Esperiénsia Traballador Timoroan nain haat iha Australia

Hosikedas governu Australia hamutuk ho nia setor privadu sira loke odamatan ba traballador timoroan mai servisu iha Australia iha tinan 2012, joven timoroan barak mak hetan ona oportunidade no esperensia servisu iha Australia. Programa traballador nian dahuluk hahu iha 2012, ho naran Seasonal Workers Programme (SWP) ne'ebe traballador sira mai servisu iha Australia to'o fulan sia nia laran, no depois iha 2018, governu Australia loke tan programa ida ho naran Pacific Labour Scheme. Programa ne'e rasik simu traballador servisu to'o tinan tolu. Maibe iha Abril 2022, governu Australia tau programa rua ne'e hamutuk hodi bolu Pacific Australia Labour Mobility Scheme (PALMS). Maski nune'e traballador balun kontinua servisu tuir vistu ne'ebe mak iha ona.

Husi programa rua ne'e timoroan barak mak hetan ona konfiansa husi kompañia ne'ebe sira servisu ba. Ida ne'e hatudu husu sira barak ne'ebe tama sai Australia durante tinan hirak nia laran. Maibe situasaun ida ne'e la aplika ba ema hotu. Traballador balun la hetan susesu no atensaun iha ho diak iha inisiu husi kompañia ne'ebe mak rekruta sira mai servisu iha ne'e. Maske prosesu hotu lao ho diak iha Timor, maibe to'o mai iha ne'e kompañia sira ne'e balun abandona sira ho rasaun ne'ebe mak klaru. Maibe sira kontinua esforsu an atu buka fatin seluk iha Australia hodi servisu.

Situasaun ida ne'e akontese ba joven nain hat ho naran, Manuel da Costa Fernandes husi Bobonaro, Jose Mau Ximenes husi Manatuto, Paulo Gomes husi Viqueque ho Lot Monteiro husi Atauro. Manuel hanesan sira nia lideransa grupu haktuir katak, sira mai servisu iha Australia iha 2018 ho kompañia ida iha Victoria, maibe durante fulan tolu nia laran, sira la halo buat ida, tanba kompañia ne'ebe rekruta sira mai, la liga ka fo servisu ba sira. Aleinde ne'e, obriga mos sira atu selu sira nia hela fatin maski sira la servisu.

Tuir Manuel, situasaun sira hasoru momentu ne'eba halo sira laran susar no lakon tebes konfiasa atu hetan no kontinua servisu depois de hetan tratamentu ne'ebe mak ladiak. Maibe sira esforsu atu buka fali servisu iha fatin seluk, hodi kontaktu Embaixadora Timor-Leste nian ba Australia, Sra.Inês Almeida, atu azuda sira. Husi ne'eba, Embaixadora Sra. Inês, koko kontaktu kompañia Icomply atu simu sira. Nune'e iha fulan Maio tinan 2023, sira komesa servisu ho kompañia Icomply.

Traballador sazional Timoroan nain haat hasai foto hamutuk ho Sr.Rodney Prestia, Diretor Icomply, Embaixadora Timor-Leste ba Australia, Sra.Inês Almeida ho Sr. Joaquim husi Embaixada Timor-Leste iha Canberra Credit: Embassy of Timor-Leste in Australia

Kompañia Icomply, hanesan kompañia ne' ebe mak fornese solusaun hotu iha setor hortikultura nian. Sira oferese traballador, ekipamentu, no mos sasan seluk ne'ebe mak agrikultor sira presiza iha sira nia area. Tuir Sr. Rodney Prestia, hanesan diretor ba kompanya ne'e hatete katak, hanesan Kompañia nia moto simples tebes "

Ami-nia motó simples tebes, ami nia alvu (target) mak ba 10 to'o 20% agrikultor sira iha Australia, no ami hakarak fó falli resultadu 20% ba sira, liu husi husi traballador ne'ebe mak ami rektura. Ami hakarak fornese servisu ne'ebe mak diak tebes, no ami hetan mos husi timor-oan nain hat ne'e. Sira halo duni Timor-Leste orgulho.

Hanesan kompañia ne'ebe mak esiste ona durante tinan 20 nia laran, sira iha ona esperensia ne'ebe mak diak ho agriklutor sira iha Australia. Icomply sempre halo sira nia servisu ho kuidadu no profesianalismu tebes. Ne'e katak, antes fornese traballador sira ba servisu ho agriklutor sira ne'ebe mak halo parseria ho sira, Icomly nia ekipa halo uluk peskiza (due dillegence) atu asegura katak agrikultor sira ne'e sei halo tuir regulamentu ne'ebe mak iha, inkluido tratamentu ba traballlador sira ho diak.

Ida ne'e ba dala uluk, Icomply rekruta traballlador Timoroan sira. Antes ne'e sira servisu hamutuk barak liu ho traballador husi nasaun Pasifiku. Sr. Rodney agradace tebes ba Embaixadora Timor-Leste, Sra. Inês, tanba sira nain hat mesak servisu hotu deit. Nia mos dehan katak, hanesan ema ne'ebe mak relijiuan hanesan ho traballador Timoroan sira , nia fasilita mos fatin ba sira hodi reza. Nia hare nia traballador sira hanesan familia.

Sira nain hat traballador ne'ebe brillante tebes no agriklutor sira kontente tebes ho sira nia servisu. Tanba sira nia servisu ne'ebe mak diak, Icomply sei loke tan oportunidade ba timoroan sira seluk.

Traballador timoroan nain hat hamutuk ho traballador husi nasaun Pasifiku ne'ebe mak agora servisu ba kompañia Icomply Credit: Icomply company

Manuel ho nia kolega nain tolu mos kontente tebes ho Icomply, tanba kompañia ida ne'e hare sira ho diak tebes no trata sira ho profesionalismu tebes. Sira mos hetan treinamentu antes servisu iha tereino. Aleinde ne'e Icomply mos fo fatin hela fatin nian ne'ebe diak tebes ba sira. Maibe hanesan kompañia ne'ebe mak fornese solusaun ba agrikultor sira, Manuel ho nia kolega nain tolu la servisu direta ba Icomply, maibe ho agriklutor sira ne'ebe mak halo parseria ho Icomply.

Traballador timoroan nain rua ne'ebe servisu hela iha tereino Credit: Icomply company

Durante sira servisu iha Icomply, Manuel hetan konfiansa husi nia Sr. Rodney sai hanesan treinador ba nia kolega traballador sira seluk. Manuel hatete katak

Ami iha ne'e laos deit lori Timor nia naran, maibe lori mos Icomply nian

Tanba sira nia servisu ne'ebe mak diak tebes, Sr. Rodney promete nia sei kontinua rekruta timoroan sira iha periode tuir mai, no sira nain hat mos sei fila fali mai servisu iha kompania ne'e depois de sira fila ba Timor deskansa fulan hirak nia laran.

Esperiénsia husi Manuel ho nia kolega nain tolu hanesan deit esemplu ida husi esperensia traballador timoroan sira iha Australia. Maibe hanesan temi ona, laos sira hotu hasoru sircumtansia hanesan. Maibe hare ba problema hirak ne'ebe mak sira hasoru, foin dadaun iha symposium ida ne'ebe mak halao husi Universidade Flinders iha Adelaide ne'ebe koalia kona ba projetu peskiza ne'ebe hare ba "Impaktu moris-di'ak husi migrasaun traballu temporáriu iha Timor-Leste: ida ne'e hare liu ba avaliasaun komparativu ba Australia nia Programa Traballador Seasonal.

Symposium ida ne'e mosu husi servisu hamutuk entre Konselhu Peskiza Australia, Universidade Flinders, governu Timor-Leste, Programa Desenvolvementu Nasaun Unidads (UNDP) no governu Australia nian rasik.

Estudante timoroan ho naran Iriana Ximenes ne'ebe mak agora dadaun rejistu hela nia PhD iha universidade Flinders, halo parte prinsipal husi ekipa peskiza reintegrasaun husi migrante lokal husi programa rua iha Australia no Korea de Sol (EPS & SWP). Nia hatete katak peskiza ne'e fahe ba rua, ida premeiro hare ba moris diak traballador timoroan nian durante servisu iha Australia no mos iha Timor, ne'ebe lidera husi Prof. Udoy Saikia. No ida segundu hare ba reintegrasaun traballador sira nian wainhira fila fali ba Timor. Iriana hanesan peskiza prinsipal ba parte segundu esplika katak nia peskiza ne'e hanesan komplementariu ba projetu " Impaktu moris-diak husi migrasaun laboral temporariu iha Timor-Leste.

Iriana Ximenes, estudante Timoroan ne'ebe rejistu PhD iha Flinders University, Adelaide, Australia Credit: Iriana Ximenes

Peskiza ida ne'e important tanba sublinha ho fase reintegrasaun ne'ebe dala barak hare traballador timoroan sira wainhira fila ba Timor-Leste. Hare liu ba prioridade migrante sira nia moris diak laos deit iha rai liur, maibe bainhria sira fila fali mai hodi asegura transisaun susesu ba sira nia rai laran.

Husi sira nia peskiza nee, iha ona dadus prelemenariu ne'ebe hatudu katak, sira nia esperensia iha rai liur hasae ona sira nia konhesementu ho abilidade.

Nia mos hateten katak, sira nia peskiza mos hare ba oinsa familia ho sosiedade sira nia espetasaun ba traballador sira ne'e wainhra sira fila ba Timor. Nia hatutan mos, atu hatene lolos reintegrasaun ne'e ho diak, presiza hatene saida mak parte hotu hakarak hodi nune'e bele azuda liu tan traballador sira iha futuru.

Peskiza ida ne'e sei kontinua nafatin, no tuir planu sei remata iha tinan oin. Maibe iha tempu hanesan, ekipa peskiza fahe ona resultadu provesoriu ho parte relevante sira inkluido ba governu Timor-Leste no mos governu Australia nian.