ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌
The Australian Greens ແມ່ນພັກການເມືອງແບບໃດ?
The Australian Greens, ຊຶ່ງປະຈຸບັນນີ້ນໍາໂດຍ Adam Bandt, ເປັນພັກຍ່ອຍ ທີ່ໃຫຍ່ທີ່ສຸດຂອງອອສເຕຣເລັຍ.
ດັ່ງທີ່ Rania Yallop ລາຍງານ, ເຂົາເຈົ້າໄດ້ເຕີບໂຕຂຶ້ນ ຈາກກຸ່ມຜູ້ປະທ້ວງ ໄປສູ່ແກນນຳສໍາຄັນ ໃນຣັຖສະພາ ໃນໄລຍະ 50 ປີທີ່ຜ່ານມາ.
The Greens.
ຄືກັນກັບສີ.
ມັນເປັນພຽງກຸ່ມດຽວ ທີ່ບໍ່ມີຄໍາວ່າ 'ພັກ (Party)' ໃນທ້າຍຊື່ຂອງມັນ-ພຽງແຕ່ The Greens ເທົ່ານັ້ນ.
ເຂົາເຈົ້າເປັນພັກຍ່ອຍ, ແຕ່ເປັນພັກຍ່ອຍ ທີ່ໃຫຍ່ທີ່ສຸດ ໃນຣັຖສະພາ, ມີສີ່ບ່ອນນັ່ງ ໃນສະພາຕ່ຳ ແລະສິບເອັດບ່ອນນັ່ງ ໃນສະພາສູງ.
ແຕ່ The Greens ມາຈາກໃສ ແລະບັດນີ້ ເຂົາເຈົ້າເປັນໃຜ?
Jill Sheppard ອາຈານສອນອາວຸໂສທີ່ the Australian National University ກ່າວວ່າ The Greens ໄດ້ເຕີບໂຕຂຶ້ນ ຈາກຂະບວນການປະທ້ວງ ດ້ານສະພາບແວດລ້ອມ ຂອງອອສເຕຣເລັຍ ໃນຊ່ວງປີ 1970.
"ມີເຫດການສໍາຄັນບາງຢ່າງ ໃນຕອນຕົ້ນຂອງ The Greens, ໂດຍສະເພາະ ໃນການເມືອງໃນ Tasmania, ບ່ອນທີ່ ບໍ່ມີໃຜໃນທາງການເມືອງ ປົກປ້ອງສະພາບແວດລ້ອມ."
ສິ່ງເຫລົ່ານັ້ນ ຮວມເຖິງການຕັດໄມ້ພື້ນເມືອງ ແລະຂໍ້ສເນີ ຂອງການສ້າງເຂື່່ອນ.
ກຸ່ມຜູ້ປະທ້ວງບາງກຸ່ມ ໄດ້ຈັດຕັ້ງຂຶ້ນ ເປັນກຸ່ມ United Tasmania, ຊຶ່ງ The Greens ອ້າງວ່າ ເປັນພັກ 'ສີຂຽວ' ພັກທໍາອິດໃນໂລກ.
ໃນປີ 1992, ພັກການເມືອງຂອງຣັດ ໄດ້ຮວມໂຕກັນ ເພື່ອກໍ່ຕັ້ງ the Australian Greens.
Bob Brown ເປັນຜູ້ນໍາຄົນທໍາອິດຂອງພັກ.
ລາວເວົ້າວ່າ ສະພາບແວດລ້ອມ ເປັນສິ່ງສໍາຄັນທີ່ສຸດ.
"ພວກເຮົາ ແຕກຕ່າງຫລາຍຈາກພັກອື່ນໆ ໂດຍການມີສະພາບແວດລ້ອມ, ນະໂຍບາຍເລື່ອງສະພາບແວດລ້ອມຂອງພວກເຮົາ ເປັນແຖວຫນ້ານໍາອີກ ເພາະໃນທີ່ສຸດ ມັນເປັນນະໂຍບາຍ ຄວາມຍຸດຕິທັມທາງສັງຄົມ."
ແຕ່ກໍມີການໃຫ້ຄວາມສຳຄັນ ກັບບັນຫາທາງສັງຄົມ ມາໂດຍຕລອດ.
"ການປົກປ້ອງສະພາບແວດລ້ອມ ແລະຄວາມຍຸດຕິທັມທາງສັງຄົມ, ປະຊາທິປະໄຕ ແລະຄວາມສງົບ, ສີ່ຫລັກການ ຂອງພັກ The Greens ທົ່ວໂລກ ແລະສືບຕໍ່ມາຈົນເຖິງ ກອງປະຊຸມ The Greens Party Congress ຄັ້ງທໍາອິດຂອງໂລກ ທີ່ Canberra ໃນປີ 2001 ຊຶ່ງໄດ້ຮັບເອົາທົ່ວໂລກ."
ຄວາມໂປ່ງໃສຂອງຣັຖບານ, ການຊ່ວຍເຫລືອການຕາຍໂດຍສມັກໃຈ (Voluntary Assisted Dying) ແລະສິດທິຂອງຜູ້ຍິງ ເປັນບັນຫາບາງຢ່າງທີ່ Bob Brown ກ່າວວ່າ ລາວໄດ້ຕໍ່ສູ້ໃນໄລຍະ ທີ່ຢູ່ໃນສະພາຂອງ Tasmania.
ທຸກວັນນີ້, ນະໂຍບາຍຂອງພັກ ແມ່ນການຮັບເອົາອົບພະຍົບ ຂອງອອສເຕຣເລັຍ, ສົງຄາມໃນ Gaza, ການຮັບຮູ້ຣັດ Palestine (Palestinian Statehood), ການເຂົ້າເຖິງການດູແລສຸຂະພາບ ແລະຄວາມສາມາດໃນການຈ່າຍຄ່າທີ່ຢູ່ອາສັຍ.
ໃນປີ 2010, the Greens ໄດ້ຮ່ວມມືກັບພັກ Labor ເພື່ອໃຫ້ Julia Gillardຈັດຕັ້ງຣັຖບານສຽງຂ້າງນ້ອຍ (Minority Government).
ເຂົາເຈົ້າ ໄດ້ຕົກລົງ ທີ່ຈະຕໍ່ຕ້ານການຍື່ນຍັດຕິບໍ່ໄວ້ວາງໃຈ ໃນຣັຖບານ ຈາກສະມາຊິກ ທີ່ບໍ່ແມ່ນພັກ The Greens.
ແຕ່ຂໍ້ຕົກລົງນັ້ນ ໄດ້ສິ້ນສຸດລົງ ໃນປີ 2013 ເມື່ອ the Greens ໄດ້ກ່າວຫາLabor ວ່າ ເຂົ້າຂ້າງອຸດສະຫະກັມ ການຂຸດຄົ້ນບໍ່ແຮ່.
ໃນການເລືອກຕັ້ງຄັ້ງນີ້, ນະໂຍບາຍຂອງ the Greens ຮວມເຖິງ:
- ເອົາການຮັກສາແຂ້ວໃສ່ໃນ Medicare
- ການເພີ່ມພາສີ ໃຫ້ມະຫາເສດຖີ.
- ຍຸດຕິ Negative Gearing.
- ແລະຢຸດໂຄງການນ້ຳມັນ ແລະແກັສໃຫມ່ທັງຫມົດ.
The Greens ບໍ່ເຄີຍມີອໍານາດໃນຣັຖສະພາ, ແລະເບິ່ງຄືວ່າ ຈະເປັນໄປບໍ່ໄດ້ ທີ່ເຂົາເຈົ້າຈະມີສຽງສ່ວນໃຫຍ່ ໃນບໍ່ຊ້ານີ້.
ສະນັ້ນ ເປັນຫຍັງຜູ້ ຄົນຈຶ່ງເລືອກເອົາເຂົາເຈົ້າ?
"ຂ້າພະເຈົ້າຄິດວ່າ ການເລືອກ The Greens, ໂດຍສະເພາະ ຕອນທີ່ເຂົາເຈົ້າ ມີຄວາມສໍາເລັດຫລາຍຂຶ້ນ ໃນສະພາສູງ, ຮູ້ສຶກວ່າ ເປັນທາງເລືອກທັມມະດາ ສໍາລັບຜູ້ລົງຄະແນນສຽງຫລາຍຄົນ. ຄວາມສໍາເລັດທັງຫມົດຂອງເຂົາເຈົ້າ ແມ່ນດໍາເນີນຢູ່ຫລັງປະຕູ. The Greens ບໍ່ຄ່ອຍຈະຢືນຂຶ້ນ ແລະກ່າວວ່າ, ໃຫ້ເບິ່ງໃນສິ່ງທີ່ເຮົາໄດ້ເຮັດ. ແຕ່ສິ່ງທີ່ເຂົາເຈົ້າເຮັດ ຄືການຕົກລົງກັນຢ່າງຕໍ່ເນື່ອງ ກັບຣັຖບານ, ບໍ່ວ່າຈະເປັນ Liberalຫລື Labor, ພຽງແຕ່ເພື່ອປ່ຽນແປງ ສິ່ງທີ່ເຂົາເຈົ້າບໍ່ເຫັນພ້ອມ. ເຂົາເຈົ້າ ຈະເວົ້າວ່າ ເຂົາເຈົ້າໄດ້ຮັບຄວາມສໍາເລັດ ໃນການປະຕິບັດ ຕໍ່ຜູ້ລີ້ພັຍ ຕໍ່ຄວາມສົນໃຈຂອງສັງຄົມ ແລະຮັກສາມັນຢູ່ຕໍ່ຫນ້າຣັຖສະພາ."
ເຖິງແມ່ນວ່າ Bob Brown ມີຄວາມຫວັງ ທີ່ຈະເຫັນຣັຖບານຂອງ The Greens ໃນອະນາຄົດ.
"ພວກເຮົາຄາດວ່າ ຈະມີຣັຖບານ Green ໃນອະນາຄົດ ເພາະວິກິດທາງສະພາບແວດລ້ອມ ແລະສັງຄົມ ທີ່ໂລກກຳລັງປະເຊີນຢູ່ໃນເວລານີ້ ຮ້າຍແຮງຂຶ້ນເລື້ອຍໆ."
ການເລືອກຕັ້ງຄັ້ງສຸດທ້າຍ ເປັນສິ່ງດີສໍາລັບ The Greens ຊຶ່ງຈາກຜູ້ແທນພຽງຄົນຫນຶ່ງ ໃນສະພາຕ່ຳ ເປັນເຖິງສີ່ບ່ອນນັ່ງ ແລະໄດ້ຮັບສາມບ່ອນນັ່ງຢູ່ໃນສະພາສູງ.
ປະຈຸບັນ, ພັກນໍາໂດຍ Adam Bandt.
ລາວໄດ້ຢູ່ໃນສະພາຂອງຣັຖບານກາງ ເປັນເວລາ 15 ປີ ໃນຖານະສະມາຊິກຂອງ Melbourne ແລະໄດ້ເປັນຜູ້ນໍາຂອງ The Greens ຕັ້ງແຕ່ປີ 2020.
ລາວເປັນທະນາຍຄວາມ...ກ່ອນທີ່ຈະກາຍເປັນນັກການເມືອງ,
ສະນັ້ນ ພັກຈະສອດຄ່ອງ ກັບຖແລງການເດີມຂອງມັນ ໄດ້ແນວໃດ?
"ໃນເວລານີ້ The Greens ຕ້ອງໄດ້ມີການປ່ຽນແປງຄັ້ງໃຫຍ່ ໃນວິທີທີ່ເຂົາເຈົ້າ ດໍາເນີນງານໃນປັດຈຸບັນ ຫລາຍກວ່າພັກອື່ນໆໃນອອສເຕຣເລັຍ. ເຂົາເຈົ້າໄດ້ປ່ຽນຈາກການເຄື່ອນໄຫວທາງບັນຫາສັງຄົມ ມາເປັນພັກການເມືອງມືອາຊີບ ທີ່ຕ້ອງທຳການຣົນນະຣົງ, ຕ້ອງມີຈຸດຢືນໃນຫລາຍປັນຫາທີ່ແຕກຕ່າງກັນ, ຕ້ອງອອກສຽງດ້ານການຜ່ານກົດຫມາຍ, ຕ້ອງຈັດການກັບສະມາຊິກພັກ ທີ່ໃຫຍ່ຂຶ້ນຕາມທຸກໆການເລືອກຕັ້ງ ແລະມີຄວາມຄິດເຫັນທີ່ແຕກຕ່າງກັນ. ເຂົາເຈົ້າ ເຄີຍເຕັມໃຈ ທີ່ຈະສະແດງຄວາມບໍ່ພໍໃຈຂອງເຂົາເຈົ້າ ໃນທີ່ສາທາຣະນະ ເພື່ອໃຫ້ມີການໂຕ້ຖຽງກັນຢ່າງເປີດເຜີຍ ກ່ຽວກັບການຂັດແຍ້ງພາຍໃນ ຂອງເຂົາເຈົ້າ, ແລະເຂົາເຈົ້າ ຕ້ອງພົບວ່າ ເມື່ອພັກທ່ານໃຫຍ່ຂຶ້ນ, ມັນເປັນໄປບໍ່ໄດ້ທີ່ຈະເຮັດເຊັ່ນນັ້ນ. ສະນັ້ນ, ບັດນີ້ເຂົາເຈົ້າຈຶ່ງຕ້ອງ ຮັບມືກັບຕົວເອງ, ກັບອຸດົມການທີ່ຂັດແຍ່ງ, ກັບຄວາມທະເຍີທະຍານທີ່ແຂ່ງຂັນກັນ ຂອງສະມາຊິກຂອງເຂົາເຈົ້າ. ແລະນັ້ນ ບໍ່ແມ່ນເລື້ອງມ່ວນ. ການເປັນພັກການເມືອງ ເປັນເລື້ອງຍາກຫລາຍ. ແລະການຈັດການພັກການເມືອງ, ດັ່ງທີ່ Adam Bandt ກໍາລັງພົບ, ແມ່ນເປັນເລື່ອງຍາກຫລາຍທີ່ສຸດ."
ເນື້ອເລື່ອງໂດຍ Rania Yallop ຂ່າວ SBS News,
ຈັດທຳໂດຍ ສັກ ພູມີຣັຕນ໌ ວິທຍຸ SBS ພາກ ພາສາລາວ.
ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌
