Raws li Anglicare Australia ib tsab ntawv cej luam tshiab tau qhia ces pom tau tias tau muaj tej tsev pheej yig uas tej neeg khwv tau nyiaj tsawg tsis tshua muaj peev xwm ntiav tau nyob lawm txawm tias tsoom fwv yeej tau tshwm nyiaj coj los pab tsim tej vaj tse.
Yog li ntawd tej koom haum txhawb nqa cov kev tsim vaj tse thiaj nqua hu kom tsoom fwv yuav tau nqes tes kiab los nrog xyuas thiab ntshwm nyiaj pab ntev ntxiv tuaj thiab siv tej tswv yim uas yuav coj los pab daws tau tej teeb meem tsis muaj vaj tse txaus rau tej neeg ntiav nyob los yog yuav tau nyob no.
Raws li tau muaj cov kev mus teeb txheeb txog cov vaj tse ntau tshaj 45,000 lub uas muaj ntiav rau tej neeg nyob lub 3 hlis ntuj xyoo 2024 no ces pom tau tias yeej yog tej uas tej neeg tsis tshua muaj peev xwm ntiav tau nyob lawm.
Tsab ntawv cej luam no kuj tseem txheeb tau ntxiv tias tsam no tseem tau them tus nqe ntiav tsev nyob kim tshaj qub ntxiv li $200 piv rau thaum tsis tau musj kab mob COVID-19 sib kis thiab.
Thoob teb chaws no ces yog tias koj yog cov neeg tau txais tsoom fwv cov nyiaj pab cuam Youth Allowance ces yeej tsis muaj peev xwm yuav ntiav tau tsev nyob los sis yog twb tsis muaj peev xwm yuav koom nrog lwm tus ntiav ib chav tsev nyob lawm.
Kasy Chambers uas yog tus coj lub koom haum Anglicare Australia hais tias 'txawm koj ua hauj lwm full time los yog tias koj tsuas khwv tau nyiaj minimum wage xwb ces yuav ua rau koj tsuas muaj cib fim tsawg dua 1 feem pua (0.6%) yuav ntiav tau tsev nyob.'
Michaela hais tias 'thaum kuv mus koom ntiav tsev nyob thiab lwm tus paub tias kev tseem yuav coj kuv tus ntxhais mus nrog kuv nyob thiab ces lawv cia li tsis kam kuv koom nrog lawv ntiav tsev nyob lawm. Uas yog tej yam tsis ncaj rau kuv tus ntxhais hlo li.'
Emma Greenhalgh uas yog tus coj lub koom haum National Shelter uas txhawb nqa kom tsim tau tej vaj tse ntau tuaj ntxiv rau tej neeg ntau millions tus uas khwv tau nyiaj tsawg nyob hais tias tau ua rau tej neeg haj yam txom nyem coob tuaj ntxiv lawm.
'Yog tias koj yog ib tug neeg khwv tau nyiaj tsawg tsis hais tseem hluas, khwv tau nyiaj nrab los yog laus li, ces yeej ntsib teeb meem nyuaj heev. Vim yuav tau siv tej nyiaj khwv tau los ntau heev ntiav tsev nyob thiab tej vaj tse ntiav tsev thiab yuav tsev los kim ces thiaj ua rau tej neeg tsis muaj peev xwm ntiav nyob los yog yuav tau nyob lawm,' raws li Greehalgh hais.
Kuj tseem muaj tej xov xwm ntawm xeev Victoria qhia tias muaj tej neeg uas yeej tseem muaj hauj lwm ua tshaj kaum tawm feem pua yeej tseem mus thov cov kev pab cuam uas pab rau tej neeg tsis muaj vaj tse nyob siv thiab.
Yog li Deborah Di Natalie uas yog tus coj lub koom haum Council to Homeless Persons thiaj hais tias 'lub tswv yim yuav daws tau tej teeb meem no ces yog tsim kom tau tsev ntau tuaj ntxiv rau tej neeg nyob.' Vim 9 tug poj niam ntawm 10 tus twg ces yeej mus thov cov kev pab cuam vim ntsib teeb meem kub ntxhov hauv cuab yig. Poj niam los yeej khwv tau nyiaj tsawg dua txiv neej thiab tseem yog cov yuav tau tu tej me nyuam thiab tej laus uas yog tej txheeb ze thiab.
Yog li ntawd nws thiaj xav kom 'tiv thaiv kom tsis txhob muaj tej teeb meem no zoo dua qhov twb cia muaj tej teeb meem no lawm es mam los daws.'
Thiab lub koom haum pab tej neeg tsis muaj faj tse nyob thiaj nqua hu kom tsoom fwv xeev Victoria tshwm nyiaj tshaj 5 millions los pab tej neeg them nqe tsev nyob rau nws cov nyiaj puag xyoo tshiab no.
Ces Kasy Chambers ntawm lub koom haum Anglicare Australia thiaj hais tias 'xav kom tsoom fwv maj mam tshem tsis txhob txo se rau tej neeg tsim vaj tse los ntiav rau lwm tus nyob lawm thiab yuav tau ua tib zoo xyuas kom tej vaj tse lawv tsim yog cov pheej yig uas tej neeg muaj peev xwm ntiav tau nyob. Tsis yog pheej yuav siv tswv yim txhawb nqa kom tej lagluam los yog tej neeg ntiag tug tsim vaj tse kaus xwb tab sis tsoom fwv yuav tsum tau nqes tes kiag los tsim tej vaj tse no.'
READ MORE
Puas yog nom tswv cov kev pab tej neeg yuav thawj lub tsev haj yam ua rau nqe tsev kim tuaj ntxiv
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
