Ntsiab lus tseem ceeb:
- Cov kev koom ntiav ib lub tsev nyob yog ib tse neeg uas tej neeg ntiag tug tsis sib paub los koom ntiav ib lub tsev nyob ua ke.
- Vim muaj ntau yam nqe siv ua lub neej kim tuaj ntxiv ces thiaj tau yuam kom tej neeg coob heev los koom ntiav tsev nyob ua ke.
- Yog tej yam tseem ceeb yauv tau txheeb kom yog lub tsev ntiav raug cai thiab txheeb kom paub txog tus neeg uas yuav ntiav tsev rau yus nyob tias seb yog leej twg.
Lub caij uas tseem muaj tej nuj nqes siv ua lub neej kim tuaj ntxiv no, tau ua rau muaj tej neeg coob tuaj ntxiv tab tom tig mus sib koom ntiav tsev nyob lawm. Lub koom haum Australian Bureau of Statistics (ABS) teev lub ntsiab lus ntawm lo lus 'a shared house' tias yog ib tse neeg uas muaj ob tug neeg los yog coob tshaj ntawd uas tej neeg ntiag tug no tsis sib txheeb, hnoob nyoog 15 xyoos los yog siab tshaj ntawd mus koom nyob ua ke.
Claudia Conley ces yog tus manager ntawm lub koom haum Flatmates Community hauv online pab pab kom tej neeg ntiag tug uas xav koom ntiav tsev nrog lwm tus kom sib cuag tau.
Nws hais tias “Ib lub tsev uas koom nyob ua ke ces yog lub tsev uas muaj tej neeg tsis sib txheeb (tsis sib paub) thaib tsis yog ib nkawm niam txiv los koom nyob ua ke ntawm tib lub tsev, thiab sib pab them tej nqe ntiav tsev, thiab ntau yam nqe ntawm lub tsev ntawd.''
Tsis yog tib co hluas nkaus xwb uas thiaj yog tej neeg koom ntiav tsev nyob ua ke. Credit: Klaus Vedfelt/Getty Images
Nws hais tias “Yeej tseem muaj tej kev xav tias tsuas yog tej hluas hnoob nyoog qes dua 35 xyoos thiaj yog tej neeg koom ntiav tsev nyob ua ke xwb, tab sis yeej muaj tej hluas no tsawg dua 10 feem pua ntiav tsev nyog tsaib no lawm, thiab peb kuj pom tias kuj tau muaj tej neg hnoob nyoog tshaj 55 xyoos ntau tuaj ntxiv txog li 10 feem pua yog cov uas tau koom ntiav tsev nyob ua ke ntau tuaj ntxiv lawm thiab, vim rau qhov tej tswv tsev uas muaj tej chav tsev seem pheej ntiav rau lwm tus koom nyob kom tau nyiaj los pab them tej nqe tsev uas tau them tus kab theem paj kim tuaj ntxiv uas peb tau pom tsis ntev los no.''
Txom nyem nyiaj siv
Raws li Claudia hais ces vim tej nqe siv ua lub neej uas tau kim tuaj ntxiv tau yuam kom tej neeg Australia nrhiav tswv yim los pab kom tsis txhob tau them nqe kim thiab tau nrhiav lwm txoj xub ke los pab tswj lawv cov kev siv nyiaj txiaj. Thiab vim tias kab theem paj uas tau kim tuaj ntxiv, ces thiaj ua rau muaj neeg nyiam siv lub tswv yim koom ntiav tsev nyob ua ke ntau tuaj ntxiv rau lub caij 2 xyoos dhau los no lawm.
Nws hais tias “Vim tej nuj nqes siv ua lub neej thiab tej nqe ntiav tsev uas kim tuaj ntxiv no thiaj ua rau tej neeg mus koom ntiav tsev nyob ua ke ntau coob heev tuaj ntxiv rau lub caij ob xyoos dhau los no lawm. Txawm tis cov kev koom nyob ntawm ib lub tsev yeej tseem kim rau tej neeg yog tham txog tej nqe yuav tau them, tab sis kuj yog tej nqe pheej yig dua yog piv rau tej nqe ntiav tsev uas ib txwm ntiav. Thiab qhov tseeb tiag ces tej neeg uas cuam tshuam nrog peb lub koom haum txog li 85 feem pua yeej nyob rau tej tsev koom ntiav vim cuam tshuam txog nyiaj txiaj thiab yuav pab kom lawv txuag tau nyiaj coj mus yuav ib lub tsev rau lawv nyob los sis vim lawv nyiam tej cwj pwm ua lub neej li no.”
Rising cost of living means that more people are seeking to share a house with others. Credit: Rafael Ben-Ari/Getty Images
Verindar Kaindal uas yog ib tug kws paub zoo txog tej neeg ntiav tsev nyob thiab tej tsev ntiav rau lwm tus nyob hais tias tej neeg tsiv teb tsaws chaw tuaj tshiab yeej ntsib teeb meem nyuaj ntau yam tsis muaj peev xwm yuav ntiav tau tsev nyob ces thiaj ua rau lawv yuav tau tib mus koom nrog lwm tus ntiav tsev nyob ua ke.
Mr Kaindal hais ntxiv tias “Yog tias lawv tsis muaj keeb kwm ntiav tsev nyob [ces lawv yeej tsis muaj peev xwm nrhiav tau ib lub tsev ntiav nyob li] ces lawv thiaj yuav tau koom nrog lwm tus ntiav tsev nyob ua ke,''
Nws kuj hais ntxiv tias cov kev muaj tsev tsis txaus raws li tej neeg xav ntiav nyog kuj tau ua rau cov kev koom ntiav tsev nyob yog ib txoj xub ke uas muaj peev xwm nrhiav tau ib qho chaw nyob dua rau lub caij uas tej nqe ntiav tsev kim.
“Yog tias peb coj ib lub tsev mus qhia rau tej neeg tias yuav ntiav rau tej neeg nyob, ces thawj limtiam xwb yeej ib txwm muaj tej neeg txog li 40 mus rau 100 leej mus saib lawm, ces thiaj yog tej yam nyuaj heev rau tej neeg tsiv teb tsaws chaw tuaj tshiab thiab tej neeg uas tseem tab tom yuav muag lawv tej tsev thiab xav mus ntiav tsev nyob tab sis tsis muaj pev xwm ntiav tau tsev nyob.”
Kuj yog tej yam nyuaj tshaj qub ntxiv rau cov kev yuav koom ntiav tsev nyob nrog lwm tus vim pheej muaj tej neeg phem siv tswv yim los ntxias dag tej neeg uas xav ntiav tsev nyob thiab.
Cov kev koom nyob ntawm tej tsev uas tej neeg ib txwm ntiav nyob
Mr Kaindal tshab txhais tias tej neeg ntiav tsev uas twb yeej ntiav tau ib lub tsev nyob lawm kuj muaj peev xwm ntiav tej chav tsev uas seem rau lwm tus neeg koom nrog lawv nyob tau thiab, tab sis yuav tsum xub tau txais kev tso cai ntawm tus tswv tsev tso.
“Tej zaum kuj yuav yog ib tug neeg ntiav lub tsev ntawd nyob xwb los sis tej zaum kuj yuav yog ntau tus neeg koom ntiav lub tsev ntawd yog cov uas yuav tsum tau them tej nqe ntiav lub tsev ntawd kom raws sij hawm thiab yog cov yuav tau saib xyuas txhua yam thiab npaj txhua yam. Ces tus neeg ntawd/tej neeg ntawd tsis hais yog poj niam los txiv neej li thiaj yog cov yuav tau mus nrog tej neeg ua hauj lwm ntiav tsev tham.”
Thaum uas ib tug tswv tsev koom nrog lwm tus neeg ntiav lub tsev ntawd nyob ua ke, ces lawv yog tus uas yuav tau saib xyuas txhua tsam yam.
Mr Kaindal hais tias “Yuav tsum xyuas kom nyias muaj nyias ib qho chaw ua noj, muaj chav dej siv, tab sis yeej muaj qee cov kev txwv tias pub tu lub tsev ntawd li cas xwb thiab. Cov kev sib om zoo ntawm ob tog li no thiaj yuav pab kom muaj peev xwm nyob tau ntawm lub tsev ntawd.”
Cov kev daws tej kev tsis haum xeeb
Cov ekv daws kiag tej kev tsis sib haum xeeb kom sai yog tej yam tseem ceeb yuav pab kom txhua tus muaj feem ua tau lub neej haum xeeb thiab kaj siab ntawm lub tsev ntawd. Ms Conley taw qhia rau tej neeg ntiav tsev thiab tej tswv tsev kom yuav tsum teeb txhua yam uas tau muaj cov kev pom zoo ntawm ob tog ua ntaub ntawv tseg cia kom thiaj tsis muaj kev sib cav sib ceg.
