တၢ်လိာ်ကွဲဒ်သိး ဖျၢၣ်ထူ, တၢ်ပှီၢ်ထံ, တၢ်ဂဲၤကလံၣ် ဘဲလ့ၢ်, တၢ်ဒ့ ဖံးအဲနိး, တၢ်လိာ်ကွဲ ခၠဲးစ်, တၢ်ခဲၣ်တၢ်ဂီၤဒီး တၢ်ခွဲးဖီဆးဖီ, တၢ်ဂဲၤဒိ စၢခၢၣ်, တၢ်ဖီအီၣ်တ့ၤအီၣ်, တၢ်လိာ်ကွဲ ဘးစကဲးဘီလ်, တၢ်လိာ်ကွဲဖျၢၣ်တီၣ် ထဲန့း အိၣ်ဝဲအကလုာ်ကလုာ်န့ၣ်လီၤ. အီစထြ့လယါကီၢ်ပူၤအံၤ ကၠိပှၢ်လီၢ်ခံ တၢ်ဟူးတၢ်ဂဲၤသ့ၣ်တဖၣ် အိၣ်ဝဲအါမး လၢနယၢၤထီၣ်အီၤတလၢၤဘၣ်န့ၣ်လီၤ.
ဖိသၣ်သ့ၣ်တဖၣ် မ့ၢ်နုာ်လီၤပၣ်ဃုာ်ဖဲတၢ်ဟူးတၢ်ဂဲၤသ့ၣ်တဖၣ်အံၤအပူၤန့ၣ် ဒိးန့ၢ်ဘၣ်ဝဲတၢ်န့ၢ်ဘျုးန့ၢ်ဖှိၣ်သ့ၣ်တဖၣ်အါမးန့ၣ် ပသ့ၣ်ညါအီၤလီၤ. အဝဲသ့ၣ်မၤလိန့ၢ်ဘၣ်တၢ်သ့တၢ်ဘၣ်အသီသ့ၣ်တဖၣ်ကးဘၣ်, မ့ၢ်စ့ၢ်ကီးတၢ်မၤဂ့ၤထီၣ်အဝဲသ့ၣ် နီၣ်သးဒီး နီၣ်ခိက့ၢ်ဂီၤတၢ်အိၣ်ဆူၣ်အိၣ်ချ့, တၢ်နာ်န့ၢ်လီၤနီၣ်ကစၢ်သးဒီး ပှၤဂ့ၢ်ဝီ တၢ်ရ့လိာ်မုာ်လိာ်အတၢ်သ့တၢ်ဘၣ်သ့ၣ်တဖၣ်န့ၣ်လီၤ.
Ramón Spaaij, လၢအမ့ၢ် ဖၠၣ်စိမိၤသရၣ်သိၣ်လိပှၤဂ့ၢ်ဝီပီညါဖဲ Victoria University တဂၤစံးဝဲဒၣ် တၢ်မုာ်လၤသးခုဒီး တၢ်ရ့တံၤရ့သကိးန့ၣ် မ့ၢ်တၢ်အကါဒိၣ်တခါ လၢပှၤသးစၢ်သ့ၣ်တဖၣ်အဂီၢ်န့ၣ်လီၤ.
“တၢ်ထုးကွံာ် ကၠိပျၢ်လီၢ်ခံ တၢ်မၤဟူးနီၣ်ခိက့ၢ်ဂီၤတၢ်ဟူးတၢ်ဂဲၤဒီး တၢ်လိာ်ခိၣ်လိာ်ကွဲသ့ၣ်တဖၣ်န့ၣ်, လၢဖိဒံဖိသၣ်ဒီးပှၤသးစၢ်သ့ၣ်တဖၣ်အဂီၢ် တၢ်ရ့တံၤရ့သကိး, မၤန့ၢ်အါထီၣ်တံၤသကိးအသီ, အိၣ်ဘၣ်ဒီးတံၤသကိး ဒီးပှၤလၢအဝဲသ့ၣ်မုာ်ဒီးအီၤသ့ၣ်တဖၣ်န့ၣ် မ့ၢ်တၢ်မုာ်လၤသးခုလၢအဝဲသ့ၣ်အဂီၢ်န့ၣ်လီၤ.”
အဝဲနာ်လၢ ဖဲလၢတၢ်မၤတၢ်ဟူးတၢ်ဂဲၤသ့ၣ်တဖၣ်အံၤအခါန့ၣ် မ့ၢ်ဝဲဒၣ်တၢ်သူၣ်ထီၣ် တၢ်သ့ၣ်ညါလၢတၢ်ဘျးစဲလိာ်သး, လီၤဆီဒၣ်တၢ်လၢပှၤသုးလီၢ်အိၣ်ဆိးသ့ၣ်တဖၣ်အဂီၢ် မ့ၢ်တၢ်လၢအကါဒိၣ်န့ၣ်လီၤ.
“နခိၣ်နဃၢၤဝးဝးဒီး နတၢ်အိၣ်သးခံခါလၢၤလၢအဘၣ်ထွဲဒီးနၤန့ၣ် နတ့ဒုးအိၣ်ထီၣ်အီၤသ့ဝဲန့ၣ်လီၤ. ယဆိကမိၣ်တၢ်အဝဲန့ၣ်မ့ၢ်တၢ်မုာ်တၢ်ပၢၤတခါ, ဒ်ပသ့ၣ်ညါအသိးလီၤ, တၢ်ဘၣ်ထွဲလိာ်သးအိၣ် အတၢ်တူၢ်ဘၣ်န့ၣ် မ့ၢ်ဝဲဒၣ် တၢ်အိၣ်မုာ်ဆိးပၢၤအဂံၢ်ခီၣ်ထံးဒီး ပှၤတဝၢတခါန့ၣ်မ့ၢ်ဝဲဒၣ်လၢပှၤကိးဂၤဒဲးအဂီၢ်န့ၣ်လီၤ. လီၤလီၤဆီဆီန့ၣ် တၢ်အံၤ မ့ၢ်ဝဲဒၣ်လၢ ပှၤဟဲတုၤသီ မ့တမ့ၢ် ပှၤတဝၢလၢအဟဲန့ၢ်လၢ အဘၣ်ဆီၣ်ဘံၣ်ဆီၣ်ဘၢ မ့တမ့ၢ် ဘၣ်တၢ်ကွၢ်တလီၤအီၤအပူၤသ့ၣ်တဖၣ်န့ၣ်လီၤ.”
Zakaria Farah မ့ၢ်ဝဲပှၤတဝၢတၢ်ဂုၤထီၣ်ပသီထီၣ်အခိၣ်ဖဲ The Huddle ကရၢတဂၤ, လၢအမ့ၢ် North Melbourne Football Club ပှၤတဝၢအစုဒုၣ်စုတီၤန့ၣ်လီၤ.
ကၠိချၢတၢ်ဟူးတၢ်ဂဲၤသ့ၣ်တဖၣ်အံၤ မၤစၢၤဖိဒံဖိသၣ်သ့ၣ်တဖၣ်ဒ်လဲၣ်န့ၣ် အဝဲထံၣ်ဘၣ်ဝဲလၢအနီၣ်ကစၢ်ဒၣ်ဝဲန့ၣ်လီၤ.
