Festival Hamutuk: Selebrasaun dahuluk tinan lima nulu hela iha Australia

Festivál "Hamutuk 2024/25" ne'ebe organiza husi grupu timoroan sira iha Melbourne hamutuk ho Endeavor United Soccer Club ne'ebé halao iha 27 & 29 Dezembru 2024 no 2 & 4 Janeiru 2025 hanesan eventu bo'ot ne'ebe fo omenajen no apresiasaun ba timoroan sira nia reziliénsia, kriatividade, no espíritu komunitáriu durante tinan lima nulu hela iha Australia. Tuir komisaun organizadora sira festival ida ne'e ho intensaun atu halibur komunidade Timoroan sira iha Melbourne ho apoiu husi governu lokal hodi selebra komunidade Timoroan nian prezensa iha Melbourne, aumesmo tempu hatudu mos tradisaun Timor nian ne'ebe mak riku tebes.

Komunidade timoroan iha Melbourne halao Festivál boot ida iha fin de ano, iha dia 27 no 29 Desembro no iha dia 2 ho dia 4 de Janeiro, 2025. Festival ida ne'e sira hanaran "Hamutuk Festival" ne'ebe halao iha Reema Reserve, Endeavour Hills iha Melbourne. Tuir komisaun organizadora Festivál ida ne’e marka inísiu ba sira nia komemorasaun ba tinan lima nulu mai hela iha Austrália.

Plaka ne'ebe hatudu Festival Hamutuk nia fatin

Sandra Bernarda Boavida, hanesan membru komisaun organizadora ba festival ne'e haktuir katak " festival ida ne'e nia objetivu mak atu lori komunidade sira hamutuk liu husi desportu, arte ho kultura, liu-liu tanba ami iha traballador timoroan ne'ebe mak barak iha Melbourne. Ami hakarak sira sente pertensia iha komunidade nia let.

Nia hatutan tan katak " Tinan 2025 komunidade iha Melbourne mos selebra tinan lima nulu muda mai hela iha Australia, no ami nia oan sira moris iha Australia, tanba ne'e hau ho hau nia laen iha responsabilidade atu hanorin ami nia oan sira kona-ba kultura, musika no patrimimonia timor nian. Tinan ida ne'e marka istoria importante tebes ba ami.

Grupu dansa tradisional timoroan ne'ebe moris no boot iha Australia. Credit: Joao Tam, Passion Creations

Sandra mos hatete katak nia sai husi Timor bainhira nia iha idade tinan tolu "Hau sai husi Timor ho idade tres no hau fo parabens hau nia aman ho inan hanorin hau kona-ba kultura no agora hau hatutan ba hau nia oan sira. Plataforma diak liu atu halao atividade hanesan ne'e mak liu husi klubu ne'ebe ami iha".

Eventu ida ne'e hetan suporta husi governu local Melbourne nian no hetan presenza maka'as husi komunidade timoroan sira ne'ebe mak hela iha Melbourne, husi ferik katuas sira to'o labarik joven sira, nune'e mos governu lokal no mos ema lokal sira iha area ne'eba. Tuir Sandra, durante halo planu ba festival ida ne'e, sira hakarak duni atu akumula ema hotu, tanba ne'e mak sira bolu festival ida ne'e ho naran "Hamutuk".

Foto iha liman karuk; Sandra Bernardo Boavida, membru organizadora Festival Hamutuk; Foto klaran, traballadora Leonita Araujo ho Ana Cristiina no foto iha liman los; Senhor Jose Pires ne'ebe halao workshop kona-ba identidade Timor nian ba joven timoroan ne'ebe moris iha Australia. Credit: Bernardo Duarte ho Hamutuk 2024/25

Atividade ka programa ne'ebe mak halao iha festival ne'e kahor husi elementu tradisionál to'o kontemporáneu sira. Husi aprezentasaun múzika no dansa tradisional husi joven no labarik ki'ik sira, fa'an produtu hanesan Tais, aprezentasaun banda musika, workshop kulturál sira, no futebol amizade ne'ebe halao entre klubu timorona nian no sira seluk. Festival ida ne'e sei la kompletu sem iha hahan tradisional timor nian, hanesan batar daan no katupa ne'ebe hatudu liu tan Timor nia sabor ba vizitante sira.

