Pontu Chave sira:
- Loron Austrália nian marka loron ne'ebé britániku sira hasa'e bandeira Union Jack iha Sydney Cove iha tinan 1788, ne'ebé maka hahú kolonizasaun.
- Loron 26 Janeiru marka inísiu hosi kolonizasaun britániku, parte ida ne'ebé maka todan hosi istória Aboríjene no Torres Strait Islander nian.
- Sondajen sira hatudu katak maioria hosi australianu sira hakarak atu Loron Austrália nian mantein iha loron 26 Janeiru.
Loron 26 Janeiru sai hanesan ofisialmente Loron Austrália nian ou ka loron nasionál nasaun nian. Maibé ba ema indíjenu sira, no númeru australianu sira ne'ebé aumenta tan, ida-ne'e la'ós loron ida atu selebra.
Boe Spearim, ativista no podcaster Gamilaraay, Kooma, no Murrawari, deskreve pezu emosionál loron nian.
“Ba ha'u, bainhira ita to'o iha loron ne'e, iha dadeer, hau sente hanesan ha'u atu bá funeral. Ha'u hatene buat balun ne'ebé ladi'ak akontese ona. Ne'e sentimentu ida ne'ebé triste tebes.”
Tanba saida maka Loron Austrália nian monu iha loron 26 Janeiru
Iha loron 26 fulan-Janeiru tinan 1788, britániku sira hasa'e bandeira Union Jack iha Sydney Cove, hodi marka inísiu kolonizasaun nian.
Loron Austrália nian selebra ona iha loron 26 Janeiru dezde tinan 1935 maibé foin sai feriadu públiku iha nasaun tomak iha tinan 1994.
Australianu balu selebra hodi organiza barbecue ho sira nia belun no família, balun fali ba tasi-ibun ka haree fogu artifisiál. Serimónia sidadania barak maka hala'o iha data ne'e.
Maibé loron 26 Janeiru hetan protestu hanesan "Loron Lutu nian" hosi povu Aboríjene no povo Ilha Torres Estrairu sira dezde tinan 1938. Númeru protesta ne'e aumenta tan hosi australianu ne'ebe lakohi selebra loron ne'e no husu atu muda feriadu nasionál ba data seluk.
Komísiu Loron Invazaun nian iha Brisbane, 2024 Source: AAP / JONO SEARLE
Tanba saida maka loron ida-ne'e hanesan loron ida ne'ebé maka susar ba ema Indíjena Australianu sira?
Dr Summer May Finlay, feto Yorta Yorta no dosente senior iha Universidade Wollongong, esplika katak loron 26 Janeiru reprezenta inísiu sofrimentu ba ema Aboríjene no Torres Strait Islander.
“Ida-ne'e maka inísiu hosi rasizmu ida-ne'e maka mai hosi diskriminasaun, ida-ne'e mos hanesan inísiu hosi tempu ida ne'ebé ami nia ema sira hetan dezenfranchisadu hosi komunidade no nasaun ne'ebé ami nia bei'ala sira la'o iha tinan 65, 000 nia laran."
Kolonizasaun britániku sai hanesan devastador ba ema indíjena australianu sira ne'ebé hasoru despose rai, masakre, moras sira ne'ebé introdús no foti no hadok labarik sira ho forsa hosi sira nia familia.
Efeitu hosi kolonizasaun, inklui diskriminasaun sistémiku, rezultadu saúde ne'ebé ladi'ak, no mos iha sistema justisa ne'ebe sei sente nafatin to'o ohin loron.
Dr Finlay husu ba Australianu hotu-hotu atu aprende kona-ba sira nia nasaun nia istória.
"Ha'u hanoin katak Austrália hanesan nasaun furak ida iha dalan barak. Ha'u iha serteza katak ema sira ne'ebé mai iha nasaun ida-ne'e no sai sidadaun foun sei rekoñese ida ne'e. Maibé iha tempu hanesan, ita iha istória iha nasaun ida-ne'e ne'ebé ladún di'ak no ladún rekoñese ho di'ak".
Muda, rekoñese ka halakon data?
Peskiza sira hatudu katak maioria australianu hakarak selebra Loron Austrália nian iha loron 26 Janeiru . Maibé tinan-tinan, numeru ema ne'ebe hakarak muda data feriadu nasionál nian mos aumenta tan.
Ema indíjena Australianu barak hakarak data ne'e muda, maski balun fó prioridade ba rekoñesimentu ba ninia istória duké muda ida-ne'e. Ema seluk, hanesan Boe Spearim, fiar katak loron ne'e tenke halakon totalmente.
