Sua Yaj Xyooj (Niam Tooj Zeb Xyooj) uas yog ib tug lees kais qhia ntawv ntawm ib lub yeej thoj nam ntawm Thaib teb dhau los, thiab tsis ntev los no tau qhia ntawv rau Hmoob tej hluas thiab tau qhia cov kev seev ceev line dancing rau Hmoob tej poj niam ntawm Cairns, ntawm far-north Queensland teb chaws Australia yeej yog ib tug neeg nyiam qhia kev paub rau lwm tus thiab nyiam cog zaub ua hobby. Tab sis peb ho mus xyuas seb vim li cas nws thiaj li muab cov kev nyiam cog zaub no tig los ua ib cov lagluam me kom ho khwv tau nyiaj pab rau nws txoj kev ua lub neej, thaum nws cog tej zaug no muag rau lub Cairns lub khw Rusty Market uas feem ntau yog muag tej qoob loo cog tau ntawm tej zejzog hauv Cairns ntawd.
Cov kev cog zaub yeej yog tej yam rov qab ua rau peb nco txog Hmoob lub neej ua liaj ua teb rau yav ntuj qub qab ntawm teb chaws Nplog, tab sis lub neej tiam tshiab no tsuas tshuav tsawg tus Hmoob thiaj ua liaj ua teb cog qoob loo lawm xwb, feem tau yeej tsis ua lawm tsuas yog cog me ntsis zaub ntawm tej qab vag tsib taug lawm xwb.
Ms Yang Xiong hais tias, thaum xub mas nws yeej tsis npaj tswv yim tias yuav muab cov kev cog zaug ua si kom lom zem, los sis pab kom yus tau txais kev noj qab nyob zoo, los yog tsuas ua laug kom caij nyoog txhob ntev vim nws so tsis ua hauj lwm lawm xwb. Tab sis tom qab nws tau cog zaub los tau ib ntus, thiab ho tau txiav txim siab cog zaub xa muag rau lwm tus muag ntawm lub zos Cairns lub khw Rusty Market, ces thaum kawg nws thiaj li ua ib siab tig los cog zaub thiab mus ntiav ib qho chaw muag zaug ntawm lub khw no rau nws mua ua luam muag zaub lawm.
Nws qhia tias hais txog cov tswv yim cog zaub ces nyias muaj nyias tswv yim, tab sis ntawm nws tus kheej lawm ces, nws tau siv cov phuas kab tsib ua tso cov kua kab tsib tab lawm es coj mus hlawv ua hmoov tshauv, nrog rau cov phua kab tsi uas tsis tau hlawv thiab cov chiv uas siv cov seaweed ua hauv teb chaws Australia coj los pab kom tej zaub thiaj loj zoo. Niam Tooj Zeb Xyooj qhia tias tos nws ho ua li no los vim tej av ntawm teb chaws Australia no txawv tej av ntawm teb chaws Nplog uas yog luaj thiab hlawv tag lawm ces cia li cog qoob loo xwb ces yeej ciaj thiab tuaj thiab loj hlob ces yeej tau noj lawm, tab sis tej av ntawm teb chaws Australia no txawv lawm, yog tsis rau tej chiv li hais no ces qoob loo yuav tsis hlob, pob kws yuav tsis qab zib, nplej yuav tsis qab tsis cua thiab tsis nplaum.
Ms Soua Yang Xiong at her vegetable stall (Soua Yang Xiong) Source: Soua Yang Xiong
Kuv thiab kuv tus txiv wb mus ntiav poj mab yawm suav teb tshaj li 1.5 acres ua. Nws muab thaj teb no cov av tshom tag ces kuv mam li mus xuas kotaw thob kwj ua pav zaub rau. Kuv yeej ua cov pab txij li 5 los yog 6 pav los sis tej zaum kuj txog 10 pav thiab. Ib pav twg ntev txog 32 metres thiab dav 1 metre thiab muaj qhov chaw taug kev hauv nruab nrab pav ze yuav laug txog li 1 metre thiab. Kuv yeej cog ntau yam zaub tsis hais cov Chinese green custard, chive, choy sum, bok choy and Shanghai bok choy, zaub txhwb, tauj dub. Tsis tas li ntawd kuj coj cov okra thiab qos ntoo tab sis yuav tau siv caij ntev zog mam tau de thiab tau khawb los noj. Ces kuv yeej cog ntau yam zaub sib hloov thawm xyoo. Txawm li cas los cov nyiaj muag zaug khwv tau ntawm ib lub limpiam (week) yeej txaus them tej nqe ntiav (rental fee) lawm thiab.
Yog tham txog cov kev sau qoob loo lawm ces yuav tsum tau sau rau tib lub caij thiab tib lub sij hawm txhua txhua zaus xwb, vim tias yuav sau tau tej qoob loj sib xwm yeem, tsis li ntawd ces tej zaub yuav loj sai heev thiab loj tsis sib luag lawm. Tab sis nws yeej nyiam hlais tej zaub no thaum tseem mos coj mus muag.
Soua Yang Xiong's husband Tong Ze Xiong at her vegetable stall (Soua Yang Xiong) Source: Soua Yang Xiong
Tab sis cov kev tig yam yus nyiam ua coj los ua lagluam me khwv nyiaj rau yus siv no tsis yog tej yam yooj yim kiag li. Ms Sua Yaj Xyooj yeej lees tias, yus yuav tau muaj kev txiav txim siab, thiab yuav tau kub siab tiag tiag nias siab hlo los leg yus lub luag hauj lwm txhua yam txij thaum pig txog thaum xaus kom tiav txog ntua rau thaum npaj tau tej qoob loo coj los teeb thiab tum saum rooj muag kiag lawm los tseem tau zov kom muag tau thiab.
Dua ntawm tej hauj lwm uas nws yuav tau mus cog zaub, npaj thiab nrhiav tej zaub kom txhij coj mus ntim rau tsheb, nrog rau tej txiv xyoob txiv ntoo es mam thauj coj mus tum cia thiab teeb muag ntawm lub khw Cairns Rusty Market ntawd rau 3 hnub li hnub zej Kuab (Friday) zwj Cag (Saturday) thiab zwj Hnub (Sunday) ntawd mas tsis yooj yim kiag li. Ntxiv ntawd los tseem yuav tau sawv ntxov ntxov thaum 3 teev sawv ntxov los npaj tej no kom tiav rau thaum kaj ntug es thiaj tau muag thiab mas sab kawg li thiab.
Thuam xub mas kuv tsuas ua kom muaj kev zoo siab thiab muaj kev lom zem laug caij xwb, tab sis tom qab tuaj ces kuv kuj tau muab cov kev nyiam cog zaub no tig los ua ib cov lagluam lawm, yog li cov kev nyiam no thiaj tau raws los ua ib lub luag hauj lwm rau yus lawm uas yuav tau xyuas kom tau tej qoob loo los muag rau tej customers ua tuaj yuav yus tej zaub lawm thiab, xws li yuav tau cog kom tau tej zaub uas lawv nyiam yuav. Ntxiv ntawd los yus yuav tsum txhob ua neeg qhia dub thiab ua neeg siab zoo, ho pub rau lwm tus thiab mas thiaj yuav khwv tau nyiaj rov qab rau yus uas yog ib yam tseem ceeb heev ntawm cov kev ua luam, raws li Ms Sua Yaj Xyooj tau qhia.
Ms. Yaj Xyooj qhia ntxiv tias nws tau yuav 8 lub rooj los muag nws cov zaub uas nws yuav tau them tej nqe rooj no ze txog li ntawm $638 rau 3 hnub uas nws muag zaub txhua limpiam ntawd. Tab sis kuj zoo tias tej nyiaj nws khwv tau ntawd muaj peev xwm txaus them tej nqe ntawd thiab. Tab sis ho khwv puas tau txaus los pab nws lub neej thiab?
Niam Tooj Zeb Xyooj hais tias xam qhov tau txais txiaj ntsim rau yus xwb, txhob xam tej nqe zog, nqe mus los, nqe dej, nqe ntiav chaw cog zaub, nqe chiv thiab nqe ntiav rooj los yog lwm yam nqe lawm, ces yeej tau me ntsis thiab yog muab piv rau cov neeg mus pleev rau tes uas khwv tau ntau tshaj plaws ces ib hnub nyuam qhuav khwv tau li $200 xwb ces kuj tsim nyog yus txoj kev khwv lawm thiab. Hos yog mua xam rau tej neeg niaj hnub ua hauj lwm rau luag ces cov kev muag zaug ntawm khw Rusty Market yeej zoo tshaj lawm.
Nws hais tias kuv twb muaj hnoob nyoog li no lawm, thiab yog tseem ua hauj lwm rau lwm tus thiab ces ntshe yus yeej tsis muaj zog cus plaws, hlwb yuav tsum khiav zoo mas luag thiaj yuav xav yuav yus ua hauj lwm thiab.
Yog li ntawd cov kev muag zaub no thiaj yog ib cov kev sib zov rau tej neeg muaj hnoob nyoog li kuv no uas kom muaj cib fim tau sib ntsib sib cuag thiab sib txuas lus nrog tej neeg zejzog xwb kom ho tau nyiaj me ntsis pab rau yus txoj kev ua lub neej vim yus yog tus nti yus kuab puab lawm.
Ms. Sua Yaj Xyooj tau xaus lus tias yog tsis ua ces tsis paub yuav tsum ua thiaj paub thiab thiaj ua tau vim tej qoob yus cog tau yeej qab dua, ces yus mam li paub tias yam qoob yus cog tau ntawd pab tau yus ntau npaum li cas. Thiab yog yus ua hauj lwm npaum li yus ua rau yus tus kheej, kuv mus ua Suav qhev tau ntawv npaum li no, tsam no kuv lub neej twb dua lawm kuv mam xav tias cas kuv tsis ua qhev rau kuv zoo tshaj.
Mloog tau ntau yam xov xwm ua lus Hmoob thiab lus Askiv tau raws li hauv qab no:
READ MORE
Tsev tsoom hwv cov cai txo se 2019
READ MORE
Txo se rau tej neeg ntiag tug