Foto hamutuk iha grupu: 1. Grupu banda musika balun iha Melbourne 2.Partisipante sira ho hahan timor nian 3. Reprezentante governu Timor-Leste Sr. Joel Goncalvez ho traballadores timoroan sira iha Melbourne 4. Inacia Santos, husi Kor Timor fa'an produtu tais Credit: Melbourne Timorese Community ho Hamutuk 2024/25

Hahan sira ne'e balun oferese ka fa'an husi Traballadór timoroan ne'ebe servisu iha Melbourne. Ana Cristina Soares, ne’ebé fa’an batar daan, fahe ninia agradesimentu. “Festivál ida-ne'e permite ami atu fahe ami nia kultura liuhosi hahán enkuantu hetan mós osan uitoan hodi sustenta ami nia vida iha ne'e” nia hatete. "Haree ema gosta ami nia hahán tradisionál sira halo ha'u sente orgullu." Nia kolega Leonita Araújo hatutan, “Furak tebes atu halo parte iha eventu ida ne'ebé sente hanesan uma. Ida-ne'e mós ajuda ami atu liga ho komunidade Timor-oan sira ne'ebé hela iha ne'e.”

Senhor Jose Pires, ne’ebe halao workshop iha festival ne'e fahe konhesimentu kultural no tradisaun kona-ba Identidade Timor nian ba jerasaun foun ne'ebe moris iha Australia. Iha sesaun ida Senhor Pires koalia kona-ba Uma Lulik (uma bei’ala sira nian) hanesan identidade, hodi subliña importánsia atu prezerva patrimóniu kulturál. "Ida-ne'e krusiál tebes atu jerasaun foun sira komprende sira mai hosi ne'ebé," dehan Pires. "Workshop sira hanesan ne'e mantein ita-nia tradisaun moris nian no ajuda hari'i ligasaun sira ba ita nia joven sira nia identidade, tanba sira ladun iha istoria kona-ba sira nia eransa. Tanba ne'e importante atu halo koneksaun ho uma sira nia uma lulik".

Senhor Zeca Mesquita hamutuk ho juventude no labarik timoroan ne'ebe moris iha Australia hodi hatudu dansa tradisional no baku tambor Credit: Joao Tam Passion Creations, Melbourne Timorese Community,- Hamutuk 2024/25

Iha parte seluk, Sr. Zeca mos halao aprezentasaun ho labarik Timor-oan sira husi idade 10 anos to'o 18 anos ne'ebe nia treino ba toka tambor no dansa tradisionál. Tuir organizadora sira haktuir katak; esperiénsia pratika ida ne'e hatudu ba labarik sira kona-ba Timor nia tadisaun tribál sira ba moris. Artista sira seluk hanesan Jose Mesquita, no Antoninho Chico Dos Santos no grupu sira seluk halibur mos ema hotu ne'ebe mai hare festival ida ne'e. Sira nia presenja ho musika kria ligasaun signifikativu tebes no anima tebes partisipante sira ne'ebe mai atende eventu ne'e durante loron ha'at nia laran.

Shyla Silvina de Lemos Guterres Duarte, hanesan jerasaun timoroan ne'ebe moris iha Australia no envolve iha grupu dansa tradisional halo reflesaun kona-ba nia esperiénsia. "Halo parte iha festival ida-ne'e ajuda ha'u atu liga fali ho ha'u nia abut sira," Shyla hatete. “Nu’udar foin-sa’e ne’ebé moris iha Austrália, importante ba ha’u atu hatene ita mai husi ne’ebé, no festivál ida-ne’e permite ha’u atu selebra ita-nia kultura Timorense ho orgullu.”

