Timor iha tinan 25 anos: Prezidente Horta ko’alia kona-ba progresu, pasaporte no ligasaun pesoál

Iha dia 6 de Outubro, SBS Tetum iha oportunidade hodi dada-lia ho Prezidente Timor-Leste, Sr. Jose Ramos-Horta iha fatin ne'ebe nia hela iha Sydney. Iha oportunidade ne'e ami koaloa kona-ba problema ne'ebe maluk Timor-oan traballadór sira hasoru, nune'e mos ho progresu ne'ebe Timor-Leste atinji ona durante 25 anos depois de vota ba Independensia. Prezidente mos koalia kona-ba nia razaun vizita mai Australia.

Iha konversa ne’ebe mak ami halo ho Senhor Prezidente, ami koalia kona-ba progresu Timor-Leste nia durante 25 anos depois de referendum, to’o kestaun urjente ba dezafiu ne’ebe hasoru husi traballadór Timor-oan sira iha Australia.

Kona-ba asuntu passaporte ba Timor-oan balun iha Australia, Iha fulan julhu, tinan ida nee, SBS Tetum halo entervista ho maluk Timor-oan balun iha Australia ne’e. Tuir informasaun ne’ebe ami hetan husi sira, kuaze ema hamutuk 500 pessoas mak nia passaporte kaduka ka mate ona, no to’o agora seidauk iha solusaun ba sira.

Source: AAP

Maske iha ona esforsu maka’as husi Ambassadora Timor-leste ba Australia, Sra, Ines Almeida, ba governu Timor-Leste, liu-liu Ministeiru relevantes.

Saida mak Prezidente Timor-Leste bele halo hodi azuda asuntu ida ne’e? No mai hatene mos, objetivu vizita husi Presidente Ramos Horta nian iha Australia. Vizita Ida ne’e pessoal ka vizita offisial?

Prezidente Horta haktuir katak; tuir konstitusaun Timor-Leste nian, problema passaporte kaduka ba Timor-oan sira ne'e laos nia kompetensia. Problema ida ne'e atu rezolve presiza entre governu ba governu, tanba ne'e nia tau fiar ba Ambassadora, Ines Almeida atu hare asuntu ida ne'e.

Ambassadora Ines, ema ida ne'e iha konhese Australia ho diak tebes no ema ida ne'e iha kompetensia. Hau tau konfiansa ba nia 100 %

Prezidente Timor-Leste, Jose Ramos-Horta

Prezidente simu ona informasaun ida ne'e, no se karik nia hasoru lideransa Australia sei koalia kona-ba asuntu ne'e. Maibe, nia emphaze katak ida ne'e governu Timor-Leste nia responsabilidade.

Governu nia responsabilidade atu buka azuda traballadór sira, laos atu kria birokrasia tun sae

President Timor-Leste, Jose Ramos-Horta

Prezidente Horta mos hatete atu governu Timor-Leste presiza komesa hanoin utiliza passaporte digital ka eletronic.

Koalia kona-ba progresu Timor-Leste nian durante 25 anos depois de referendum, nia kompara fasilidade no infrastutura fisiku no umanu nian iha 2002 no tempu agora ne'ebe diak liu.

Vizita ne'ebe Prezidente halao iha Australia iha fulan Outubru ne'e nia laran hanesan vizita pessoal ida, laos offisial nian. Prezidente haktuir katak, kleur ona nia promete ba Universidade New South Wales atu vizita, maibe foin mak bele realiza. Prezidente Horta hanesan profesor vizitante ka visiting profesor ba UNSW desde 1990. Nune'e mos, The Australian Institute konvida nia ba sira nia halo aniversariu tinan 30. Prezidente Horta sei koalia kona-ba progresu Timor-Leste nian ohin loron.

SBS Produser Lian Tetum, Cristina Freitas, foto hamutuk ho Prezidenti Timor-Leste, Sr. Jose Ramos-Horta, depois de intervista.

Iha vizita ne'e Prezidente sei hasoru malu ho komunidade Timor-oan sira, akademiku no komunidade Australia balun iha Opera House ne'ebe nia halo palestra kona-ba Timor-Leste nia progresu, rekonsiliasaun no seluk tan. Nia mos sei koalia ho ABC TV iha Canberra no sei vizita Australia nia estadu sira seluk hanesan Canberra, Tasmania no Melbourne.