“Thiaj xav txhawb nqa kom ob tog yuav tau sau txhua yam uas uas pom zoo ua ntaub ntawv tseg, tsis hais seb yuav ntiav lub tsev ntawd nyob ntev npaum li cas? Yuav them nqe ntiav npaum li cas? Yuav ua li cas rau tej nyiaj bond yog thaum muaj tej yam khoom dab tsi me me puas lawm, ces thiaj xav kom teev tej xwm txheej no ua ntaub ntawv tseg thiab ob tog yuav tau kos mem tes rau khaws cia.”
Nkawm niam txib paub tab uas kub siab hlo sab laj nrog tej kws paub daws tej teeb meem ntiav tsev. Credit: JohnnyGreig/Getty Images
Cov kev ntxias dag cuam tshuam txog cov kev koom ntiav tsev
Cov kev koom ntiav tsev nrog lwm tus nyob kuj yog tej yam nyuaj heev, hais tsi ntsees rau thaum cuam tshuam nrog tej neeg phem uas pheej txhob txwm xav los ntxias dag tej neeg uas xav ntiav tsev nyob.
Ms Conley hais tias yeej muaj tej xwm txheej dag neeg no thiab tab sis peb kuj muaj peev xwm lug thiab.
“Yog tias yus nrog ib tug twg tham los yog pheej muaj ib tug twg pheej xa messages rau yus hauv online thiab lawv pheej hais tias muaj ib lub tsev penthouse uas zoo nkuaj heev ntawm Melbourne thiab yeej pom tej nroog, thiab yeej muaj tej rooj tog txij zog hauv lub tsev ntawd. Tsis tas li ntawd los kuj muaj ntau yam nyob ze uas yooj yim rau yus, thiab yeej muaj tej twj siv ntau yam, thiab tsuas sau tus nqe ntiav tsev $200 rau ib limtiam twg xwb. Ces tej no zoo li yeej tsis tshua txaus ntseeg thiab tej zaum koj yuav yog ib co kev ntxias dag xwb.”
Ces qhov zoo tshaj plaws thiaj xav kom yuav tau ceev faj thaum cuam tshuam nrog tej neeg ntiag tug uas pheej coj tej goods los yog services los thab yus hauv online yam yus tsis muaj peev xwm yuav mus ntsib tau kiag tus neeg ntawd tiag.
Nws hais tias “Yog tias ib tug twg pheej siv ntau cov kev yeb tias vim li cas thiaj tsis muaj peev xwm mus ntsib tau lawv, ces tej zaum kuj yuav yog ib cov kev ntxias dag, thiab yog tej yam uas yuav tau ceev faj txog.”
Thiaj yog tej yam tseem ceeb uas yuav tau ua tib zoo txheeb kom lub tsev ntiav ntawv yog lub tsev muaj tseeb tiag coj los ntiav rau ib tug twg nyob, thiab txheeb tus neeg uas pheej nrog yus tham tias yuav muag tej khoom los yog xav ntiav tsev rau yus nyob seb yog leej twg tiag, hais tsi ntsees rau tej neeg uas tseem tab tom npaj yuav tuaj rau teb chaws Australia.
“Tej no kuj yuav yog tej yam nyuaj heev thiab vim yus yeej xav npaj tej chaw nyob ua ntej yus yuav tuaj txog. Tab sis raws li peb xav lawm, ces yog ib txais kev nyab xeeb tshaj plaws rau yus uas yus muaj peev xwm ua tau coj los pab tiv thaiv kom yus tsis txhob raug dag.”
Subscribe thiab mloog tej xov xwm Australia Explained kaw ua suab kom thiaj paub txog ntau yam xov xwm tseem ceeb thiab tej lus taw qhia uas yuav pab koj ua tau koj lub neej tshiab ntawm teb chaws Australia.
Yog tias koj muaj ib yam lus nug dab tsi los yog muaj ib co tswv yim txog ib yam dab tsi? Ces sau ntawv tuaj rau peb raws tus email no:
Mloog tau hnub zwj Teeb (Thursday) 6 pm, hnub zwj Hnub (Sunday) 11am, los yog koom tau ntxiv ntawm , , thiab . Downloadthiab caum