Foto husi liman karuk; Jerasaun foun - Shyla Silvina de Lemos Guterres Duarte, Senhor Herminio Da Silva Maia no Artista vizual; Bernardo Duarte ho nia pintura Credit: Bernardo Duarte ho Hamutuk 2024/25

Ba ema barak, festival ne'e mós hanesan oportunidade ida atu reflete kona-ba pasadu. Hanesan Senhor Herminio Da Silva Maia, senior ida ne'ebe hela iha Australia kleur ona, fahe memória bainhira to’o iha Austrália tinan 50 liubá. "Bainhira ami mai iha ne'e iha tinan 1975, ami iha uitoan de'it, hau sai husi Timor ho tinan walu depois ba Mozambique no Portugal depois mak mai Australia," Maia hatete. "Ida-ne'e maka tempu inserteza nian, maibé ami lori ami nia tradisaun sira, kultura, no esperansa.

Nia hatutan tan katak Haree selebrasaun ida-ne'e ohin halo nia sente orgullu ba saida maka sira atinji ona nu'udar komunidade "Festival ida ne'e importante atu ita nia jerasaun foun sira tuir. Komunidade iha Melbourne unidade tebes. Jerasaun foun tenke kolabora hodi kontinua ita nia kultura ne'ebe riku tebes. Se ita la hamutuk ita lakon kultura no labarik sira sei la konhese malu. sira bele lori ita nia rain ba oin. Nia hatutan tan" Tenki iha kolaborasaun husi inan aman sira, oan sira moris iha liur ne'e laos problema. inan aman sira mak kontinua fo moral ba sira hodi kontinua ita nia kultura"

Nune'e mos artista vizuál Bernardo Duarte reflete kona-ba nia motivasaun hodi partisipa. “Imajen Timór nian dalabarak asosiadu ho konflitu no luta—la’ós de’it hosi ema estranjeiru sira maibé mós hosi Timor-oan rasik. Nune'e liuhusi ha’u-nia arte, ha’u espera bele inspira jerasaun foun sira atu haree ita-nia kultura hanesan buat ida ne’ebé vibrante no vale atu prezerva,” nia hateten. "Festivál ida-ne'e maka kontinuasaun ida hosi esforsu ne'ebá, halibur buat hotu hamutuk - futeból, múzika, hahán, arte, no dansa."

Grupu Foto: 1.Labarik ho joven sira aprende baku tambor 2. Partisipante tur iha tenda okos hodi han sira nia hahan 3. Grupu timoroan balun hetan taxa husi joga bola amizade ne'ebe mak sira partisipa 4. Joven timoroan sira ne'ebe partisipa iha festival Credit: Joao Tam Passion Creations; MTC ho Hamutuk 2024/25

Maski festival ida ne'e lao ho susesu, organiza festival ne'e mai ho dezafiu sira, temi husi Sandra. "Ami nia planu ba festival ida ne'e lori tempu besik 12-18 meses . Husi koordena partisipante sira to'o asegura patrosíniu sira no apoiu governu lokal nian, ida-ne'e prosesu ida ne'ebé maka susar.

Infelizmente, ami la hetan apoiu hosi governu Timor-Leste, maibé ami agradese tanba iha reprezentante hosi Oecusse hamutuk ho ami. Buat ida ne'ebe la fasil atu organiza, maibé haree ema hotu halibur hamutuk halo ida-ne'e vale esforsu. Ami hein katak eventu sira iha futuru sei hetan apoiu husi governu Timor-Leste mos".

Festival ida ne'e hanesan inisiu selebrasaun ba 50 anos timoroan nia resilensia iha Australia, sira hotu espera katak sei iha tan atividade ka programa seluk hanesan ne'e iha futuru atu halibur liu tan ema hotu, tantu timoroan, ema Australianu sira no komunidade etniku sira seluk hodi konhese no hatene liu tan timor nia kultura ne'ebe riku tebes. No koalia kona-ba jerasaun foun sira nia papel, Bernardo Duarte hatutan tan katak " sira apresia tebes kultura Timor nian, nia fiar katak sei buras nafatin iha futuru".