ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌
ສິ່ງທີ່ຕ້ອງເຮັດກ່ອນມື້ເລືອກຕັ້ງ.
ລະດູການເລືອກຕັ້ງ ຂອງຣັຖບານກາງ ໄດ້ເລີ່ມຕົ້ນແລ້ວ ແລະທ່ານອາດສົງສັຍວ່າ ຈະສະແດງຄວາມຄິດເຫັນຂອງທ່ານແນວໃດ ໃນການເລືອກຕັ້ງ.
ບັດນີ້ ເມື່ອການເລືອກໄດ້ຖືກປະກາດແລ້ວ, ພົນລະເມືອງອອສເຕຣເລັຍຜູ້ໃຫຍ່ທຸກຄົນ ຕ້ອງລົງທະບຽນໃນອີກເຈັດມື້ຕໍ່ໄປ ຖ້າບໍ່ດັ່ງນັ້ນ ເຂົາເຈົ້າອາດຖືກປັບໃໝ.
ໃນ ການອອກສຽງ 101 (Voting 101) ນີ້, SBS ອະທິບາຍວ່າ ຜູ້ໃດມີສິດລົງຄະແນນສຽງ ແລະວິທີທີ່ຈະຈົດທະບຽນ ດ້ວຍຕົວເອງແນວໃດ.
Sam Dover ລາຍງານ.
"ບັດນີ້, ໃນວັນທີ 3 ເດືອນ ພຶດສະພາ, ທ່ານເລືອກທາງ ທີ່ຈະກ້າວໄປຂ້າງຫນ້າ. ການອອກສຽງຂອງທ່ານ ບໍ່ເຄີຍມີຄວາມສໍາຄັນ ຫລາຍໄປກວ່ານີ້ມາກ່ອນ."
ຫລັງຈາກໄດ້ມີການຄາດການເປັນເວລາຫລາຍເດືອນ, ໃນທີ່ສຸດ ການເລືອກຕັ້ງຣັຖບານກາງ ກໍໄດ້ຖືກປະກາດໃນ.
Peter Dutton : "ຊາວອອສເຕຣເລັຍ ຈະມີໂອກາດ."
ນັ້ນແມ່ນ Peter Dutton
Anthony Albanese: "ການເລືອກລະຫວ່າງ Labor, ທີ່ຕັ້ງໃຈທີ່ຈະຮັບມື ກັບຄວາມກົດດັນດ້ານຄ່າຄອງຊີບ ໃນຂນະທີ່ສ້າງອະນາຄົດ ຂອງອອສເຕຣເລັຍ..."
ແລະນັ້ນແມ່ນ Anthony Albanese
Peter Dutton: "...ແລະຣັຖບານ Coalition ໃຫມ່ ທີ່ເຂັ້ມແຂງ ເພື່ອເຮັດໃຫ້ປະເທດຂອງເຮົາກັບຄືນມາສູ່ເສັ້ນທາງ."
Peter Dutton ອີກເທື່ອນຶ່ງ
ນັ້ນແມ່ນການຣົນນະຣົງຫາສຽງ ຂອງພັກການເມືອງໃຫຍ່ສອງພັກ.
ໃນ SBS Voting 101 ພວກເຮົາຈະອະທິບາຍວ່າ ມັນຫມາຍຄວາມວ່າແນວໃດສໍາລັບທ່ານ, ລະບົບການລົງຄະແນນສຽງຂອງອອສເຕຣເລັຍທໍາງານແນວໃດ ແລະທ່ານກຳລັງອອກສຽງເລືອກຕັ້ງຫຍັງແທ້.
ໃນຕອນນີ້ ເຮົາຈະເບິ່ງວິທີ ທີ່ຈະລົງທະບຽນເລືອກຕັ້ງ ແລະບ່ອນທີ່ຈະໄປປັບປຸງລາຍລະອຽດ ຂອງການອອກສຽງຂອງທ່ານ.
ແຕ່ກ່ອນອື່ນ, ທ່ານອາດສົງສັຍວ່າ ທ່ານຕ້ອງອອກສຽງເລືອກຕັ້ງຫລືບໍ່.
ອອສເຕຣເລັຍ ມີລະບົບການເລືອກຕັ້ງ ທີ່ເປັນການບັງຄັບ ຊຶ່ງແຕກຕ່າງຈາກປະເທດສ່ວນໃຫຍ່ທົ່ວໂລກ.
ນີ້ຫມາຍຄວາມວ່າ ພົນລະເມືອງຂອງອອສເຕຣເລັຍ ເກືອບທຸກຄົນທີ່ມີອາຍຸສູງກວ່າ 18 ປີ ຕ້ອງລົງຄະແນນສຽງຕາມກົດຫມາຍ ແລະຕ້ອງໄດ້ລົງທະບຽນ ພາຍໃນເຈັດມື້ ຫລັງຈາກມີການປະກາດເລືອກຕັ້ງ.