“တၢ်အဘျုးအဖှိၣ်လၢပှၤသးအါမးထံၣ်ဘၣ်အီၤန့ၣ်မ့ၢ်ဝဲ တၢ်ခွဲးတၢ်ယာ်တခါလၢ တၢ်မၤန့ၢ်တံၤသကိး, တၢ်ရ့လိာ်မုာ်ဒီး တဂၤဒီးတဂၤန့ၣ်အိၣ်ဒီးဘျးစဲလိာ်သးန့ၣ်လီၤ. ပှၤဂ့ၢ်ဝီတၢ်ဘျးစဲန့ၣ်မ့ၢ်ဝဲနီၣ်ဝံာ်ခံတခါလၢတၢ်အိၣ်မုာ်ဆိးပၢၤအဂီၢ်န့ၣ်လီၤ. တၢ်မၤန့ၢ်တံၤသကိးန့ၣ် တဘျီတခီၣ် လၢပှၤသးစၢ်သ့ၣ်တဖၣ်အဂီၢ်မ့ၢ်ဝဲတၢ်ကီတၢ်ခဲတခါ နာ်သက့ တၢ်လိာ်ခိၣ်လိာ်ကွဲန့ၣ် ဟဲစိာ်ဃုာ်တၢ်အိၣ်ဖှိၣ်သကိးတပူၤဃီဒီး တၢ်ရဲၣ်တၢ်ကျဲၤအဂုၤအဂၤသ့ၣ်တဖၣ်န့ၣ် မ့ၢ်စ့ၢ်ကီးတၢ်ဟဲစိာ်ဃုာ် အတၢ်အိၣ်ဖှိၣ်သကိးတပူၤဃီဒီး သူၣ်ထီၣ် တၢ်ဘျးစဲလၢအဂံၢ်ဆူၣ် လၢအမ့ၢ်တၢ်အရ့ဒိၣ်မးလၢပှၤသးစၢ်သ့ၣ်တဖၣ်အဂီၢ်န့ၣ်လီၤ.”
Ramón Spaaij, ဟ့ၣ်ကူၣ်ဝဲလၢ ကဟ့ၣ်ဒုးနုာ်လီၤပၣ်ဃုာ်ပှၤဖိဒံဖိသၣ်သ့ၣ်တဖၣ်ဖဲတၢ်ဟူးတၢ်ဂဲၤလၢအဝဲသ့ၣ်ဃုထၢအီၤအပူၤန့ၣ်လီၤ.
“ယဖိခွါသၢဂၤန့ၣ် အတၢ်သ့တၢ်ဘၣ်တၢ်ဆိကမိၣ်သ့ၣ်တဖၣ်န့ၣ် လီၤဆီလိာ်အသးသပှၢ်လီၤ. ယဖိခွါအဒိၣ်န့ၣ် အသးတၢ်ပြၢအိၣ်ဒီး အဝဲန့ၣ် အတၢ်သ့တၢ်ဘၣ်အိၣ်လၢတၢ်လိာ်ကွဲဖျၢၣ်ထူ. ယဖိခွါအဂၤတဂၤတခီန့ၣ် မၤသးဒ်သိးအအိၣ်ဖဲတၢ်ဘၢၣ်စၢၤ. ဒီးမ့မ့ၢ်ယဖိခွါသၢဂၤတဂၤန့ၣ် လိာ်ကွဲလၢတၢ်ချၢမုာ်မးဒီး အဝဲန့ၣ် အဲၣ်ခိၣ်ဃၢၤန့ဆၢၣ် နာ်သက့ နမ့ၢ်ရဲၣ်ကျဲၤန့ၣ်အီၤတၢ်မူးမူးနီၣ်နီၣ်ဒီး နုာ်လီၤတၢ်ပြၢန့ၣ် မၤဝဲတန့ၢ်ဘၣ်. အဃိန့ၣ် ဖဲဟံၣ်ဖိဃီဖိတခါအပူၤန့ၣ် နထံၣ်ဘၣ်လံ တၢ်လီၤဆီသ့ၣ်တဖၣ်အံၤ, အဝဲသ့ၣ်အတၢ်ဆိကမိၣ်တၢ်သးစၢၢ်ဆၢသ့ၣ်တဖၣ်အိၣ်ဒ်လဲၣ်န့ၣ်လီၤ. ယဆိကမိၣ် ဒ်အဝဲသ့ၣ်တၢ်သ့တၢ်ဘၣ်လီၤဆီလိာ်အသးအသိး ကမၤပှဲၤန့ၣ်အဝဲသ့ၣ်န့ၣ် မ့ၢ်ဝဲတၢ်အရ့ဒိၣ်တခါန့ၣ်လီၤ.”
