Xeev South Australia lub tsev tsoom fwv tseem tab tom sib teev theev tias seb puas yuav txwv tsis pub siv cov artificial intelligence (AI) coj los tsim tej duab liab qab ntau yam. Thiaj tau muaj kev koom tes ntawm MLC Connie Bonaros ntawm tsev kis xeev siab thiab tsoom fwv xeev los xyuas kom cov kev siv tej technology no los tsim kev kub ntxhov thiab tsim duab, suab thiab yeeb yaj kiab liab qab yog ib co kev ua txhaum cai.
Lwm pab nom teb chaws (Coalition) hais tias nws yuav tsis siv pab nom Labor cov kev txo se thiab yuav tsis ua ib co program tseem ceeb kom pab txuag tau nyiaj puag xyoo yog nws yeej cov kev xaiv tsa. Raws li ntau cov ntawv xovxwm li the Australian, Nine thiab News Corp qhia ces Coalition yuav tsis ua Labor ob co program tsem ceb kom txuag tau nyiaj li tsis tsim vaj tse uas siv $10 billion Housing Australia Future Fund uas xav tsim kom tau 30,000 lub tsev. Tsis tas li no yuav tsis txo tej tub kawm tej nuj nqe qev kawm ntawv txog li $16 billion dollars, yuav txo se rau tej neeg muaj nyiaj super tshaj $3 million thiab yuav tsis ua cov ncej thiab xov xa hluav taws xob ($20 billion). Ces Coalition cav tias yuav txuag tau $10 billion rau tej nyiaj puag xyoo rau 4 lub xyoo ntxiv no thiab pab kom txo tau tej nuj nqe txog $40 billion. Tab sis Labor tus nom tswj tuam chav nyiaj txiaj Katy Gallagher tau qhia rau lub chaw nthuav xov xwm tshooj 9 tias lwm pab nom tej nyiaj uas qhia thaum ntxov tsuas coj los dab tsawv daws xwb. ''Nws yeej tsis qhia tias yuav txiav nyiaj qhov twg, tsis qhia tias yuav siv nyiaj li cas tsim nws tej chaw tsim hluav taws xob nuclear, tab sis peb paub tias yuav ua rau tej tub kawm tiv nuj nqe ntau ntxiv, yuav txiav niaj ua tsev, yuav nce income tax.'' Tab sis Angus Taylor uas yog tus nom tswj nyiaj txiaj rau lwm pab nom teb chaws tau teb Gallagher ntawm lub chaw nthuav xov xwm tshooj 9 tias ''Katy mas haj yam dag ntau ntxiv tuaj xwb. Tab sis qhov tseem ceeb yog peb yuav xyuas kom tiv nuj nqe tsawg, nyiaj puag xyoo poob peev tsawg, tswj kab theem paj kom qes, tswj kom nyiaj poob nqe tsawg thiab pab tej lagluam kom loj hlob thiab muaj kev nqes peev ntau ntxiv.''
Ukraine thiab Meskas tau kos xyeem mem tes pom zoo yuav los txhim kho Ukraine tom qab xaus tsov rog kom rov qab zoo tuaj ntxiv. Tau muaj tej xwm txheej no tom qab uas Donald Trump tau hais kom Ukraine them tej nqe pab tug rog thiab tej nyiaj pab rau Ukraine rov qab rau Meskas.
Tsev tsoom fwv Minnesota kuj tau tawm suab los lees paub Hmoob thiab Nplog tej qub tub rog uas tau ua rog rau Meskas cov CIA tej tsov rog secret war tawm tsam communism thaum muaj tsov rog Vietnam War. Thiaj yuav ua rau lawv yuav tau ib co ntawv tsav tsheb uas lees paub tias yog qub tug rog, yuav muaj cai mus zais ntawm Meskas tej tub rog tej tsev yeeb, thiab muaj cai raug lees paub rau lawv tej phiaj ntawm tej tsev yeeb thaum nruam sim. Tau muaj Hmoob ntau tus nom li Ethan Cha, Senator Foung Hawj, Susan Pha, Dr Lee Pao Xiong thiab Hmoob ib co qub tug rog tau mus koom ntawm tsev tsoom fwv thaum tsev kis xeev qes tawm suab txhawb nqa ua zaum kawg raws li Kare 11 tshaj tawm.
Lub koom haum Austroads uas yog lub koom haum tswj Australia thiab New Zealand tej tuam chav transport qhia tias muaj ntau cov kev pauv hloov rau tej neeg txawv teb chaws tuaj nyob ntawm Australia cov ntawv tsav tsheb thiab tsav tsheb motorcycle, ces thiaj yuav muaj cov kev pauv hloov rau 18 lub teb chaws thiab ntau cheeb tsam, suav South Korea, Hong Kong, South Africa thiab ntau lub teb chaws ntawm EU, tab sis kuj yuav zam rau ib txhia tsis tas xeem dab tsi thaum hloov los siv Australia tej ntawv tsev tsheb thiab.
Pab nom Greens tau qhia tias nws los nrhiav suab sib tw xaiv nom tam li yog pab nom me ua zaum kawg coj los txhawb nqa tej neeg uas nyiam thiab pab nws ua ntej yuav txog hnub xaiv nom. Tej nuj nqes siv ua lub neej yog ib co tseem ceeb tshaj plaws rau cov kev sib tw xaiv tsoom fwv teb chaws Australia xyoo 2025 no uas pab nom Greens hais tias lawv tej cai zoo yuav pab tau tej neeg xaiv nom zoo dua.
Donald Trump uas yog Meskas tus nom liam tias tos Meskas tej lagluam tsis zoo rau lub caij 3 hlis thaum ntxov xyoo 2025 no los twb vim yog tus tsoom fwv Biden dhau los thaum nws tau sab laj nrog nws tej nom tseem ceeb rau lub caij muaj xov xwm qhia tias Meskas tej lagluam cov kev loj hlob ib xyoos twg tau nqe mus nyob rau ntawm 0.3 feem pua rau lub caij ntawd lawm xwb.
Thaib lub tuam chav tswj dej num ntoj ncig hais tias nws yuav los xyuas seb puas yuav tso tseg tsis siv cov kev sau tej nqe ob yam sib txawv rau tej chaw ntoj ncig rau neeg Thaib thiab neeg txawv teb chaws tom qab tau muaj xov xwm tshaj tawm tias muaj neeg txawv teb chaws tau mus ncig Thaib teb tsawg zog vim txhawj tsam tsis tau txais kev nyab xeeb, raug ntaus thiab raug tej neeg ua txhaum cai hla teb chaws tsim teeb meem rau, thiab pheej yuav tau them tej nqe xyuas tej chaw ntoj ncig kim raws li Bangkok Post tshaj tawm.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm , , , los yog . Download thiab mloog , caum Pod follw los yog lwm cov podcasts platforms (, ).
