Tsis hais tej hnub qub ci ntsa iab saum qab ntuj thiab tej kev pauv hloov ntau nceeg ntawm lub hli li, yeej yog ib co kab lis kev cai thiab cov kev tswm sim ntawm Australia tej neeg txum tim uas tau muaj los tau ntau txheeb xyoo lawm.
Tsis hais yog tej hnub qub mus txog rau tej hnub qub poob, thiab lub caij nyoog sib txawv ntawm lub hli - ces yeej muaj ntau yam kawm txog neeg txum tim tej txuj saib hnub qub thiab ntau lub ntuj los yog tej khoom nyob nruab ntug.
Yog thaum peb saib saum ntuaj thaum hmo ntuj, ces peb yeej yauv pom tej hnub qub ntsais thiab cov kev pauv hloov ntawm lub hli tom qab hnub poob lawm.
Astronomy ces yog ib co txuj uas teev txog tej khoom los yog tej xwm txheej ntau yam, thiab yog tham txog neeg txum tim tej txuj no ces yog ib co txuj ci tob heev txog tej hnub qub thiab lawv cov kev sib cuag nrog tej luaj pua - thiab tej hnub qub tej qhia kom totaub txog tej luaj pua.
Yog tham txog Australia tej neeg txum tim Aboriginal thiab Torres Strait Islander lawm, ces nruab ntug yog tej yam qhia kom lawv paub ua lawv tej kab lis kev cai, thiab yeej yog ib co uas raug piav qhia ntawm ib phaum neeg rau lwm phaum neeg txuas ntxiv los tau ntau txheeb tiam neeg, tsis hais yuav yog piav ua tej dab neeg, nqua ua nkauj, ua tej koom txoos kab lis kev cai thiab tej txuj kos duab.
Lub hli nyob sab saum tus choj Sydney Harbour Bridge – Eclipse Chasers.
Nws tshab txhais “Neeg txum tim yeej tau saib nruab ntug los tau ntev tshaj 60,000 xyoo lawm, vim nws pab kom peb totaub txog lub ntuj ib puag ncig peb, thiab peb siv ntuj ntsuab los ua cov ntsuam tej hnub qub, tej ntuj, lub hnub, lub hli thiab tej huab cua, peb siv coj los kwv yees txog tej huab cua pauv hloov, thiab tej nthwv dej, los yog siv hnub qub coj los pab kom peb paub mus ntawm ib qho rau ib qho, kom paub txog tej dej, los yog kom paub npaj tias yuav sau qoob loo li cas, yuav tu tsiaj li cas los sis yuav ua tej koom txoos kab lis kev cai li cas, thiab peb yeej tau qhia tej dab neeg no rau ntau phaum neeg,''
Ces neeg txum tim tej txuj hnub qub thiaj yog ib txoj xub ke pab lawv kom totaub txog lub ntuj uas lawv nyob, lawv lub luag hauj lwm hauv ntiaj teb.
Aunty Joanne hais tias “Peb yeej muaj ib lo lus hais tias - txhua yam saum nruab ntug yeej yog txhua yam hauv pem teb (hauv luaj pua). Ces yus yeej muaj peev xwm nrhiav tau yus tej zejzog, yus tej nkauj, tej chaw ua kev cai tseem ceeb, thiab siv hnub qub coj kev - tab sis tib co hnub qub kuj muaj peev xwm pab kom yus nkag siab txog txhua yam thiab, tsis hais pab kom yus paub seev cev, paub yus tej lus, kev sib cuag nrog yus teb chaws ntawm yus lub teb chaws - ces thiaj cuam tshuam txog txhua yam.”
Duane Hamacher uas yog ib tug zeskais theem qes uas paub zoo txog Cultural Astronomy ntawm lub tuam chav School of Physics ntawm tsev kawm qib siab University of Melbourne. Nws yeej tau ua hauj lwm nrog neeg txum tim Aboriginal thiab Torres Strait Islander tej zejzog los teev txog lawv tej txuj kab lis kev cai thiab faib qhia tej no rau lwm tus.
Peb tej coj yeej tshab txhais tias txhua yam saum ntuj yeej cuam tshuam nrog tej hauv pem teb no. Ces yog koj xav paub txog lub ntuj ib puag ncig peb tias zoo li cas, ces koj yuav tsum tau saib tej hnub qub.Duane Hamacher.
Duane Hamacher hais tias “Tib neeg yeej ib txwm muaj txoj kev sib cuag zoo heev nrog ntuj ntsuab. Tej hnub qub pab kom peb totaub txog lub caij lub nyoog thiab nruab ntug. Lawv yog tej qhia txog peb tej cai thiab kev tshawb fawb. Lawv zoo tam ntua ib daim luaj chib lig (map) thiab yog lub teev. Thiab lawv kuj yog tej txuj qhia kom peb nco txog tej nruab ntug, uas pab kom peb muaj peev xwm qhia tej txuj - tseeb -los tau ntau txheeb xyoo.”
Ces txhua yam saum ntuj ntsuab thiaj muaj nws lub ntsiab lus ib yam dab tsi thiab siv rau ib co hom phiaj dab tsi. Ces cov kev tig thiab txav ntawm lub hnub, lub hli thiab tej hnub qub thiaj raug siv coj los kwv yees cov kev pauv hloov ntawm peb tej ib puag ncig, tsis hais tej caij nyoog, tej yam ntxwv huab cua, thiab tej cwj pwm ntawm tej nrog tsuag thiab xyoob ntoo.
Australia tej nruab ntug thaum hmo ntuj - Ken Cheung.
“Yog koj xav paub tias thaum twg yuav los nag, ces saib hnub qub. Yog koj xav paub tias tej tsiaj txhu ho coj cwj pwm li cas los yog xav paub tias thaum twg yuav cog qoob loo los yog sau qoob loo, ces saib hnub qub. Ces yus yuav tsum tau kawm kom paub nyeem tej hnub qub thiab tej chaw ib puag ncig yus mas thiaj totaub tias tej chaw ntawd tab tom qhia dab tsi rau yus.”
Duane Hamacher hais tias cov kev siv ntau yam txuj nthuav dab li no los txheeb lub ntiaj teb yeej yog tej yam tseem ceeb heev ntawm tej neeg txum tim Aboriginal thiab Torres Strait Islander tej kab lis kev cai.
Nws tshab txhais tias “Ntawm tej neeg txum tim tej teb chaws pov txwv ces tej coj tseem ceeb yeej tau tshuaj ntsuam tias hnub qub ntsais li cas. Thiab yog tias koj muaj peev xwm nyeem tau tej no - ces yuav muaj peev xwm tshuaj ntsuam thiab qhia tau txog cov kev pauv hloov ntawm tej hnub qub no, piv txwv li hloov lawv tej kob (Xim), lawv cov kev ci ci, los yog seb tej hnub qub ntawd ntsias ceev npaum li cas - ces yuav pab kom yus kawm tau ntau yam tseem ceeb txog tej huab cua. Thiab tej no yuav muaj peev xwm qhia rau yus tias seb puas yuav muaj nag xob nag cua, los yog cov kev hloov seem cua tshua hnub poob rau hnub tuaj los yog hnub tuaj rau hnub poob li cas.”
Txhua hmo ces tej hnub qub yeej tawm ntawm tej nruab ntug sab hnub tuaj ntxov dua 4 ntiag tiv ib hnub dhau los. Ces thaum txwm ib xyoos, tej hnub qub thiaj ncig txwm ib ncig rau lub caij uas lub ntiaj teb tig ncig lub hnub.
Cov kev hloov no yeej cuam tshuam txog cov kev hloov ntau yam hauv ntiaj teb (hauv luaj pua) thiab. Aunty Joanne tshab txhais tias, tus noog Emu saum ntuj ntsuab, los yog tus noog Emu dub, ces yeej yog ib tug uas sawv daws paub zoo ntawm tej hnub qub ntau heev ntawm thaj chaw tsaus ntawm txoj Kag Lig Ntuj (Milky Way).
“Qhov kuv nyiam txog tus noog Emu saum nruab ntug ces yog nws qhia tias seb lwm cov neeg txum tim ho siv thaj chaw tsaus uas muaj hnub qub ntau heev saum ntauj ntawd li cas, tab sis kuj yog tej yam qhia txog tej cwj pwm ntawm tus noog Emu, ces yog peb pom tus neeg Emu coj cwj pwm li cas hauv ntiaj teb no ces peb kuj pom tej cwj pwm zoo tib yam li ntawd saum nruab ntug thiab.”
Tus noog Emu dub tab tom sawv - Geoffrey Wyatt.
Duane Hamacher says.“Tsis tas li ntawd los kuj muaj tej xwm txheej no tshwm sim rau tib lub caij uas tej noog Emu nteg qe thiab,”
“Tab sis thaum dhau cov hli no lawm ces yuav muaj cov hnub qub noog Emu dub nyob siab rau lub 6 li thiab 7 hli ntuj lawm. Thiab kuj yog lub caij uas tej lau noog emu tab tom puag tej qe. Thiab thaum tus noog emu nyob ncaj ncaj rau sab hnub poob qab teb rau lub 8 hli thiab 9 hli ntuj lawm ces tej qe noog emu pib daug lawm.”
Tsis tas li ntawd los tej neeg txum tim yeej tau teev txog tus noog emu rau lawv tej dab neeg, thiab kuj teev tias yog ib cov xov xwm tseem ceeb rau cov kev tshawb fawb thiab.
Duane Hamacher tshab txhais tias “Ces tej coj neeg txum tim Gunaikurnai uas nyob sab qab teb ntawm xeev Victoria thiaj qhia tias tus txiv nraug hli ho caum tua ib tug noog emu li cas. Nws hais tias tus emu khiav hla 3 tsob ntoo uas vau tsuam ib tug dej. Tab sis tus noog ntawm tau npleem thiab tau poob rau hauv tus dej ntawd. Ces tam sim no peb yeej tseem pom zaj dab neeg no saum ntuj. Li pom tus neeg emu pw chev ntawm tus dej saum ntuj - uas yog Txoj Kab Lig Ntuj (Milky Way) los sis yog Warrambool li neeg txum tim hais,”
“Ces tso ntoo Yarran thiaj vau tsuam tus dej ntawm 5 lub hnub qub (Southern Cross), ze ntawm tus noog emu lub taub hau. Thaum tus txiv nraug hli tawm tuaj, ces tus noog emu tsiv nraim tus nws. Tab sis vim peb pheej muaj tej teeb ci rau lub hli ces tsis tshuaj pom txoj Kab Lig Hnub (Milky Way) thiab tsis tshua pom tus noog emu lawm.”
Thiab tej xwm txheej tsuas pom tig pliag rau lub caij luv luv saum ntuj li hnub qub poob ntawd los kuj txhais tau ib co ntsiab lus ntawm neeg txum tim tej kab li kev cai thiab.
Aunty Joanne daim duab nws yees nws tus kheej uas nws xa rau SBS, thiab Associate Professor Duane Hamacher – Amanda Fordyce.
Mr Hamacher hais tias “Tej chaw feem ntau ntawm sab qaum teb Australia, ces yeej yog tej hnub qub poob uas ci ci heev cuam tshuam nrog tej ntsuj phem. Thiab yog tej hnub qub poob muaj tw ntev uas ya saum ntuj. Ntawm neeg txum tim lub teb chaws pov txwv Torres Strait ces tej hnub qub poob ci ci heev hu ua Maier. Tej coj tshab txhais tias yog tej ntsuj ntawm tej neeg uas nyuam qhuav nruam sim uas tau ya sau ntuj zoo li lub foob pob mus rau thaj chaw Beig, uas yog yeeb ceeb.”
Ces cov kev sib raug zoo ntawm tej neeg txum tim Aboriginal thiab Torres Strait Islander thiab tej hnub qub thiaj yog tej yam qhia txog lawv tej cim thawj thiab qhia tias lawv yog ib feem - ntawm lub ntuj, thiab yog tib neeg thiab yog ib feem ntawm lawv tej kab lis kev cai.
Yog tham txog neeg txum tim tej txuj saib ntau lub ntuj thiab tej hnub qub lawm, yeej muaj lub chiv keeb ntev heev txij thaum Tjukurrpa. Uas tej neeg ntawm cov teb chaws vam meej hais tias yog Dreaming, uas yog ib lub caij ntev heev los lawm txij li thaum tag nrho peb sawv daws tshwm sim.Aunty Joanne
Aunty Joanne tshab txhais tias “Tab sis qhov ua rau peb xav paub txog tej keeb kwm no tsis hais lub caij nyoog los yog keeb kwm li ces peb yeej nkag siab tias yeej cuam tshuam txog lub ntsiab lus, thiab nej yeej pom tias peb muaj ib lub tswv yim - uas hu ua Txhua sij hawj, tsis tas li ntawd los tej neeg ntsuj cov kev tau nyob hauv lub ntiaj teb thiab lawv tau tsim tej toj roob hauv pes, tej dej, nruab ntug thiab txhua tsav yiam puas peb pom muaj ib puag ncig peb, thiab yog tej yam pab kom peb totaub tias peb los yeej yog tej neeg nrog koom tsim lub ntuj ceeb tsheej uas peb nyob - tsis hais tej neeg soj ntsuam los yog tej neeg ua tau soj ntsuam ces yeej yog tib tug xwb.”
Ces yog xam raws li no lawm, ces neeg txum tim tej txuj hnub qub thiaj yog ib feem ceeb tseem ntawm peb cov kev sib cuag nrog yav tag los, tam sim no thiab yav pem suab rau ib co txuj uas cuam tshuam nrog txhua yam, thiab yog ib co tseem ceeb ntawm peb tej neeg txum tim tej kab lis kev cai.
Yog xav paub xov xwm ntxawv ntxiv ces txheeb tau thiab .
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
