ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌
ສາເຫດທີ່ໂຣກໝາກສຸກອາດກັບຄືນມາ.
ການລະບາດ ຂອງໂຣກໝາກສຸກ ໃນສະຫະຣັດອາເມຣິກາ ໄດ້ເຮັດໃຫ້ມີຜູ້ເສັຍຊີວິດສອງຄົນ, ມີຫຼາຍຮ້ອຍຄົນ ທີ່ຕິດເຊື້ອ ແລະເດັກນ້ອຍຈໍານວນຫຼວງຫຼາຍ ທີ່ຕ້ອງເຂົ້າໂຮງຫມໍ ດ້ວຍພາວະແຊກຊ້ອນ.
ເຈົ້າຫນ້າທີ່ກ່າວວ່າ ວິທີທີ່ດີທີ່ສຸດທີ່ ຈະປ້ອງກັນການລະບາດ ແມ່ນການສັກວັກຊີນ.
ແຕ່ທ່ານຫມໍບາງຄົນ ລາຍງານວ່າ ຄົນໄຂ້ມີຄວາມສົງສັຍ ກ່ຽວກັບການສັກວັກຊີນປ້ອງກັນ ແລະມີຊຸມຊົນຈໍານວນຫລວງຫລາຍ ທີ່ບໍ່ໄດ້ຮັບການສັກວັກຊີນ.
ຕາມຈິງແລ້ວ, ຜູ້ຊ່ຽວຊານກ່າວວ່າ ມີການຫລຸດຈໍານວນລົງທົ່ວໂລກ ແລະບໍ່ແມ່ນ ພຽງແຕ່ສະຫະຣັດອາເມຣິກາເທົ່ານັ້ນ, ເພາະບັນຫາເລື່ອງການເຂົ້າເຖິງວັກຊີນ-ແລະມີຄວາມສົງສັຍ ແລະຄວາມບໍ່ໄວ້ວາງໃຈ ທີ່ເພີ່ມຂຶ້ນ.
ຕອນນີ້ຂອງ Too Hard Basket ກ່າວເຖິງການແພ່ລະບາດ ຂອງໂຣກໝາກສຸກໃນສະຫະຣັດອາເມຣິກາ, ແລະຜົນກະທົບ ທີ່ອາດເກີດຂຶ້ນຈາກໂຣກໝາກສຸກ ໃນອອສເຕຣເລັຍ, ຖ້າຫາກມີຂໍ້ຄວາມຕໍ່ຕ້ານວັກຊີນເກີດຂຶ້ນ.
"ມື້ນີ້, ສາທາຣະນະສຸກ Austin ຢືນຢັນໂຣກໝາກສຸກກໍຣະນີທໍາອິດ ທີ່ຖືກລາຍງານ ໃນເຂດ Travis ນັບແຕ່ປີ 2019. ມັນເປັນເວລາ 25 ປີ ນັບຕັ້ງແຕ່ກໍຣະນີທີ່ຜ່ານມາ ໄດ້ຖືກລາຍງານຕໍ່ພວກເຮົາ. ກໍຣະນີເມື່ອບໍ່ດົນມານີ້ ກ່ຽວຂ້ອງກັບເດັກອ່ອນ ທີ່ບໍ່ໄດ້ຮັບການສັກວັກຊີນປ້ອງກັນ ແລະສຳຜັດເຊື້ອໄວຣັສ ໃນລະຫວ່າງການໄປທ່ຽວຕ່າງປະເທດ."
ນັ້ນແມ່ນ Dr Desmar Walkes ເຈົ້າຫນ້າທີ່ສາທາຣະນະສຸກໃນ Austin-Travis County, ທີ່ລາຍງານ ກ່ຽວກັບການລະບາດຂອງໂຣກໝາກສຸກ ທີ່ເຈົ້າຫນ້າທີ່ກ່າວວ່າ ບັດນີ້ກໍາລັງແພ່ລາມໄປທົ່ວຣັດ Texas ແລະ New Mexico.
ຍັງມີກໍຣະນີທີ່ແຕກຕ່າງກັນ ກໍໄດ້ຖືກລາຍງານ ໃນອີກ 15 ຣັດ, ດ້ວຍມີສອງຄົນ ທີ່ບໍ່ໄດ້ຮັບການສັກວັກຊີນ ໄດ້ເສັຍຊີວິດຈາກໂຣກນີ້.