Nia hatete "Ida-ne'e kona-ba halakon komprensaun koloniál katak nasaun ida-ne'e estabelese ho dame ka katak saida maka akontese ona ba ema Aboríjene sira labele rekoñese, bainhira ida-ne'e tenke rekoñese. No ida-ne'e atu fó hanoin de'it ba ema metan sira no rasista sira no públiku prinsipál katak ita labele selebra tan jenosídiu, ida-ne'e la di'ak".
Ema barak halibur iha Parlamentu Vitoria nian oin hodi halo manifestasaun iha Loron Invazaun nian, 2024. Source: AAP / Diego Fedele
Oinsá atu marka ho respeitu loron 26 Janeiru
Grupu indíjena sira organiza marxa, manifestasaun no halao onra iha tempu madrugada, no eventu kulturál sira iha nasaun tomak iha loron 26 Janeiru, hodi refere ba loron ne'e hanesan "Loron Invazaun nian" ka "Loron Sobrevivénsia nian.
Dr Finlay deskreve oinsá loron ne'e la'o no sé maka bele hola parte.
“Marxa sira ne'ebe hanesan marxa pasífiku iha dalan sira, hanesan protestu ida. Ha'u partisipa iha marxa balu iha Melbourne bainhira ha'u hela iha ne'ebá. No ida-ne'e maka dalan diak ba família sira atu halibur hamutuk, tantu família aboríjene no Ilha Torres Estraitu sira, no sira seluk ne'ebe laos ema indijina.”
Rana Hussain hanesan membru konsellu ida hosi Rekonsiliasaun Austrália, hanesan fundasaun la'ós lukrativu ida ne'ebé promove rekonsiliasaun entre ema indíjena no la'ós indíjena australianu sira. Nia hatete katak halibur sira-ne'e fó esperansa no unidade.
""Ita hetan sentidu solidariedade nian, no dala barak ita hetan sentidu esperansa nian bainhira hamutuk ho komunidade. Nu'udar aliadu sira, ha'u hanoin importante tebes atu ita hamriik iha Primeiru Povu sira nia kotuk bainhira sira dudu atu muda data ka rekoñesimentu barak liután kona-ba saida maka loron ida-ne'e signifika loloos ba sira".
Konsellu oioin la hala'o ona eventu sira Loron Austrália nian no serimónia sidadania nian iha loron 26 Janeiru. Servisu fatin balu permite funsionáriu sira atu troka feriadu públiku ba loron seluk.
Sidadaun Australianu foun sira, Broken Hill, NSW Source: AAP / STUART WALMSLEY
Oinsá migrante sira bele relasiona ho Australianu Indíjena sira
Sr. Spearim fiar katak migrante sira, barak hosi sira ne'ebé maka iha esperiénsia ona ho funu no okupasaun, bele iha liu tan empatiza ho luta ema Indíjena sira nian.
Nia hatete " Ne'e furak tebes katak ema sira mai iha ne'e no hetan dame ruma. Desde 26 Janeiru 1788, ami seidauk hetan justisa, ami seidauk hetan dame".
Rana Hussain hatete katak kestaun 26 Janeiru nian importante ba australianu hotu-hotu, la'ós de'it ba ema indíjena sira.
"Ha'u hanoin ba ema barak, sira hanoin katak komplikasaun no tristeza no laran-susar ida-ne'e tuur de'it ho ema sira Nasaun dahuluk nian, maibé ema ne'ebé komprende signifikadu hosi loron ne'ebá bele sente komplikadu de'it kona-ba ida-ne'e. No ba ha'u, nu'udar oan hosi migrante indianu sira, ami iha ami nia istória rasik kona-ba kolonizasaun no kolonializmu britániku.”
Nu'udar migrante jerasaun daruak, Sra. Hussain komprende tansá maka migrante barak hakarak selebra sira nia identidade foun.
Maibé nia fiar katak australianu hotu-hotu presiza iha konversa sériu sira kona-ba istória loloos ita-nia rain nian molok ita bele hetan dalan inkluzivu ida atu selebra ida-ne'e.
“Ha'u hanoin ita tenke iha konversa ne'e hanesan nasaun ida, no depois ita bele ko'alia kona-ba loron saida maka ita hakarak selebra istória ne'e hotu no rekoñese istória ne'e hotu no depois mai hamutuk. Ita hatene, saida maka loron apropriadu atu unifika ita hotu."
Subscribe or follow the Australia Explained podcast for more valuable information and tips about settling into your new life in Australia.
Do you have any questions or topic ideas? Send us an email to
