ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌
ຣັຖບານສຽງຂ້າງນ້ອຍ (Minority Government) ແມ່ນຫຍັງ?
ໂດຍການເລືອກຂອງຣັຖບານກາງ ເຫຼືອພຽງແຕ່ສອງສາມອາທິດເທົ່ານັ້ນ, ຣັຖບານສຽງຂ້າງນ້ອຍ (Minority Government) ເບິ່ງຄືວ່າຈະເປັນໄປໄດ້ຫລາຍຂຶ້ນ.
ສະນັ້ນ, ຣັຖບານສຽງຂ້າງນ້ອຍ (Minority Government) ແມ່ນຫຍັງ?
Rania Yallop ລາຍງານ.
ທ່ານອາດເຄີຍໄດ້ຍິນຄໍາວ່າ ຣັຖບານສຽງຂ້າງນ້ອຍ (Minority Government) ຢູ່ເລື້ອຍໆ ໃນການຣົນນະຣົງຄັ້ງນີ້.
ຮອງສາດສະດາຈານ Paul Williams ຈາກ Griffith University ກ່າວວ່າ ມັນກໍແມ່ນເຫດຜົນທີ່ດີ.
"ພວກເຮົາ ກໍາລັງຈະມີຣັຖບານສຽງຂ້າງນ້ອຍ (Minority Government) ໃນເທື່ອນີ້."
ໂດຍທີ່ການເລືອກຕັ້ງເທື່ອແລ້ວນີ້ ມີການໄດ້/ເສັຍບ່ອນນັ່ງທີ່ຍິ່ງໃຫຍ່ທີ່ສຸດ ໃນປວັດສາດຂອງອອສເຕຣເລັຍ, ເບິ່ງຄືວ່າ ຈະມີຣັຖບານສຽງຂ້າງນ້ອຍ (Minority Government) ທີ່ຖືກເລືອກ.
ແຕ່ນັ້ນຫມາຍຄວາມວ່າແນວໃດ?
"ພາຍໃຕ້ລະບົບ ທີ່ສືບທອດຈາກອັງກິດຂອງພວກເຮົາ, ແຕ່ແບ່ງປັນກັບປະເທດຕ່າງໆ ເຊັ່ນອິນເດັຍ, ນິວຊີແລນ, ບ່ອນທີ່ນາຍົກຣັຖມົນຕີ ເປັນຜູ້ທີ່ໄດ້ຮັບການສນັບສນູນ ຈາກສະມາຊິກສ່ວນໃຫຍ່ ຂອງສະພາຜູ້ແທນ."
ນັ້ນແມ່ນສາດສະດາຈານ Graeme Orr ຈາກ the University of Queensland.
ໃນຂນະທີ່ ວິທີທີ່ງ່າຍທີ່ສຸດ ທີ່ຈະຈັດຕັ້ງ ແມ່ນໂດຍການຊນະບ່ອນນັ່ງສ່ວນໃຫຍ່ໃນສະພາ ໃນການເລືອກຕັ້ງ-ແຕ່ຍັງມີທາງເລືອກອື່ນອີກ.
"ຣັຖບານສຽງຂ້າງນ້ອຍ (Minority Government) ຈະເປັນຣັຖບານທີ່ທ່ານບໍ່ມີພັກ ຫລືພັກຮ່ວມ ທີ່ມີຜູ້ແທນ 76 ຄົນໃນ 150 ຄົນໃນສະພາຕ່ຳ (House of Reps). ໃນສະຖານະການນັ້ນ, ມີຊ່ວງເວລາຂອງການເຈຣະຈາ, ການແລກປ່ຽນກັນ ກັບພັກອິດສຣະ, Greens ແລະອື່ນໆ, ເພື່ອຈະໄດ້ເຫັນວ່າ ຜູ້ໃດຈະສາມາດມີຈໍານວນຜູ້ແທນ 76 ຄົນໄດ້."
ນັ້ນບໍ່ແມ່ນສິ່ງທີ່ເຮົາໄດ້ເຫັນເລື້ອຍໆ ໃນລະດັບຂອງຣັຖບານ ໃນອອສເຕຣເລັຍ.
ກ່ອນປີ 2010, ພວກເຮົາ ບໍ່ເຄີຍມີມັນເປັນເວລາ 70 ປີ.
ສາດສະດາຈານ Orr ກ່າວວ່າ ແນວໂນ້ມນັ້ນກໍາລັງປ່ຽນໄປ.
"ພວກເຮົາ ມີຣັຖບານສຽງຂ້າງນ້ອຍ (Minority Government) ບາງສ່ວນໃນສມັຍຂອງ Turnbull, ແຕ່ກໍມີໃນສມັຍ Gillard ນໍາອີກ. ມັນກາຍເປັນເລື່ອງທັມມະດາຫລາຍຂຶ້ນ ເພາະມີຄົນຈໍານວນຫນ້ອຍລົງ ທີ່ຈະເລືອກເອົາ Labor ຫລື Liberal National. ສະນັ້ນ, ເມື່ອຈໍານວນຄະແນນສຽງເບື້ອງຕົ້ນຂອງເຂົາເຈົ້າຫລຸດຈໍານວນລົງ ເຖິງ 30 ຫລືຕ່ຳກວ່ານັ້ນ, ກໍມີໂອກາດຫລາຍຂຶ້ນ ທີ່ຈະມີຄົນອື່ນ ທີ່ຖືກເລືອກໃຫ້ເປັນສະມາຊິກໃນສະພາ."
ສາມຣັຖບານທໍາອິດ ໃນອອສເຕຣເລັຍ ເປັນຣັຖສຽງຂ້າງນ້ອຍ (Minority Government), ເມື່ອບໍ່ມີພັກ ຫລືພັກຮ່ວມ ທີ່ຖືກຈັດຕັ້ງຂຶ້ນຢ່າງແທ້ຈິງ.
ແລະມັນຍັງເປັນເລື່ອງທັມມະດາ ຢູ່ໃນລະດັບຣັດ ແລະເຂດປົກຄອງ.
ຂັ້ນຕ່ຳ ທີ່ພັກນ້ອຍ ແລະພັກອິດສຣະ ຕ້ອງສເນີໃຫ້ຣັຖບານ ຈັດຕັ້ງສຽງຂ້າງນ້ອຍເອີ້ນວ່າ "Supply and Confidence".
Professor Orr ກ່າວວ່າ ນັ້ນຄືສິ່ງທີ່ໄດ້ເກີດຂຶ້ນ ໃນຣັຖບານສຽງຂ້າງນ້ອຍ (Minority Government) ຂອງ Gillard.
"ທ່ານອາດມີຄໍາສັນຍາວ່າ ຈະສນັບສນູນ, ແລະເຂົາເຈົ້າ ຈະບໍ່ເປັນສະມາຊິກຂອງຣັຖບານ. ເຂົາເຈົ້າ ຈະບໍ່ມີອໍານາດຣັຖມົນຕີ, ແຕ່ເຂົາເຈົ້າຈະສງວນສິດທິ ທີ່ຈະຂັດຂວາງການອອກກົດໝາຍ, ແລະສິ່ງທີ່ເຂົາເຈົ້າຈະເຮັດ ແມ່ນຮັບຮອງວ່າ ຣັຖບານຈະສາມາດຜ່ານງົບປະມານ, ເພາະສິ່ງຫນຶ່ງ ທີ່ສາມາດລົ້ມຣັຖບານ ແມ່ນຖ້າຫາກຣັຖບານ ບໍ່ສາມາດເຮັດໃຫ້ງົບປະມານຜ່ານຣັຖສະພາໄດ້."
ພັກອື່ນໆ ຫລືພັກອິດສຣະ ສາມາດຂໍຮ້ອງ ໃຫ້ມີການສເນີກົດຫມາຍ,ເຖິງແມ່ນວ່າ ຣັຖບານບໍ່ຈໍາເປັນຕ້ອງເຮັດຕາມຄໍາສັນຍານັ້ນ.
ເຂົາເຈົ້າ ຍັງສາມາດຂໍຮ້ອງ ໃຫ້ມີບົດບາດຫລາຍຂຶ້ນໃນຣັຖບານ, ເຊັ່ນການຂໍຕຳແໜ່ງກະຊວງເປັນຕົ້ນ.
ຮອງສາດສະດາຈານ Williams ກ່າວວ່າ ມັນບໍ່ເປັນທີ່ນິຍົມຕໍ່ພັກການເມືອງໃຫຍ່.
"ພັກໃຫຍ່ ບໍ່ຢາກໃຫ້ມີປັນຫາ ໃນສອງສະພາ ທີ່ເຂົາເຈົ້າ ບໍ່ພຽງແຕ່ຕ້ອງຮັບມືຢູ່ໃນສະພາສູງເທົ່ານັ້ນ, ແຕ່ຕ້ອງຮັບມືຢູ່ໃນສະພາຜູ້ແທນນຳອີກ, ມັນເປັນເລື່ອງທີ່ໜ້າເຈັບຫົວຫລາຍ."
ແລະສາທາຣະນະຊົນ ກໍບໍ່ມັກມັນຄືກັນ.
"ຄົນສ່ວນຫລາຍ ບໍ່ມັກແນວຄິດຂອງ Hung Parliament ຫລືຣັຖບານສຽງຂ້າງນ້ອຍ (Minority Government) ເພາະສິ່ງທໍາອິດ ທີ່ທ່ານຄິດແມ່ນຄວາມບໍ່ແນ່ນອນ, ຄວາມບໍ່ໝັນຄົງ. ແລະນັ້ນຄື ຄວາມສວຍງາມຂອງລະບົບພັກ. ເຮົາສາມາດເວົ້າຫລາຍຢ່າງ ກ່ຽວກັບພັກການເມືອງໃຫຍ່ ທີ່ຂົ່ມເຫັງພັກນ້ອຍໆ. ພັກໃຫຍ່ ໄດ້ຈັດຕັ້ງພັນທະມິດ ,ແລະເຂົາເຈົ້າຂຽນກົດສໍາລັບຕົນເອງ, ວ່າພັກໃຫຍ່ຈະລັກປຸ້ນເອົາຄວາມຄິດ ແລະຄວາມເປັນສ່ວນຕົວ ແລະຄວາມເປັນທັມມະຊາດຂອງຣັຖບານ. ແຕ່ສິ່ງຫນຶ່ງ ທີ່ພັກການເມືອງເຮັດ ຄືເຂົາເຈົ້າສເນີ ຄວາມແນ່ນອນແລະໃຫ້ຄວາມລຽບງ່າຍ ແກ່ຜູ້ເລືອກຕັ້ງ."
ໃນຣັຖບານສຽງຂ້າງນ້ອຍ (Minority Government) ບໍ່ມີການຮັບປະກັນວ່າ ກົດຫມາຍຈະຜ່ານສະພາຕ່ຳ ໂດຍອັດຕະໂນມັດ.
ນັ້ນ ອາດເຮັດໃຫ້ສະພາບການ ບໍ່ແນ່ນອນຫນ້ອຍຫນຶ່ງ.
ພາຍໃຕ້ຣັຖບານທີ່ມີສຽງສ່ວນໃຫຍ່, ການຕົກລົງກັນ ເພື່ອຜ່ານກົດຫມາຍ ສ່ວນຫລາຍຈະເກີດຂຶ້ນໃນສະພາສູງ, ແຕ່ຜົນສະທ້ອນນັ້ນ ຈະເພີ່ມຂຶ້ນເປັນສອງເທົ່າ ໃນຣັຖບານສຽງຂ້າງນ້ອຍ (Minority Government).
ແຕ່ອີກຝັ່ງນຶ່ງຂອງ Tasman, ສຽງສ່ວນນ້ອຍ ເປັນເລື່ອງທັມມະດາ.
New Zealand ມີລະບົບການເມືອງທີ່ແຕກຕ່າງ ຈາກອອສເຕຣເລັຍ ທີ່ຣັຖບານ ມີພຽງແຕ່ສະພາດຽວ ແລະວິທີການເປັນຕົວແທນ ຕາມສັດສ່ວນ ທີ່ແຕກຕ່າງກັນ.
ເຈັດໃນ 10 ຣັຖບານທີ່ຜ່ານມາ ເປັນສຽງສ່ວນນ້ອຍ.
Professor Richard Shaw ຈາກມະຫາວິທະຍາໄລ Massey ຂອງ ນິວຊີແລນ ກ່າວວ່າ ມັນບໍ່ໄດ້ກໍ່ໃຫ້ເກີດບັນຫາ.
"ທ່ານຈະເບິງຈາກອອສເຕຣເລັຍ ແລະຄິດວ່າ ພວກນັ້ນເປັນແບບຢ່າງຂອງຄວາມບໍ່ຫມັ້ນຄົງ ທາງຣັຖທັມມະນູນ ແລະຄວາມວຸ້ນວາຍທາງການເມືອງ .ສິ່ງຕ່າງໆກໍເກີດຍັງຂຶ້ນຕໍ່ໄປ. ບໍ່ມີຣັຖບານໃດ ທີ່ສູນເສັຍການອອກສຽງ ຄວາມບໍ່ໄວ້ວາງໃຈໃຈ. ບໍ່ມີຣັຖບານໃດ ທີ່ສູນເສັຍການອອກສຽງເລື້ອງງົບປະມານ. ຣັຖບານຈະສູນເສັຍການອອກສຽງ ໃນກົດຫມາຍເປັນປະຈໍາ, ແຕ່ຕາມຣັຖທັມມະນູນ, ບໍ່ມີຫຍັງເກີດຂຶ້ນ. ມັນບໍ່ຄ່ອຍເປັນວິກິດທາງການເມືອງ."
ແລະອະນຸຍາດໃຫ້ມີຄວາມຄິດເຫັນ ຫລາຍກວ່າເກົ່າ ກ່ຽວກັບຮ່າງກົດໝາຍ.
"ຂ້າພະເຈົ້າຄິດວ່າ ຂໍ້ດີກໍຄື ທ່ານມີຄວາມຄິດເຫັນຫລາຍຂຶ້ນ ໃນຄນະຣັຖມົນຕີ, ແລະຖ້າຫາກເຂົາເຈົ້າ ບໍ່ໄດ້ຢູ່ໃນຄນະຣັຖບານ, ແລ້ວເຂົາເຈົ້າກໍມີຕໍາແຫນ່ງຂອງກະຊວງ ນອກຄນະຣັຖບານ. ສະນັ້ນ, ຂ້າພະເຈົ້າຄິດວ່າ ມັນເຮັດໃຫ້ມີຄວາມແຕກຕ່າງຫລາຍຂຶ້ນ, ມີຜູ້ອອກສຽງເລືອກຕັ້ງຫລາຍຂຶ້ນ ທີ່ເຫັນທັດສະນະຂອງເຂົາເຈົ້າ ເປັນຕົວແທນໃນຣັຖບານ."
ເຖິງແມ່ນວ່າ ອາດຈະມີຄວາມຕິດຂັດ ຂອງການຜ່ານກົດໝາຍ ພາຍໃຕ້ຣັຖບານສຽງຂ້າງນ້ອຍ (Minority Government), ແຕ່ມັນບໍ່ໄດ້ເປັນແນວນັ້ນສເມີໄປ.
ຣັຖບານສຽງຂ້າງນ້ອຍ (Minority Government) ຂອງ Gillard ໄດ້ຜ່ານກົດຫມາຍຫລາຍກວ່າ 90 ເປີເຊັນ ທີ່ຖືກນໍາເຂົ້າໄປສເນີໃນສະພາ-ຊຶ່ງຫລາຍກວ່າ ທີ່ໄດ້ຮັບອະນຸມັດ ພາຍໃຕ້ຣັຖບານສ່ວນໃຫຍ່ ຂອງRudd government, ແລະຣັຖບານສ່ວນໃຫຍ່ຂອງ Howard government.
ຮອງສາດສະດາຈານ Williams ກ່າວວ່າ ມີຜົນກະທົບອື່ນໆເຊັ່ນກັນ.
"ໂດຍທົ່ວໄປແລ້ວ, ສະພາໄດ້ປະພຶດໂຕດີຫລາຍ. ຜູ້ແທນກໍປະພຶດຕົນດີ ເພາະເຂົາເຈົ້າ ບໍ່ຢາກຖືກໄລ່ອອກຈາກສະພາ ໂດຍປະທານສະພາ ຍ້ອນຄວາມປະພຶດ, ເພາະມັນຈະເຮັດໃຫ້ຈໍານວນຜູ້ແທນຂອງພັກເຂົາເຈົ້າຫລຸດລົງກວ່າເກົ່າ. ສະນັ້ນ Hung Parliament ອາດຫມາຍຄວາມວ່າ ນັກການເມືອງ ກໍາລັງປະພຶດໂຕດີທີ່ສຸດ. ເຂົາເຈົ້າ ຈະອ່ານຮ່າງກົດຫມາຍເພາະເຂົາເຈົ້າ ຢາກໃຫ້ແນ່ໃຈວ່າ ມັນມີຜົນກະທົບຫລາຍທີ່ສຸດ ແລະທ່ານຍັງພົບວ່າ ນັກການເມືອງມີຄວາມຕອບຮັບ ຕໍ່ຜູ້ຄົນໃນຊຸມຊົນເປັນຢ່າງດີ."
ເມື່ອຄະແນນສຽງຂອງພັກໃຫຍ່ ຫລຸດຫນ້ອຍລົງ, Professor Orr ກ່າວວ່າ ມັນເປັນສິ່ງທີ່ເຂົາເຈົ້າຕ້ອງປັບໂຕ.
"ສະນັ້ນ ຂ້າພະເຈົ້າຄິດວ່າ ເຮົາຕ້ອງເປັນຜູ້ໃຫຍ່ຫລາຍກວ່າເກົ່າ ກ່ຽວກັບເລື່ອງນີ້ ແລະຍອມຮັບຄວາມຈິງທີ່ວ່າ ບໍ່ພຽງແຕ່ມີຣັຖບານສຽງຂ້າງນ້ອຍ (Minority Government) ໃນອອສເຕຣເລັຍ, ຣັດແລະCommonwealth ເທົ່ານັ້ນ, ແຕ່ເຮົາຕ້ອງການ ພັກການເມືອງປັບຕົວໃຫ້ເຂົ້າກັບແນວຄິດ ຂອງການເຈຣະຈາຕົກລົງກັນ."
ເນື້ອເລື່ອງໂດຍ Rania Yallop ຂ່າວ SBS News,
ຈັດທຳໂດຍ ສັກ ພູມີຣັຕນ໌ ວິທຍຸ SBS ພາກ ພາສາລາວ.
ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌
ທ່ານຍັງສາມາດ ຕິດຕາມທາງ facebook ໄດ້ທີ່