"ກະຊວງບໍຣິການສຸຂະພາບຂອງຣັດ ໄດ້ລາຍງານເຖິງການຕາຍເທື່ອທໍາອິດ (26 Feb) ເນື່ອງຈາກໂຣກໝາກສຸກ ໃນເດັກນ້ອຍທີ່ບໍ່ໄດ້ຮັບການສັກວັກຊີນ."
Dr Amy Thompson ຈາກເຂດບໍຣິການສຸຂະພາບ Covenant Health Lubbock ກ່າວວ່າ ກໍຣະນີອື່ນໆ ແມ່ນຕ້ອງໄດ້ໄປໂຮງໝໍ.
"ຄົນໄຂ້ຫລາຍກວ່າ 20 ຄົນ ໄດ້ຖືກສົ່ງເຂົ້າໂຮງຫມໍ Covenant Children's Hospital. ພວກເຮົາມີຫລາຍຄົນ ທີ່ຕ້ອງໄດ້ຮັບການດູແລພິເສດ ເພາະເປັນໂຣກໝາກສຸກ."
ການລະບາດ ໄດ້ເລີ່ມຕົ້ນ ຢູ່ທີ່ເມືອງ Seminole ພາກຕາເວັນຕົກຂອງຣັດ Texas, ຊຶ່ງເປັນຊຸມຊົນຂອງຊາວ Mennonite ທີ່ມີຜູ້ຄົນຈໍານວນຫລວງຫລາຍ ທີ່ບໍ່ໄດ້ຮັບການສັກວັກຊີນ.
Dr Tammy Camp ທ່ານຫມໍເດັກນ້ອຍ ຂອງຣັດ Texas ກ່າວວ່າ ໂຣກນີ້ແພ່ຂຍາຍອອກໄດ້ງ່າຍຫຼາຍ ໃນສະພາບດັ່ງກ່າວ.
"ຜູ້ຄົນທີ່ບໍ່ໄດ້ຮັບການສັກວັກຊີນ ມັກຈະມາເຕົ້າໂຮມກັນຢູ່ບ່ອນດຽວ. ສະນັ້ນ, ທ່ານອາດມີກຸ່ມຄົນ ທີ່ຮູ້ສຶກຢ່າງແຮງ ກ່ຽວກັບການບໍ່ສັກວັກຊີນ ແລະສະນັ້ນ ເຂົາເຈົ້າມັກຈະເຮັດກິດຈະກັມນໍາກັນເລື້ອຍໆ. ແລະເພາະເຫດນີ້, ຖ້າຫາກມັນຖືກສຳຜັດ, ທ່ານກໍມີໂອກາດ ທີ່ຈະເຮັດໃຫ້ຜູ້ຄົນເປັນຈໍານວນຫລວງຫລາຍ ຕິດເຊື້ອໂຣກນັ້ນ."
ຄັ້ງຫນຶ່ງ ໂຣກໝາກສຸກຖືວ່າ ຖືກກໍາຈັດໃນສະຫະຣັດອາເມຣິກາ ຍ້ອນວັກຊີນ MM (Measles-Mumps-Rubella) ແລະອັດຕາ ການສັກວັກຊີນພູມຕ້ານທານສູງ.
ແຕ່ເພາະໂຣກໝາກສຸກ ເປັນໂຣກທີ່ແພ່ໄດ້ໄວ, ຜູ້ຊ່ຽວຊານກ່າວວ່າ ຢ່າງຫນ້ອຍ 95 ເປີເຊັນ ຂອງຊຸມຊົນ ຕ້ອງໄດ້ຮັບການສັກວັກຊີນ ເພື່ອຢຸດການລະບາດ-ແລະນັ້ນ ບໍ່ໄດ້ແມ່ນກໍຣະນີ ໃນສະຫະຣັດອາເມຣິກາ.
ອັດຕາການສັກວັກຊີນ ໄດ້ຫລຸດລົງທົ່ວປະເທດ ໃນສະຫະຣັດອາເມຣິກາ ນັບຕັ້ງແຕ່ ການລະບາດຂອງ COVID-19, ແລະການສັກວັກຊີນ ສໍາລັບເດັກນ້ອຍອະນຸບານ ສ່ວນຫລາຍກໍຕ່ຳກວ່າມາດຕະຖານ.
