ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌
ການຊັກຊ້າຂອງການອະນຸມັດ ວີຊາຜູ້ອາສັຍຢູ່ຖາວອນ.
ຫລາຍຄົນທີ່ລໍຖ້າ ການອາສັຍຢູ່ຢ່າງຖາວອນ ດ້ວຍວີຊາຍ່ອຍບາງກຸ່ມ ກ່າວວ່າ ການຊັກຊ້າ ໃນການອະນຸມັດ ໃຫ້ອາສັຍຢູ່ຢ່າງຖາວອນ ໂດຍDepartment of Home Affairs ໄດ້ເຮັດໃຫ້ເຂົາເຈົ້າ ຕົກຢູ່ໃນຄວາມບໍ່ແນ່ນອນ, ແລະບໍ່ສາມາດວາງແຜນຊີວິດໄດ້.
ດັ່ງທີ່ Sunil Awasthi ລາຍງານ, ເຂົາເຈົ້າຮູ້ສຶກວ່າ ການມີສ່ວນຮ່ວມຂອງເຂົາເຈົ້າ ແກ່ອອສເຕຣເລັຍ-ແລະການມີສ່ວນຮ່ວມທີ່ເຂົາເຈົ້າໄດ້ເຮັດ ໃນໄລຍະໂຣກລະບາດ-ໄດ້ຮັບການຕອບແທນຢ່າງບໍ່ພຽງພໍ.
Akash ໄດ້ຍ້າຍຈາກປະເທດອິນເດັຍ ມາອອສເຕຣເລັຍໃນປີ 2020.
ລາວໄດ້ທໍາງານ ເປັນຜູ້ຈັດການ ໃນອຸດສະຫະກັມການຂາຍຍ່ອຍ ໃນ Gold Coast.
ເຊັ່ນດຽວກັບຫລາຍຄົນ, ລາວໄດ້ມາດ້ວຍວີຊາ 4-9-4 ຫລື 4-9-1, ຊຶ່ງຈັດປະເພດເຂົາເຈົ້າວ່າ ເປັນຜູ້ອາສັຍຊົ່ວຄາວ.
ເຂົາເຈົ້າ ໄດ້ຮັບການສນັບສນູນຈາກຄອບຄົວ ຫລືຣັຖບານ ໃຫ້ອາສັຍຢູ່ ແລະທໍາງານ ໃນເຂດພູມີພາກ ຢ່າງຫນ້ອຍສາມປີ, ພ້ອມດ້ວຍຄໍາສັນຍາ ທີ່ຈະໄດ້ອາສັຍຢູ່ຢ່າງຖາວອນ-ຈາກວີຊາ 1-9-1 ຫຼັງຈາກຄົບ 3 ປີ.
ແຕ່ Department of Home Affairs ເບິ່ງຄືວ່າ ກໍາລັງດີ້ນລົນ ທີ່ຈະອະນຸມັດ ການອາສັຍຢູ່ຢ່າງຖາວອນ ໃຫ້ໄວພໍ ສໍາລັບຜູ້ຄົນເຫລົ່ານີ້.
ຜູ້ສນັບສນູນ ມີຂໍ້ມູນຈາກກະຊວງ, ນັບແຕ່ເດືອນທັນວາ (2024), ທີ່ລະບຸວ່າ ມີໃບສມັກເກືອບ 11,000 ໃບ, ແຕ່ມີຫນ້ອຍກວ່າ 300 ໃບທີ່ຖືກດໍາເນີນການ ຕໍ່ເດືອນ.
Akash ເວົ້າວ່າ ລາວຮູ້ສຶກວ່າ ລາວຖືກປະຕິບັດ ຢ່າງບໍ່ເປັນທັມ.
"ເຖິງແມ່ນຈະຕ້ອງຢູ່ໃນເຂດພູມີພາກ ເຮົາກໍຍອມຢູ່. ແຕ່ພວກເຮົາພຽງແຕ່ ຂໍຄວາມຍຸດຕິທັມ-ຄໍາສັນຍາ ທີ່ໄດ້ໃຫ້ແກ່ພວກເຮົາ. ເພາະໃນຕອນຕົ້ນ, ພຽງແຕ່ໃນປີທີ່ຜ່ານມາ, ຂ້າພະເຈົ້າ ໄດ້ເຫັນຜູ້ສມັກ ຫລາຍຄົນ ທີ່ເຂົາເຈົ້າ ເຄີຍໄດ້ຮັບອະນຸມັດ ພາຍໃນສີ່ເດືອນ. ບັດນີ້, ເຂົາເຈົ້າໄດ້ຮັບອະນຸມັດ ພາຍໃນເກົ້າເດືອນ ແລະແປດເດືອນ. ບັດນີ້, ຖືກຄາດວ່າ ຈະໃຊ້ເວລາຢ່າງຫນ້ອຍ 14 ເດືອນ ເພື່ອແກ້ໄຂບັນຫາ ຂອງໃບສມັກ ທີ່ຄ້າງຢູ່."
