ຄວາມໝັ້ນຄົງພາຍໃນ ແລະຂໍ້ຂັດແຍ່ງໃນຕາເວັນອອກກາງ.
ຫົວຫນ້າໜ່ວຍຂ່າວລັບ ຂອງອອສເຕຣເລັຍກ່າວວ່າ ບໍ່ມີການໂຈມຕີຈາກການກໍ່ການຮ້າຍ, ການລົບກວນ ຫລືເຫດການຕ່າງໆ ທີ່ເກີດຂຶ້ນເກົ້າເທື່ອໃນປີນີ້ ໄດ້ຮັບການດົນໃຈໂດຍກົງ ຈາກການຂັດແຍ້ງ ໃນຕາເວັນອອກກາງ.
ຫລັງຈາກ ໄດ້ຍົກລະດັບພັຍຄຸກຄາມ ຈາກການກໍ່ການຮ້າຍ ຂອງອອສເຕຣເລັຍ ໃນຕົ້ນປີນີ້ ເພາະຄວາມເປັນຫ່ວງ ກ່ຽວກັບສະພາບແວດລ້ອມ ທີ່ສ້າງຄວາມສັ່ນຄອນ ຕໍ່ຄວາມປອດພັຍ, ອົງການຂ່າວລັບ ເພື່ອຄວາມໝັ້ນຄົງ ຂອງອອສເຕຣເລັຍ (the Australian Security Intelligence Organisation) ກ່າວວ່າ ຄວາມເປັນຫ່ວງເຫລົ່ານັ້ນ ໄດ້ຖືກພິສູດວ່າຖືກຕ້ອງ.
Rania Yallop ລາຍງານ.
ນຶ່ງຂອງຫນ່ວຍງານຣັຖບານ ທີ່ລີ້ລັບທີ່ສຸດ ຂອງອອສເຕຣເລັຍ-ຂ່າວລັບ ເພື່ອຄວາມໝັ້ນຄົງ ຂອງອອສເຕຣເລັຍ (the Australian Security Intelligence Organisation-ASIO)-ຖືກມອບຫມາຍໃຫ້ປົກປ້ອງ ຄວາມປອດພັຍແຫ່ງຊາດ ຂອງອອສເຕຣເລັຍ, ສືບຖາມແລະຂັດຂວາງ ການສອດແນມ, ການແຊກແຊງຈາກຕ່າງປະເທດ, ຄວາມຮຸນແຮງ ທີ່ຖືກກະຕຸ້ນທາງການເມືອງ ແລະການກໍ່ການຮ້າຍ.
ແລະວຽກງານສ່ວນຫລາຍ ຈະເກີດຂຶ້ນຢ່າງລັບໆ.
ຊາວອອສເຕຣເລັຍ ໄດ້ເຫັນວຽກງານຂອງໜ່ວຍງານ ພຽງແຕ່ບໍ່ເທົ່າໃດເທື່ອຕໍ່ປີ.
"ພວກເຮົາໄດ້ເຫັນການແບ່ງຂົ້ວ (Polarization) ແລະການບໍ່ຍອມຮັບ (Intolerance) ທາງການເມືອງ, ການປະທ້ວງຢ່າງສງົບ, ການໂຕ້ຖຽງກັນດ້ວຍເຫດຜົນ, ການປະທ້ວງຢ່າງສງົບ, ຄວາມເຊື່ອໃນການຕໍ່ຕ້ານອໍານາດ (Anti authority) ໄດ້ເພີ່ມຂຶ້ນ, ຄວາມໄວ້ວາງໃຈໃນສະຖາບັນ ໄດ້ເສື່ອມໂຊມລົງ, ພຶດຕິກັມທີ່ຍຸແຍ່ ແລະການກໍ່ໃຫ້ເກີດຄວາມວຸ້ນວາຍ ໄດ້ກາຍເປັນເລື່ອງປົກກະຕິ."
ນັ້ນຄື Mike Burgess, ຜູ້ອໍານວຍການໃຫຍ່ຂອງ ASIO ທີ່ໃຫ້ຫລັກຖານຢູ່ທີ່ Senate Estimates, ຊຶ່ງເປັນໂອກາດສອງສາມຢ່າງ ທີ່ອອສເຕຣເລັຍຈະເຂົ້າໃຈ ວຽກງານຂອງຫນ່ວຍງານ ດ້ານຄວາມປອດພັຍ.
ໃນເດືອນສິງຫາ, ລາວໄດ້ຍົກລະດັບ ພັຍຄຸກຄາມການກໍ່ການຮ້າຍ ຂຶ້ນເປັນ 'ອາດເປັນໄປໄດ້' ຫລັງຈາກ ASIO ໄດ້ປະເມີນວ່າ ມີໂອກາດຫລາຍກວ່າ 50 ເປີເຊັນ ທີ່ຈະມີການໂຈມຕີ ຈາກຜູ້ກໍ່ການຮ້າຍໃນປະເທດ ຫລືແຜນການ ທີ່ຈະໂຈມຕີ ໃນ 12 ເດືອນຂ້າງຫນ້າ.
