Kev nrhiav kom tau ib tug General Practitioner (GP) los yog ib tug kws kho mob hauv Australia no mas yog koj nyob nroog loj ces kuj nrhiav tau yooj yim, tsuas mus nrhiav hauv internet xwb, ces yeej paub tias muaj tsawg tus kws kho mob ntawm cheeb tsam ze koj nyob lawm. Tab sis koj yuav tau mus teeb txheeb me ntsi thiaj nrhiav tau tus kws kho mob zoo.
Nug tej neeg koj paub:
Thawj yam tsim nyog koj uas ces nug tej neeg nyob ze koj, tej phooj ywg thiab koj tsev neeg seb lawv puas tawm tswv yim pab tau koj dab tsi, uas tej zaum kuj muaj qee yam tsis teev rau hauv tej ntaub ntawv thiab los kuj muaj.
Yog koj muaj tej phooj ywg uas yog koj tib haiv neeg ces lawv kuj yuav qhia tau tias seb puas muaj cov kws kho mob uas hais tau koj hom lus thiab paub zoo txog koj tej kab lis kev cai thiab.
Source: Flickr AMISOM Public Information (CC 1.0)
Yog koj tsis paub lus English ne:
Tej zaum koj kuj yuav nrhiav tau ib tug kws kho mob uas paub hais koj hom lus thiab, tab sis txawm nrhiav tsis tau los ho nrhiav cov uas yeej tau kho koj tej neeg, uas yeej paub zoo txog koj tej kab li kev cai zoo lawm los kuj tau.
Yog koj xav tau neeg txhais lus, ces hu rau lub chaw txhais lus tus zauv xov tooj 131 450, uas lawv yeej nrhiav neeg txhais lus pub dawb rau koj siv, tsis hais tham hauv xov tooj los yog tuaj txhais lus kiag ntawm chaw pab koj. Tab sis xav kom koj ua tib zoo txheeb kom zoo seb lub chaw kho mob ntaw khiav hauj lwm li cas, vim tej zaum lawv kuj teem caij los yog muaj neeg txhais lus rau tej neeg mob mus ntsib lawv rau qee lub sijhawm xwb.
Yuav txheeb xyuas dab tsi ntxiv:
Nrhiav kom tau lub chaw kho mob uas siv tau yooj yim rau lub caij twg los tau thiab haum raws li tej sij hawm kom xav siv.
Dr. Tony Bartone uas yog tus lwm coj ntawm lub koom haum tau qhia tias “Yus yeej tsis xav kom cov kev mus ntsib kws kho mob yog ib cov teeb meem nyuaj rau yus thiab."
Tsis tas li no tsim nyog yuav tau xyuas kom cov chaw kho mob siv bulk-billing los yog tias koj yuav tau them nyiaj ne ho them npaum li cas kiag. Thiab yog tias koj hos tsis muaj nyiaj siv ces siv cov chaw kho mob uas muaj cov bulk-billing ntawd yuav zoo dua rau koj. Tab sis muaj qee zaus kuj zoo rau koj thiab txawm koj tau them nqe me ntsis los yog lub chaw kho mob nyob ze koj ces yeej tsim nyog thiab.
Yog li thiaj tsim nyog yuav tau mus txheeb xyuas tej chaw kho mob ntawd tej vam sab (Websites) kom zoo li zoo tau ua ntej yuav mus ntsib thiab nrog lawv tham. Thiab yog koj tseem muaj teeb meem khuam siab dab tsi, ces hu nrog lawv tham los sis nrog lawv tham thaum koj mus ntsib lawv tau tib yam.
Qee cov lus nug uas tsim nyog koj nug lawv:
- Nej puas kho me nyuam yaus?
- Nej puas tuaj kho mob tom tsev?
- Puas teem caij tau yooj yim?
- Yog tias ho muaj tej xwm txheej kub ntaiv ne siv puas tau kws kho mob?
- Yuav ntev npaum li cas mam li paub cov kev sim ntshav, zis, los yog lwm yam?
- Nej tej cai cov neeg mob them nyiaj zoo li cas?
- Nej puas muaj cov kws kho mob uas paub lwm yam uas yuav tau txais txiaj ntsim rau kuv?
Tsis tas li no ho txheeb xyuas seb lub chaw kho mob ntawd puas teev zwm npe ua tub koom siab nrog lub koom haum Check los sis , vim qhov no txhais tau tias lub chaw kho mob no yeej kho tau neeg zoo lawm thiab.
Source: AAP
Cov kev teem caij mus ntsib kws kho mob:
Thaum koj xaiv tau ib tug kws kho mob lawm, ces teem caij mus ntsib nws seb tus kws kho mob ntawd ho zoo li cas. Tsis txhob tos txog rau thaum koj twb mob sab heev es mam li los txheeb tias tus kws kho mob los yog lub chaw kho mob twg thiaj zoo.
Dr. Sama Balasubramanian uas tseem yog ib tug neeg kawm los ua kws khomob ntawm Western Sydney lub chaw Refugee Health hais tias "Tsim nyog cov neeg mob yuav tsum tham tau yam qhib siab lug thiab thiab tus kws kho mob yog ib tug neeg siab ncaj uas qhia qhov tseeb. tsim nyog tus kws kho mob yuav tusm kub siab mloog tej neeg mob tej teeb meem thiab kub siab thiab txhawj xeeb pab lawv tiag tiag. Yog koj mloog tau tias zoo li tus kws kho mob tsis kub siab thiab tsis tshua xav pab koj thiab tsis haum koj ces kuj nrhiav dua tus tshiab xwb. Yeej tsis yog ib yam dab tsi txawv uas tsis muaj kws kho mob siv li 2-3 lub hlis thaum yus tuaj nyob tshiab hauv teb chaws Australia no."
Dr. Tony Bartone uas yog tus lwm coj ntawm lub koom haum Australian Medical Association hais tias "Yeej nrhiav tsis tau ib tug kws kho mob siv tau yooj yim kiag rau lub caij sai sai twg, tab sis yog yus xav tias tus kws kho mob ntawd kub siab pab yus tiag ces kom siv tus ntawd xwb thiab tsim kom muaj kev phooj ywg sib raug zoo nrog nws thiaj yuav pab cuam tau yus txoj kev noj qab haus huv zoo tshaj plaws ntev ntxiv mus."
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