ຖ້າບໍ່ດັ່ງນັ້ນ, ທ່ານຈະພາດໂອກາດ ທີ່ຈະສະແດງຄວາມຄິດເຫັນຂອງທ່ານ ແລະອາດຖືກປັບໃໝອີກດ້ວຍ.
ທ່ານສາມາດລົງທະບຽນເລືອກຕັ້ງ ຕອນມີອາຍຸ 16 ປີແລະ-ຖ້າຫາກທ່ານຮູ້ວ່າ ທ່ານຈະມີອາຍຸ 18 ປີໃນຊ່ວງເວລາ ທີ່ມີການເລືອກຕັ້ງ-ທ່ານຄວນລົງທະບຽນໃນຕອນນີ້ ເພື່ອວ່າທ່ານ ຈະພ້ອມທີ່ຈະອອກສຽງເລືອກຕັ້ງ.
"ຊາວອອສເຕຣເລັຍ ທີ່ອາຍຸບໍ່ຮອດ 18 ປີ ຫລືອາສັຍຢູ່ໃນອອສເຕຣເລັຍ ແຕ່ບໍ່ໄດ້ເປັນພົນລະເມືອງ ຈະບໍ່ມີສິດ ທີ່ຈະລົງທະບຽນຫລືອອກສຽງເລືອກຕັ້ງ."
ນັ້ນແມ່ນ Kath Gleeson, ຜູ້ແທນຂອງຄນະກັມມະການ ການເລືອກຕັ້ງຂອງອອສເຕຣເລັຍ (the Australian Electoral Commission) ຊຶ່ງເປັນອົງກອນອິດສຣະ ທີ່ຄວບຄຸມການເລືອກຕັ້ງ ຂອງຣັຖບານອອສເຕຣເລັຍ.
ນາງເວົ້າວ່າ ມີພຽງແຕ່ຈໍານວນຫນ້ອຍຫນຶ່ງ ຂອງຜູ້ໃຫຍ່ຊາວອອສເຕຣເລັຍ ທີ່ບໍ່ມີສິດອອກສຽງເລືອກຕັ້ງ.
"ມີຜູ້ອອກສຽງບາງປະເພດ ທີ່ບໍ່ສາມາດເລືອກຕັ້ງ ອາດເປັນເພາະການຖືກໂທດຈຳຄຸກ, ຍົກຕົວຢ່າງ. ແຕ່ກົດ ແລະຂໍ້ກຳໜົດດ້ານຄຸນສົມບັດ ແມ່ນຊັດແຈ້ງ ຢູ່ໃນເວັບໄຊ້ AEC ແລະຂ້າພະເຈົ້າ ຂໍຊຸກຍູ້ຊາວອອສເຕຣເລັຍທຸກຄົນ ໃຫ້ກວດກາເບິ່ງສິດທິຂອງເຂົາເຈົ້າ ຖ້າຫາກເຂົາເຈົ້າມີຄວາມສົງສັຍ."
ຖ້າຫາກທ່ານມີສິດ, ການຍົກເວັ້ນພຽງຢ່າງດຽວ ທີ່ຈະບໍ່ອອກສຽງໃນການເລືອກຕັ້ງ ແມ່ນຖ້າຫາກທ່ານເຈັບປ່ວຍຫນັກ ຫລືຢູ່ນອກປະເທດໃນມື້ເລືອກຕັ້ງ.
ທ່ານຍັງສາມາດ ພະຍາຍາມຍື່ນທີ່ຮູ້ກັນວ່າ ເປັນເຫດຜົນທີ່ສົມຄວນແລະພຽງພໍຕໍ່ AEC ແຕ່ນັ້ນ ເປັນສິ່ງທີ່ຂຶ້ນຢູ່ກັບການພິຈາຣະນາ ຂອງເຂົາເຈົ້າ.
ແລະຖ້າຫາກທ່ານ ເດີນທາງໄປຕ່າງປະເທດ, ທ່ານຍັງສາມາດສະແດງຄວາມຄິດເຫັນໄດ້ ຖ້າຫາກທ່ານວາງແຜນໄວ້ລ່ວງຫນ້າ.
"ທ່ານອາດສາມາດ ອອກສຽງເລືອກຕັ້ງ ຢູ່ທີ່ສະຖານທູດຢູ່ຕ່າງປະເທດ, ຫລືທ່ານສາມາດ ສມັກການອອກສຽງທາງໄປສະນີໄດ້ ທີ່ເວັບໄຊ້ AEC ທີ່ aec.gov.au."
Ok, ບັດນີ້ ທ່ານຮູ້ວ່າ ທ່ານຕ້ອງອອກສຽງເລືອກຕັ້ງຫລືບໍ່, ໃຫ້ເຮົາມາເບິ່ງວ່າ ຈະລົງທະບຽນແນວໃດ.
ຂັ້ນຕອນທໍາອິດ ແມ່ນໄປທີ່ aec.gov.au ຫລື-ຖ້າຫາກທ່ານບໍ່ສາມາດໃຊ້ອິນເຕີເນັດໄດ້-ທ່ານສາມາດໂທຫາ 13 23 26 ແລະເຮັດຕາມຄໍາແນະນໍາ.
ໃນເວັບໄຊ້ ທ່ານຕ້ອງຄະລິກ 'ລົງທະບຽນເລືອກຕັ້ງ (Enrol to vote)',ແລ້ວ 'ເລີ່ມຕົ້ນລົງທະບຽນ (Start enrolment)' ແລະໃຫ້ແນ່ໃຈວ່າ ທ່ານມີໃບອະນຸຍາດຂັບຣົດ, ຫນັງສືຜ່ານແດນ, ບັດ Medicare ຫລືເລກພົນລະເມືອງ ເພື່ອພິສູດຕົວຕົນຂອງທ່ານ.
ຖ້າທ່ານບໍ່ສາມາດເຂົ້າເຖິງເອກະສານເຫຼົ່ານັ້ນ, ທ່ານສາມາດໃຫ້ອີກຄົນຫນຶ່ງ ທີ່ໄດ້ລົງທະບຽນແລ້ວ ໃນການຢືນຢັນຕົວຕົນຂອງທ່ານ ໄດ້ຄືກັນ.
ແຕ່ຈາກນັ້ນ, ທ່ານພຽງແຕ່ຕ້ອງຂຽນລາຍລະອຽດສ່ວນຕົວບາງຢ່າງ ແລະສົ່ງໃບລົງທະບຽນຂອງທ່ານ.
ແລະເຖິງແມ່ນວ່າ ທ່ານແນ່ໃຈວ່ າທ່ານໄດ້ລົງທະບຽນເລືອກຕັ້ງ ແລະລາຍລະອຽດຂອງທ່ານແມ່ນຖືກຕ້ອງ, ແຕ່ບໍ່ເປັນຫຍັງ ທີ່ຈະຢືນຢັນເລື່ອງນີ້ ໃນເວັບໄຊ້, ໂດຍສະເພາະ ຖ້າຫາກທ່ານໄດ້ປ່ຽນທີ່ຢູ່ ເມື່ອບໍ່ດົນມານີ້.
"ພວກເຮົາຊຸກຍູ້ ຊາວອອສເຕຣເລັຍທຸກຄົນ ໃຫ້ແນ່ໃຈວ່າ ລາຍລະອຽດຂອງການລົງທະບຽນຂອງເຂົາເຈົ້າ ຖືກຕ້ອງແລະຫຼ້າສຸດ. ທ່ານສາມາດເຮັດໄດ້ຢ່າງງ່າຍໆ ທີ່ aec.gov.au. ສະນັ້ນ ໃຫ້ກວດກາເບິ່ງວ່າ ລາຍລະອຽດຂອງທ່ານຖືກຕ້ອງ ແລະວ່າທ່ານພ້ອມແລ້ວ ທີ່ຈະອອກສຽງເລືອກຕັ້ງກ່ອນມື້ເລືອກຕັ້ງ. ທະບຽນລາຍຊື່ ຈະປິດພາຍໃນເຈັດມື້ ຫລັງຈາກການປະກາດເລືອກຕັ້ງ."
ສະນັ້ນ, ບັດນີ້ ເມື່ອການເລືອກໄດ້ຖືກປະກາດແລ້ວ, ທ່ານມີເວລາຈົນເຖິງ ເວລາ 8 ໂມງແລງ ຕາມເວລາທ້ອງຖິ່ນ ໃນວັນຈັນທີ 7 ເດືອນເມສາ ກ່ອນການລົງທະບຽນຈະປິດ. ສະນັ້ນ, ໃຫ້ແນ່ໃຈວ່າ ທ່ານໄປທີ່ເວັບໄຊ້ AEC ທັນທີ ເພື່ອກວດກາເບິ່ງວ່າ ທ່ານພ້ອມແລ້ວທີ່ຈະອອກສຽງໃນມື້ເລືອກຕັ້ງ.
ຕິດຕາມຕອນອື່ນໆ ຂອງ ການເລືອກຕັ້ງ 101 (Voting 101) ເພື່ອທຳຄວາມເຂົ້າໃຈແຕ່ລະຂັ້ນຕອນ ກ່ຽວກັບວິທີການອອກສຽງ ແລະລາຍລະອຽດ ກ່ຽວກັບວິທີການທຳງານ ຂອງລະບົບການເມືອງຂອງອອສເຕຣເລັຍ-ແລະຕິດຕາມ SBS Our House ເພື່ອຕິດຕາມຂ່າວສານຫຼ້າສຸດ ຂອງການເລືອກຕັ້ງຄັ້ງນີ້.
ແຕ່ຈົນເຖິງເວລານັ້ນ... Happy voting!
ເນື້ອເລື່ອງໂດຍ Sam Dover ຂ່າວ SBS News,
ຈັດທຳໂດຍ ສັກ ພູມີຣັຕນ໌ ວິທຍຸ SBS ພາກ ພາສາລາວ.
ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌
