Xovxwm luv tshaj tawm hnub zwj Feej (23.04.2025):
Australia lub koom haum tswj kev xaiv tsa (Australian Electoral Commission - AEC) hais tias twb muaj neeg tshaj 500,000 tus tau xub mus xaiv nom ua ntej rau thawj hnub uas qhib tej chaw xaiv nom ntxo rau tej neeg siv nag hmo (22.04.2025) lawm.
Jim Chalmers uas yog tus nom tswj nyiaj txiaj rau tsoom fwv Albanese tau hais kom pab nom koom tswj qhia tias seb nws yuav muab cov nyiaj $21 billion qhov twg los coj los pab Australia tej tub rog tom qab nws tau qhia tias yuav nce cov nyiaj no ntawm 2.5 feem pua ua 3 feem pua rau lub caij 10 ntxiv no.
Narendra Modi uas yog India tus thawj pwm tsav tau cog lus tias yuav ntes kom tau tej neeg phem uas nqa phom mua tua tej neeg ntoj ncig yam tsawg li 26 tus ntawm Kashmir coj los raug txim.
Al Gore uas yog Meskas tus lwm thawj tsav meem (Vice-President) dhau los tau liam Mr Trump tias yog tus ua rau muaj teeb meem rau tej hauj lwm daws tej xwm txheej huab cua pauv hloov thiab yuav ua rau muaj teeb meem rau Meskas cov kev tswj hwm democracy.
Treasurer Jim Chalmers uas yog tus nom tswj nyiaj txiaj rau tsoom fwv Albanese hais tias raws li tau muaj ib cov kev txheeb cov kev kwv yees txog ntiaj teb tej lagluam cov kev loj hlob ces kuj pom tau tias ''tej kev tsis sib haum xeeb lagluam yuav ua rau muaj teeb meem rau ntiaj teb tej lagluam cov kev loj hlob thiab tej zaum yuav ua rau nyiaj poob nqe thoob ntiaj teb.''
Nom tswv Cob Tsib qhia tias txij lub 7 hli ntuj 2025 no mus yuav ua cov digital ID rau tej neeg txawv teb chaws mus rau teb chaws Nyab Laj siv tom qab tau muaj nws tej pej xeem tshaj 60 million tus tau siv tej ID no.
Thaib tus thawj pwm tsav tau hais hnub zwj Quag (Tuesday 22.04.2025) tias kom rov qab los txheeb tej free visa entry uas pub rau tej neeg txawv teb chaws siv mus ntoj ncig teb chaws Thaib tom qab uas txheeb tau tias muaj ib txhia neeg txawb teb chaws nyob dhau sij hawm thiab ua ntau yam lagluam li khw noj mov, tsev tos qhua thiab ntoj ncig tsis raug cai.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm , , , los yog . Download thiab mloog , caum Pod follw los yog lwm cov podcasts platforms (, ).