Mr Burgess ກ່າວວ່າ ຄວາມເປັນຫ່ວງ ທີ່ໄດ້ບອກເຖິງການຕັດສິນໃຈນັ້ນ ໄດ້ເປັນໄປຕາມ ທີ່ໄດ້ຄາດຄິດໄວ້.
"ແນວໂນ້ມນີ້ ໄດ້ເລີ່ມຕົ້ນກ່ອນ COVID ແຕ່ໄດ້ເລັ່ງໄວຂຶ້ນ ໃນການຮັບມື ຕໍ່ການລັອກດາວ ແລະການດຳເນີນການອື່ນໆ ຂອງຣັຖບານ. ມັນໄດ້ເລັ່ງໄວຂຶ້ນອີກ ຫລັງຈາກການໂຈມຕີຂອງຜູ້ກໍ່ການຮ້າຍ Hamas ຕໍ່ Israel, ແລະອີກເທື່ອຫນຶ່ງ, ຫລັງຈາກການຕອບໂຕ້ ທາງທະຫານຂອງ Israel, ການປ່ຽນແປງເຫລົ່ານີ້ ໄດ້ຍົກລະດັບອຸນຫະພູມ ຂອງສະພາບແວດລ້ອມດ້ານຄວາມປອດພັຍ ແລະສ້າງບັນຍາກາດ ທີ່ອະນຸຍາດໃຫ້ມີຄວາມຮຸນແຮງຫລາຍຂຶ້ນ, ເຮັດໃຫ້ການກໍ່ການຮ້າຍ ມີຄວາມເປັນໄປໄດ້ຫລາຍຂຶ້ນ.
ມັນໄດ້ເລັ່ງໄວຂຶ້ນອີກ ຫລັງຈາກການໂຈມຕີຂອງຜູ້ກໍ່ການຮ້າຍ Hamas ຕໍ່ Israel, ແລະອີກເທື່ອຫນຶ່ງ, ຫລັງຈາກການຕອບໂຕ້ ທາງທະຫານຂອງIsrael
ຄວາມຮຸນແຮງ ທີ່ຖືກກະຕຸ້ນທາງການເມືອງ, ຊຶ່ງຮວມເຖິງການກໍ່ການຮ້າຍ, ເປັນນຶ່ງຂອງຄວາມເປັນຫ່ວງ ເລື່ອງຄວາມປອດພັຍ ຫຼັກຂອງ ASIO.
ASIO ໄດ້ບັນທຶກການໂຈມຕີການກໍ່ການຮ້າຍ, ການລົບກວນ ຫຼືເຫດການ ເກົ້າເທື່ອ ໃນອອສເຕຣເລັຍໃນປີນີ້, ໂດຍທີ່ກຸ່ມຫົວຮຸນແຮງທີ່ມີແຮງກະຕຸ້ນ ທາງສາສນາ ຍັງຄອບຄຸມວຽກງານສ່ວນໃຫຍ່ ຂອງ ໜ່ວຍງານ.
ຄວາມເປັນຫ່ວງເຫລົ່ານີ້ ແມ່ນຮວມເຖິງ ການກັບຄືນມາ ຂອງກຸ່ມທີ່ເອີ້ນວ່າ IS ແລະ Al-Qaeda, ຊຶ່ງທັງສອງກຸ່ມນີ້ ຣັຖບານຖືວ່າ ເປັນກຸ່ມຜູ້ກໍ່ການຮ້າຍ.
ແຕ່ Mr Burgess ກ່າວວ່າ ບໍ່ມີເຫດການກໍ່ການຮ້າຍ ໃນປີນີ້ ທີ່ໄດ້ຮັບການດົນໃຈໂດຍກົງ ຈາກການຂັດແຍ້ງ ໃນຕາເວັນອອກກາງ.
"ໃນການປະເມີນຂອງພວກເຮົາ, ຫນຶ່ງສ່ວນສາມ ຂອງເຫດການນັ້ນ ແມ່ນກ່ຽວພັນກັບຄວາມຮຸນແຮງ ທີ່ມີແຮງກະຕຸ້ນທາງສາສນາ. ເຫດການສ່ວນຫລາຍ ຖືກກ່າວຫາວ່າ ຖືກກະຕຸ້ນໂດຍອຸດົມການຊາດນິຍົມ (Nationalist) ແລະອຸດົມການດ້ານເຊື້ອຊາດ (Racist Ideologies) ຫລືອຸດົມການທີ່ປະສົມທັງສອງຢ່າງ. ສິ່ງສໍາຄັນ, ເພາະເລື່ອງນີ້ມັກຈະເຂົ້າໃຈຜິດ, ບໍ່ມີການໂຈມຕີ ຫລືແຜນການໃດ ທີ່ໄດ້ຮັບການດົນໃຈໂດຍກົງ ຈາກການຂັດແຍ້ງ ໃນຕາເວັນອອກກາງ."
ລາວເຕືອນວ່າ ປະເພດຂອງແຜນການ ແລະອຸດົມການ ຂອງພວກຫົວຮຸນແຮງ ກໍາລັງຈະປ່ຽນໄປ.