Akash ມີອ້າຍເອື້ອຍນ້ອງ ທີ່ຢູ່ອອສເຕຣເລັຍຄືກັນ, ແລະທັງສອງມີຖານະ ຢູ່ຢ່າງຖາວອນ.
ລາວເວົ້າວ່າ ກະຊວງເຮັດວຽກຢ່າງ ບໍ່ສມ່ຳສເມີ.
"ຂ້ອຍສາມາດເຫັນລະບົບ ຢູ່ໃນອິນເຕີເນັດ ທີ່ Department of Home Affairs, ມັນບໍ່ເຊື່ອຖືໄດ້ດັ່ງທີ່ຄວນເປັນ. ການຄຳນວນ ທີ່ເຂົາເຈົ້າໃຊ້ ໃນເວັບໄຊ້, ມັນເປັນເລື່ອງຕລົກ ຫລືຫຍັງກໍບໍ່ຮູ້. ນັ້ນແມ່ນເຫດຜົນ-ທີ່ມັນປ່ຽນໄປເລື້ອຍໆ."
ຜູ້ສນັບສນູນກ່າວວ່າ ວຽກງານທີ່ຄ້າງຢູ່ນັ້ນ ໄດ້ກໍ່ໃຫ້ເກີດຄວາມບໍ່ແນ່ນອນ ເປັນເວລານານ ສໍາລັບຜູ້ທີ່ກ່ຽວຂ້ອງ, ຊຶ່ງເຮັດໃຫ້ເກີດຄວາມກົດດັນທາງຈິດໃຈ.
Prasoon Kottayodan ເປັນ chef ທີ່ເຄີຍທໍາງານຢູ່ Dubai ແລະ Singapore ກ່ອນທີ່ຈະຍ້າຍມາອອສເຕຣເລັຍ.
ລາວກໍມີຄອບຄົວຢູ່ອອສເຕຣເລັຍນໍາອີກ, ແລະລູກສາວຂອງລາວກໍາລັງຮຽນຢູ່ທີ່ນີ້.
ລາວເວົ້າວ່າ ຜູ້ຄົນທີ່ຕົກຢູ່ໃນວຽກທີ່ຄ້າງຢູ່ຂອງກະຊວງ ກໍຈະຖືກເອົາປຽບ, ເພາະເຂົາເຈົ້າ ຕ້ອງຢູ່ກັບນາຍຈ້າງ ແລະອາຊີບດຽວກັນ ຈົນກວ່າເຂົາເຈົ້າໄດ້ຮັບວີຊາ ຜູ້ອາສັຍຢູ່ຢ່າງຖາວອນ.
"ແທ້ຈິງແລ້ວ ຂ້າພະເຈົ້າໄດ້ປະເຊີນ ກັບການເອົາປຽບຢ່າງຫລາຍ. ຂ້າພະເຈົ້າ ໄດ້ລາອອກຈາກວຽກຂອງຂ້າພະເຈົ້າ. ຂ້າພະເຈົ້າ ໄດ້ຍື່ນ ສມັກ ໃນຖານະຜູ້ອາສັຍຢູ່ແລ້ວ. ບໍ່ມີໃຜຈະສນັບສນູນຂ້າພະເຈົ້າ ຫລັງຈາກຂ້າພະເຈົ້າ ໄດ້ສມັກໃນຖານະຜູ້ອາສັຍ."
Mr Kottayodan ກ່າວວ່າ ລາວກໍາລັງເຮັດໃຫ້ ຄວາມຂາດທັກສະນັ້ນ ໜ້ອຍລົງ.
"ຂ້ອຍກໍາລັງເຮັດວຽກດ້ານການບໍຣິການ ໃນຖານະ chef ໃນເຂດ Geelong, ໃນ Victoria. ມີການຂາດແຄນ chef ໃນເຂດນີ້ແທ້ໆ. ຂ້ອຍກໍໄດ້ເຮັດຕາມເງື່ອນໄຂ ສາມປີແລ້ວ."
Matthew Nicklin ຖືວ່າຕົນເອງ ປະເຊີນກັບຄວາມສັບສົນ ອັນດຽວກັນກັບ Akash ແລະ Mr Kottayodan.
ລາວໄດ້ຍ້າຍມາຢູ່ອອສເຕຣເລັຍ ຈາກປະເທດອັງກິດ ໃນເດືອນກັນຍາປີ 2022.
ລາວເປັນຄູສອນໂຮງຮຽນມັດທະຍົມ ໃນເມືອງ Townsville ແລະເມັຍຂອງລາວ ເປັນນາງພະຍາບານ.
ເຂົາເຈົ້າ ມີລູກຄົນຫນຶ່ງ, ພ້ອມດ້ວຍອີກຄົນຫນຶ່ງທີ່ກໍາລັງຈະເກີດມາ.
ລາວເວົ້າວ່າ ຜູ້ຄົນຄືກັນກັບລາວ ບໍ່ໄດ້ມີສ່ວນຮ່ວມ ໃນການເຮັດໃຫ້ມີວິກິດການ ຂາດທີ່ຢູ່ອາສັຍ ທີ່ບາງຄົນມັກກ່າວໂທດ ຜູ້ອົບພະຍົບ ເມື່ອບໍ່ດົນມານີ້.
ລາວເວົ້າວ່າ ມັນແມ່ນຣັຖບານ, ພ້ອມດ້ວຍວຽກຄ້າງຄາຂອງວີຊາ, ທີ່ຢຸດລາວ ຈາກການມີສ່ວນຮ່ວມ ແກ່ອອສເຕຣເລັຍຕໍ່ໄປ.
"ພວກເຮົາ ຕ້ອງຍ້າຍເຮືອນສີ່ເທື່ອ ໃນຂນະທີ່ເຊົ່າເຮືອນຢູ່. ແລະຂ້າພະເຈົ້າກໍເຂົ້າໃຈ. ບໍ່ເປັນຫຍັງ. ນັ້ນຄືການເປັນຄົນເຊົ່າ. ແຕ່ເປັນຫຍັງ ຈຶ່ງບໍ່ອະນຸຍາດ ໃຫ້ພວກເຮົາປຸກເຮືອນ, ເພື່ອວ່າ ພວກເຮົາຈະສາມາດ ຊ່ອຍບັນເທົາການຂາດທີ່ຢູ່ອາສັຍ ທີ່ນີ້? ມັນຈະຊ່ອຍພວກເຮົາ ໃຫ້ພົ້ນຈາກການເຊົ່າເຮືອນ."
ລາວເວົ້າວ່າ ລາວຮູ້ສຶກວ່າ ຊີວິດຂອງລາວຖືກລະງັບ ແລະຄິດວ່າ ຈະຍອມຈຳນົນ ແລະຍ້າຍກັບໄປຢູ່ປະເທດອັງກິດ, ຊຶ່ງລາວບໍ່ຢາກເຮັດ.
"ຢູ່ທີ່ນີ້, ຂ້ອຍຮູ້ສຶກວ່າ ອະນາຄົດຂອງພວກເຮົາ ໄດ້ຖືກເອົາໄປຈາກເຮົາ. ເຖິງແມ່ນ ເຮົາຮັກອອສເຕຣເລັຍ, ແລະການເປັນສ່ວນນຶ່ງ ຂອງຊຸມຊົນ, ແລະມີສ່ວນຮ່ວມ, ເສັ້ນທາງຂອງເຮົາ ທີ່ຈະໄປສູ່ການອາສັຍຢູ່ ຢ່າງຖາວອນ ເບິ່ງຄືວ່າຖືກປິດ, ຫລືຢ່າງຫນ້ອຍ ກໍບໍ່ໄດ້ຖືກກໍານົດໄວ້ ຢ່າງແນ່ນອນ."
Mr Kottayodan ກ່າວວ່າ ຜູ້ຄົນຄືກັນກັບລາວບໍ່ ຢາກຍ້າຍໄປຢູ່ເມືອງໃຫຍ່-ເຂົາເຈົ້າ ພຽງແຕ່ຢາກດໍາເນີນຊີວິດ ຂອງເຂົາເຈົ້າ ຕໍ່ໄປໃນເຂດທີ່ເຂົາເຈົ້າ ເຄີຍຢູ່ມາກ່ອນ.
"ພວກເຮົາ ໄດ້ສນັບສນູນຊຸມຊົນ ເປັນເວລາດົນນານແລ້ວ, ໃນເຂດນັ້ນ. ພວກເຮົາ ຈະບໍ່ຍ້າຍໄປເມືອງໃຫຍ່. ພວກເຮົາສ່ວນຫລາຍ ຢາກຕັ້ງຖິ່ນຖານ ຢູ່ໃນເຂດນັ້ນ. ເຂດນັ້ນ ມີການຂາດຜູ້ຄົນທີ່ມີທັກສະ. ຂ້ອຍບໍ່ຮູ້ວ່າ ເປັນຫຍັງ ພວກເຂົາຈຶ່ງຫລີກລ້ຽງພວກເຮົາ."
ໃນການຕອບໂຕ້ ຕໍ່ສິ່ງທັງຫມົດນີ້, ຜູ້ທີ່ມີວີຊາເຫລົ່ານີ້ ໄດ້ສົ່ງຄຳຮ້ອງໄປຫາຣັຖບານກາງ, ຂໍຮ້ອງໃຫ້ມີຊັບພະຍາກອນເພີ່ມເຕີມ ເພື່ອໃຫ້ມີການດໍາເນີນການເລື້ອງວີຊາເຫລົ່ານີ້ ໄດ້ທັນເວລາ.
ມັນມີຫລາຍກວ່າ 5,500 ລາຍຊື່ ຈົນເຖິງເວລານີ້.
ເນື້ອເລື່ອງໂດຍ Sunil Awasthi ຂ່າວ SBS News,
ຈັດທຳໂດຍ ສັກ ພູມີຣັຕນ໌ ວິທຍຸ SBS ພາກ ພາສາລາວ.
ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌
