ຈຸດສຳຄັນ
- ການລົງຄະແນນສຽງ ເປັນສິ່ງບັງຄັບໃນອອສເຕຣເລັຍ, ແຕ່ທ່ານຕ້ອງລົງທະບຽນ ເພື່ອລົງຄະແນນສຽງ.
- ທ່ານຕ້ອງເປັນພົນລະເມືອງຂອງອອສເຕຣເລັຍ ແລະມີອາຍຸຢ່າງຫນ້ອຍ 18 ປີຈຶ່ງມີສິດລົງຄະແນນສຽງໄດ້.
- ທ່ານສາມາດລົງທະບຽນ ເພື່ອລົງຄະແນນສຽງທາງອິນເຕີເນັດ ຫຼືໃຊ້ແບບຟອມເຈັ້ຍ.
- ເວັບໄຊ AEC ມີຂໍ້ມູນໃນພາສາຕ່າງໆ ແລະ ຄູ່ມືພາສາອັງກິດທີ່ອ່ານງ່າຍ.
ຊ່ວຍທ່ານໃຫ້ດໍາເນີນຊີວິດໃນບ້ານໃຫມ່ຂອງທ່ານໃນອອສເຕຣເລັຍ.-ເບິ່ງທຸກຕອນ ()
ການເລືອກຕັ້ງຣັຖບານກາງ ເປັນໂອກາດທີ່ຈະສະແດງຄວາມຄິດເຫັນຂອງທ່ານ ໂດຍການລົງຄະແນນສຽງເລືອກຕັ້ງ ຣັຖບານຂອງອອສເຕຣເລັຍ.
ການລົງຄະແນນສຽງ ເປັນຂໍ້ບັງຄັບ ໃນອົດອອສເຕຣເລັຍ. ແຕ່ມີຂໍ້ກຳໜົດບາງຢ່າງ ທີ່ທ່ານຕ້ອງປະຕິບັດກ່ອນ. ຫນຶ່ງໃນນັ້ນ ແມ່ນການລົງທະບຽນ ກັບຄນະກັມມະການ ການເລືອກຕັ້ງຂອງປະເທດອອສເຕຣເລັຍ (AEC).
ຂ້ອຍມີສິດລົງທະບຽນຫຼືບໍ່?
ເຖິງແມ່ນວ່າ ການລົງຄະແນນສຽງ ເປັນສິ່ງບັງຄັບສໍາລັບຊາວອອສເຕຣເລັຍສ່ວນໃຫຍ່, ແຕ່ທ່ານ ຕ້ອງກວດສອບເບິ່ງ ຄຸນສົມບັດຂອງທ່ານ.
"ຜູ້ໃດກໍຕາມ ທີ່ເປັນພົນລະເມືອງອອສເຕຣເລັຍ ແລະມີອາຍຸສູງກວ່າ18 ປີ ກໍມີສິດທີ່ຈະລົງທະບຽນ ເພື່ອລົງຄະແນນສຽງ," Evan Ekin-Smyth, ໂຄສົກ AEC ອະທິບາຍ.
"ແຕ່ທ່ານຕ້ອງລົງທະບຽນ ຖ້າຫາກທ່ານຢາກລົງຄະແນນສຽງ."
ຂ້ອຍຄວນລົງທະບຽນເມື່ອໃດ?
ຊາວອອສເຕຣເລັຍໃຫມ່ທຸກຄົນ ຖືກຊຸກຍູ້ໃຫ້ລົງທະບຽນ ທັນທີທີ່ເຂົາເຈົ້າ ໄດ້ກາຍເປັນພົນລະເມືອງ ເພື່ອວ່າເຂົາເຈົ້າ ຈະສາມາດມີຄວາມຄິດເຫັນ ໃນອະນາຄົດ ຂອງອອສເຕຣເລັຍ.
ຕາມປົກກະຕິແລ້ວ ກໍານົດການລົງທະບຽນ ແມ່ນຫນຶ່ງອາທິດ ຫລັງຈາກໄດ້ປະກາດວັນເລືອກຕັ້ງ. ຖ້າທ່ານ ໄດ້ລົງທະບຽນແລ້ວ, ທ່ານຍັງມີເວລາຫນຶ່ງອາທິດ ທີ່ຈະປັບປ່ຽນລາຍລະອຽດຫຼ້າສຸດຂອງທ່ານ ເຊັ່ນການປ່ຽນທີ່ຢູ່ ຫຼືຊື່ຂອງທ່ານ.
"ແຕ່ທ່ານ ບໍ່ຈໍາເປັນຕ້ອງລໍການປະກາດການເລືອກຕັ້ງ-ທ່ານສາມາດເຮັດໄດ້ໃນຕອນນີ້,"Mr Ekin-Smyth ກ່າວ.
ແທ້ຈິງແລ້ວ, ທ່ານບໍ່ຈໍາເປັນຕ້ອງລໍຖ້າ ຈົນກວ່າທ່ານມີອາຍຸໄດ້ 18 ປີກ່ອນຈະລົງທະບຽນ, Kath Gleeson, ຮອງກັມມະການເລືອກຕັ້ງ ຂອງ AEC ກ່າວ.
"ທ່ານສາມາດ ສມັກລົງທະບຽນໄດ້ ນັບແຕ່ອາຍຸ 16 ປີ ເພື່ອວ່າທ່ານ ຈະພ້ອມທີ່ຈະລົງຄະແນນສຽງ ໃນການເລືອກຕັ້ງ ເມື່ອທ່ານມີອາຍຸຄົບ 18 ປີ."
MELBOURNE, ອອສເຕຣເລັຍ. - 18 ພຶດສະພາ: ພາບຈາກທາງເຂົ້າສະຖານທີ່ເລືອກຕັ້ງ ໃນລະຫວ່າງການເລືອກຕັ້ງທົ່ວໄປ ເພື່ອເລືອກຕັ້ງສະພາ ແລະ ນາຍົກຣັຖມົນຕີ ໃນ Melbourne, ອອສເຕຣເລັຍ. Source: Anadolu / Recep Sakar/Anadolu Agency/Getty Images
ຂ້ອຍຈະລົງທະບຽນໄດ້ແນວໃດ?
ທ່ານສາມາດລົງທະບຽນ ໂດຍໃຊ້ແບບຟອມທາງອິນເຕີເນັດ ທີ່ງ່າຍໆ.ທ່ານຍັງສາມາດ ລົງທະບຽນໂດຍໃຊ້ໂທຣະສັບມືຖືຂອງທ່ານ. ພຽງແຕ່ເຂົ້າໄປໃນເວັບໄຊ້ຂອງ AEC ().
ຖ້າທ່ານຕ້ອງການ, ຫລືທ່ານບໍ່ສາມາດເຂົ້າເຖິງອິນເຕີເນັດ, ເອກະສານລົງທະບຽນແບບເປັນເຈັ້ຍ ກໍມີຢູ່ທີ່ຫ້ອງການ AEC. ທ່ານສາມາດ ໂທຫາ 13 23 26 ເພື່ອຮັບເອົາແບບຟອມທາງໄປສະນີ.
ທ່ານຕ້ອງພິສູດຕົວຕົນຂອງທ່ານ, ສະນັ້ນ ໃຫ້ມີເອກະສານລະບຸຕົວຕົນ(Identification Documents). ບໍ່ຈໍາເປັນ ຕ້ອງຕິດຂໍ້ມູນ, ແຕ່ທ່ານຕ້ອງອ້າງອີງຂໍ້ມູນ.
Ms Gleeson ກ່າວວ່າ ຫຼັກຖານຢືນຢັນຕົວຕົນ ອາດມີສອງສາມຮູບແບບ ທີ່ແຕກຕ່າງກັນ, ແລະມີຂໍ້ມູນ ໃນພາສາຕ່າງໆຢູ່ ໃນເວັບໄຊ້ຂອງ AEC ().
"ຄົນສ່ວນຫຼາຍ ໃຊ້ໃບອະນຸຍາດຂັບຣົດ ແຕ່ທ່ານສາມາດໃຊ້ຫນັງສືຜ່ານແດນ ຫຼືບັດ Medicare ໄດ້ນໍາອີກ," ນາງກ່າວ.
ເຫັນຫີບບັດຄະແນນສຽງ ຢູ່ໃນສູນເລືອກຕັ້ງຢູ່ Collingwood ໃນMelbourne, ວັນເສົາ, ວັນທີ 14 ເດືອນຕຸລາ, 2023 Credit: CON CHRONIS/AAPIMAGE
ພົນລະເມືອງໃຫມ່ ຈະຕ້ອງມີໃບຢັ້ງຢືນການເປັນພົນລະເມືອງ ເພື່ອລົງທະບຽນ.
ຖ້າຫາກທ່ານບໍ່ມີເອກກະສານ, ຫລືຫາບໍ່ເຫັນ ຫລືເຮັດເສັຍ, ມັນສໍາຄັນທີ່ທ່ານຕ້ອງສມັກລ່ວງຫນ້າ. ເວລາລໍຖ້າ ສໍາລັບການອອກເອກກະສານປະຈຳໂຕ ອາດແຕກຕ່າງກັນ ໃນແຕ່ລະເຂດ ແລະໃນບາງກໍຣະນີ ອາດໃຊ້ເວລາເຖິງສີ່ອາທິດ.
ຂ້ອຍຈໍາເປັນ ຕ້ອງລົງທະບຽນ ສໍາລັບການເລືອກຕັ້ງທຸກເທື່ອ ຫຼືບໍ່?
ເມື່ອທ່ານມີຊື່ໃນທະບຽນຂອງຜູ້ມີສິດລົງຄະແນນສຽງແລ້ວ ທ່ານຈະສາມາດລົງຄະແນນສຽງ ໃນການເລືອກຂອງກາງ, ຣັດ ຫລືຣັຖບານທ້ອງຖິ່ນໄດ້ ໃນອະນາຄົດ.
ດ້ວຍເຫດນີ້ ມັນຈຶ່ງສໍາຄັນ ທີ່ທ່ານຕ້ອງຮັກສາລາຍລະອຽດຫຼ້າສຸດຂອງທ່ານຢູ່ສເມີ.
ສື່ສານມວນຊົນ, ການເຊື່ອມຕໍ່ ແລະຜູ້ຍິງພິມໃນໂທຣະສັບມືຖື ເພື່ອສື່ສານ, app ແລະ ເວົ້າລົມ. ເວບໄຊ້, ການຄົ້ນຫາ ແລະພະນັກງານຂອງບໍຣິສັດ ອ່ານການສົນທະນາ ໃນມືຖື, ເຄືອຂ່າຍ ແລະສົ່ງຂໍ້ຄວາມ ໃນອັບພລິເຄຊັນ Credit: Delmaine Donson/Getty Images
ຖ້າຂ້ອຍຍ້າຍເຮືອນ ເດ?
ທ່ານມີເວລາຫນຶ່ງອາທິດ ຫລັງຈາກການເລືອກຕັ້ງ ໄດ້ຖືກປະກາດ ເພື່ອໃຫ້ແນ່ໃຈວ່າ ລາຍລະອຽດຂອງທ່ານນັ້ນ ຫຼ້າສຸດ.
"ພວກເຮົາຈະສົ່ງການແຈ້ງເຕືອນ ໃຫ້ຜູ້ຄົນຊາບ ຖ້າຫາກພວກເຮົາ ໄດ້ຮັບຂໍ້ມູນບາງຢ່າງ ທີ່ພວກເຮົາເຊື່ອວ່າ ທ່ານໄດ້ຍ້າຍບ້ານ, ຍົກຕົວຢ່າງ," Mr Ekin-Smyth ກ່າວ.
"ແຕ່ມັນສໍາຄັນ ເມື່ອໃດກໍຕາມ ທີ່ທ່ານຍ້າຍເຮືອນ ຫຼືປ່ຽນຊື່ຂອງທ່ານ, ທ່ານຕ້ອງແຈ້ງລາຍລະອຽດໃໝ່ຂອງທ່ານ."
ຖ້າຫາກທ່ານບໍ່ແນ່ໃຈວ່າ ທ່ານມີຊື່ ຢູ່ໃນທະບຽນຂອງຜູ້ມີສິດເລືອກຕັ້ງແລ້ວຫລືບໍ່, ໃຫ້ໄປເບິ່ງທີ່ ຫລືໂທຫາ 13 23 26 ເພື່ອຂໍຄວາມຊ່ອຍເຫລືອ.
ໃຜສາມາດຊ່ວຍຂ້ອຍ ລົງທະບຽນໄດ້ແນ່?
ເວັບໄຊຂອງ AEC ມີຄໍາແນະນໍາ ກ່ຽວກັບການມີສິດ ແລະການສມັກ, ຊຶ່ງແປເປັນພາສາຂອງທ່ານ. ເຂົາເຈົ້າຍັງມີບໍຣິການແປທາງໂທຣະສັບ ແລະ 'ຄູ່ມືທີ່ອ່ານງ່າຍ' ທີ່ຂຽນໂດຍການໃຊ້ພາສາອັງກິດ ແລະຮູບປະກອບງ່າຍໆ.
Migrant Resource Centres ແລະບໍຣິການຊ່ອຍເຫລືອ ທາງວັດທະນະທັມໃນທ້ອງຖິ່ນ ອື່ນໆ ກໍພ້ອມຊ່ອຍເຫລືອ ຜູ້ມີສິດລົງຄະແນນສຽງ ເທື່ອທໍາອິດ ແລະຊ່ອຍເຫລືອທ່ານ ໃນການສມັກລົງທະບຽນ.
ຊາວອອສເຕຣເລັຍໃຫມ່ທຸກຄົນ ຄວນຮູ້ສຶກຫມັ້ນໃຈ ທີ່ຈະສມັກ ທັນທີທີ່ເຂົາເຈົ້າ ມີສິດຈະລົງຄະແນນສຽງ. ຈົ່ງຈື່ໄວ້ວ່າ, ການອອກສຽງຂອງທ່ານ ຈະມີຄວາມສຳຄັນ ບໍ່ວ່າທ່ານຈະເປັນໃຜກໍຕາມ.
ຖ້າຂ້າພະເຈົ້າບໍ່ລົງທະບຽນເລືອກຕັ້ງ ເດ?
ການລົງຄະແນນສຽງ ເປັນການບັງຄັບໃນອອສເຕຣເລັຍ, ແລະການບໍ່ລົງຄະແນນສຽງ ຈະສົ່ງຜົນໃຫ້ຖືກປັບໃໝ. ນອກຈາກຄວາມຈິງທີ່ວ່າ ທ່ານຕ້ອງລົງຄະແນນສຽງແລ້ວ, ຈົ່ງຈໍາໄວ້ວ່າ ທ່ານຈະເສັຍໂອກາດ ໃນການສະແດງຄວາມຄິດເຫັນຂອງທ່ານ ຖ້າຫາກທ່ານບໍ່ລົງທະບຽນ.
ໄປທີ່ ຫລືໄປທີ່ຫ້ອງການ AEC ເພື່ອລົງທະບຽນເລືອກຕັ້ງ ໃຫ້ທັນເວລາ ສໍາລັບການເລືອກຂອງຣັຖບານ ໃນປີ 2025
ສມັກເປັນສະມາຊິກ (Subscribe) ຫຼືຕິດຕາມ Podcast Australia Explained ສໍາລັບຂໍ້ມູນທີ່ມີຄຸນຄ່າ ແລະຄໍາແນະນໍາ ກ່ຽວກັບການຕັ້ງຖິ່ນຖານ ໃນຊີວິດໃຫມ່ຂອງທ່ານ ໃນອອສເຕຣເລັຍ.
ເນື້ອເລື່ອງໂດຍ Melissa Compagnoni ຂ່າວ SBS News,
ຈັດທຳໂດຍ ສັກ ພູມີຣັຕນ໌ ວິທຍຸ SBS ພາກ ພາສາລາວ.
ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌ sbs.com.au/lao
ທ່ານຍັງສາມາດ ຕິດຕາມທາງ facebook ໄດ້ທີ່ facebook.com/sbslao