"ມັນກ່ຽວຂ້ອງກັບຄົນຫນຸ່ມ, ທຸກຢ່າງກ່ຽວຂ້ອງກັບນັກສະແດງຄົນດຽວ ຫລືກຸ່ມນ້ອຍໆ. ທັງຫມົດກ່ຽວຂ້ອງກັບອາວຸດ ທີ່ມີຄວາມສາມາດຕ່ຳ. ມີຫນ້ອຍຄົນ ໃນຈໍານວນຜູ້ກະທຳຜິດ ທີ່ຖືກກ່າວຫາວ່າຖືກ ASIOຫລືຕໍາຫລວດ ຈັບຕາເບິ່ງ, ແລະໃນຈໍານວນ ຜູ້ທີ່ເຄື່ອນຍ້າຍໄປສູ່ຄວາມຮຸນແຮງ, ສ່ວນຫລາຍ ໃຫ້ການເຕືອນພຽງເລັກນ້ອຍ ຫຼືບໍ່ມີການເຕືອນຫຍັງເລີຍ."
Hezbollah ແລະ Hamas ຖືກລະບຸວ່າ ເປັນອົງການກໍ່ການຮ້າຍ ໃນອອສເຕຣເລັຍ
ການຂັດແຍ້ງ ໃນຕາເວັນອອກກາງ ໄດ້ສ້າງຄວາມສັ່ນສະເທືອນທົ່ວອອສເຕຣເລັຍ.
ນັບຕັ້ງແຕ່ ການເລີ່ມຕົ້ນຂອງສົງຄາມ Israel/Hamas, ຜູ້ປະທ້ວງ ໄດ້ຍ່າງໄປຕາມຖນົນ ໃນອອສເຕຣເລັຍ ເປັນຈໍານວນຫລາຍພັນຄົນໃນການຮຽກຮ້ອງໃຫ້ຍຸດຕິ ຄວາມຂັດແຍ້ງ. ໃນການປະທ້ວງທີ່ສ່ວນໃຫຍ່ແລ້ວບໍ່ມີຄວາມຮຸນແຮງ.
ຫລັງຈາກ Hassan Nasrallah ອະດີດຜູ້ນໍາ Hezbollah ໄດ້ຖືກຂ້າຕາຍ ໃນການໂຈມຕີທາງອາກາດ ຂອງ Israel, ຫລາຍຄົນ ໄດ້ໄປຮ່ວມການປະທ້ວງ ພ້ອມດ້ວຍທຸງ Hezbollah.
Hezbollah ແລະ Hamas ຖືກລະບຸວ່າ ເປັນອົງການກໍ່ການຮ້າຍ ໃນອອສເຕຣເລັຍ, ແລະການສະແດງທຸງ ອາດຖືກຖືວ່າ ເປັນອາດຊະຍາກັມ.
Mr Burgess ກ່າວວ່າ ຜູ້ຄົນທີ່ຍົກທຸງຂອງກຸ່ມ ທີ່ມີໃນລາຍຊື່ຜູ້ກໍ່ການຮ້າຍ, ຜູ້ທີ່ບໍ່ໄດ້ລະເມີດກົດຫມາຍ, ອາດປະເຊີນກັບຜົນສະທ້ອນຢ່າງອື່ນ.
"ໃນຖານະ ທີ່ເປັນຫນ່ວຍຮັກສາຄວາມປອດພັຍ, ຂ້າພະເຈົ້າຍິນດີຕ້ອນຮັບ ເມື່ອບຸກຄົນຍົກທຸງ, ແລະເປັນການຊີ້ບອກວ່າ ມີບາງຄົນທີ່ເຮົາຄວນສົນໃຈ. ສະນັ້ນ, ຖ້າຫາກຜູ້ຄົນໂງ່ຈ້າພໍ ທີ່ຈະເຮັດສິ່ງນັ້ນ, ບໍ່ວ່າມັນຈະຜິດກົດຫມາຍຫລືບໍ່, ກໍເປັນເລື່ອງຂອງຜູ້ຮັກສາກົດຫມາຍ. ແຕ່ໂດຍສ່ວນໂຕແລ້ວ, ຂ້າພະເຈົ້າຍິນດີຕ້ອນຮັບ ຜູ້ຄົນທີ່ປະກາດໂຕເອງ, ຊຶ່ງຊ່ອຍໃຫ້ ASIO ສາມາດດໍາເນີນການສອບສວນ ກ່ຽວກັບບຸກຄົນເຫລົ່ານັ້ນ ຖ້າຫາກເຂົາເຈົ້າ ເປັນພັຍຄຸກຄາມ ຕໍ່ຄວາມໝັ້ນຄົງ."
ເນື້ອເລື່ອງໂດຍ Rania Yallop ຂ່າວ SBS News,
ຈັດທຳໂດຍ ສັກ ພູມີຣັຕນ໌ ວິທຍຸ SBS ພາກ ພາສາລາວ.
ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌
