Australia tus thawj pwm tsav Anthony Albanese tau cog lus tias yog thaum tau qhia tias yuav xaiv tsa tsoom fwv Australia tshiab hnub twg lawm ces yuav xyuas kom yog ib cov kev nrhiav suab sib tw xaiv nom uas zoo.
Tau muaj tej lus hais no rau lub caij tau muaj xov xwm cej luam tias Australia tej neeg tsiv teb tsaws chaw thiab tej zej zog neeg coj ntseeg ntau yam kab lis kev cai mloog tau tias lawv ntshai, muaj neeg hawv yuav ua phem rau lawv thiab zoo li tsis muaj neeg zoo siab tos txais lawv ntawm teb chaws Australia no.
Kon Karapanogiotidis uas yog tus coj lub koom haum Asylum Seeker Resources Centre ntawm Victoria tau qhia tias tej neeg zejzog tsiv teb tsaws chaw thiab thoj nam mloog tau tias tab tom muaj cov kev sib tawg tswj ntau tuaj ntxiv.
Nws hais tias ''Tej neeg thoj nam peb tau ua hauj lwm nrog mloog tau tias zoo li muaj tej kev ua txhaum vim ntxub ntxaug lwm tus, cov kev faib cais tsis nyiaj ib tsav neeg twg thiab zoo li tsis muaj neeg xav tau lawv los yog tos txais lawv ntau tuaj ntxiv ntawm teb chaws Australia no. Thiab ua rau lawv mloog tau tias tsam muaj neeg tsim teeb meem rau lawv thiab tsis tau txais kev nyab xeeb ntawm teb chaws no.''
Anthea Hancocks uas yog tus coj ntawm lub koom haum Scanlon Foundation lub chaw teeb txheeb Scanlon Foundation Research Institute uas tau ua cov kev teeb txheeb txog zej tsoom cov kev koom npoj tau qhia tias txij xyoo 2009 los txog tam sim no ces tsuas tau cov zauv feem pua ntawm zej tsoom cov kev koom npoj txog li 78 feem pua xwb uas yog ib co zauv tsawg tshaj plaws.
Nws tau qhia rau SBS News tias ''tau muaj cov kev ntseeg siab rau tsoom fv thiab muaj cov kev xav rau kis zoo rau cov pawg ntseeg tsawg tuaj ntxiv lawm. Tau muaj cov feem pua ntau tuaj ntxiv xav tsis zoo rau cov neeg uas ntseeg cov kev ntseeg Hinduism, Sikhism, Judaism, thiab christianity lawm.''
Arif Hussein uas yog ib tug kws lij choj ntawm lub koom haum Human Rights Legal Centre thiaj hais xav kom kho tej cai tam sim no los rau txim rau txhua cov kev ntxub lwm tus, ''tsis hais yog cov kev thuam, saib tsis tau, ua rau ib tug twg txaj muag los yog ua rau kom ntshai, los yog hais lus phem los yog sau ntawv phem saib tsis tau ib tug twg.''
Raws li lub koom haum Susan McKinnon Foundation cov kev teeb txheeb tshiab xyoo 2024 ces pom tau tias tau ua rau lub teb chaws Australia no muaj cov kev sib tawg tswj ntau tuaj ntxiv rau tej laj fai kum xeeb tseem ceeb, tej zejzog thiab tej lagluam ntau yam.
Mr Karapanagiotidis thiaj hais tias ''Peb yuav tau ua kev zoo siab rau thiab yuav tau tham txog zej tsoom cov kev koom npoj no ces thiaj yuav yog lub zog loj, tsis li ntawd ces yuav yog tej yam uas tsis muaj zog thiab yuav cia li ras los ua tej yam uas ib txhia pom tau tias tsuas yog ib co chaw leg thiab yog tej yam yuav hawv tsim teeb meem xwb.''
READ MORE
Cov kev sib koom npoj
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm , , , los yog . Download thiab mloog , caum Pod follw los yog lwm cov podcasts platforms (, ).
