ခွံစလဲကညီပိာ်မုၣ်အတၢ်ထံၣ်လိာ်အိၣ်သကိးမုၢ်နံၤအဆိကတၢၢ်တဘျီ

ဖဲလါမးရှး ၂၂သီ အနံၤန့ၣ် ကညီပိာ်မုၣ် လၢအအိၣ်ဆိးဖဲ ခွံစလဲကီၢ်စဲၣ်အပူၤသ့ၣ်တဖၣ် မၤဝဲတၢ်ထံၣ်လိာ်တၢၣ်ပီၣ်သကိးအဆိကတၢၢ်တဘျီ ဒ်သိးကမၤဂ့ၤထီၣ်တၢ်ဖီၣ်လိာ်စုမၤသကိးတၢ်ဒီး ပှၤတဝၢအဂီၢ်န့ၣ်လီၤ.

တၢ်ကလုၢ်တဖၣ်: 

https://www.sbs.com.au/language/karen/kar/collection/podcast/0ms9u5vjn

တၢ်ထံၣ်လိာ်အိၣ်သကိးလၢကိးဝဲဒၣ်အမံၤ, Karen Women Consultation Day, ကညီပိာ်မုၣ်သ့ၣ်တဖၣ်အတၢ်ထံၣ်လိာ်အိၣ်သကိးအမုၢ်နံၤအံၤ ဘၣ်တၢ်တီခိၣ်ရိာ်မဲမၤအီၤလၢ အီစထြ့လယၢၤကညီကလုာ်ကရၢ — ခွံစလဲဝဲၤဒ့ န့ၣ်လီၤ.

အီစထြ့လယၢၤကညီကလုာ်ကရၢ — ခွံစလဲဝဲၤဒ့ နဲၣ်ရွဲၣ် မုၣ်က့ၤတူၣ်စ့ၣ် စံးဝဲဒၣ် တၢ်ဒုးအိၣ်ထီၣ်တၢ်ထံၣ်လိာ်တၢၣ်ပီၣ်အံၤအတၢ်ပညိၣ်န့ၣ် မ့ၢ်ဒ်သိး တၢ်အမၤအါထီၣ်တၢ်သ့ၣ်ညါလိာ်သးတဂၤဒီးတဂၤဒီးခါဆူညါ ကဟ့ၣ်နီၤလီၤသကိးသး တၢ်ဂ့ၢ်တၢ်ကျိၤသ့ၣ်တဖၣ်န့ၣ်လီၤ.

အဝဲစံးစ့ၢ်ကီးဝဲဒၣ်လၢ ပိာ်မုၣ်တနီၤနီၤန့ၣ် ခီဖျိလၢတၢ်တြီတံာ်တာ်အိၣ်ဒီး တၢ်ကတိၤကျိာ် ဒီး လုၢ်လၢ်ဆဲးလၤအတၢ်လီၤဆီလိာ်အသးအဃိ အဝဲသ့ၣ်တဖၣ်န့ၣ်အိၣ်ဒီးတၢ်ကီတၢ်ခဲလၢ အကသုးဘူးသးဒီးပှၤတဝၢအဂၤသ့ၣ်တဖၣ်န့ၣ်လီၤ.

ဖဲအဝဲသ့ၣ်မၤတၢ်တၢၣ်ပီၣ်တဲသကိးတဘျီအံၤအပူၤန့ၣ် အဝဲသ့ၣ်ကွဲမုာ်စ့ၢ်ကီးလီၢ်ကဝီၤဝဲၤကျိၤဝဲၤဒ့လၢအဟ့ၣ်လီၤမၤစၢၤတၢ်ဖဲပှၤတဝၢအပူၤ, ပၣ်ဃုာ်ဒီးဝဲၤကျိၤလၢအမၤစၢၤပှၤဟဲတုၤသီသ့ၣ်တဖၣ်, လၢအဟဲဒီးဟ့ၣ်နီၤလီၤဒုးသ့ၣ်ညါအဝဲသ့ၣ်ဝဲၤကျိၤတၢ်ဖံးတၢ်မၤအဂ့ၢ်အကျိၤသ့ၣ်တဖၣ်န့ၣ်လီၤ.

လၢန့ၣ်အမဲာ်ညါတၢ်ထံၣ်လိာ်တဘျီအံၤ တဲသကိးစ့ၢ်ကီး ဟံၣ်ပူၤဃီပူၤတၢ်မၤဆူၣ်မၤဆီးအဂ့ၢ် ဒ်သိးတၢ်ဂ့ၢ်ဒ်အံၤမ့ၢ်အိၣ်ထီၣ်န့ၣ် ကဘၣ်ဃ့တၢ်မၤစၢၤဒ်လဲၣ်သ့ၣ်တဖၣ်န့ၣ်လီၤ.

တကတီၢ်ဃီန့ၣ် မုၣ်က့ၤတူၣ်စ့ၣ် စံးဝဲဒၣ် လၢဟံၣ်ပူၤဃီပူၤဒီးပှၤတဝၢ တၢ်ဒိၣ်ထီၣ်ထီထီၣ်အဂီၢ် မိၢ်သ့ၣ်တဖၣ်အတၢ်ပၣ်ဃုာ်မၤသကိးတၢ်န့ၣ်မ့ၢ်ဝဲတၢ်လၢအရ့ဒိၣ်မး ဒီး အဝဲကွဲမုာ်စ့ၢ်ကီးလၢ အဝဲသ့ၣ်ကပၣ်ဃုာ်မၤသကိးတၢ်အါထီၣ်ဖဲပှၤတဝၢတၢ်ဖံးတၢ်မၤအပူၤန့ၣ်လီၤ.

ကညီပိာ်မုၣ်သ့ၣ်တဖၣ်အတၢ်ထံၣ်လိာ်အိၣ်သကိးအမုၢ်နံၤအံၤ ခါဆူညါန့ၣ် တၢ်ရဲၣ်တၢ်ကျဲၤပာ်လၢ တၢ်ကဆဲးမၤအီၤ ဃုလါတဘျီန့ၣ်လီၤ. ခွံစလဲကီၢ်စဲၣ်အပူၤန့ၣ် တၢ်တယာ်လၢ ကညီဖိအနီၣ်ဂံၢ်န့ၣ်ကအိၣ်ဝဲဒၣ် ၅ဝဝဝ ဆူအဖီခိၣ်န့ၣ်လီၤ.