Peter Dutton hais tias yog nws yeej kev xaiv tsa tsoom fwv teb chaws tshiab ua ntej lub 5 hlis ntuj xyoo 2025 no ces nws yuav tso cai rau zej tsoom tawm suab seb puas pom zoo kho cai kom muaj peev xwm muab tej neeg ua pej xeem rau ob lub teb chaws (Australia, thiab lwm lub teb chaws) uas ua txhaum cai xa rov qab thiab tsis pub ua pej xeem Australia, uas xyoo 2022 tsev hais plaub High Court tau txiav txim tias tsis pub tej nom muab tej neeg ua txhaum cai rho tsis pub ua pej xeem thiab yog tej nom tseem ua li no ces yuav yog ib cov kev ua txhaum Australia tej txhooj cai tswj haiv. Tab sis nws yeej tseem tsis tau qhia kom ntxaws tias yuav ua tej hauj lwm no li cas.
Txawm li cas los Michaelia Cash uas yog tus kws lij choj teb chaws ntawm lwm pab nom hais tias yuav tsis ua tej hauj lwm no thiab tsis muaj tej tswv yim ua tej hauj lwm no, tsuas yog ib lub tswv yim kawg uas tseem xav tias seb puas yuav ua xwb thiab.
George Brandis uas yog pab nom Liberal tus kws lij choj teb chaws dhau los yeej hais tias ''lub tswv yim tseem yuav coj los sab laj no yog ib lub tswv yim tsis zoo, thiab yuav ua rau tsev hais plaub High Court tsis muaj peev xwm ua tau hauj lwm ywj pheej.''
Adam Bandt uas yog tus coj pab nom Greens hais tias tej hauj lwm no qhia tau tias lwm pab nom teb chaws tsis muaj tswv yim yuav los daws tej teeb meem nuj nqes siv ua lub neej pab kom zej tsoom ua tau lub zoo neej ntxiv tuaj.
Ua ke no los Associate Professor Rayner Thwaites ntawm lub tuam chav qhia cai lij choj ntawm tsev kawm qib siab University of Sydney hais tias ''Yog tseem hloov tej txhooj cai tswj haiv no thiab ces yuav ua rau tej tsev hais plaub tsis tau txais kev pov puag lawm.''
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, koom tau ntxiv ntawm , , , los yog . Download thiab mloog , caum Pod follw los yog lwm cov podcasts platforms (, ).
