Avizu: konteúdu ida karik sei halo ema laran-susar
Iha Austrália, liu metade hosi feto sira ne'ebé iha vistu temporáriu hetan ona asédiu seksuál iha serbisu fatin.
Tuir peskiza foin lalais ne'e hosi Unions NSW, feto hamutuk pursentu 25 de'it maka relata abuzu ne'e.
indústria sira hanesan; konstrusaun, ospitalidade, ortikultura, limpeza no retallu maka hanesan indústria sira ne'ebé la seguru liu ho xefe no jestór sira maka sai hanesan autór komún liu.
Feto sira ne'ebé maka relata abuzu hetan kastigu ho intimidasaun, hamenus saláriu, ameasa deportasaun ka terminasaun empregu.
Profesora Marie Segrave hosi Universidade Melbourne, ne'ebé halo ona peskiza kona-ba asédiu seksuál hasoru feto migrante no refujiadu sira iha Austrália, hatete katak maioria feto sira sente katak sira nia seguransa sai ameasadu liu bainhira sira laiha serbisu.
Sentimentu tauk atu lakon seguransa finanseira ka rezidénsia lori feto barak maka "jere" abuzu ida ne'e ho la relata saida mak akontese.
Enkuantu governu hamutuk ho Komisaun Direitus Umanus Austrália nian, implementa hela lejislasaun atu mantein feto sira seguru iha sira nia serbisu fatin, Prof Segrave hatete katak reforma ida ne'e parte ida de'it hosi solusaun.
"Ita presiza iha maneira ne'ebé kompleksu atu hanoin kona-ba feto sira-nia esperiénsia seguransa ne'ebé maka diferente, maneira diferente atu hanoin kona-ba apoia saida deit mak feto sira presija no kria seguransa iha kazu sira hanesan ne'e."
Se ita-boot ka ema ruma ne'ebé ita-boot koñese hetan impaktu husi asédiu seksuál ka asaltu favour liga ba numeru 1800RESPECT ka vizita 1800RESPECT.org.au. No se karik Iha emerjénsia nia laran, favor liga ba numeru 000.
