Xov xwm tshaj tawm hnub zwj Teeb (Thursday news 06.02.2025):
Peter Dutton kuj xyuam xim ceev faj rau Meskas tus President Donald Trump tej lus tawm tswv yim txog Meskas cov kev tswj Gaza, uas tau ua rau ntiaj teb tsoom thawj tswj tsis pom zoo thiab tej koom paum pab cuam hais tias lub tswv yim no yog ib lub tswv yim txov tej neeg pawg tsawg thiab yog ib lub uas tsis muaj peev xwm yuav daws tau tej kev kub ntxhov ntawm cheeb tsam Middle East. Nws tau qhia rau xov tooj cua 2GB tias tej lus tawm tswv yim no tsuas yog ib co tswv yim sib khom xwb. Mr Dutton hais tias:''Kuv xav tias nws kub siab ua tib zoo xyuas kom tsis txhob raug kev phom sij rau Israel xwb, vim peb tsis xav kom rov qab muaj tej xwm txheej tim 7 lub 10 hli ntuj dua, rau qhov yog ib co kev puas tsuaj loj tshaj plaws rau tej neeg Jews tom qab Holocaust. Thiaj xav kom muaj cib fim tsim tau kev thaj yeeb tiag. Thaib kom tej neeg tau ua lub neej nyob tau txais kev nyab xeeb nrog tej ib puag ncig. Tsis tas li ntawd los lwm lub teb chaws ntawm cheeb tsam no yuav tsum tau kub siab nrog xyuas.''
Labor tau qhia meej tias nws yuav pab los xyuas kom rau txim raws li qhov tsim nyog rau tej neeg ua txhaum cov kev txhaum terror thiab hate crimes, tab sis nws pab nom tseem tsis tau qhia tseeb tias seb puas yuav rau txim li cas, vim nws cav tias xyov paus yuav txo tau tej kev ua txhaum, los yog yuav muaj teeb meem rau tej kev hais plaub thiab puas tau txais kev ncaj ncees los sis ho puas yuav ua rau muaj kev cais li cas.
Lub koom haum Dementia Australia tau muaj kev nqua hu kom kub siab tshaj no los nrog kho cov mob no vim rau qhov yeej tau kwv yees tseg tias ntau caum xyoo ntxiv no yuav muaj neeg tau tus mob no coob tuaj ntxiv. Thiaj xav kom haiv neeg no tham txog tej kev pab kom tau txais kev noj qab nyob zoo rau lub hlwb, thiab tshwm nyiaj ntxiv los tsim tej kev pab cuam pab rau tej neeg zos toj siab thiab neeg txum tim tej zejzog.
Tej neeg Palestinians hais tias lawv ceeb loj kawg rau Donald Trump cov kev hais kom muab tej neeg Gazan tshem tawm ntawm Gaza mus nyob rau lwm qhov chaw. Thiaj ua rau Fathi Kallab ntawm lub koom haum Democratic Front for the Liberation of Palestine hais tias cov kev hais kom tej neeg yeem thaj mus nyob lwm qhov kom tau cov kev pab cuam yog cov kev ua txhaum cai lub caij tsov rog, thiab Suheil Natour uas yog tus coj NGO hais tias tsuas yog Trump ib lub tswv yim thiab tau txiaj ntsim rau Meskas xwb.
Jason Clare uas yog Australia tus nom tswj dej num kev kawm tau coj ib tsab cai tshiab sab laj hauv tsev tsoom fwv kom tsim cov national code tswj kom tej tub kawm qib siab tau txais kev nyab xeeb. Ces thiaj li yog thawj zaug uas tsab cai no yuav tsim ib cov framework uas tej tsev kawm qib siab yuav tau ua raws los daws cov teeb meem tsim kev kub ntxhov rau tej poj niam.
Tau muaj ib tug nom kis xeev qes (MP) ntawm xeev Northern Territory nqua hu kom tsoom fwv yuav tau mus txheeb xyuas cov nyiaj yuav laug txog li 60 million dollars siv ua cov hauj lwm pab nrhiav hauj lwm rau neeg txumt im ua tom qab tau muaj ib co lus iab liam xyoo 2017 tias tej nom tswv tswj tej hauj lwm no ua tsis ncaj.
Singapore tau qev ob lub nyob hoom kiv tshuab rau Australia coj los pab tswj tej xwm txheej dej nyab sab qaum teb xeev Queensland rau lub caij tseem muaj ntuj los nag hlob thiab dej nyab rau ntau thaj chaw. Thawj pwm tsav Albanese hais tias twb xa tuaj rau Townsvilles lawm thiab tseem tab tom xyaum kom paub siv uas yuav coj mus pab tej tub rog thiab pab tej xwm txheej raug dej nyab.
Donald Trump tau siv nws lub fwj chim executive order los txwv tsis pub tej neeg transgender uas yog poj niam koom cov kev sib tw rau hnub National Girls and Women in Sports Day.
New Zealand tus thawj pwm tsav tau siv nws lub sij hawm thaum koom hnub Waitangi Day los hais lus kom tej neeg siab tus rau nws tus tsoom fwv cov kev xav rau neeg txum tim Maori thiab tsab cai Waitangi Treaty, thaum tau muaj txo kev txhawj xeeb txog tsab cai Treaty Principles Bill uas coj los sab laj hauv tsev tsoom fwv tom qab pab nom koom tswj tau sib khom nrog Chris Luxon thiab pab nom ACT.
Lub koom haum Energy Consumers Asutralia tau coj ib cov kev teeb txheeb los qhia tias lub caij 10 xyoo ntxiv no ces yuav muaj txhua txhua ib tug ntawm peb tug neeg Australia yuav tso tseg tsis siv gas thiab tig mus siv hluav taws xob lawm.
Nom tswv Tasmania tau ceeb toom rau tej neeg txog li ntawm 100 tus uas npaj thiab xav mus taug kev hav zoov ntawm txoj kev Overland Track kom tsis txhob mus los yog ncua rau lub caij tseem muaj hav zoov kub hnyiab txog 5 km uas tsis muaj peev xwm tswj tau.
Tau muaj neeg ntawm Queensland mus claims insurance ntau tuaj ntxiv rau lub caij raug dej nyab. Insurance Australia Group hais tias muaj li ntawm 200 cov kev claim txij tim 26 lub 1 hlis ntuj, thiab Suncorp los kuj qhia tias muaj neeg claim tshaj 660 zaus feem ntau yog ntawm Townsville.
Muaj 9 tug FBI agents tau coj Meskas lub tuam chav US Justice Department mus hais plaub tiv thaiv kom tsis txhob nrhiav tej neeg no tej xov xwm ntiag tug uas muaj feem cuam tshuam nrog cov kev tshuaj ntsuam Donald Trump thiab tej xwm txheej neeg tsim kev kub ntxhov rau tsev dawb tim 6 lub 1 hlis ntuj, vim tej neeg no hais tias tsuas yog Trump ib cov laj fai kum xeeb los pauj kev chim xwb.
Cob Tsib phau ntawv xov xwm Tuoitre tau qhia tias Nyab Laj tus nom tau qhia tias muaj ob lub tuam txhab hluav taws xob, roj thiab gas yuav los tsim ob lub chaw nuclear power ntawm plawv teb kom tau hluav taws xob siv thiab siv pab kev kho mob.
Nom tswv Nplog qhia tias xyoo 2024 dhau los tau muaj tej xwm txheej tsheb sib nrau yuav laug txog 7,000 zaus thiab ua rau tej neeg ntsib tej teeb meem no poob nyiaj tshaj USD 12 million raws li Vientiane Times tau qhia.
Bangkok Post tau qhia tias tuam ceeb Bangkok kuj yog ib lub nroog uas raug teev tias muaj tej cua tsis huv tshaj plaws ntawm Thaib ntau caum lub xeev.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab mloog tau caum los yog lwm cov podcast platforms (, , thiab ).