ຜູ້ຊ່ຽວຊານ ດ້ານໄວຣັສເຊັ່ນ Scott Weaver ຂອງ University of Texas ໄດ້ພະຍາຍາມ ໃຫ້ຄວາມຫມັ້ນໃຈແກ່ຊຸມຊົນ, ໂດຍກ່າວວ່າ ວັກຊີນສໍາລັບໂຣກໝາກສຸກນັ້ນ ແມ່ນປອດພັຍ ແທ້ໆ.
"ຫລັກຖານທາງວິທະຍາສາດ ແມ່ນຫນັກແຫນ້ນ ແລະຄົບຖ້ວນ ວ່ານີ້ເປັນວັກຊີນທີ່ປອດພັຍ ແລະມີປະສິດທິພາບຫລາຍ. ແລະບໍ່ມີເຫດຜົນ ທາງວິທະຍາສາດ ສໍາລັບຜູ້ຄົນ ທີ່ຈະກັງວົນ ກ່ຽວກັບການສັກວັກຊີນ."
Kirk Watson ເຈົ້າເມືອງ Austin ຂອງພັກ Democrats ຍັງໄດ້ເປັນຜູ້ນໍາການຣົນນະຣົງ ການສັກວັກຊີນໃນຣັດ Texas.
"ຂ້າພະເຈົ້າ ຢາກເນັ້ນຫນັກຕໍ່ທຸກຄົນ ທີ່ກຳລັງຟັງ ວ່າການສັກວັກຊີນ ຍັງເປັນການປ້ອງກັນທີ່ດີທີ່ສຸດ ໃນການຕໍ່ຕ້ານໂຣກທີ່ຕິດຕໍ່ໄດ້ສູງ ແລະເປັນອັນຕະຣາຍນີ້. ມັນເຖິງເວລາແລ້ວ ທີ່ຈະກວດກາເບິ່ງ ແລະໃຫ້ແນ່ໃຈວ່າ ການສັກວັກຊີນຂອງທ່ານນັ້ນ ຄົບຖ້ວນ."
ນັ້ນເຮັດໃຫ້ Macey Lane ຜູ້ເປັນແມ່ ຢູ່ພາກຕາເວັນຕົກຂອງຣັດ Texas ເຊື່ອຂໍຄວາມນັ້ນ.
"ຂ້ອຍຮູ້ສຶກວ່າ ວັກຊີນຖືກສ້າງຂຶ້ນ ເພື່ອຊ່ວຍຊີວິດຂອງຜູ້ຄົນ. ແລະເຖິງແມ່ນວ່າ ມັນບໍ່ດີພ້ອມທຸກຢ່າງ, ບາງທີສິ່ງທີ່ດີ ຈະມີຫລາຍກວ່າສິ່ງທີ່ບໍ່ດີ. ແຕ່ບໍ່ແມ່ນທຸກຄົນ ຈະເຫັນພ້ອມກັບເລື່ອງນັ້ນ."
ແຕ່ບາງຄົນ ກໍບໍ່ຍອມຮັບ.
David Klassen ຜູ້ນໍາຊຸມຊົນ ແລະຄຸນພໍ່ຈາກ Seminole Community Church ກ່າວວ່າ ເຂົາເຈົ້າຈະບໍ່ພະຍາຍາມປ່ຽນຄວາມຄິດ.
"ພວກເຮົາເຊື່ອຢ່າງແຮງກ້າ ໃນສິດອໍານາດຂອງພໍ່ແມ່ໃນບ້ານ. ວ່າເຂົາເຈົ້າ ຕ້ອງ ແລະຄວນມີອິດສຣະ ທີ່ຈະຊີ້ນໍາ ແລະນໍາພາລູກໆຂອງເຂົາເຈົ້າ."
ຜູ້ສນັບສນູນ ໄດ້ເຊື່ອມໂຍງຄວາມລັງເລໃຈຂອງພໍ່ແມ່ ກ່ຽວກັບການສັກວັກຊີນ ກັບຂ່າວສານຕໍ່ຕ້ານການສັກວັກຊີນ ທີ່ແພ່ຂຍາຍໄປທົ່ວ ທັງໃນລະດັບຣັດ ແລະລະດັບປະເທດ, ຂ່າວສານ ທີ່ສົ່ງເສີມທິດສະດີ ເລື່ອງຄວາມປອດພັຍຂອງວັກຊີນ ຊຶ່ງຖືກພິສູດວ່າ ບໍ່ແມ່ນຄວາມຈິງ ເປັນເວລາດົນນານແລ້ວ.
ຂ່າວສານການຕໍ່ຕ້ານວັກຊີນບາງຢ່າງ ໄດ້ຖືກພົບເຫັນໃນຣັຖບານຂອງ Trump, ແຕ່ຜູ້ຊ່ຽວຊານເລື່ອງວັກຊີນກ່າວວ່າ ອັດຕາການສັກວັກຊີນ ໄດ້ຫລຸດລົງກ່ອນ Donald Trump ຈະກັບຄືນມາ.
ເຖິງຢ່າງໃດກໍຕາມ, ໃນບໍ່ດົນມານີ້ ນັກການເມືອງຂອງຣັດ ໄດ້ສເນີຮ່າງກົດຫມາຍ ຫລາຍກວ່າ 10 ສະບັບ ທີ່ຈະເພີ່ມຄວາມເຂັ້ມແຂງ ຫລື ຂຍາຍການຍົກເວັ້ນຈາກສັກວັກຊີນ, ໃນຂນະທີ່ Robert F. Kennedy Jrຣັຖມົນຕີສາທາຣະນະສຸກ ຂອງຣັຖບານ ທີ່ຫາກໍຖືກແຕ່ງຕັ້ງໃໝ່ໆ ໄດ້ສັ່ງໃຫ້ຍົກເລີກການສຶກສາເລື່ອງວັກຊີນ.
ນັກຄົ້ນຄວ້າບາງຄົນ ທີ່ໄດ້ຮັບເງິນທຶນຈາກ the National Institute of Health ໄດ້ຮັບຈົດຫມາຍບອກວ່າ ໂຄງການຂອງເຂົາເຈົ້າ ຖືກຍົກເລີກ, ພ້ອມດ້ວຍຈົດຫມາຍສະບັບຫນຶ່ງ ກ່າວວ່າ:
"ມັນເປັນນະໂຍບາຍຂອງ NIH ທີ່ຈະບໍ່ໃຫ້ຄວາມຄວາມສໍາຄັນ ຕໍ່ກິດຈະກັມການຄົ້ນຄວ້າ ທີ່ເຈາະຈົງໃສ່ ການໄດ້ຮັບຄວາມຮູ້ທາງວິທະຍາສາດ ວ່າເປັນຫຍັງ ບຸກຄົນຈຶ່ງລັງເລໃຈ ທີ່ຈະຮັບການສັກວັກຊີນ ແລະ/ຫລື ຄົ້ນຄວ້າຫາວິທີ ທີ່ຈະພັດທະນາຄວາມສົນໃຈ ແລະຈຸດປະສົງຂອງວັກຊີນ."
ເມື່ອບໍ່ດົນມານີ້, Kennedy ໄດ້ໃຫ້ການສໍາພາດກັບ Fox News ບ່ອນທີ່ Kennedy ໄດ້ກ່າວຢ້ຳ ກ່ຽວກັບຄວາມປອດພັຍ ຂອງວັກຊີນ.
"ພວກເຮົາ ຄວນມີຄວາມໂປ່ງໃສ, ພວກເຮົາ ຄວນມີທາງເລືອກຢ່າງມີຂໍ້ມູນ. ແລະຖ້າຫາກຜູ້ຄົນບໍ່ຢາກເຮັດ, ຣັຖບານ ກໍບໍ່ຄວນບັງຄັບເຂົາເຈົ້າໃຫ້ເຮັດ. ມີຜົນກະທົບຂ້າງຄຽງຈາກວັກຊີນ. ມັນເຮັດໃຫ້ມີຄົນຕາຍທຸກໆປີ. ມັນເຮັດໃຫ້ເກີດຄວາມເຈັບປ່ວຍທັງຫມົດ ທີ່ໂຣກໝາກສຸກເຮັດໃຫ້ເກີດ-ສມອງອັກເສບ ແລະຕາບອດ, ແລະອື່ນໆ. ແລະສະນັ້ນ, ຜູ້ຄົນ ຄວນຈະສາມາດເລືອກໄດ້ດ້ວຍຕົວເອງ."
ຣັຖມົນຕີ ຍັງກ່າວຊ້ຳອີກ ກ່ຽວກັບການໃຊ້ Vitamin A ແລະການປິ່ນປົວອື່ນໆ ທີ່ທ່ານຫມໍບາງຄົນກ່າວວ່າ ມີຜົນກະທົບ.
Dr Ana Montanez ໃນຣັດ Texas ກ່າວວ່າ ຄົນໄຂ້ໄດ້ບອກນາງວ່າ ເຂົາເຈົ້າ ກໍາລັງໃຫ້ລູກໆຂອງເຂົາເຈົ້າ ກິນ Vitamin A ໃນການປ້ອງກັນໂຣກ ຊຶ່ງແມ່ນອີກຢ່າງຫນຶ່ງທີ່ບໍ່ໄດ້ຖືກພິສູດ.
ນັ້ນແມ່ນມາດຕະການ ທີ່ຄັ້ງຫນຶ່ງເຄີຍຖືກຍົກຍ້ອງໂດຍ Kennedy ຕອນທີ່ ເປັນຜູ້ນໍາກຸ່ມປ້ອງກັນສຸຂະພາບຂອງເດັກນ້ອຍ (Children's Health Defense), ຊຶ່ງເປັນກຸ່ມຕໍ່ຕ້ານວັກຊີນແຫ່ງຊາດ.
Dr Summer Davies ທ່ານຫມໍເດັກນ້ອຍຂອງຣັດ Texas ກ່າວວ່າ ການປິ່ນປົວເຫລົ່ານີ້ ຈະບໍ່ສາມາດປ້ອງກັນການຕິດເຊື້ອໂຣກ.
"ມັນຍາກຫລາຍ ທີ່ຈະເຫັນເດັກນ້ອຍເຫລົ່ານີ້, ປິ່ນປົວເຂົາເຈົ້າ, ເພາະວ່າ ເຮົາບໍ່ສາມາດເຮັດຫຍັງໄດ້ຫຼາຍ. ມັນເປັນການຕິດເຊື້ອ ທີ່ເຮົາບໍ່ສາມາດປິ່ນປົວໄດ້. ບໍ່ມີຢາໃດ ທີ່ຈະເຮັດໃຫ້ມັນຫາຍໄປໄວກວ່ານັ້ນ. ສະນັ້ນ ທ່ານຈຶ່ງເຫັນເຂົາເຈົ້າດີ້ນລົນ. ທ່ານເຫັນເຂົາເຈົ້າດີ້ນລົນ ທີ່ຈະຫາຍໃຈ. ເຂົາເຈົ້າບໍ່ຢາກກິນຫລືດື່ມ. ເຂົາເຈົ້າຂາດນ້ຳ. ເຂົາເຈົ້າມີໄຂ້ສູງ. ເຂົາເຈົ້າໂສກເສົ້າ. ແລະພວກເຮົາ ເຮັດຢ່າງເຕັມທີ່ ເພື່ອສົ່ງເສີມເຂົາເຈົ້າ ໃຫ້ຜ່ານຜ່າສິ່ງນັ້ນ....ແຕ່ມັນຍາກຫລາຍທີ່ຈະເບິ່ງ."
ການຫລຸດລົງ ຂອງລະດັບການສັກວັກຊີນ ຍັງເຫັນໄດ້ ໃນລະດັບສາກົນ-ລວມທັງໃນດ້ວຍ.
ຮອງສາດສະດາຈານ Frank Beard ຈາກ the National Centre for Immunisation Research and Surveillance, ຊຶ່ງລາຍງານທຸກໆປີ ກ່ຽວກັບອັດຕາການສັກວັກຊີນ ທົ່ວປະເທດ.
"ຈໍານວນການສັກວັກຊີນໄດ້ຫລຸດລົງ ໃນສອງສາມປີທີ່ຜ່ານມາ ນັບຕັ້ງແຕ່ ການແພ່ລະບາດຂອງ COVID-19...ສະນັ້ນ ແມ່ນການຫລຸດລົງຫນ້ອຍຫນຶ່ງ ແຕ່ມັນກໍໜ້າເປັນຫ່ວງ ເພາະກ່ອນການລະບາດ, ການຄອບຄຸມໄດ້ເພີ່ມຂຶ້ນເລື້ອຍໆ ໃນປະມານແປດປີທີ່ຜ່ານມາ."
ສາດສະດາຈານ Margie Danchin ທ່ານຫມໍເດັກນ້ອຍ ແລະຜູ້ຊ່ຽວຊານເລື່ອງວັກຊີນຈາກ the University of Melbourne ແລະ the Murdoch Children's Research Institute ເວົ້າວ່າ ການຫລຸດລົງນັ້ນ ແມ່ນເຫັນໄດ້ໂດຍສະເພາະໃນບາງຊຸມຊົນ ແລະບາງກຸ່ມອາຍຸ.
"ຕັ້ງແຕ່ປີ 2020, ອັດຕາການຄອບຄຸມຂອງວັກຊີນ ໃນເດັກນ້ອຍ ຕອນອາຍຸ 1, 2 ແລະ 5 ປີໃນອອສເຕຣເລັຍ ໄດ້ຫລຸດລົງເລື້ອຍໆ. ແລະການຫລຸດລົງຫລາຍທີ່ສຸດ ແມ່ນເດັກນ້ອຍຊາວ First Nations ໃນໄລຍະຫນຶ່ງ ເຖິງສອງປີ, ໂດຍສະເພາະຢູ່ໃນ Northern Territory. ສະນັ້ນ, ພວກເຮົາ ຈຶ່ງມີບັນຫາໃຫຍ່ ຢູ່ໃນອອສເຕຣເລັຍຄືກັນ, ແລະພວກເຮົາກໍມີໂອກາດສູງ ທີ່ຈະເກີດໂຣກໝາກສຸກ ໃນອອສເຕຣເລັຍຄືກັນ, ບໍ່ແມ່ນ ພຽງແຕ່ຢູ່ໃນເຂດອາຊີປາຊີຟິກເທົ່ານັ້ນ."
Professor Danchin ກ່າວວ່າ ຍັງມີເຂດທາງພູມີສາດ ທີ່ກຳໜົດໄວ້ຊັດເຈນ ຢູ່ໃນອອສເຕຣເລັຍ ທີ່ມີຄວາມຄອບຄຸມ ຂອງການສັກວັກຊີນທີ່ຕ່ຳກວ່າ.
"ໂດຍທົ່ວໄປແລ້ວ, ການຄອບຄຸມການສັກວັກຊີນໂຣກໝາກສຸກ ແມ່ນສູງພໍສົມຄວນ. ແນ່ນອນວ່າ,ມັນຂຶ້ນຢູ່ກັບສ່ວນໃດຂອງປະເທດ... ພວກເຮົາມີການຄອບຄຸມຕ່ຳ ຂອງການວັກຊີນຢູ່ທົ່ວອອສເຕຣເລັຍ, ຍົກຕົວຢ່າງ ໃນເຂດ Northern Rivers ໃນຣັດ New South Wales, ຍັງຮວມເຖິງໃນເມືອງ Melbourne ແລະ Sydney ນໍາອີກ."
ຖ້າຫາກຄວາມສົງສັຍ ແລະຄວາມບໍ່ໄວ້ວາງໃຈໃນວັກຊີນ ເປັນເຫດຜົນຂອງອັດຕາການສັກວັກຊີນທີ່ຕ່ຳກວ່າໃນສະຫະຣັດອາເມຣິກາ, ນັ້ນບໍ່ໄດ້ແມ່ນກໍຣະນີ ສໍາລັບອອສເຕຣເລັຍ.
ສາດສະດາຈານ Danchin ກ່າວວ່າ ເຖິງແມ່ນວ່າ ມີຄົນສົງສັຍກ່ຽວວັກຊີນ-ແຕ່ການເຂົ້າເຖິງກໍເປັນບັນຫາສໍາຄັນ.
"ອຸບປະສັກດ້ານປະຕິບັດ ໃນການສັກວັກຊີນ ແມ່ນບໍ່ສາມາດນັດຫມາຍ ຫລືຈ່າຍຄ່ານັດຫມາຍນັ້ນ. ບໍ່ສາມາດເດີນທາງໄປຕາມນັດໄດ້ ຖ້າຫາກແມ່ມີລູກຫລາຍຄົນ, ຫລືບໍ່ສາມາດລາວຽກໄດ້, ເປັນຕົ້ນ."
ຮອງສາດສະດາຈານ Beard ກ່າວວ່າ ມີຄວາມເປັນຫ່ວງ ກ່ຽວກັບການລະບາດໃນທ້ອງຖິ່ນ ເນື່ອງຈາກຊ່ອງວ່າງ ໃນຄວາມຄອບຄຸມ ຂອງການສັກວັກຊີນ, ແລະຜູ້ຄົນ ທີ່ບໍ່ໄດ້ຮັບວັກຊີນ ຈະນໍາເອົາໂຣກໝາກສຸກ ກັບຄືນມາ ຫລັງຈາກການເດີນທາງກັບຈາກຕ່າງປະເທດ.
"ອອສເຕຣເລັຍ ໄດ້ຮັບການຢືນຢັນ ໂດຍອົງການອະນາມັຍໂລກ ວ່າໄດ້ກໍາຈັດການແພ່ເຊື້ອໂຣກໝາກສຸກໃນທ້ອງຖິ່ນ ໃນປີ 2014. ນັບແຕ່ນັ້ນມາ ພວກເຮົາໄດ້ມີບາງກໍຣະນີ ແລະການລະບາດຂອງໂຣກ, ແລະສ່ວນຫລາຍແລ້ວ ມັນກໍກ່ຽວຂ້ອງກັບ ຜູ້ຄົນທີ່ບໍ່ໄດ້ຮັບການສັກວັກຊີນ. ຊາວອອສເຕຣເລັຍ ທີ່ໄປຕ່າງປະເທດ ແລະກັບມາດ້ວຍໂຣກ ໝາກສຸກ; ຫລືນັກທ່ອງທ່ຽວຈາກຕ່າງປະເທດ ທີ່ເປັນໂຣກໝາກສຸກ. ແລະສະນັ້ນ ຈຶ່ງມີການລະບາດຂອງໂຣກໝາກສຸກ ໃນສອງສາມປີທີ່ຜ່ານມາ ຢູ່ຕ່າງປະເທດ ທີ່ເພີ່ມຄວາມສ່ຽງ ທີ່ຈະຖືກນໍາເຂົ້າມາໃນອອສເຕຣເລັຍ."
ໃນຂນະດຽວກັນ, ຢູ່ໃນເມືອງ Seminole ໃນຣັດເທັກຊັສ, Pastor Klassen ກ່າວວ່າ ບໍ່ມີການຕິດຕໍ່ໂດຍກົງ ຈາກເຈົ້າຫນ້າທີ່ສາທາຣະນະສຸກ ວ່າຈະເຮັດແນວໃດ ໃນຂນະທີ່ຈໍານວນຄົນທີ່ເຈັບປ່ວຍດ້ວຍໂຣກໝາກສຸກ ໄດ້ເພີ່ມຂຶ້ນ ໃນໄລຍະຊ່ວງການລະບາດ ໃນສະຫະຣັດອາເມຣິກາ.
ລາວເວົ້າວ່າ ປະຊາຄົມຂອງລາວ ພຽງແຕ່ດຳເນີນຊີວິດຕາມປົກກະຕິຂອງເຂົາເຈົ້າ.
"ພວກເຮົາ ເລືອກທີ່ຈະບໍ່ເປັນຄົນຕື່ນຕົກໃຈ. ນັ້ນບໍ່ໄດ້ຫມາຍຄວາມວ່າ ເຮົາມີຄວາມປມາດ. ກ່ຽວກັບ COVID, ເຮົາມີການຊີ້ນໍາທີ່ແນ່ນອນ ຈາກຣັຖບານຂອງເຮົາ. ແຕ່ໃນກໍຣະນີນີ້, ເຮົາບໍ່ໄດ້ຮັບຄຳແນະນຳທີ່ ແຈ່ມແຈ້ງ. ໂອເຄ? ສະນັ້ນ ຂ້າພະເຈົ້າຈຶ່ງຄິດວ່າ ນັ້ນຄືສິ່ງທີ່ຂ້າພະເຈົ້າສາມາດເວົ້າໄດ້ ແມ່ນວ່າ ພວກເຮົາບໍ່ໄດ້ຮັບທິດທາງທີ່ແຈ່ມແຈ້ງ, ສະນັ້ນ ພວກເຮົາ-ຈຶ່ງໃຊ້ຊີວິດຕາມປົກກະຕິ."
ເນື້ອເລື່ອງໂດຍ Deborah Groarke ຂ່າວ SBS News,
ຈັດທຳໂດຍ ສັກ ພູມີຣັຕນ໌ ວິທຍຸ SBS ພາກ ພາສາລາວ.
ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌
