ຄວາມປອດພັຍໃນເຮືອນໃນລະດູໜາວ.
ໃນຂນະທີ່ ອຸນຫະພູມ ຍັງສືບຕໍ່ຫຼຸດລົງທົ່ວປະເທດ, ມີຄໍາເຕືອນໃຫມ່ ສໍາລັບຊາວ ໃຫ້ລະວັງອັນຕະຣາຍ ທີ່ອາດຈະເກີດຂຶ້ນ ຈາກການເຮັດໃຫ້ເຮືອນຂອງທ່ານອົບອຸ່ນ.
ຄໍາເຕືອນນີ້ ມາຈາກສາເຫດທີ່ມີໄຟໄຫມ້ເຮືອນ ແລະແກັສພິດCarbon monoxide ໃນລະດູຫນາວນີ້.
Abbie O’Brien ລາຍງານ:
ຖ້າທ່ານຮູ້ສຶກວ່າ ລະດູຫນາວນີ້ ຈະຫນາວເຢັນກວ່າປົກກະຕິ, ນັ້ນແມ່ນຄວາມຈິງ.
ພື້ນທີ່ສ່ວນໃຫຍ່ຂອງປະເທດ ມີອາກາດທີ່ເຢັນກວ່າ ອຸນຫະພູມຕ່ຳສຸດ ໂດຍສເລັ່ຍ.
ການຮັກສາເຮືອນຂອງທ່ານໃຫ້ອົບອຸ່ນ ເປັນສິ່ງສໍາຄັນ, ແຕ່ມັນມາພ້ອມກັບຄໍາເຕືອນ.
"ໄຟໄໝ້ເຮືອນ ແມ່ນເກີດຂຶ້ນເລື້ອຍໆ ໃນລະດູຫນາວ ເມື່ອເຮົາເຫັນປັດຈັຍພາຍນອກເຫຼົ່ານີ້ ເຊັ່ນ: ເຄື່ອງທຳຄວາມຮ້ອນທີ່ຍ້າຍໄດ້ ແລະມັນສາມາດເກີດຄວາມສ່ຽງໄດ້ຫຼາຍ ຖ້າທ່ານໃຊ້ມັນ ຢ່າງບໍ່ເຫມາະສົມ, ໂດຍສະເພາະ ໃນຫ້ອງນອນ ເມື່ອທ່ານວາງມັນ ໃກ້ກັບວັດສະດຸ ທີ່ສາມາດຕິດໄຟໄດ້ ອື່ນໆເຊັ່ນ: ການຢູ່ໃກ້ກັບຕຽງ ຫຼືເຄື່ອງນຸ່ງຫົ່ມ."
Joshua Fischer ເປັນຮອງຜູ້ບັນຊາການ ດ້ານຄວາມປອດພັຍ ຂອງຊຸມຊົນ ທີ່ Fire Rescue Victoria.
ລາວເວົ້າວ່າ ມີຫຼາຍຂັ້ນຕອນ ທີ່ຊາວອອສເຕຣເລັຍ ສາມາດເຮັດໄດ້ ເພື່ອຄວາມປອດພັຍ ໃນລະດູຫນາວນີ້- ເລີ່ມຈາກ ການທົດສອບເຄື່ອງຈັບສັນຍານຄວັນ.
"ເມື່ອທ່ານນອນ, ທ່ານຄົງຈະບໍ່ຕື່ນ ໃນກໍຣະນີທີ່ໄຟໄໝ້ ຍ້ອນພຽງແຕ່ຄວັນ. ສະນັ້ນ, ພວກເຮົາ ກໍາລັງຂໍໃຫ້ຜູ້ຄົນ ໃນລະດູຫນາວນີ້ ກວດສອບໃຫ້ແນ່ໃຈວ່າ ພວກເຂົາເຈົ້າ ມີສັນຍານຄວັນ ທີ່ໃຊ້ງານໄດ້ ຕິດຕັ້ງຢູ່ໃນຫ້ອງນອນຂອງພວກເຂົາ, ທີ່ເຊື່ອມຕໍ່ກັນທົ່ວເຮືອນ, ໃນຫ້ອງນອນທັງຫມົດ, ທຸກພື້ນທີ່ໃຊ້ສອຍ ແລະທຸກຫ້ອງໂຖງ, ເພື່ອໃຫ້ແນ່ໃຈວ່າ ທ່ານມີສັນຍານເຕືອນ ໄວທີ່ສຸດ ຖ້າຫາກຈະມີເຫດການໄຟໄໝ້ເລີ່ມຂຶ້ນ."
ທ່ານຮອງຜູ້ບັນຊາການ, ທ່ານ Fischer, ຍັງໄດ້ກ່າວເນັ້ນ ເຖິງຄວາມສໍາຄັນ ຂອງການມີແຜນການຫນີໄຟ.
"ໃຫ້ແນ່ໃຈວ່າ ທ່ານມີການຊັກຊ້ອມ ແຜນຄວາມປອດພັຍ ຈາກອັກຄີພັຍ ແລະມີການບັນທຶກໄວ້ ແລະທ່ານແລະຄອບຄົວຂອງທ່ານ ແລະຜູ້ອາສັຍຄົນອື່ນໆ ໃນເຮືອນຂອງທ່ານ ຮູ້ວ່າຈະເຮັດແນວໃດ ໃນກໍຣະນີທີ່ໄຟເລີ່ມໄໝ້."
ຫນ່ວຍດັບເພິງ ແລະກູ້ພັຍ ຍັງຊຸກຍູ້ໃຫ້ຊາວອອສເຕຣເລັຍ ທົດສອບເຄື່ອງເຮັດຄວາມຮ້ອນ ຂອງເຂົາເຈົ້າ ກ່ອນທີ່ຈະໃຊ້ມັນ. ນີ້ລວມເຖິງການກວດສອບສາຍໄຟ ວ່າມີການຫ້ຽນ ຫຼືເສັຍຫາຍຫຼືບໍ່.
ເຄື່ອງເຮັດຄວາມຮ້ອນ ຄວນສຽບໃສ່ Plug ໄຟໃນຝາເຮືອນໂດຍກົງ. ຢ່າປະຖິ້ມໄວ້ ໂດຍບໍ່ມີຜູ້ດູແລ ແລະຢ່າລືມທີ່ຈະປິດມັນ ເມື່ອບໍ່ໄດ້ໃຊ້ງານ.
ສິ່ງສໍາຄັນ ເພື່ອໃຫ້ແນ່ໃຈວ່າ ເຄື່ອງເຮືອນ (Furniture) ແລະວັດຖຸອື່ນໆຢູ່ຫ່າງຈາກອຸປະກອນທຳຄວາມຮ້ອນ ຢ່າງຫນ້ອຍຫນຶ່ງແມັດ.
ພິດ Carbon monoxide ແມ່ນຄວາມສ່ຽງອັນໃຫຍ່ຫຼວງ ອີກອັນຫນຶ່ງ.
Dr Suzanne Gilbey ຈາກໂຮງຮຽນສຸຂະພາບ ປະຊາກອນ (School of Population Health) ທີ່ມະຫາວິທະຍາໄລ Curtin ຂອງ Western Australia.
"Carbon monoxide ແມ່ນຜົນຜລິດ ຂອງການເຜົາໄຫມ້. ດັ່ງນັ້ນ, ເມື່ອຜູ້ຄົນ ພະຍາຍາມທີ່ຈະເຮັດໃຫ້ເຮືອນຂອງເຂົາເຈົ້າອຸ່ນ ໂດຍໃຊ້ເຄື່ອງເຜົາຖ່ານໄມ້ ແລະເຄື່ອງເຮັດຄວາມຮ້ອນດ້ວຍແກັສ ແລະເຄື່ອງເຮັດຄວາມຮ້ອນຖ່ານ. ນັ້ນແມ່ນການສ້າງ Carbon monoxide ໃນອາກາດ ພາຍໃນເຮືອນ."
Carbon monoxide ບໍ່ມີສີ, ບໍ່ມີຣົດ ແລະບໍ່ມີກິ່ນ, ສະນັ້ນ, ຈຶ່ງເຮັດໃຫ້ມັນຍາກ ທີ່ຈະກວດພົບ ແລະດັ່ງນັ້ນ ຜູ້ຊ່ຽວຊານ ຈຶ່ງເຕືອນໃຫ້ຜູ້ຄົນ ຮູ້ເຖິງອາການ.
"ການສໍາຜັດກັບ Carbon monoxide ອາດເປັນອັນຕະຣາຍຫຼາຍ ເພາະມັນສະທ້ອນ ໃຫ້ເຫັນເງື່ອນໄຂອື່ນໆ ຫຼາຍຢ່າງ. ດັ່ງນັ້ນ, ຄົນທີ່ຖືກກະທົບ ຈາກການສໍາຜັດກັບ Carbon monoxide ສາມາດປະສົບ ກັບອາການຕ່າງໆເຊັ່ນ: ອາການວິນຫົວ, ອາການປວດຮາກ, ເຈັບຄໍ, ຫນ້າແດງ, ໜ້າມືດ, ເຊິ່ງຈະຄ້າຍຄື ກັບອາການປະເພດອື່ນໆ ອີກຈໍານວນຫນຶ່ງ, ໂດຍສະເພາະ ຄົນເຮົາກໍາລັງໄດ້ຮັບໃນລະດູຫນາວ ຫຼືເປັນໄຂ້ຫວັດ.ສະນັ້ນ, ພວກເຂົາອາດຈະຄຶດວ່າ 'ບາງທີຂ້ອຍກໍາລັງຈະເປັນໄຂ້ ຫຼືເປັນຫວັດ,' ສະນັ້ນ ພວກເຂົາເຈົ້າຈະບໍ່ຄິດວ່າ ມັນເປັນຍ້ອນ Carbon monoxide ແລະອາດຈະເປັນສະພາບການ ເປັນພິດ."
ຜູ້ຊ່ຽວຊານເຕືອນວ່າ ອຸປະກອນຕ່າງໆເຊັ່ນ: ເຕົາໄຟຖ່ານ, barbeques ແລະເຄື່ອງເຮັດຄວາມຮ້ອນນອກເຮືອນ ກໍ່ໃຫ້ເກີດຄວາມສ່ຽງ ຫຼາຍທີ່ສຸດ ເມື່ອໃຊ້ພາຍໃນເຮືອນ.
ເຂົາເຈົ້າ ຍັງຊຸກຍູ້ຜູ້ຄົນ ໃຫ້ກວດເບິ່ງເຄື່ອງເຮັດຄວາມຮ້ອນແກັສ ໃນເຮືອນຂອງເຂົາເຈົ້າເປັນປະຈໍາ-ຢ່າງຫນ້ອຍທຸກໆສອງປີ-ແລະບໍ່ປ່ອຍໃຫ້ມັນເປີດໄວ້ ຂ້າມຄືນ.
ຜູ້ຄົນ ຄວນພິຈາຣະນາ ການຕິດຕັ້ງສັນຍານ Carbon monoxide ເປັນສິ່ງສໍາຮອງ.
ເນື້ອເລື່ອງໂດຍ Abbie O'Brien ຂ່າວ SBS News,
ຈັດທຳໂດຍ ສັກ ພູມີຣັຕນ໌ ວິທຍຸ SBS ພາກ ພາສາລາວ.
ທ່ານສາມາດຕິດຕາມຂ່າວສານຫຼ້າສຸດ ຈາກ ອອສເຕຣເລັຍ ແລະທົ່ວໂລກ ເປັນພາສາລາວຈາກ ເອສບີເອສ ລາວ ໄດ້ທີ່ເວັບໄຊ້ຕ໌