တၢ်လၢၤဘူၣ်လၢၤစ့န့ၣ် မ့ၢ်ဝဲတၢ်တြီတံာ်ဖးဒိၣ်တခါ ဒီးဟံၣ်ဖိဃီဖိတနီၤနီၤ တနံၣ်တနံၣ် လၢကၠိပျၢ်လီၢ်ခံတၢ်ဟူးတၢ်ဂဲၤအဂီၢ် သူကျိၣ်စ့လၢအကထိအါမး နာ်သက့ ကဘၣ်သ့ၣ်ညါအီၤတခါန့ၣ်မ့ၢ်ဝဲ တၢ်ဟူးတၢ်ဂဲၤလၢ တၢ်မၤန့ၢ်ကလီအီၤသ့ၣ်တဖၣ်အိၣ်အသိး လၢအတၢ်လၢၤဘူၣ်လၢၤစ့တအါကဲၣ်ဆိးဘၣ်သ့ၣ်တဖၣ်အိၣ်ဝဲန့ၣ်လီၤ.
ကၠိတနီၤနီၤန့ၣ် ကၠိပျၢ်ဝံၤအလီၢ်ခံ ဟ့ၣ်လီၤဝဲတၢ်ဟူးတၢ်ဂဲၤအိၣ်ဝဲ လၢအနၣ်ရံၣ်အါမး ဒီး ကီၢ်စဲၣ်ပဒိၣ်အါမး ဟ့ၣ်လီၤစ့ၢ်ကီး ကျိၣ်စ့လံာ်ဖှီတဲာ်လၢ တၢ်သူအီၤသ့လၢတၢ်လိာ်ကွဲဒီး ဒွဲလၤပီညါ သ့ၣ်တဖၣ်အဂီၢ်န့ၣ်လီၤ.
လၢဒွဲလာ်ပီညါ, စဲအ့ၣ်တၢ်သ့ၣ်ညါဒီး စဲးဖီကဟၣ်တၢ်သ့ၣ်ညါ တၢ်ဟူးတၢ်ဂဲၤသ့ၣ်တဖၣ်အဂီၢ် နလီၢ်ကဝီၤလံာ်ရိဒၢးန့ၣ်မ့ၢ်ဝဲတၢ်လီၢ်အဂ့ၤကတၢၢ်တတီၤ လၢနကမၤန့ၢ်ဂံၢ်ထံးတၢ်ဂ့ၢ်တၢ်ကျိၤသ့ၣ်တဖၣ်န့ၣ်လီၤ.
Elysa Dennis မ့ၢ်ဝဲလံာ်ရိဒၢးဒီး တၢ်ကွၢ်ကီ အတၢ်လီၢ် ပှၤရဲၣ်ကျဲၤတၢ်အခိၣ်တဂၤ ဖဲ Liverpool City Council, လၢအအိၣ်ဖဲဆ့ၣ်ဒနံၤဝ့ၢ်မုၢ်နုာ်ကလံၤထံးအပူၤန့ၣ်လီၤ.
အဝဲသ့ၣ် လံာ်ရိဒၢးသ့ၣ်တဖၣ်ဟ့ၣ်လီၤဝဲကၠိပျၢ်လီၢ်ခံတၢ်ဟူးတၢ်ဂဲၤအါမး လၢအပၣ်ဃုာ် တၢ်လိာ်ကွဲ ခၠဲၣ်စ် (chess), တၢ်စုသ့ၣ်ခီၣ်ဘၣ်တၢ်မၤ (crafts), ဒီး ရံထိၣ် တၢ်လိာ်ကွဲန့ၣ်လီၤ.
“Yellamundie ဒီး ပလံာ်ရိဒၢးခဲလၢာ်, ကမျၢၢ်လံာ်ရိဒၢးခဲလၢာ်န့ၣ် ဟ့ၣ်လီၤ တၢ်မၤန့ၢ်တၢ်ဂ့ၢ်တၢ်ကျိၤဒီးတၢ်တုၤသိးထဲသိးဖဲပှၤတဝၢအပူၤန့ၣ်လီၤ. နကျိၣ်စ့တၢ်ဟဲနုာ်အိၣ်ထဲလဲၣ်ဂ့ၤ, နဆိးဖဲလဲၣ်ဂ့ၤ, လံာ်ရိဒၢးန့ၣ် မ့ၢ်ဝဲတၢ်လီၢ်လၢ ဖိဒံဖိသၣ်သ့ၣ်တဖၣ် ဃုမၤန့ၢ်ဘၣ်တၢ်ဂ့ၢ်တၢ်ကျိၤ လၢအဝဲသ့ၣ်သးစၢၢ်ဆၢအီၤ, မၤလိန့ၢ်ဘၣ် တၢ်သ့တၢ်ဘၣ်အသီသ့ၣ်တဖၣ် ဒီး မ့ၢ်တၢ်လီၢ်လၢအမ့ၢ်တၢ်မုာ်အဂီၢ်တခါန့ၣ်လီၤ. မ့ၢ်ဝဲတၢ်လီၢ်လၢ နမၤန့ၢ်တၢ်ကူၣ်ဘၣ်ကူၣ်သ့အလီၢ် လၢကျိၤကျဲအဖှံအညီ လၢအတအိၣ်ဒီး တၢ်ပာ်အနီၣ်ထိၣ်နီၤတဲာ်ဘၣ်န့ၣ်လီၤ.”
သးစၢ်ဒီးပှၤတဝၢဝဲၤလီၢ်သ့ၣ်တဖၣ် မ့ၢ်စ့ၢ်ကီးကျိၤကျဲဂ့ၤမးတဘိလၢ တၢ်မၤန့ၢ်ကလီဘၣ်တၢ်ဟူးတၢ်ဂဲၤသ့ၣ်တဖၣ်ဒီး တၢ်ဟူးတၢ်ဂဲၤလၢ အပှ့ၤတဒိၣ်ဘၣ် သ့ၣ်တဖၣ်န့ၣ်လီၤ.
Zachary Lovett , မ့ၢ်ဝဲ Gunditjmara ကလုာ်ပိာ်ခွါတဂၤ, လၢအမ့ၢ် ကရူၢ်ခိၣ်တဂၤဖဲ Richmond Youth Hub, လၢအအိၣ်ဖဲမဲလ်ဘၢဝ့ၢ်ခၢၣ်သးအပူၤန့ၣ်လီၤ.
သးစၢ်တၢ်ထံၣ်လိာ်အိၣ်ဖှိၣ်သကိးတၢ်လီၢ်အံၤ ဟ့ၣ်လီၤဝဲတၢ်ဟူးတၢ်ဂဲၤအါမး လၢအမ့ၢ်ဒ်သိး တၢ်လိာ်ကွဲ ဘးစကဲးဘီလ်, ဖျၢၣ်ထူ, တၢ်ဖီအီၣ်တ့ၤအီၣ်ဒီး တၢ်ဂဲၤဒိ စၢၢ်ခၢၣ်စ် သ့ၣ်တဖၣ်န့ၣ်လီၤ.
အဝဲစံးလၢ တၢ်န့ၢ်သူဘၣ် တၢ်လိာ်ကွဲပီးလီသ့ၣ်တဖၣ်န့ၣ် မ့ၢ်ဝဲတၢ်အဒိၣ်အမုၢ်တခါဒီး ပှၤသးစၢ်သ့ၣ်တဖၣ် တၢ်မုာ်ဘၣ်အဝဲသ့ၣ်လၢ အဒိးန့ၢ်ဘၣ် အနီၣ်ကစၢ်ဒၣ်ဝဲ အတၢ်လီၢ်န့ၣ်လီၤ.
“ခီဖျိလၢ တၢ်ဟဲပာ်ဖှိၣ်သကိးအလီၢ်အံၤ အဟီၣ်ခိၣ်ဂီၤ တၢ်အိၣ်ဆီလီၤသးအလီၢ်အဃိ, အဝဲသ့ၣ်န့ၣ် အတၢ်လီၢ်တအိၣ်အါအါလၢ ကဆ့ၣ်နီၤ ဟးဝ့ၤဝီမ ဒီး ကတဲသကိးတၢ်ဒီး ပှၤအဂုၤအသး လၢအသးနံၣ်ပှဲၤသိးဒီးအဝဲသ့ၣ်ဘၣ်. အဃိတၢ်လၢ ပကျဲးစၢးမၤအီၤအါတက့ၢ်န့ၣ်မ့ၢ်ဝဲ တၢ်တၢၣ်ပီၣ်တဲသကိးကရူၢ် မ့တမ့ၢ် တၢ်မၤသကိးတၢ်ဟူးတၢ်ဂဲၤကရူၢ်သ့ၣ်တဖၣ်န့ၣ်လီၤ. အဒိပမ့ၢ်ဖီသကိးတၢ်အီၣ်န့ၣ်, ပဆ့ၣ်နီၤတပူၤဃီခဲလၢာ်ဒီး အီၣ်သကိး တဲသကိးတၢ်တပူၤဃီန့ၣ်လီၤ.”
မ့မ့ၢ် Huddle ကရူၢ်န့ၣ် အဝဲသ့ၣ်အိၣ်ဒီး တၢ်လိာ်ကွဲကလီ တၢ်ရဲၣ်တၢ်ကျဲၤသ့ၣ်တဖၣ် ဖဲ North Melbourne ဒီး Wyndham အပူၤန့ၣ်လီၤ. Zakaria Farah စံးဝဲဒၣ် အဝဲသ့ၣ်မၤလီၤတံၢ်လၢ တၢ်ဟူးတၢ်ဂဲၤသ့ၣ်တဖၣ် တၢ်မၤန့ၢ်ကလီဘၣ်အီၤဒီး ပှၤကိးဂၤဒဲးနုာ်လီၤပၣ်ဃုာ်သ့န့ၣ်လီၤ.
“မိၢ်ပၢ်ဒီး ပှၤသးစၢ်သ့ၣ်တဖၣ် အမ့ၢ်ဘၣ်ဟ့ၣ်လီၤတၢ်အဘူးအလဲလၢတၢ်ဟူးတၢ်ဂဲၤတခါခါအဂီၢ်န့ၣ်, တၢ်နုာ်ပၣ်ဃုာ်သကိးသ့ၣ်တဖၣ်စှၤလီၤဒီး ပှၤကညီသ့ၣ်တဖၣ်တၢ်ခွဲးတၢ်ယာ်စှၤလီၤလၢကန့ၢ်မၤဘၣ်တၢ်ဟူးတၢ်ဂဲၤသ့ၣ်တဖၣ်န့ၣ်လီၤ. အဃိ, တၢ်လၢတၢ်ဟ့ၣ်လီၤကလီတၢ်ဟူးတၢ်ဂဲၤန့ၣ် မ့ၢ်ဝဲဒၣ် တၢ်ပျဲပှၤသးစၢ်သ့ၣ်တဖၣ် ဟဲနုာ်လီၤပၣ်ဃုာ်အါထီၣ် မၤသကိးတၢ်ဖဲတၢ်ဟူးတၢ်ဂဲၤအပူၤအါထီၣ်ဒီး ကဲထီၣ်ဝဲ တၢ်န့ၢ်ဘျုးန့ၢ်ဖှိၣ်လၢ တၢ်အိၣ်မုာ်ဆိးပၢၤအဂီၢ်န့ၣ်လီၤ.”
အနာ်လၢ လုၢ်အလၢ်ဆဲးလၤ တၢ်ပူၤဖျဲးန့ၣ်မ့ၢ်စ့ၢ်ကီးနီၣ်ဝံာ်ခံတခါန့ၣ်လီၤ.
“လုၢ်လၢ်ဆဲးလၤအဂ့ၢ်အကျိၤ မနုၤသ့ၣ်တဖၣ်လၢ ပဆီၣ်ထွဲမၤစၢၤအီၤသ့လဲၣ်န့ၣ် ပဃု ငါန့ၢ်ပှၤကညီသ့ၣ်တဖၣ် မ့တမ့ၢ် ပှၤဘၣ်မူဘၣ်ဒါလၢ တၢ်ဟ့ၣ်တၢ်သ့ၣ်ညါနၢ်ပၢၢ်တၢ်ဂ့ၢ်သ့ၣ်တဖၣ်အံၤ ဒီး ဟ့ၣ်ဒုးသ့ၣ်ညါအဝဲသ့ၣ် ဘၣ်ဃးလုၢ်လၢ်ဆဲးလၤ တၢ်ပူၤဖျဲးအဂ့ၢ်အကျိၤဒီး တၢၣ်ပီၣ်တဲသကိးအီၤဒီးပှၤသးစၢ်လၢအထူအထံးဟဲန့ၢ်လီၤဆီလိာ်အသးသ့ၣ်တဖၣ်န့ၣ်လီၤ.”
Zakaria Farah အနီၣ်ကစၢ်ဒၣ်ဝဲ ဒိးန့ၢ်ဘၣ်ဝဲ တၢ်အဘျုးအဖှိၣ်လၢ တၢ်ရဲၣ်တၢ်ကျဲၤ ဖဲအဝဲတၢ်ဒိၣ်ထီၣ်အပူၤအံၤန့ၣ်လီၤ.
“လၢယနီၣ်ကစၢ်တၢ်လဲၤခီဖျိအပူၤန့ၣ်, ဖဲယဒိၣ်ထီၣ်အခါဒီး သူဘၣ်ဝဲၤကျိၤတၢ်ရဲၣ်တၢ်ကျဲၤသ့ၣ်တဖၣ်အံၤအဃိ, လၢတၢ်အိၣ်မူတစိၤအဂီၢ် ယန့ၢ်ဘၣ် တံၤသကိး ပှၤသးစၢ်လၢအထူအထံးဟဲန့ၢ်ဒ်သိးယၤသ့ၣ်တဖၣ် တကးဘၣ် န့ၢ်ဘၣ်စ့ၢ်ကီးတံၤသကိးဒီးပှၤလၢအထူအထံးတဒ်သိးဒီးယၤသ့ၣ်တဖၣ်န့ၣ်လီၤ. ညီနုၢ်န့ၣ် ပှၤကညီလၢအထူအထံးဟဲန့ၣ်လၢ လုၢ်လၢ်ဆဲးလၤအါကလုာ်လီၤဆီလိာ်သးသ့ၣ်တဖၣ်န့ၣ် အိၣ်ကစု အိၣ်လီၤဖျဲၣ်လီၤဟိ ဒီး အဲၣ်ဒိးအိၣ်မူဒၣ်ဖဲအဝဲသ့ၣ်ကဒဲကဒဲ အပှၤတဝၢအပူၤ နာ်သက့ မ့ၢ်လၢတၢ်ဟ့ၣ်လီၤတၢ်ခွဲးတၢ်ယာ်အံၤအဃိ ဒုးအိၣ်ထီၣ်ဝဲဒၣ် တၢ်ဘျးစဲလိာ်သးဒီး ပှၤဂုၤပှၤဂၤသ့ၣ်တဖၣ်, ပှၤလၢအထူအထံးလီၤဆီလိာ်အသးသ့ၣ်တဖၣ်န့ၣ်လီၤ. မ့ၢ်ဝဲတၢ်မၤလဲၢ်ထီၣ် တၢ်အိၣ်ဆိး တၢ်အိၣ်မူအတကွီၣ်ဒီး တၢ်တဲသကိးလၢအအိၣ်ဒီး တၢ်သ့ၣ်ညါအါထီၣ်တၢ်ဂ့ၢ်တၢ်ကျိၤသ့ၣ်တဖၣ်န့ၣ်လီၤ.”
အဝဲစံးဝဲဒၣ် တၢ်မုာ်လၤသးခုအမဲာ်ညါန့ၣ် တၢ်ဟူးတၢ်ဂဲၤသ့ၣ်တဖၣ်ဟ့ၣ် ဒုးအိၣ်ထီၣ်ဝဲ ခါဆူညါတၢ်ခွဲးတၢ်ယာ်သ့ၣ်တဖၣ်န့ၣ်လီၤ.
“တၢ်မၤသကိးတၢ်ဒီး နုာ်လီၤမၤသကိးတၢ်ဖဲ ကၠိပျၢ်လီၢ်ခံတၢ်ဟူးတၢ်ဂဲၤသ့ၣ်တဖၣ်အဃိ ယန့ၢ်ဘၣ်ဝဲတၢ်ဖံးတၢ်မၤ အတၢ်ခွဲးတၢ်ယာ်သ့ၣ်တဖၣ်န့ၣ်လီၤ. ယန့ၢ်ဘၣ် တၢ်ခွဲးတၢ်ယာ် လၢကမၤတၢ်မၤဖဲတၢ်ရဲၣ်တၢ်ကျဲၤသ့ၣ်တဖၣ်အံၤဒီး ဝံၤန့ၣ် ယသူၣ်ထီၣ်ဝဲဒၣ် ယတၢ်လုၢ်အီၣ်သးသမူတၢ်ဖံးတၢ်မၤ လၢယဟံးန့ၢ်အခီၣ်ဃာ်ဖဲ တၢ်ခွဲးတၢ်ယာ်အဆိကတၢၢ်ဖဲယမၤန့ၣ်အီၤ ဖဲတၢ်ရဲၣ်တၢ်ကျဲၤသ့ၣ်တဖၣ်အံၤအပူၤန့ၣ်လီၤ.”
အဝဲစံးစ့ၢ်ကီးဝဲဒၣ် တၢ်ရဲၣ်တၢ်ကျဲၤသ့ၣ်တဖၣ်အံၤ န့ၢ်ဘျုးန့ၢ်ဖှိၣ်လၢပှၤကိးဂၤဒဲးအဂီၢ်, အတမ့ၢ်ထဲပှၤသးစၢ်အဂီၢ်ဘၣ်.
“ပှၤသးစၢ်သ့ၣ်တဖၣ်အံၤဟဲဖဲပအိၣ်အဃိ, ပမၤလိန့ၢ်ဘၣ် တၢ်လၢအဝဲသ့ၣ်မၤအီၤသ့ၣ်တဖၣ်, ပမၤလိန့ၢ်ဘၣ်ဃးအဝဲသ့ၣ်လုၢ်လၢ်ဆဲးလၤဒီး ပမၤန့ၢ်ဘၣ်စ့ၢ်ကီးတၢ်လၢအဝဲသ့ၣ်တဖၣ်အအိၣ်န့ၣ်လီၤ. တၢ်န့ၢ်ဘျုးလၢအဝဲသ့ၣ်ဒိးန့ၢ်အီၤတဂၤစုာ်စုာ်န့ၣ်မ့ၢ်တၢ်လၢအရ့ဒိၣ် နာ်သက့ အဝဲသ့ၣ်န့ၣ် ဟ့ၣ်လီၤကဒါက့ၤစ့ၢ်ကီးတၢ် ဖဲတၢ်နုာ်လီၤပၣ်ဃုာ်မၤသကိး ဖဲပှၤတဝၢအပူၤ လၢအပှဲၤဒီး တၢ်အိၣ်မုာ်ဆိးပၢၤ တၢ်သူၣ်ဖှံသးညီန့ၣ်လီၤ.”
