Ntsiab lus tseem ceeb:
- ATO hais tias muaj neeg tshaj 1.5 million tus uas yeej ib txwm thov se tseem tsis tau thov se.
- Ces yog tias tsis xav ntawv thov se ua ntej hnub tim 31 lub 10 hli ntuj ces tej zaum kuj yuav raug nplua thiab.
- Tej zaum muaj ib txhia yeej tau mus sau tej ntawv thov se hauv online lawm, tab sis tseem yuav tau rov qab mus qhib yus phau account thiab xa tej ntaub ntawv no rau ATO.
Lub caij tsuas tshuav 1 limtiam rau cov kev xav ntawv thov se rau xyoo nyiaj txiaj 2023/24 no ces tseem muaj tej neeg Australia coob tshaj 1 million tus tseem tsis tau xa lawv tej ntaub ntawv thov se no.
Lub tuam chav tswj cov kev sau se Australian Taxation Office (ATO) thiaj tab tom nqua hu kom tej neeg uas tseem tsis tau thov se kav sij xa lawv tej ntaub ntawv mus qhia rau ATO .
Twb ze ze rau qhov yuav txog lub caij uas ATO pub tej neeg mus thov se lawm
Lub caij xa ntawv thov se kom yus tsis txhob raug nplua ces yog hnub tim 31 lub 10 hli ntuj.
Rob Thomson uas yog tus neeg ua hauj lwm pab ATO tus coj tau hais tias muaj tej neeg Australia tshaj 9.4 million tus twb tau xa ntawv thov se lawm.
Nws tau hais tias "ATO los yeej tau txais tej ntaub ntawv thov se ntau tuaj ntxiv yog xam ces ib hnub twg muaj tej neeg ntiag tug yuav laug txog 60,000 tus xa ntawv thov se rau ib hnub twg rau lub 10 hli ntuj no rau lub caij yuav tag sij hawm thov se. Qhov tseeb tiag ces lub hli no nkaus xwb yeej muaj tej neeg tshaj 1 million tus tau xa ntawv thov se rau peb lawm.''
Thiab tej neeg uas tsis xav ntawv mus ua ntej tab sij hawm thov ces yuav raug nplua.
Txawm li cas los kuj muaj peev xwm siv tej tax agent pab thov se rau yus tab sis yuav tsum tau mus teev zwm cov kev thov se no ua ntej hnub tim 31 lub 10 ntuj.
Tej neeg uas yus sau yus tej ntawv thov se kheej yam tsis tau txais kev pab ntawm tax agent yuav tsum xa tej ntawv thov se tsis pub dhau hnub tim 31 lub 10 hli ntuj. Source: Getty / LPETTET
Kav tsij sau thiab xa koj tej ntawv thov se
Raws li ATO hais ces yeej tseem muaj tej neeg Australia ntau tshaj 1.5 million uas ib txwm xa ntawv thov se kheej yam tsis tau txais kev pab ntawm lawv tej tax agents tseem tsis tau xa ntawv thov se.
Thomson thiaj xav rov qab hais rau tej neeg uas twb tau pib sau lawv tej ntawv thov se lawm tab sis pheej ncua kom kab tsij ''qhib lawv phau account ntawm lub App los yog myTax thiab sau kom tiav thiab nyem lub pob xa (rau ATO).''
Thomson tau hais tias "Tej neeg uas tseem tsis tau xa ntawv thov se tsis txhob ntshai los yog cov kev thov se no yeej ua tsis nyuaj. Tej neeg uas tsis ua dab tsi ntau yeej muaj peev xwm sau tau tej ntawv thov se rau lub caij yus rhaub ib lub pizza tsau khov kom sov zoo noj.''
Tej neeg uas khwv tau nyiaj tsawg uas yog xav thov kev pab cuam thov se rau lawv los yeej muaj peev xwm siv cov kev pab thov se hu ua Tax Help uas yeej muaj tej neeg ua hauj lwm yeem thaj uas muaj cai pab sau ntawv thov se pab tej neeg xa ntawv thov se rau lawv.
Lub tuam chav sau se (Australia Tax Office -ATO) yeej tau txais tej neeg tej ntawv xa thov se ntau tshaj 1 million tsab lub hli no lawm. Source: Getty / juanma hache
Yuav raug nplua nyiaj ntau npaum li cas yog tsis xa ntawv thov se?
Yog ib tug neeg twg pheej tos ntev npaum li cas tom qab hnub tim 31 lub 10 hli ntuj lawm ces tej zaum yuav ua rau tus neeg ntawd raug nplua nyiaj ntau tuaj ntxiv.
Txhua txhua 28 hnub twg tom qab tab sij hawm ua se lawm ces ib tug neeg uas tseem tsis tau xa ntawv thov se yuav raug nplua nyiaj $330, txhais tau tias yog koj ncua tsis xa ntawv thov se mus txog rau thaum xaus lub 11 hlis ntuj ces tej zaum koj yuav raug nplua txog $660.
Thiab yuav raug nplua hnyav tshaj plaws txog $1,650 vim tsis xa ntawv thov se raws sij hawm thov se.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
