tej neeg zejzog. Piv txwv li nws kuj pab yuav tej khaub ncaws rau tej neeg hnav rau lub caij lawv koom cov physical activities, npaj ib cov neeg mus rau tej chaw uas cov laus yeej npaj tau lawv cov neeg uas xav ua ib yam dab tsi kom thiaj pab lawv ua tau tej lawv xav ua ntawd, raws li Linzee tau qhia.
Ntxiv ntawd los lub koom haum ACMS tseem pab tej neeg puas cev los sis yog tej neeg uas tsis muaj peev xwm yuav mus koom tau cov physical activities los yog tsis muaj tsheb caij mus koom tau tej no thiab.
Qhov tseem ceeb tshaj ntawd mas tsis yog tias yuav pab rau ib pab neeg twg xwb tab sis yeej pab rau ib tug neeg ntiag tug twg uas xav tau txais kev pab cuam thiab kom lawv thiaj mua koom tau cov physical activities no thiab yeej tseem muaj ib cov program ntawm lub koom haum Hillside Community Centre ntawm Melton uas tej laus yeej mus koom tau dawb thaib.
Yog tias koj xav paub tias yuav thov cov nyiaj no ntawm lub koom haum the Australian Multicultural Community Services li cas thiaj tau los siv ces xav kom sau ntawv sib txuas lus rau tus email: los sis yog txheeb xyuas lub koom haum no lub vas sab: los yog hu xov tooj nrog lawv tham tau raws li tus zauv xov tooj no: (03) 9133 8698 tau.
Mloog tau lwm yam xov xwm ua lus Hmoob thiab ua lus Askiv tau raws li hauv qab no:
READ MORE
Hmoob cov paj ntaub tej txiaj ntsim
